Ga nduru na Nzapa

Jéhovah ayeke na bê la?

TONGANA e tene En, mbeni hundango tënë ni alondo: Asarango ye ti e alingbi ti sara ye na ndo ti lo? So ti tene, asarango ye ti e alingbi ti zia ngia na bê ti Nzapa wala ti son bê ti lo? Ambeni wandara ti giriri atene Ên-ën. Ala tene so zo oko alingbi ti sara ye na ndo ti Nzapa pëpe na tongaso ye alingbi ti zia ngia na bê ti Nzapa pëpe wala ti son bê ti lo pëpe. Me ye so Bible afa ayeke ti lo nde. Bible afa so Nzapa ayeke bâ mawa ti e nga lo yeke bi bê ti lo mingi na ndo ti aye so e yeke sara. Gbu li na ndo ti atënë so ayeke na Psaume 78:40, 41.

Psaume 78 afa tongana nyen la Nzapa asara ye na mbage ti mara ti Israël ti giriri. Na pekoni so lo zi ala lani na ngbâa na sese ti Égypte, Jéhovah azi lege na ala ti lë mbeni kpengba songo na lo. Lo tene so tongana ala sara ye lakue alingbi na andia ti lo, ala yeke ga ‘ye ti Lo mveni’ nga lo yeke sara kusala na ala na mbeni lege so ayeke pendere mingi ti sara si ye so lo leke ti sara aga tâ tënë. Azo ti mara ni ayeda na ala lï na yâ ti mbele ti Ndia. Ala sara ye lani alingbi na yanga so ala mû?​—Exode 19:3-8.

Wasungo psaume ni atene: “Ala handa lo na yando.” (Versê 40). Versê 41 atene: “Ala kiri ala handa Nzapa.” Bâ so wasungo psaume atene so ala ke yanga na peko ti tere. Kengo yanga ti ala so ato nda ni lani hio mingi na yando na pekoni so a zi ala na sese ti Égypte. Azo ni akomanse ti diko tënë na gbe ti go ti ala na tere ti Nzapa, ala yeke hunda tere ti ala wala Nzapa ayeke na ngangu ti bata ala nga ala yeke hunda tere ti ala wala lo ye ti sara ni (Nombre 14:1-4). Mbeni buku so asara tënë na ndo ti Bible atene so mbeni lege ti kiri na peko ti tënë “ala handa lo” ayeke “ala sara si bê ti ala akpengba na tere ti Nzapa” wala “ala tene ