Asewa so ayeke aChrétien, ala ‘zia lê ti ala angbâ na zingo ni’
“Zia lê ti e angbâ na zingo ni na e zia li ti e kpô.”—1 ATHES. 5:6.
1, 2. Nyen la a hunda ti tene azo ti mbeni sewa asara si lê ti ala angbâ na zingo ni na lege ti yingo?
NA NGOI so bazengele Paul ayeke sara tënë ti ‘kota lâ ti Jéhovah so amû mbeto mingi’, lo sû mbeti na aChrétien ti Thessalonique lo tene: “Aita, ala yeke na yâ ti bingo pëpe, si lango ni so anzi ala nzingo tongana ti so kota lâ ayeke nzi azo ti nzi, teti ala kue ayeke amolenge ti lumière nga amolenge ti kota lâ. E yeke ti bï wala ti bingo pëpe.” Lo kiri lo tene: “Tongaso, zia e lango pëpe tongana ti so atanga ni ayeke lango, me zia lê ti e angbâ na zingo ni na e zia li ti e kpô.”—Joël 2:31; 1 aThes. 5:4-6.
2 Wango so Paul amû na aChrétien ti Thessalonique so ayeke nzoni mingi teti aChrétien so ayeke na “lâ ti nda ni.” (Dan. 12:4). Na ngoi so, so futingo bungbi ti aye ti sioni ti ngoi so ayeke pusu nduru nduru, Satan ayeke sara kue ti tene atâ wakua ti Nzapa mingi azia ti sara na Nzapa. Ni la, a yeke na lege ti ndara ti tene e bâ wango ti Paul so na nene ni na ti zia si lê ti e angbâ ti kpengba na lege ti yingo. Tongana azo ti sewa ti mbeni Chrétien aye si lê ti ala angbâ biani na zingo ni, a yeke kota ye ti tene zo oko oko kue ti yâ ti sewa ni asara kusala so Jéhovah amû ni na lo so a fa ni na yâ ti Bible. Tongaso, kusala wa a lingbi babâ, mama nga na amolenge asara ti mû maboko na sewa ti ala si ‘lê ti ala angbâ na zingo ni’?
Akoli, ala mû tapande ti “berger so ayeke nzoni mingi”
3. Ti gue oko na 1 Timothée 5:8, kusala ti koli so ayeke mokonzi ti sewa andu aye wa?
3 Bible atene: “Mokonzi ti wali ayeke koli.” (1 aCor. 11:3). Kusala ti koli so ayeke mokonzi ti sewa andu aye wa? Bible asara tënë ti mbeni oko atene: “Tongana mbeni zo abata azo ti lo pëpe, na mbilimbili azo ti da ti lo, lo dö lege ti mabe lo zia awe, na sioni ti lo ahon ti zo so amä na bê pëpe.” (1 Tim. 5:8). Biani, a lingbi koli amû ye na sewa ti lo na lege ti mitele. Ye oko, tongana koli ayeke mû maboko na azo ti sewa ti lo ti tene lê ti ala angbâ na zingo ni na lege ti yingo, a lingbi lo sara ye mingi ahon gi ti gi ti wara nginza ti bâ lege ti sewa ni. A lingbi lo kpengba azo ti da ti lo na lege ti yingo na mungo maboko na azo kue ti sewa ni ti kpengba songo ti ala na Nzapa (aProv. 24:3, 4). Lo yeke sara ni tongana nyen?
4. Nyen la alingbi ti mû maboko na mbeni koli ti kpengba biani azo ti da ti lo na lege ti yingo?
4 Teti so “koli ayeke li ti wali ti lo tongana ti so Christ nga ayeke li ti congrégation”, a lingbi lo gi ti bâ lege so Christ ayeke komande na congrégation na lo mû pekoni (aÉph. 5:23). Bâ tongana nyen Jésus asara tënë ti songo ti lo na adisciple ti lo. (Diko Jean 10:14, 15.) Ye wa a lingbi mbeni koli so aye biani ti kpengba azo ti da ti lo na lege ti yingo asara? A lingbi lo manda ye so Jésus so ayeke “berger so ayeke nzoni mingi” atene na asara, nga lo “mû tâ gi peko ti gere ti lo mbilimbili.”—1 Pi. 2:21.
