Hunzingo ti dunia so ayeke lawa? Bâ atënë so Jésus atene

BÂ ATËNË USE SO JÉSUS ATENE NA NDÖ TI HUNZINGO TI DUNIA SO:

“Ni la, zia ala lango pëpe, ngbanga ti so ala hinga lango ni nga na l’heure ni pëpe.”​—MATTHIEU 25:13.

“Ala sara hange, zia lê ti ala angbâ na zingo ni, ndali ti so ala hinga pëpe lawa si lango so a fa ni awe ayeke si.”​—MARC 13:33.

Tongaso, zo oko na ndö ti sese ahinga mbilimbili ape lawa la aye ti ngoi so ayeke gue ti hunzi. Me, Nzapa asoro mbeni “mbilimbili ngoi” awe, lo zia mbeni ‘lango nga na l’heure’ so aye ni ayeke hunzi na ni (Matthieu 24:36). Eskê aye ti tene so mbeni ye oko ayeke dä ape so amû lege na zo ti hinga ngoi so aye ni ayeke gue ti hunzi na ni? Ên-ën. Jésus atene lani na adisciple ti lo ti bâ aye nde nde so ayeke si ande so afa so nda ni aga nduru mingi awe.

SIGNE NI

Aye so a fa ayeke signe ti “aye ti ngoi so ayeke gue ti hunzi.” Jésus atene: “Mara ayeke londo na bira na terê ti mbeni mara, na royaume ayeke londo na bira na terê ti mbeni royaume. Kota nzara ayeke tï nga sese ayeke yengi, na aye so ayeke si na ando nde nde na peko ti terê.” (Matthieu 24:3, 7). Lo sara nga tënë ti “asioni kobela so amû ndo.” (Luc 21:11). Eskê mo yeke bâ aye so Jésus asara lani tënë ni so?

Laso, azo ayeke bâ pasi ndali ti abira, nzara, yengingo ti sese, nga na akobela so amû ndö ti sese kue. Na tapande, na 2004, sese ayengi ngangu na gbe ti Kota ngu-ingo na Inde asara si ngu-ingo ni asuku afâ azo ahon 225 000. Na yâ ti ngu ota, kobela ti COVID-19 amû ndö ti sese kue nga afâ azo ahon kutu omene na ndambo. Jésus atene so mara ti aye so ayeke signe ti aye so afa so aye ti ngoi so ayeke gue ti hunzi la.

“LÂ TI NDA NI”

Bible airi ngoi ni so “lâ ti nda ni”. (2 Pierre 3:3, 4). Use mbeti na Timothée 3:1-5 atene so na lâ ti nda ni sarango ye ti azo ayeke ga sioni mingi ahon ti kozo. (Bâ encadré “Kozo si hunzingo ti dunia ni asi.”) Eskê mo bâ laso azo so sarango ye ti terê ti ala afa so ala pensé gï na ala wani, ala yeke sara bê ti ye, ala yeke asioni zo nga ala fa so ala ye amba ti ala ape? Aye so nga afa polele so e yeke nduru mingi awe na hunzingo ti dunia so.

Lâ ti nda ni ayeke ninga alango oke? Ti gue oko na tënë ti Bible angbâ “ngoi mingi pëpe.” Na pekoni, Nzapa ayeke futi ande “azo so ayeke futi sese.”—Apocalypse 11:15-18; 12:12.

SESE AGA NDURU TI GA PARADIS!

Nzapa aleke awe ngoi nga na l’heure so lo yeke ga ande ti futi sioni dunia so (Matthieu 24:36). Me, mbeni nzoni tënë nde ayeke dä, Nzapa ‘aye si a futi zo oko pëpe.’ (2 Pierre 3:9). Lo yeke zi lege na azo ti sara ye alingbi na andia ti lo. Ngbanga ti nyen? Ngbanga ti so lo ye si e sö kuâ na ngoi ti hunzingo ti dunia so nga e vivre na yâ ti fini dunia, na temps ni ande sese ayeke paradis.

Nzapa aleke ti tene a fa ye na azo kue ti aidé ala ti hinga tongana nyen la ala peut ti vivre na yâ ti fini dunia na gbe ti Royaume ti lo. Jésus atene lani so a yeke fa nzoni tënë ti Royaume ti Nzapa “na ndö ti sese kue so azo ayeke dä”. (Matthieu 24:14). Na ndö ti sese kue, aTémoin ti Jéhovah amû l’heure ahon milliard ti fa na tënë nga ti fa na azo tënë ti beku so ayeke na yâ ti Bible. Jésus atene so a yeke sara kua ti fango tënë so na ndö ti sese kue kozoni si nda ni aga.

Ngoi ti komandema ti azo aga nduru ti hunzi awe. Me nzoni tënë ni ayeke so mo peut ti sö kuâ na hunzingo ti dunia so na ti duti na yâ ti Paradis na ndö ti sese tongana ti so Nzapa amû lani zendo ni. Article ti peko ayeke fa nyen la mo peut ti sara ti vivre ande na yâ ti fini dunia so.