Gango nzoni na yâ ti dutingo so ayeke nzoni ahon atanga ni kue!
“Atâa tongana e duti na fini wala e kui, e yeke ti Jéhovah.”—AROM. 14:8.
1. Ye wa Jésus afa na ndo ti nzoni lege ti dutingo na fini so ahon atanga ni kue?
JÉHOVAH aye si e duti na fini so ayeke nzoni ahon atanga ni kue. Lege so azo ayeke duti na ni alingbi ti duti nde nde, me gi oko la ayeke nzoni ahon atanga ni kue. Nzoni lege ti dutingo na fini so ahon atanga ni kue ayeke ti sara si fini ti e ague oko na Mbeti ti Nzapa na ti manda ye na mbage ti Molenge ti Nzapa, Jésus Christ. Jésus afa na adisciple ti lo ti voro Nzapa na yingo nga na tâ tënë, na lo mû na ala kua ti sara adisciple (Mat. 28:19, 20; Jean 4:24). Tongana fini ti e ague oko na aye so Jésus afa, e yeke mû ngia na Jéhovah na e yeke wara tënë nzoni ti lo.
2. Na ngoi ti akozo Chrétien, azo mingi so amä tënë ti Royaume asara ye tongana nyen? Ti duti ti “Lege ni” aye ti tene nyen?
2 Tongana ala so “ayeke nduru ti yeda na tënë ni ti wara fini ti lakue lakue” amä na bê na amû batême, a yeke na lege ni ti tene e tene na ala, “Gango nzoni na yâ ti dutingo so ayeke nzoni ahon atanga ni kue!” (Kus. 13:48). Na ngoi ti akozo Chrétien, azo saki mingi ti amara nde nde ayeda na tâ tënë na ala fa na lê ti azo dandara na lege ti batême so ala mû tere ti ala na Nzapa awe (Kus. 2:41). Akozo disciple so ayeke ti “Lege ni”. (Kus. 9:2; 19:23). A tene ala yeke ti “Lege ni” ngbanga ti so azo so aga adisciple ti Christ ayeda na mbeni lege ti fini so aluti na ndo ti mabe na Jésus Christ nga na mungo tapande ti lo.—1 Pi. 2:21.
3. Ngbanga ti nyen azo ti Jéhovah awara batême? Azo oke si a batize ala na yâ ti ngu bale-oko so ahon?
3 Kua ti sarango adisciple ague na loro mingi na alango ti nda ni so, na a yeke sara kusala so fadeso na yâ ti akodoro ahon 230. Na yâ ti angu bale-oko so ahon, azo ahon 2 700 000 ayeda ti sara na Jéhovah na ala mû batême ti fa so ala mû tere ti ala na Nzapa awe. So ti tene, yenga oko oko azo 5 000 na ndo ni si awara batême! Batême so ala yeda ti wara ni aluti na ndo ti ndoyengo Nzapa, hingango ye na ndo ti Mbeti ti Nzapa, nga mango na bê na ye so ala fa. Batême ayeke mbeni kpengba ye na yâ ti fini ti e, teti a yeke tongo nda ti lengo mbeni kpengba songo na Jéhovah. A fa nga na gigi so e zia bê ti e kue na lo ti mû maboko na e ti sara na lo be-ta-zo, tongana ti so lo sara na awakua ti lo ti giriri ti tambela na lege ti lo.—És. 30:21.
A lingbi mo wara batême ngbanga ti nyen?
4, 5. Fa ambeni ye ti nzoni so mungo batême aga na ni.
4 Peut-être mo hinga ye na ndo ti Nzapa, mo changé aye mingi na yâ ti fini ti mo, na fadeso mo ga mbeni wafango tënë so ade ti wara batême pëpe. Mo lingbi na gonda teti so mo gue na li ni. Me, mo mû tere ti mo na Nzapa na yâ ti sambela awe na mo yeke ku ti wara batême? Na lege ti ye so mo manda na yâ ti Bible, peut-être mo hinga awe so a yeke nzoni mo mû fini ti mo ti sepela na Jéhovah, me pëpe ti sara ye so bê ti mo aye wala ti gi na amosoro. (Diko Psaume 148:11-13; Luc 12:15.) Tongaso, ambeni ye ti nzoni so zo ayeke wara na mungo batême ayeke so wa?