5. Mara ti hingango ye wa Berger so ayeke nzoni mingi ayeke na ni na ndo ti congrégation?
5 Zia e bâ ye so mbeni mokonzi ti sewa alingbi ti manda na lege ti tapande ti Christ. Ti bâ ni nzoni, songo so ayeke na popo ti mbeni berger na angasangbaga ti lo aluti na ndo ti aye so: Berger ni ahinga aye kue na ndo ti angasangbaga ti lo nga angasangbaga ni ahinga lo na azia bê ti ala na lo. Ala hinga go ti lo nga ala yeke mä yanga ti lo. Jésus atene: “Mbi hinga angasangbaga ti mbi na angasangbaga ti mbi ahinga mbi.” A yeke pëpe gi mbeni senge hingango ye tongaso la Jésus ayeke na ni na ndo ti congrégation. Mbupa ti Grec so a kiri pekoni na “hinga” aye ti sara tënë ti “hingango mbeni ye nzoni wala ti hinga anzene nzene ye kue na ndo ti mbeni ye.” Biani, Berger so ayeke nzoni mingi ahinga angasangbaga ti lo nzoni mingi. Lo hinga aye so ala oko oko kue ayeke na bezoin ni, ando so ala woko dä nga na ando so ala kpengba dä. Lo hinga aye kue na ndo ti angasangbaga ti lo. Angasangbaga ni ahinga nga berger ti ala nzoni mingi nga ala zia bê ti ala kue na fango lege so lo yeke fa na ala.
6. Na lege wa akoli alingbi ti mû tapande ti Berger so ayeke nzoni mingi?
6 Ti tene mbeni koli afa lege tongana ti Christ, a lingbi lo bâ tere ti lo tongana mbeni berger nga azo so lo yeke bâ ndo na ndo ti ala tongana angasangbaga. A yeke nzoni lo sara ngangu ti hinga sewa ti lo nzoni. Mbeni koli alingbi biani ti hinga sewa ti lo nzoni? En. Tongana lo sara lisoro nzoni na azo ti sewa ti lo kue, lo dengi mê ti mä aye so agbu bê ti ala nga lo mû li ni na yâ ti akusala ti sewa ni. Nga, lo yeke sara ngangu ti mû anzoni desizion na ndo ti aye tongana mandango tënë ti Nzapa na sewa, guengo na abungbi, fango tënë, gbotongo gere kete nga na angia. Tongana mbeni koli so ayeke Chrétien asara ngangu ti hinga ye so Mbeti ti Nzapa afa nzoni nga lo hinga azo ti sewa ti lo nzoni tongaso si lo duti mbeni nzoni tapande nga lo mû anzoni desizion, a yeke duti ngangu pëpe na azo ti sewa ni ti zia bê ti ala kue na fango lege ti lo nga lo yeke duti na ngia ti bâ so ala kue ayeke voro Jéhovah beoko.
7, 8. Na lege wa mbeni koli alingbi ti mû tapande ti Berger so ayeke nzoni mingi na ndoyengo azo so lo yeke bâ ndo na ndo ti ala?
7 Mbeni nzoni berger ayeke nga na ndoye teti angasangbaga ti lo. Tongana e manda mbaï ti fini ti Jésus nga na kusala ti lo so a sara tënë ni na yâ ti a-Évangile, e yeke bâ so Jésus aye adisciple ti lo mingi. Lo “kä” même ‘âme ti lo na kuâ ndali ti angasangbaga ni.’ A yeke nzoni akoli amû tapande ti Jésus na lege so ala ndoye azo so ala yeke bâ ndo na ndo ti ala. Mbeni koli so aye ti nzere na lê ti Nzapa ayeke ngbâ ti ndoye wali ti lo “tongana ti so Christ nga andoye congrégation”, na lo yeke komande na ngangu na ndo ti lo pëpe (aÉph. 5:25). A lingbi atënë ti yanga ti lo aduti nzoni nga ane zo, teti so wali ti lo alingbi biani ti tene a ne lo.—1 Pi. 3:7.
