Kiringo tënë na ahundango tënë osio na ndo ti tënë ti nda ni

JÉSUS CHRIST afa kozoni awe so na mbeni lâ fade “nda ni ayeke ga.” Lo sara tënë ti ngoi ni so lo tene: “Na ngoi ni so, fade mbeni kota ye ti vundu ayeke si, ye ti vundu so mara ni ade ti si lâ oko pëpe ngbene ye so dunia abâ gigi juska fadeso, na mara ni ayeke kiri ti si ande mbeni pëpe.”​—Matthieu 24:​14, 21.

Tënë so Jésus atene na ndo ti nda ni nga na ambeni versê so asara tënë na ndo ni asara si ahundango tënë mingi alondo. A yeke nzoni mo zi Bible ti mo na mo bâ akiringo tënë so Bible amû na ahundango tënë so.

Nyen la ayeke hunzi?

Bible afa pëpe so a yeke futi ande sese so e yeke na ndo ni. Mbeni wasungo psaume atene: ‘[Nzapa] aleke gere ti sese, si a yengi lâ oko pëpe.’ (Psaume 104:5). Bible afa nga pëpe so a yeke futi ande aye kue so ayeke na fini na ndo ti sese na yâ ti mbeni kota bira (Ésaïe 45:18). Jésus lo wani afa so ambeni zo ayeke sö ande kuâ na ngoi ti nda ni (Matthieu 24:21, 22). Me, nyen la Bible atene ayeke hunzi?

Komandema ti azo ayeke hunzi. Nzapa apusu prophète Daniel ti sû tënë so: “Fade Nzapa ti yayu ayä royaume so afuti lâ oko pëpe, na Lo zia royaume ni na tïtî ambeni zo nde pëpe; me fade royaume so afâ mbeni royaume so kue nduru nduru, na a sara si royaume nde nde so kue awe; na fade royaume so angbâ lakue lakue.”​—Daniel 2:44.

Bira nga bubango aye tongana pupu wala ngu ayeke hunzi. Psaume 46:10 asara tënë ti aye so Nzapa ayeke sara ande. Versê ni atene: “Lo sara si bira awe juska na nda ti sese; Lo fâ ngindi, na Lo fâ yâ ti likongo; Lo zö apuse ti mbarata na wâ.” Bible afa nga so ande Nzapa ayeke “buba azo so ayeke buba sese.”​—Apocalypse 11:18.

Sarango ye ti sioni nga na sarango ye na lege ni pëpe ayeke hunzi. Bible amû zendo so: “Azo ti mbilimbili, fade ala duti na sese so, na azo so alingbi kue, fade ala ngbâ dä. Me azo ti sioni, fade a lungula ala na sese so, na fade a gboto azo ti handa na yâ sese ni.”​—aProverbe 2:21, 22.

2 Nda ni ayeke si lawa?

Jéhovah azia mbeni ‘lango awe’ ti hunzi aye ti sioni nga ti zia na sese ngorogbia ti lo (Marc 13:33). Me Bible afa polele so e lingbi pëpe ti hinga mbilimbili lango ti nda ni so. Jésus atene: “Na ndo ti tënë ti lango ni so nga na ngbonga ni so, zo oko ahinga ni pëpe, atâa a-ange so ayeke na yayu, wala Molenge ni a­hinga ni pëpe, me gi Babâ ni.” (Matthieu 24:36). Ye oko, Jésus na adisciple ti lo afa kozoni awe tongana nyen aye ayeke tambela na ndo ti sese kozoni si nda ni aga. Nda ni ayeke si ande hio na ngoi so aye kue so a sara tënë ni na gbe ni ge asi na oko ngoi nga na yâ ti dunia kue.

Laso kpale na lege ti poroso, bubango ti aye tongana ngu wala pupu ahon ndo ni; sarango ye ti azo aga sioni mingi. Na yâ ti kiringo tënë ti Jésus na adisciple ti lo na ndo ti tënë nda ni, lo tene: “Fade mara ayeke londo na bira na tere ti mbeni mara, na royaume ayeke londo na bira na tere ti mbeni royaume. Fade sese ayeke yengi na ando nde nde na peko ti tere, na kota nzara ayeke tï. Aye so ayeke tongo nda ti aye ti vundu so akpa songo yâ so agbu wali so aye ti dü.” (Marc 13:8). Bazengele Paul atene: “Na alango ti nda ni, angoi ti akpale so ayeke ngangu na zo ti kanga bê na yâ ni ayeke duti dä, ngbanga ti so azo ayeke duti ande azo so andoye gi tere ti ala wani, azo so andoye nginza, azo so abâ tere ti ala kota na ndo ti amba ti ala, azo ti baba, azo ti zongango ndo, azo so ake yanga ti ababâ na amama ti ala, azo so ahinga ti kiri singila pëpe, azo so ayeke abe-ta-zo pëpe, azo so aye amba ti ala zo pëpe, azo so aye oko pëpe ti mä tere na amba ti ala, azo ti pango amba ti ala, azo so akanga nzara ti bê ti ala pëpe, azo so ayeke asioni zo, azo so andoye nzoni ye pëpe, azo ti kango amba ti ala, azo so li ti ala akpengba, azo so wuma ti ala ahon ndo ni, azo so andoye angia ahon ti ndoye Nzapa.”​—2 Timothée 3:1-5.

A yeke fa tënë na yâ ti dunia kue na ayanga ti kodoro nde nde. Jésus atene: “A yeke fa ande nzoni tënë ti royaume so na ndo ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.”​—Matthieu 24:14.