5 Ti mo so mo yeke Chrétien so amû tere na Nzapa awe, mbeni ye ti hon so na yâ ti fini ti mo ayeke pëpe. Mo yeke duti ande na ngia ngbanga ti so mo yeke sara ye so Nzapa aye (aRom. 12:1, 2). Yingo vulu ti Jéhovah ayeke sara si mo yeke lë ambage ti lengo ti yingo ti Nzapa tongana siriri na mabe (aGal. 5:22, 23). Fade Nzapa ayeke kiri tënë na asambela ti mo na lo yeke iri tënë nzoni na ndo ti angangu so mo yeke sara ti tene fini ti mo ague oko na Mbeti ti lo. Mo yeke wara ande ngia mingi na yâ ti kusala ti mo, na dutingo ti mo so amû ngia na Nzapa ayeke kpengba beku ti fini ti lakue lakue so mo yeke na ni. Na ndo ni, mungo tere ti mo na Nzapa na warango batême ayeke fa ande so mo ye biani ti ga Témoin ti Jéhovah.—És. 43:10-12.
6. Batême ti e afa nyen?
6 Na mungo tere ti e na Nzapa nga na warango batême, e fa polele so e yeke ti Jéhovah. Bazengele Paul atene: “Biani, mbeni zo na popo ti e ayeke duti na fini gi ndali ti lo wani pëpe, nga mbeni zo na popo ti e ayeke kui gi ndali ti lo wani pëpe. Atâa tongana e duti na fini, e duti na fini ndali ti Jéhovah, nga atâa e kui, e kui ndali ti Jéhovah. Tongaso, atâa tongana e duti na fini wala e kui, e yeke ti Jéhovah.” (aRom. 14:7, 8). Nzapa ane e mingi na mungo na e liberté ti soro ye so bê ti e aye. Tongana e soro biani ti duti na mara ti fini so ndali ti so e ndoye Nzapa, e yeke zia ngia na bê ti lo (aProv. 27:11). Batême ti e afa kozoni kue so e mû tere ti e na Nzapa awe, nga na mbage a fa na gigi so e mû Jéhovah tongana Mokonzi ti e. A fa so e yeke na mbage ti lo na yâ ti tënë so andu droit ti lo ti komande dunia kue (Kus. 5:29, 32). Jéhovah nga kue ayeke na mbage ti e. (Diko Psaume 118:6.) Batême azi nga lege na e ti wara aye ti nzoni mingi na lege ti yingo laso nga kekereke.
A iri tënë nzoni na ndo ti azo so awara batême na lege ti sewa ti aita
7-9. (a) Dengo bê wa Jésus amû na azo so azia ye kue na amû peko ti lo? (b) Zendo so Jésus amû na mbeti ti Marc 10:29, 30 aga tâ tënë laso tongana nyen?
7 Bazengele Pierre atene na Jésus: “Bâ, e dö aye ti e kue e zia na e mû peko ti mo. E yeke wara ande nyen biani?” (Mat. 19:27). Pierre aye ti hinga ye so ayeke ku ande lo na ambeni mba ti lo so ayeke nga adisciple ti Jésus. Ti mû ngoi ti ala kue na kusala ti fango tënë ti Royaume, ala dö aye ti ala mingi ala zia ndali ni (Mat. 4:18-22). Dengo bê wa ala wara na mbage ti Jésus?
8 Na mbeti ti Marc e wara oko tënë so dä. Jésus afa so adisciple ti lo ayeke duti ande na yâ ti mbeni sewa ti aita na lege ti yingo. Lo tene: “Zo kue so azia da ti lo, aita ti lo ti koli, aita ti lo ti wali, mama ti lo, babâ ti lo, amolenge ti lo na ayaka ti lo ngbanga ti mbi nga ngbanga ti nzoni tënë, fade lo yeke wara na yâ ti ngoi ti fadeso ada, aita ti koli, aita ti wali, amama, amolenge na ayaka. Aye so kue lo yeke wara ni fani ngbangbo oko, nga a yeke sara aye ti ngangu na lo na ndo ni. Me na yâ ti aye ti ngoi so ayeke ga, lo yeke wara ande fini ti lakue lakue.” (Marc 10:29, 30). Akozo Chrétien tongana Lydie, Aquila, Priscille na Gaïus ayeke na popo ti ala so amû “ada”, na ala ga ‘aita ti koli, aita ti wali na amama’ teti amba ti ala awamabe, tongana ti so Jésus atene ândö na ala.—Kus. 16:14, 15; 18:2-4; 3 Jean 1, 5-8.