8 Na ngoi so mokonzi ti sewa ayeke fa ye na amolenge, a lingbi lo luti nganganga na ndo ti aye so Bible ahunda ti sara. Me a lingbi lo zia pëpe ti ndoye amolenge ti lo. Tongana a hunda ti se amolenge ni, a yeke nzoni lo sara ni me na ndoye. Ti ambeni molenge, a hunda ti tene a mû ngoi mingi si ala hinga ye so a hunda na ala ti sara. Tongana a yeke tongaso, a yeke nzoni babâ ni ahinga ti kanga bê. Tongana akoli amû tapande ti Jésus lakue, ala yeke sara si yanga-da ti ala aga mbeni ndo so zo ayeke na ngia ti duti dä nga mbeni ndo so ayeke bata zo. Asewa ti ala ayeke duti nzoni na lege ti yingo tongana ti so mbeni wasungo psaume asara tënë ni na yâ ti bia.—Diko Psaume 23:1-6.
9. Tongana ti Noé, kusala wa akoli so ayeke aChrétien ayeke na ni? Nyen la ayeke mû maboko na ala ti sara ni?
9 Noé ayeke nga mbeni nzoni tapande teti amokonzi ti sewa so ayeke aChrétien. Lo yeke na fini lani na alango ti nda ni ti dunia ti ngoi ti lo. Me Jéhovah ‘abata lo na ambeni zo mbasambala na ngoi so lo ga na kota ngu so apika na ndo ti mbeni dunia ti azo so akpe Nzapa pëpe.’ (2 Pi. 2:5). Noé ayeke na kusala ti mû maboko na sewa ti lo ti sö kuâ na ngoi ti kota ngu nzapa so apika. Dutingo ti amokonzi ti sewa so ayeke aChrétien na alango ti nda ni so ayeke tongana ti Noé (Mat. 24:37). A yeke biani kota ye ti tene ala manda tapande ti “berger so ayeke nzoni mingi” nga ala sara kue ti sara ye tongana ti lo!
Awali, ala ‘sara si da ti ala’ akpengba
10. Ti tene mbeni wali awoko tere ti lo na gbe ti koli ti lo aye ti tene nyen?
10 Bazengele Paul atene: “Zia awali awoko tere na gbe ti akoli ti ala tongana ti so ala yeke woko tere na gbe ti Seigneur.” (aÉph. 5:22). Tënë so ayeke pëpe mbeni tënë so akiri na nengo ti zo na gbe ni. Kozoni si tâ Nzapa asara kozo wali, Ève, lo tene: “A yeke nzoni zo aduti gi lo oko pëpe; fade Mbi sara oko teti lo, so alingbi na lo, ti sara na tere ti lo.” (Gen. 2:18). Tënë so atene “ti sara na tere ti lo” nga na tënë so atene “so alingbi na lo” ayeke biani mbeni kua so alingbi na gonda. Atënë so afa so lo yeke mû maboko na koli ti lo na ngoi so koli ni ayeke sara akusala ti lo ti yâ ti sewa.