3 Tongana nda ni aga awe, nyen la ayeke si na pekoni?

Bible afa pëpe so a yeke mû anzoni zo kue na sese ti gue na ala na yayu si ala duti kâ teti lakue lakue. Me Jésus afa so ye so Nzapa aleke na tongo nda ni ndali ti azo ayeke ga tâ tënë. Lo tene: “Ngia ayeke na ala so ayeke sara ye na ngangu pëpe, teti fade sese ayeke ga ti ala.” (Matthieu 5:5; 6:9, 10). Ti azo so akui kozoni si nda ni asi, Bible atene so a yeke zingo ande akuâ (Job 14:14, 15; Jean 5:28, 29). Tongana nda ni aga awe, nyen la ayeke si na pekoni?

Jésus so ayeke na yayu kâ ayeke komande na yâ ti Royaume ti Nzapa. Prophète Daniel atene: “Mbi bâ ye tongana suma na bï, mbi bâ Zo oko tongana Molenge Ti Zo [Jésus so azingo na kuâ] so aga na mbinda ti yayu, Lo si nduru na Lo Ti Giriri [Jéhovah Nzapa], na ala sara si Zo so aga na gbele Lo. A mû na lo [Jésus] ngangu ti komande, na gloire, na royaume, si azo kue, amara kue, na azo ti yanga nde nde kue, asara na Lo; ngangu ti Lo ti komande ayeke ti lakue lakue, fade a hon pëpe, na a lingbi futi royaume ti Lo pëpe.”​—Daniel 7:13, 14; Luc 1:31, 32; Jean 3:13-16.

Azo ti gbe ti Royaume ni ayeke duti ande na nzoni seni, na siriri so aninga nga na fini ti lakue lakue. Prophète Ésaïe atene: “Fade azo asara da, na ala duti na yâ ni; fade ala lu vigne na yaka, na ala te lê ni. Fade azo asara da si mbeni zo aduti na yâ ni pëpe; fade ala lu ye si mbeni zo ate pëpe.” (Ésaïe 65:21-23). Bazengele Jean asara tënë ti ngoi ni so lo tene: “Bâ, tente ti Nzapa ayeke na azo, Nzapa ayeke sara ande kodoro na ala, na ala yeke duti azo ti lo. Nga Nzapa wani ayeke duti ande na ala. Fade lo yeke mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”​—Apocalypse 21:3, 4.

4 A lingbi mo sara nyen ti sö kuâ na ngoi ni so?

Bazengele Pierre afa biani so na popo ti azo so ayeke duti na fini na ngoi ti nda ni, ambeni ayeke he na ngia tënë so atene Nzapa ayeke ga ti leke akpale ti azo na ti zi aye ti sioni na ndo ti sese (2 Pierre 3:3, 4). Ni la, Pierre awa azo ti ngoi ti e ti sara aye so a fa na gbe ni ge.

Manda ye na lege ti aye so asi ândö. Pierre atene: “Nzapa agbanzi nga tere ti lo pëpe ti se mbeni dunia ândö, me lo bata Noé, wafango tënë ti ye so ayeke mbilimbili, lo bata lo na ambeni zo mbasambala na ngoi so lo ga na kota ngu so apika na ndo ti mbeni dunia ti azo so akpe Nzapa pëpe.” (2 Pierre 2:5). Pierre asara tënë ti azo ti hengo ndo so lo tene: “Na bê ti ala wani, ala girisa ye so: ngbene ye giriri ayayu ayeke dä nga mbeni kuru sese ayeke dä so asigigi na yâ ti ngu si a yeke na popo ti ngu na lege ti tënë ti yanga ti Nzapa; nga na lege ti aye so, dunia ti ngoi ni so afuti na ngoi so kota ngu apika amene ni. Me na lege ti oko tënë so, a bata ayayu na sesea ti fadeso ti ku na wâ, na a bata ni ti ku lango ti ngbanga nga ti futingo azo so akpe Nzapa pëpe.”​—2 Pierre 3:5-7.

Sara ye alingbi na afango ye ti Nzapa so andu nzoni tambela. Pierre atene so a yeke nzoni azo so aye ti sö kuâ na ngoi ti nda ni aduti na ‘asarango ye so ayeke nzoni-kue nga na akusala so afa so ala gbu tënë ti Nzapa ngangu’. (2 Pierre 3:11). Bâ so Pierre aluti mingi na ndo ti “sarango ye so ayeke nzoni-kue” nga na “akusala so afa so ala gbu tënë ti Nzapa ngangu”. Tongaso, a hunda ti sara ye mingi ahon gi ti tene na yanga so e mä na bê wala ti ku ngbii nda ni aga nduru awe si e gi ti lë songo na Nzapa ti tene e sö kuâ.

Asarango ye wa nga na akusala wa anzere na lê ti Nzapa? Ngbanga ti nyen ti haka pëpe ye so mo hinga na ye so Bible afa na ndo ti tënë so? A-Témoin ti Jéhovah ayeke duti na ngia ti mû maboko na mo. Hunda na ala ti fa na mo akiringo tënë ni na yâ ti Bible ti mo. Tongana mo sara tongaso a lingbi ti mû maboko na mo ti sara mbeto ti gigi ti kekereke pëpe, atâa so aye so ayeke si laso amû mbeto na zo.

[Kete tënë na gbe ni]

[Kete tënë na lembeti 7]

Sese ayeke ngbâ lakue, me a yeke futi ande azo so abuba ni