9 Tënë so Jésus atene aga biani tâ tënë laso. “Ayaka” so adisciple ti lo azia na peko ti ala andu ambeni ye so azo mingi ayeke nduru ti zia tongaso si ala pusu akusala ti Royaume na dawa na yâ ti akodoro nde nde. Na popo ti azo mingi so a yeke wara amissionnaire, amembre ti sewa ti Béthel, awakua so asara kua na kodoro wande ti leke ada so ayeke sara kusala ti Jéhovah dä nga na ambeni mingi. Aita-koli na aita-wali mingi azia ada ti ala ti sara si fini ti ala ayapu, na ye so amû ngia na e mingi ti mä tënë ti ye so asi na ala, so afa tongana nyen Jéhovah abata ala na tongana nyen sarango kusala ti lo asara si ala duti na ngia (Kus. 20:35). Na ndo ni, awakua ti Jéhovah kue so awara batême awe so ayeke na yâ ti bungbi ti aita so amû ndo ti sese kue alingbi ti wara aye ti nzoni so aga na lege ti ‘gingo royaume ti Nzapa na mbilimbili ti lo kozoni’.—Mat. 6:33.
Duti na siriri na “ndo ti lingo”
10, 11. “Ndo ti lingo ti Lo Ti Nduzu Ahon Kue” ayeke nyen? E lingbi ti si dä tongana nyen?
10 Mungo tere na Nzapa nga na batême ague na zo ti wara mbeni ye ti nzoni: pasa ti duti na “ndo ti lingo ti Lo Ti Nduzu Ahon Kue”. (Diko Psaume 91:1.) A yeke fä ti mbeni ndo so siriri na nzoni dutingo ayeke dä, mbeni dutingo so abata zo yamba na asioni ye na lege ti yingo. A yeke “ndo ti lingo” ngbanga ti so azo so abâ ndo na lê ti yingo pëpe na azia bê ti ala na Nzapa pëpe ahinga ni pëpe. Na dutingo na fini so ague oko na mungo tere ti e so e mû na Nzapa nga na ziango bê ti e kue na Jéhovah, mo bâ mo tene e yeke tene na lo: ‘Mo yeke Ndo Ti Bata Tere ti mbi na Gbada Ti Bira ti mbi; Nzapa ti mbi, Lo so mbi zia bê ti mbi na Lo.’ (Ps. 91:2). Jéhovah aga ndo so e duti dä nzoni (Ps. 91:9). Mbeni ndo ti hon so ayeke dä?
11 Ti si na “ndo ti lingo” ti Jéhovah aye ti tene nga so lo iri tënë nzoni na ndo ti e na mungo na e pasa ti lë mbeni songo na lo. Ye so ato nda ni na mungo tere ti e so e mû na lo nga na batême. Na pekoni, e kpengba songo na Nzapa na gango nduru na lo na lege ti mandango Bible, sambela so e sara na bê ti e kue nga na mango yanga ti lo na yâ ti ye kue (Jacq. 4:8). Zo oko ayeke nduru na Jéhovah ahon Jésus pëpe, na ziango bê so lo zia na Wasarango ye ayengi lâ oko pëpe (Jean 8:29). Tongaso, zia e dë kite lâ oko pëpe na ndo ti ngangu ti Jéhovah nga na nzara so lo yeke na ni ti mû maboko na e si e sara ye alingbi na yanga so e mû na lo (Zo-ti. 5:4). Aye so Nzapa aleke na lege ti yingo teti azo ti lo afa biani so lo ye e na lo ye si e voro lo nzoni.
E bâ na nene ni paradis ti yingo
12, 13. (a) Paradis ti yingo ayeke nyen? (b) Tongana nyen e lingbi ti mû maboko na afini zo?