11. Na lege wa mbeni nzoni wali ayeke ‘sara si da ti lo’ akpengba?
11 Mbeni nzoni wali ayeke sara kua ndali ti nzoni ti azo ti da ti lo. (Diko aProverbe 14:1.) Nde na wali ti buba so ayeke ne pëpe komandema so Nzapa azia na sese, wali ti ndara ayeke bâ ni na nene ni mingi. Ahon ti fa na gigi bibe ti kpengba-li nga na ti sarango gi ye so bê ti zo wani aye so a yeke wara ni mingi na yâ ti dunia so, lo yeke woko tere ti lo na gbe ti koli ti lo (aÉph. 2:2). Wali so li ti lo ayeke dä pëpe ayeke nduru ti tene sioni tënë na ndo ti koli ti lo, me wali ti ndara ayeke sara kue si amolenge ti lo nga na tanga ti azo ane koli ti lo mingi. Mara ti wali tongaso ayeke sara kue ti bâ na nene ni komandema ti koli ti lo na lege so lo yeke gi pëpe ti diko tënë lakue na tere ti lo wala ti papa na lo. A ndu nga tënë ti sarango kusala nzoni na nginza. Wali ti buba ayeke nduru ti buba nginza so sewa ni asara kua ngangu ti wara ni. Wali so ayeke mû maboko na koli ti lo ayeke ti lo tongaso pëpe. Lo yeke sara kua maboko na maboko na koli ti lo na ndo ti tënë ti nginza. A hinga lo tongana zo so ayeke sara ye na hange nga so ayeke buba nginza kirikiri pëpe. Lo yeke pusu pëpe koli ti lo ti sara kua ahon ndo ti so lo yeke sara ka.
12. Nyen la mbeni wali alingbi ti sara ti mû maboko na sewa ti lo si ‘lê ti ala angbâ na zingo ni’?
12 Mbeni nzoni wali ayeke mû maboko na sewa ti lo si ‘lê ti ala angbâ na zingo ni’ na lege so lo yeke mû maboko na koli ti lo na fango ye na amolenge na ndo ti Jéhovah (aProv. 1:8). Lo yeke mû maboko ti tene kapa ti Mandango tënë ti Nzapa na sewa aduti dä. Na ndo ni, lo yeke mû maboko na koli ti lo na ngoi so koli ni amû wango na amolenge ti ala wala lo se ala. Lo yeke tâ nde mingi na wali so ayeke sara pëpe kua maboko na maboko na koli ti lo nga so amolenge ti lo ayeke bâ pasi na lege ti mitele nga na lege ti yingo!
13. Ngbanga ti nyen a yeke kota ye ti tene wali amû maboko na koli ti lo na yâ ti aye so andu kusala ti Jéhovah?
13 Wali so ayeke mû maboko na koli ti lo, bibe ti lo ayeke tongana nyen tongana koli ti lo ayeke sara akusala na yâ ti congrégation? Lo yeke biani na ngia! Atâa koli ti lo ayeke wakua ti mungo maboko, wala ancien, wala peut-être membre ti Komite so abâ lege ti songo ti aita na awanganga, wala Komite so ayeke bâ lege ti lekengo aDa ti Royaume, lo yeke na ngia ti tene koli ti lo asara kusala so. Mungo maboko na koli ti lo atâa na lege ti tënë ti yanga ti lo wala na sarango ambeni ye ayeke hunda ti tene lo dö ambeni ye lo zia. Me lo hinga so, so koli ti lo abi tere ti lo na yâ ti akusala ti Jéhovah ayeke mû maboko na sewa ni kue ti zia lê ti ala angbâ na zingo ni na lege ti yingo.
14. (a) Ye wa alingbi ti sara si a duti ngangu na mbeni wali ti mû maboko na koli ti lo? Tongana nyen la lo lingbi ti hon ndo ti kpale so? (b) Na lege wa wali ayeke sara si sewa ni kue aduti nzoni?
