Tâ tënë na ndo ti guengo na yayu ayeke so wa?
BEKU ti guengo na yayu agbu bê ti azo mingi! A-Musulman, aHindou, aBouddhiste, amembre ti a-eglize so atene ani yeke ti Christ, na même azo so aye ti gue na da ti Nzapa pëpe amä na bê so fini ayeke na peko ti kuâ, me lege so ala yeke fa na ni ayeke nde nde. Na yâ ti li ti azo mingi, yayu ayeke mbeni pendere ndo ti duti nga ndo ti ngia so azo ayeke wu tere ti ala dä na peko ti apasi so ala bâ, na ala wara tere na “azo ti ala so ague kâ kozoni.” Me, ti mingi ti azo, ngbene mato so ayeke tâ tënë: Zo kue aye ti gue na yayu, me zo oko aye ti kui pëpe. Ngbanga ti nyen?
Tongana a sara e ti tene e gue na yayu na peko ti kuâ ti e, ka azo mingi ayeke ku kungo ti kui pëpe? Legeoko tongana ti so kete molenge ayeke ku ti kono hio wala amaseka ayeke ku ti sara mariage. Me mingi ti azo aye ti kui pëpe.
Atâa so kue, awafango tënë ti nzapa atene so yayu ayeke ndo so a leke awe ti tene e gue e duti dä na peko ti kete ngoi so e sara na ndo ti sese. Theodore McCarrick, ngbene Kota bua ti gbata ti Washington (na Amerika), atene: “A sara e ndali ti fini so pëpe. A sara e ndali ti yayu.” Ted Haggard, mokonzi ti bungbi ti awafango tënë ti nzapa ti Amerika, atene mara ti tënë so, lo tene: “Ndani so zo ayeke na fini ayeke ti voro Nzapa na ti gue na yayu . . . ngbanga ti so yayu ayeke ndo ti e.”
Mingi ni azo kue so amä na bê na guengo na yayu na peko ti kuâ ahinga tâ tënë na ndo ni nzoni pëpe. George Barna, mokonzi ti mbeni ndokua so ayeke hunda bibe ti azo na ndo ti atënë ti Nzapa, abâ so azo mingi ayeda so “bango ndo ti azo na ndo ti fini nga na tënë ti fini na peko ti kuâ aluti na ndo ti atënë so ala wara na ando nde nde tongana alimon, amozoko na abuku.” Na kodoro ti Floride, mbeni pasteur ti aÉpiscopalien atene: “E hinga ye oko na ndo ti yayu pëpe, ye oko so e hinga ayeke so yayu ayeke ndo so Nzapa ayeke dä.”
Ye oko, tënë ti yayu ayeke mbeni kota tënë na yâ ti Bible. Ti Bible, yayu ayeke tongana nyen? A sara zo ti duti na yayu? Tongana biani azo ague na yayu, ala yeke gue ti sara nyen kâ?
[Kete tënë na lembeti 3]
Ngbanga ti nyen azo mingi aye ti gue na yayu, me mingi ti ala aye ti kui pëpe?