12 Mungo tere ti e na Nzapa nga na batême azi lege nga na e ti duti na yâ ti paradis ti yingo so Nzapa airi tënë nzoni na ndo ni. A yeke gi oko ndo so azo so ayeke na siriri na Jéhovah Nzapa nga ayeke na siriri na amba ti ala awamabe ayeke dä (Ps. 29:11; És. 54:13). Mbeni ye oko na yâ ti dunia so ti lingbi na paradis ti e ti yingo ayeke dä pëpe. Ye so ayeke polele na ngoi ti akota bungbi so abungbi aita ti kodoro nde nde, so aita-koli na aita-wali ti akodoro nde nde, ayanga nde nde na ti amara nde nde abungbi ndo oko na yâ ti siriri, mango tere na ala ye tere tongana aita.
13 Paradis ti yingo so e yeke na yâ ni ayeke ti lo nde na dunia ti laso, so aye ti vundu ayeke na yâ ni. (Diko Ésaïe 65:13, 14.) Na fango tënë ti Royaume, e yeke na pasa ti gue na tisango ndo ti lï na yâ ti paradis ti yingo na azo. Ti mû maboko na afini zo so ayeke na yâ ti congrégation ti fa tënë na lege ni ayeke nga mbeni lege ti wara tënë nzoni. Tongana a-ancien ahunda na e ti sara ni, e lingbi ti wara ye ti nzoni na mungo maboko na ambeni fini zo, tongana ti so Aquila na Priscille “azi nda ti lege ti Nzapa na [Apollos] nzoni mingi ahon ti kozo”.—Kus. 18:24-26.
Ngbâ ti manda ye na mbage ti Jésus
14, 15. Ngbanga ti nyen e ngbâ ti manda ye na mbage ti Jésus?
14 A yeke senge pëpe si e ngbâ ti manda ye na mbage ti Jésus. Kozo ti tene lo ga na sese, Jésus na Babâ ti lo asara kusala teti angu mingi (aProv. 8:22, 30). Lo hinga so tâ nzoni lege ti duti na fini ayeke ti sara na Nzapa na ti fa tënë ti témoin na ndo ti tâ tënë (Jean 18:37). Ti Jésus, a yeke polele so mbeni lege ti dutingo na fini so ayeke nde na so aluti na ndo ti kion ayeke ninga pëpe. Lo hinga so fade ngangu tara ayeke si na lo na a yeke fâ lo (Mat. 20:18, 19; aHéb. 4:15). Teti lo yeke tapande ti e, lo fa na e tongana nyen ti ngbâ be-ta-zo.
15 Kete na peko ti so Jésus awara batême, Satan atara lo ti tene lo zia lege ti duti na fini so ayeke nzoni ahon atanga ni, me lo tara gbä (Mat. 4:1-11). Aye so afa na e so atâa ye wa Satan asara, e lingbi ti ngbâ be-ta-zo. Peut-être lo yeke zia lê ti lo mingi na ndo ti azo so aga nduru ti wara batême lo yeke sara nga legeoko na ala so awara batême fini fini (1 Pi. 5:8). E lingbi ti wara kangango lege na mbage ti asewa ti e so amä asioni tënë na ndo ti aTémoin ti Jéhovah, na ala bâ atene sioni lege la e yeke mû so. Ye oko, atara tongaso amû lege na e ti fa anzoni sarango ye ti aChrétien tongana nengo zo na sarango ye na ndara, na ngoi so e yeke kiri tënë na ala na e yeke fa tënë ti témoin (1 Pi. 3:15). Ni la, aye so asi na e alingbi ti sara ye ti nzoni na ndo ti azo so ayeke mä e.—1 Tim. 4:16.
Gbu fini so ayeke nzoni ahon atanga ni kue ngangu!
16, 17. (a) Akota ye ota wa so a hunda na zo ti sara ti ngbâ na fini e wara ni na Deutéronome 30:19, 20? (b) Tongana nyen Jésus, Jean nga na Paul ayeda na tënë ti Moïse so?
16 Ngu 1500 kozo si Jésus aga na ndo ti sese, Moïse ahunda na azo ti Israël ti soro tâ nzoni lege ti fini so ayeke na gbele ti ala. Lo tene: “Laso mbi iri yayu na sese ti ga atémoin ti ke i, mbi zia na gbele mo fini na kui, nzoye na zonga; tongaso mo kamata fini, si mo ngbâ na fini, mo na amolenge ti mo; mo ndoye L’Éternel Nzapa ti mo, mo mä yanga ti Lo, na mo zia bê ti mo na Lo.” (Deut. 30:19, 20). Israël aduti be-ta-zo na Nzapa pëpe, me akota ye ota so a hunda na zo ti sara ti ngbâ na fini so Moïse asara tënë ni achangé pëpe. Jésus na ambeni zo akiri asara tënë ti aye so.