14 Ti duti mbeni nzoni wali so ayeke mû maboko na koli ti lo alingbi ti duti ngangu na mbeni wali tongana koli ni amû mbeni desizion so anzere na lo pëpe. Atâa so kue, nzoni wali ayeke fa na gigi “bibe ti dutingo na siriri nga ti sarango ye na ngangu pëpe” nga lo yeke sara kusala maboko na maboko na koli ni si desizion so lo mû ague nzoni (1 Pi. 3:4). Mbeni nzoni wali ayeke gi ti mû peko ti anzoni tapande ti awali ti giriri so akpe mbeto ti Nzapa. A lingbi ti duti awali tongana Sara, Ruth, Abigaïl nga na Marie mama ti Jésus (1 Pi. 3:5, 6). Lo yeke mû nga tapande ti ambakoro-wali ti ngoi ti e so “asara ye tongana azo so akpe mbeto ti Nzapa”. (Tite 2:3, 4). Tongana wali so ayeke nzoni wali andoye koli ti lo nga lo ne lo, lo yeke sara si mariage ti ala aga nzoni nga sewa ni kue ayeke duti nzoni. Da ti lo ayeke duti mbeni ndo so zo ayeke na ngia ti duti dä nga mbeni ndo so ayeke bata zo. Ti koli so aye Jéhovah nga ayeke sara kua ngangu teti lo, ngere ti wali ti lo so ayeke mû maboko na lo ayeke kota mingi!—aProv. 18:22.
Amaseka, ala ‘zia lê ti ala na ndo ti aye so lê ayeke bâ pëpe’
15. Tongana nyen la amolenge alingbi ti sara kusala na tere ti babâ na mama ti ala tongaso si sewa ti ala azia ‘lê ti ala angbâ na zingo ni’?
15 Tongana nyen la amolenge alingbi ti sara kusala na tere ti ababâ na amama ti ala tongaso si sewa ti ala azia ‘lê ti ala angbâ na zingo ni’ na lege ti yingo? Gbu li na ndo ti futa so Jéhovah azia na gbele mo. Peut-être a to nda ni na kete ti mo, babâ na mama ti mo afa na mo afoto so afa tongana nyen fini ayeke duti ande na yâ ti Paradis. Tongana mo yeke kono, peut-être ala sara kua na Bible nga na ambeti ti e ti mû maboko na mo ti bâ na yâ ti li ti mo tongana nyen azo ayeke duti ande na fini lakue lakue na yâ ti fini dunia. Ti zia lê ti mo angbâ gi na ndo ti kusala so mo yeke sara na Jéhovah nga ti leke fini ti mo alingbi na ni ayeke mû maboko na mo ti ‘zia lê ti mo angbâ na zingo ni’.
16, 17. Nyen la amaseka alingbi ti sara ti kpe loro ti fini ti wara futa ni?
16 Bâ na nene ni atënë ti bazengele Paul so ayeke na 1 aCorinthien 9:24. (Diko ni.) Lo haka kusala so e yeke sara na Jéhovah na mbeni mandako ti kpengo loro nga fini ti lakue lakue na futa ni. Kpe loro ti fini na bibe ti warango ni. Duti na mbeni fini so ayeke mû lege na mo ti wara futa ni so ayeke fini ti lakue lakue. Azo mingi azia si tombango peko ti aye ti mitele agboto lê ti ala yongoro na futa ni. So ye ti buba! Ti mû fini ti mo ti gi gi na amosoro ayeke ga na mo tâ ngia pëpe. Aye so mo lingbi ti vo na nginza ayeke gi teti kete ngoi. Me, zia lê ti mo na ndo ti “aye so lê ayeke bâ pëpe.” Ngbanga ti nyen? Ngbanga ti so “aye so lê ayeke bâ pëpe ayeke ti lakue lakue.”—2 aCor. 4:18.
17 Aye ti nzoni so Royaume ayeke ga na ni ayeke na popo ti “aye so lê ayeke bâ pëpe.” Leke fini ti mo na mbeni lege so ayeke sara si mo wara aye ti nzoni so. Mo yeke wara tâ ngia tongana mo mû fini ti mo ti sara na kusala ti Jéhovah. Ti sara na tâ Nzapa ayeke mû lege na mo ti wara aye so mo zia na gbele mo ti wara na yâ ti kete ngoi nga na ati so mo leke ti wara na yâ ti ngoi so ayeke ga.a Ti zia na gbele mo aye ti yingo so mo lingbi ti si dä biani ayeke mû lege na mo ti zia lê ti mo gi na ndo ti kusala ti Nzapa tongaso si mo wara futa ni so ayeke fini ti lakue lakue.—1 Jean 2:17.
