Bata nzoni duti ti mo na popo ti azo ti Nzapa

“Fade mbi mû merci na Mo na yâ kota bungbi ti azo.”​—PS. 35:18.

1-3. (a) Aye wa alingbi ti gue na ambeni Chrétien ti buba songo ti ala na Jéhovah? (b) Azo ti Nzapa alingbi ti bata tere ti ala na ndo wa?

BÂ TAPANDE so. Ambeni maseka-koli use, yaya na ngambe, ague ti tï ngu. Yaya ni ayeke tï ngu ni na mbeni place so alï mingi ngbanga ti so place ni so la ayeke pendere na lê ti lo. Azo ahinga so angunde ayeke ka mingi na place ni so. Ngambe ni atene na lo: “Gue kâ pëpe.” Me yaya ni atene na lo: “Gi bê ti mo pëpe, mbi hinga ye so mbi yeke sara.” Ngambe ni asara tënë na lo gbä, lo ye ti mä lo pëpe. Mo ye ti bâ, lo tingbi na mbeni kota ngunde na angbâ kete ngunde ni amû lo.

² Legeoko nga, aye ti dunia ti Satan so alingbi ti gboto lê ti mbeni Chrétien na asara si lo bâ pëpe so lo yeke hon yongoro na yâ ti mbeni ngu so alï na so aye ti sioni mingi ayeke dä. A yeke aye tongana ngia, kua ti nginza nga na warango akungba. Ye so asi na maseka-koli so amû maboko na e ti gbu li na ndo ti azo so e yeke sara kamarade na ala. A lingbi e tï ngu na ndo so ye ti sioni ayeke dä pëpe, so ayeke congrégation. Tï ngu pëpe na place so alï mingi, so alingbi ti sara si mo gue yongoro na congrégation na mo wara kpale. Tongana mo bâ so mo hon yongoro, kpe hio mo kiri na yâ ti ‘ngu so ye ti sioni ayeke dä pëpe’. Tongana mo kiri pëpe, mo yeke buba songo ti mo na Jéhovah.

³ Laso, place so ayeke sioni teti aChrétien ayeke dunia so (2 Tim. 3:1-5). Satan ahinga so ngoi ti lo angbâ mingi pëpe, na lo yeke gi ti te azo so lê ti ala akpengba pëpe (1 Pi. 5:8; Apoc. 12:12, 17). Ye oko, e yeke na mbeni ndo ti batango e. Jéhovah amû na azo ti lo mbeni ndo ti bata ala na lege ti yingo, so ayeke congrégation ti aChrétien.

4, 5. Azo mingi abâ gigi ti ala ti kekereke tongana nyen? Ngbanga ti nyen?

⁴ Dunia so alingbi pëpe ti mû na zo aye so lo yeke tâ na bezoin ni ti duti nzoni nga na siriri ti bê. Azo mingi abâ so ala duti nzoni pëpe ndali ti tënë ti fango zo, sarango ngangu na zo, ngere ti aye so ague na li ni nga na bubango ti aye tongana ngu nga na pupu. Azo kue ayeke tingbi na kpale ti gango mbakoro nga na kpale ti seni. Même azo so ayeke na kua ti nginza, ada, gbâ ti nginza nga na nzoni seni alingbi ti gi bê ti ala wala aye ni so ayeke ninga ande la?

⁵ Azo mingi ayeke nga na siriri ti bê pëpe. Ye ti mawa ni ayeke so, azo mingi apensé ti wara siriri na ngia na yâ ti mariage nga na yâ ti sewa, me na nda ni ala wara ni pëpe. Na ndo ti tënë ti dutingo na nzoni songo na Nzapa, azo mingi so ague na a-eglize li ti ala aga kirikiri na ala yeke na kite na ndo ti afango ye so ala yeke wara kâ. Mingi ni a yeke sarango ye ti akota zo ti eglize ni so ayeke na lege ni pëpe nga afango ye ti ala so alondo na yâ ti Bible pëpe la asara si azo ni ayeke na kite. Ni la, azo ni abâ so mbeni ye ti sarango ni ayeke dä pëpe. Ala zia bê ti ala fadeso gi na senda-ye nga na azo so aye nzoni ti amba ti ala.