17 Kozoni, ‘e ndoye Jéhovah Nzapa ti e’. E yeke fa so e ndoye Nzapa na sarango ye alingbi na lege ti lo so ayeke mbilimbili (Mat. 22:37). Use ni, ‘e mä yanga ti Jéhovah’ na mandango Mbeti ti Nzapa nga na batango acommandement ti lo (1 Jean 5:3). Ye so ahunda ti tene e gue na abungbi lakue, kâ la a yeke sara lisoro na ndo ti Bible (aHéb. 10:23-25). Ota ni, ‘e zia bê ti e na Jéhovah’. Atâa ye wa asi na e, zia e duti lakue na mabe na Nzapa nga e mû peko ti Molenge ti lo.—2 aCor. 4:16-18.
18. (a) Tongana nyen Tour ti Ba Ndo afa tâ tënë na ngu 1914? (b) Tënë ti bê ti e ayeke tongana nyen tongana e bâ lumière ti tâ tënë laso?
18 Ti duti na fini so ague oko na tâ tënë so ayeke na yâ ti Bible aga na aye ti nzoni na e biani! Na ngu 1914, kpengba tënë so asigigi na yâ ti Tour ti Ba Ndo, a tene: “E yeke azo so Nzapa airi tënë nzoni na ndo ti e pëpe? e yeke na ngia pëpe? Nzapa ti e ayeke be-ta-zo pëpe? Tongana mbeni zo ahinga mbeni ye so ayeke nzoni mingi, zia lo mû ni. Tongana mbeni zo na popo ti ala awara mbeni nzoni ye, e ku ti tene lo fa ni na e. Mbeni ye ti nzoni mingi so e hinga ahon ti so e wara na yâ ti Mbeti ti Nzapa ayeke pëpe. . . . A yeke ngangu ti fa tënë ti siriri, ngia nga na nzoni ye so hingango tâ Nzapa aga na ni na yâ ti bê ti e nga na yâ ti fini ti e. Tënë ti Ndara ti Nzapa, ti Mbilimbili ti lo, ti Ngangu ti lo nga na ti Ndoye ti lo akaï nzara ti bibe na ti bê ti e kue. E gi ni na mbeni ndo nde pëpe. Ye oko so e ye ayeke gi ti hinga ye na ndo ti Nzapa mingi ahon ti kozo.” (Tour ti Ba Ndo ti 15 décembre 1914, lembeti 377-378 ti Anglais). Singila ti e teti lumière ti yingo nga na tâ tënë achangé pëpe. Biani, fadeso e yeke na kota nda ti tënë ti duti na ngia so e “tambela na yâ lumière ti L’Éternel.”—És. 2:5; Ps. 43:3; aProv. 4:18.
19. A yeke nzoni ala so alingbi ti wara batême awe aku pëpe ngbanga ti nyen?
19 Tongana mo ye ti “tambela na yâ lumière ti L’Éternel” me ade mo mû tere ti mo na Nzapa pëpe, wala ade mo wara batême pëpe, ku pëpe. Sara ye kue so Bible ahunda ti wara batême: oko lege ti fa singila ti mo teti ye so Nzapa na Christ asara teti e. Mû na Jéhovah ye ti mo so mo bâ na nene ni mingi: fini ti mo. Fa so mo ye ti sara ye so Nzapa aye na mungo peko ti Molenge ti lo (2 aCor. 5:14, 15). Biani, so ayeke dutingo na fini so ayeke nzoni ahon atanga ni kue!
Mo yeke kiri tënë tongana nyen?
• Batême ti e ayeke fä ti nyen?
• Mungo tere na Nzapa nga na batême aga na aye ti nzoni wa?
• Ngbanga ti nyen ti manda ye na mbage ti Jésus ayeke kota ye?
• Ye wa ayeke mû ande maboko na e ti gbu ngangu fini so ayeke nzoni ahon atanga ni kue?
[Foto na lembeti 29]
Batême ti mo afa so mo soro fini so ayeke nzoni ahon atanga ni kue
[Afoto na lembeti 31]
Mo yeke na siriri na “ndo ti lingo”?