18, 19. Tongana nyen la mbeni maseka alingbi ti bâ wala lo yeke na kpengba songo na Jéhovah?
18 Amaseka, kozo ye so ala lingbi ti sara ti mû lege ti fini ayeke ti maï songo ti ala na Jéhovah. Mo sara ni awe? Hunda tere ti mo: ‘Mbi yeke zo so aye aye ti yingo wala mbi yeke sara akusala ti Jéhovah gi ndali ti babâ na mama ti mbi? Mbi yeke gi ti duti na asarango ye so ayeke sara si mbi nzere na lê ti Nzapa? Aye so mbi yeke sara ti voro na Jéhovah, aye tongana sambela, mandango ye, guengo na abungbi nga na fango tënë; mbi yeke sara ngangu ti sara ni lakue? Mbi yeke ga nduru na Nzapa na lege so mbi yeke maï mbeni kpengba songo na lo?’—Jacq. 4:8.
19 Gbu li na ndo ti tapande ti Moïse. Atâa so Moïse akono na popo ti awande, lo ye ti tene azo ahinga lo tongana mbeni wakua ti Jéhovah, me pëpe tongana molenge ti molenge ti Pharaon ti wali. (Diko aHébreu 11:24-27.) Ala aChrétien so ade maseka, a lingbi ala nga kue ala leke na bê ti ala ti ngbâ ti sara na Jéhovah na bê ti ala kue. Na sarango tongaso, ala yeke wara tâ ngia, fini ti ala ayeke ga nzoni laso nga ala yeke na beku ti gbu “fini so ayeke tâ fini ni biani.”—1 Tim. 6:19.
20. Na yâ ti loro so azo ayeke kpe ti wara fini, azo wa la ayeke wara futa ni?
20 Na ngoi ti amandako ti kpengo loro ti giriri, gi zo oko la ayeke sö benda. Me ti kpengo loro ti wara fini ayeke tongaso pëpe. Nzapa aye “si mara ti azo nde nde kue asö fini ti ala na ala si na tâ hingango ye na ndo ti tâ tënë.” (1 Tim. 2:3, 4). Ambeni zo akpe loro so kozoni na mo na ala sara ni nzoni nga ambeni ayeke kpe loro ni legeoko na mo na ndembe so (aHéb. 12:1, 2). A yeke azo kue so akpe loro ni juska na nda ni la ayeke wara futa ni. Ni la, sara kue ti wara futa ni!
21 ‘Kota lâ ti Jéhovah so amû mbeto mingi’ ayeke si ande biani (Mal. 4:5). A yeke nzoni asewa ti aChrétien aku tere ti ala na lango ni so. A yeke nzoni azo kue ti yâ ti sewa asara kusala so Bible afa ndali ti zo oko oko. Mbeni ye nde wa mo lingbi ti sara ti lango pëpe na lege ti yingo nga ti kpengba songo ti mo na Nzapa? Article ti peko ayeke sara tënë na ndo ti aye ota so ayeke sara si azo kue ti yâ ti sewa aduti nzoni na lege ti yingo.
[Kete tënë na gbe ni]
a Bâ Tour ti Ba Ndo ti 1 novembre 2010, lembeti 20-25; 15 juillet 2004, lembeti 21-23.
Mo manda nyen?
• Ngbanga ti nyen a yeke kota ye ti tene asewa so ayeke aChrétien azia ‘lê ti ala angbâ na zingo ni’?
• Na lege wa koli alingbi ti mû tapande ti Berger so ayeke nzoni mingi?
• Nyen la mbeni nzoni wali alingbi ti sara ti mû maboko na koli ti lo?
• Tongana nyen la amaseka alingbi ti mû maboko ti tene sewa ti ala alango pëpe na lege ti yingo?
21. Ye wa e yeke bâ ande na yâ ti article ti peko?
[Foto na lembeti 12]
Ti koli so akpengba na lege ti yingo, ngere ti wali ti lo so ayeke mû maboko na lo ayeke kota mingi