6, 7. (a) Ngbanga ti nyen bango ndo ti azo so ayeke sara na Nzapa ayeke nde na ti azo so ayeke sara na lo pëpe? (b) Ye wa e yeke gue ti bâ?

⁶ Bango ndo ti azo so ayeke na yâ ti congrégation ti aChrétien ayeke nde mingi na ti azo so ayeke na yâ ni pëpe. Atâa so e azo ti Jéhovah, e yeke tingbi na a-oko kpale so azo so a yeke nduru na e ayeke tingbi nga na ni, sarango ye ti e ayeke ti lo nde. (Diko Ésaïe 65:13, 14; Malachie 3:18.) Ngbanga ti nyen? A yeke ngbanga ti so Bible amû maboko na e ti hinga ndani so azo ti dunia kue ayeke na yâ ti aye tongaso nga amû maboko na e ti luti na gbele akpale ti gigi. Ye so asara si e yeke gi bê ti e ahon ndo ni pëpe na ndo ti gigi ti e ti kekereke. Ti duti azo so ayeke voro Jéhovah abata e nde na atënë so gere ni aluti nzoni pëpe, afango ye so alondo na Bible pëpe, asarango ye ti kirikiri nga na akpale so ayeke ga na peko ti mara ti aye tongaso. Amembre ti congrégation ti aChrétien ayeke na mbeni siriri so tanga ti azo ayeke na ni pëpe.​—És. 48:17, 18; aPhil. 4:6, 7.

⁷ Ambeni tapande alingbi ti mû maboko na e ti gbu li ti e mingi na ndo ti nzoni duti so azo so ayeke sara na Jéhovah ayeke na ni, me so azo so ayeke sara na lo pëpe ayeke na ni pëpe. Atapande ni so alingbi ti pusu e ti bâ yâ ti aye so e yeke gbu li ti e na ndo ni nga na asarango ye ti e. A lingbi nga ti pusu e ti bâ wala e lingbi ti sara ngangu ahon ti kozo ti sara ye alingbi na awango so Nzapa amû na e ti bata e.​—És. 30:21.

“Gere ti mbi aye ti zene”

8. Ye wa a hunda lakue na awakua ti Jéhovah ti sara?

⁸ Tâ gi na tongo nda ti mbaï ti azo, azo so asoro ti sara na Jéhovah nga ti mä yanga ti lo ayeke gi ti sara kamarade pëpe na azo so ayeke sara na Jéhovah pëpe. Biani, Jéhovah afa so azo so ayeke voro lo nga na azo so ayeke mû peko ti Satan ayeke mä tere pëpe (Gen. 3:15). Ndali ti so azo ti Nzapa aye lakue ti sara ye alingbi gi na afango ye ti Bible, sarango ye ti ala ayeke nde na ti azo so angoro ala (Jean 17:15, 16; 1 Jean 2:15-17). Ti sara tongaso ayeke lakue kete ye pëpe. Ye oko, ambeni wakua ti Jéhovah so adö ambeni ye na yâ ti fini ti ala azia ayeke gi bê ti ala ngoi na ngoi na ndo ti desizion so ala mû ti bâ wala ala sara ye na lege ti ndara.

9. Fa kpale so wasungo Psaume 73 atingbi na ni.

⁹ Mbeni wakua ti Jéhovah so agi bê ti lo na ndo ti desizion so lo mû ti bâ wala lo sara ye na lege ti ndara ayeke wasungo Psaume 73, so ayeke peut-être mbeni hale ti Asaph. Lo yeke hunda tere ti lo ngbanga ti nyen mo bâ mo tene azo ti sioni ayeke ti ala nzoni, ala yeke na ngia nga aye ti ala ayeke maï nzoni. Me, ambeni zo so ayeke sara ngangu ti sara na Nzapa ayeke bâ pasi ndali ti atara nga aye akpengba na ala.​—Diko Psaume 73:1-13.

