Mo lingbi ti hinga iri ti Nzapa?

Ti bara mbeni kota zo na ti sara tënë na lo na dingo iri ti lo ayeke mbeni kota pasa. Mingi ni, a yeke sara tënë na akota zo na iringo ala “Gbia ti kodoro,” “Gbia ti agbia” wala “Kota zo”. Tongana mbeni zo so kamba ti kusala ti lo akono atene na mo, atene: “Pardon, iri mbi na iri ti mbi.” Kite ayeke pëpe so a yeke nzere na mo mingi.

TÂ NZAPA atene na e na yâ ti Mbeti ti lo, Bible, lo tene: “Mbi yeke [Jéhovah], so ayeke iri ti Mbi.” (Ésaïe 42:8).a Atâa so lo yeke nga na airi mingi, airi tongana “Wasarango ye,” “Lo ti ngangu ahon kue,” nga “Seigneur L’Éternel,” lakue lo yeke ne awakua be-ta-zo ti lo na mungo lege na ala ti iri lo na iri ti lo.

Na tapande, prophète Moïse avoro yanga na Nzapa, lo tene: “O [Jéhovah].” (Exode 4:10). Na ngoi ti matanga ti mungo temple so ayeke na Jérusalem na Nzapa, Gbia Salomon ato nda ti sambela ti lo na atënë so: “O [Jéhovah].” (1 aGbia 8:22, 23). Nga na ngoi so prophète Ésaïe ayeke sara tënë na Nzapa ndali ti azo ti Israël, lo tene: “Mo, O [Jéhovah], Mo yeke Babâ ti e.” (Ésaïe 63:16). A yeke polele so Babâ ti e ti yayu aye si e iri lo na tâ iri ti lo.

Atâa so ti sara tënë na Jéhovah na dingo iri ti lo ayeke kota ye, ti hinga lo na iri ti lo andu aye mingi. Zo so aye Jéhovah na azia bê kue na lo, Jéhovah amû zendo na lo atene: “Fade . . . mbi bata lo tënë ti so lo hinga iri ti mbi.” (Psaume 91:14, Tene ti Nzapa, Kozo Mbouki). Biani, ti hinga iri ti Nzapa andu aye mingi teti so ni la ayeke sara si Nzapa abata e. Ti hinga Nzapa na iri ti lo, a lingbi mo sara nyen?

[Kete tënë na gbe ni]