10. Ngbanga ti nyen tënë so wasungo Psaume asigigi na ni abâ mo?

¹⁰ A si na mo awe ti hunda tere ti mo tongana ti wasungo Psaume so? Tongana a si na mo, gi bê ti mo ahon ndo ni pëpe so mo hunda mara ti tënë so wala tene pëpe so mabe ti mo awoko. Biani, ambeni wakua ti Jéhovah mingi, même ambeni so asû Bible, awara lani mara ti bibe so (Job 21:7-13; Ps. 37:1; Jér. 12:1; Hab. 1:1-4, 13). Ni la, a lingbi ala kue so aye ti sara na Jéhovah agbu li ti ala nzoni na ndo ti hundango tënë so nga ala yeda na kiringo tënë ni: Ti sara na Nzapa nga ti mä yanga ti lo ayeke nzoni ahon tanga ti aye kue so zo alingbi ti sara? Ye so ague oko na tënë so Satan abi lani na sese na yaka ti Éden. A ndu tënë ti droit ti Nzapa ti komande dunia kue (Gen. 3:4, 5). Tongaso, a yeke nzoni e oko oko kue e gbu li ti e na ndo ti tënë so wasungo Psaume so asigigi na ni. Azo ti fandara so mo bâ mo tene ala yeke ti ala ka na kpale pëpe, a lingbi e sara nzara ti ga tongana ala? A lingbi e zia ti sara na Jéhovah na e mû tapande ti ala? A yeke tâ ye so Satan aye ti tene e sara la.

11, 12. (a) Tongana nyen wasungo Psaume so ahon ndo ti agingo bê ti lo? E lingbi ti manda nyen dä? (b) Nyen la amû maboko na mo ti tene na nda ni oko tënë ti wasungo Psaume so?

¹¹ Nyen la amû lani maboko na wasungo Psaume so ti hon ndo ti gingo bê ti lo? Atâa so lo tene so lo ga lani nduru ti dö lege ti mbilimbili ti zia, bango ndo ti lo achangé na ngoi so lo gue na “Ndo ti Nzoni-kue ti Nzapa,” so ti tene na ngoi so lo bungbi oko na ambeni zo na yâ ti temple ti Nzapa, azo so azia vorongo Jéhovah na kozo ndo na yâ ti fini ti ala, na lo gbu li ti lo na ndo ti ye so Jéhovah aleke ti sara. A yeke ge la lo ga ti bâ so lo ye pëpe ti tene oko ye so ayeke ku azo ti sioni asi na lo. Lo bâ so ye so ala yeke sara na yâ ti fini ti ala azia ala na “ndo so gere ti ala azene”. Wasungo Psaume ni abâ so azo ti sioni kue so ake Jéhovah, fade a yeke futi ala na lege ti mbeni ye so ‘amû mbeto’. Me ala so ayeke sara na Jéhovah, lo yeke mû maboko na ala. (Diko Psaume 73:16-19, 27, 28.) Kite ayeke pëpe so mo hinga so tënë so ayeke tâ tënë. Ti tene zo asara aye so anzere gi na lo wani na ti sara sanka ti andia ti Nzapa alingbi ti duti ye so azo mingi aye, me zo alingbi pëpe ti kpe akpale so ayeke ga na pekoni.​—aGal. 6:7-9.

¹² Mbeni ye wa e manda na yâ ti ye so asi na wasungo Psaume so? Lo duti nzoni na popo ti azo ti Nzapa nga lo wara ndara. Na ngoi so lo gue na ndo so a yeke voro Jéhovah dä, lo to nda ti gbu nda ti aye ni nzoni. Legeoko nga laso, e yeke wara anzoni zo ti mungo wango nga na apendere kobe ti yingo na ngoi ti abungbi ti congrégation. Ni la, a yeke na lege ni so Jéhovah atene na awakua ti lo ti gue na abungbi. Kâ, a yeke kpengba ala nga a yeke wa ala ti sara ye na lege ti ndara.​—És. 32:1, 2; aHéb. 10:24, 25.

Soro akamarade ti mo na lege ti ndara

13-15. (a) Nyen la asi na Dina nyen? Ye so afa nyen? (b) Ngbanga ti nyen ti sara kamarade na amba ti mo Chrétien ayeke bata mo?

¹³ Mbeni tapande ti zo so awara kota kpale ndali ti so lo sara kamarade na azo ti dunia so ayeke Dina, molenge ti Jacob ti wali. Mbeti ti Genèse atene na e so lo yeke gue ka lakue na ndo ti amaseka-wali ti kodoro ti Canaan, ndo so lo na azo ti sewa ti lo ayeke dä. Azo ti kodoro ti Canaan ayeke pëpe na a-oko bango ndo so azo ti Jéhovah ayeke na ni na ndo ti nzoni sarango ye. Nde na so, aye so azo ti gingo nda ti aye na gbe ti sese awara afa so sarango ye ti azo ti Canaan asara si kodoro ni asi singo na vorongo yanda, aye ti kirikiri, vorongo nzapa so ayä na nduzu lango-sioni nga na sarango ye ti ngangu na zo (Ex. 23:23; Lév. 18:2-25; Deut. 18:9-12). Girisa pëpe aye so asi na Dina na peko ti so lo sara kamarade na azo ti kodoro so.

¹⁴ Mbeni koli ti kodoro ni so iri ti lo ayeke Sichem, so afa lo tongana zo so “a yä iri ti [lo] ahon azo kue na da ti babâ ti lo”, abâ Dina na “lo kamata lo, lo bungbi na lo, lo bi kamene na lê ti lo.” (Gen. 34:1, 2, 19). So tâ ye ti vundu! Ti mo, Dina apensé kozoni so ye tongaso alingbi ti si na lo? Peut-être lo yeke gi lani ti sara gi kamarade senge na amaseka ti kodoro ni so lo pensé lo tene ala yeke sara ye ti sioni na lo pëpe. Me Dina awara kota vundu na pekoni.

¹⁵ Ye so asi na Dina so afa na e nyen? Ye so afa na e so tongana e sara kamarade na azo ti dunia so, e yeke wara kpale na pekoni. Mbeti ti Nzapa atene: “Ti sara songo na asioni zo ayeke buba anzoni sarango ye ti zo.” (1 aCor. 15:33). Me, tongana mo sara kamarade na azo so ayeke voro Jéhovah tongana mo, so mo na ala ayeke bata a-oko ndia ti Nzapa na ndo ti nzoni sarango ye nga so andoye Jéhovah tongana mo, ye so ayeke bata mo. Mara ti anzoni kamarade tongaso ayeke wa mo ti sara ye na lege ti ndara.​—aProv. 13:20.

“A sukula ala si ala ga nzoni”

16. Bazengele Paul atene nyen na ndo ti ambeni zo so ayeke na yâ ti congrégation ti Corinthe?

¹⁶ Congrégation ti aChrétien amû maboko na azo mingi ti dö lege ti ambeni sioni sarango ye ti zia na ti ga nzoni. Na ngoi so bazengele Paul asû kozo mbeti ti lo na aChrétien ti congrégation ti Corinthe, lo sara tënë na ndo ti aye so ala gbian na yâ ti fini ti ala ti sara ye alingbi na aye so Nzapa afa. Ambeni ândö ayeke sara aye tongana lango-sioni, vorongo yanda, gingo koli wala wali nde, bungbingo koli na koli wala wali na wali, nzi, nyongo sämba ahon ndo ni nga na ambeni ye tongaso. Me Paul atene so “a sukula ala si ala ga nzoni”.​—Diko 1 aCorinthien 6:9-11.

17. Na lege wa sarango ye alingbi na afango ye ti Bible agbian fini ti azo mingi?

¹⁷ Azo so ayeke na mabe pëpe adö lege ti nzoni sarango ye azia. Ala sara gi ye so ala wani aye wala ala tï na yâ ti sioni sarango ye ti azo so angoro ala tâ gi tongana ti so ambeni zo ti Corinthe asara kozoni si ala ga aChrétien (aÉph. 4:14). Me tâ hingango ye na ndo ti Mbeti ti Nzapa nga na aye so lo leke ti sara ayeke na ngangu ti gbian fini ti azo kue so asara ye alingbi na fango ye ti Bible (aCol. 3:5-10; aHéb. 4:12). Azo mingi so ayeke na yâ ti acongrégation ti aChrétien laso alingbi ti tene na mo so kozoni si ala manda ye na ndo ti andia ti Jéhovah nga ti sara ye alingbi na ni, ala yeke sara lani aye kue so ala ye. Ye oko, ala wara lani aye so ala ye pëpe nga ala yeke na ngia pëpe. Ala wara siriri gi na ngoi so ala to nda ti bungbi oko na azo ti Nzapa nga ti sara ye ague oko na afango ye ti Bible.

18. Nyen la mbeni maseka asara? Ye so afa nyen?

¹⁸ Ye oko, azo so ândö asoro ti zia ‘ngu so ye ti sioni ayeke dä pëpe’ so ayeke congrégation ti aChrétien ayeke fadeso na vundu mingi. Mbeni ita-wali so iri ti lo ayeke Tanya atene so lo kono lani na yâ ti mbeni sewa ti aChrétien, me na ngoi so lo wara ngu 16, lo dö congrégation lo zia ti “tomba peko ti aye ti dunia so.” Ambeni ye ti pekoni ayeke so lo mû ngo so lo ye fade ni pëpe nga lo tuku ni. Fadeso lo tene: “Angu ota so mbi sara na gigi ti congrégation aga na mbi mbeni vundu so ayeke hon pëpe. Mbeni ye so mbi yeke girisa ni lâ oko pëpe ayeke so mbi fâ lani molenge ti mbi so angbâ na yâ ti mbi. . . . Amaseka kue so aye ti tara aye ti dunia so même gi teti kete ngoi, mbi ye ti tene na ala: ‘Hange!’ Na tongo nda ni a lingbi ti nzere, me na nda ni ayeke sê ngangu. Dunia so ayeke na mbeni ye ti nzoni ti mû na zo pëpe, me gi aye ti vundu. Mbi tara ni, na mbi bâ. Ala ngbâ na yâ ti bungbi ti Jéhovah! A yeke oko lege so ayeke ga na zo ngia.”

19, 20. Congrégation ayeke bata e tongana nyen?

¹⁹ Tara ti bâ ye so ayeke si na mo tongana mo dö congrégation ti aChrétien so a yeke bata mo na yâ ni mo zia. Azo mingi so asara lani aye ti kirikiri kozoni si ala hinga tâ tënë aye même ti dabe ti ala na ni pëpe (Jean 6:68, 69). Ti tene aye ti vundu so asi singo na yâ ti dunia ti Satan so asi na mo pëpe, a lingbi mo ngbâ lakue ti bata nzoni duti ti mo na ngbango nduru na aita ti mo aChrétien. Ti sara kamarade na ala na ti gue lakue na abungbi ti congrégation ayeke dabe ti mo lakue so andia ti Jéhovah ayeke nzoni na ayeke mû ngangu na mo ti sara ye alingbi na ni. Mo yeke na araison mingi ti “mû merci na [Jéhovah] na yâ kota bungbi ti azo” tongana ti so mbeni wasungo Psaume asara lani.​—Ps. 35:18.

²⁰ Biani, ngoi na ngoi, aChrétien kue ayeke tingbi na ambeni ye so alingbi ti sara si a yeke ngangu na ala ti ngbâ be-ta-zo. Peut-être ala yeke gi na bezoin ti tene a fa na ala ye so ala lingbi ti sara. Nyen la mo nga na tanga ti aita ti congrégation alingbi ti sara ti mû maboko na aita so ayeke na yâ ti akpale tongaso? Article ti peko ayeke fa ande tongana nyen mo lingbi ti ‘ngbâ ti dë bê nga ti kpengba’ aita ti mo.​—1 aThes. 5:11.

Mo yeke kiri tënë tongana nyen?

• Nyen la e manda na yâ ti ye so asi na wasungo Psaume 73?

• Ye so asi na Dina afa nyen na e?

• Ngbanga ti nyen congrégation ti aChrétien ayeke sara si mo duti nzoni?

[Afoto na lembeti 9]

Tï ngu na ndo so ye ti sioni ayeke dä pëpe; ngbâ na yâ ti congrégation!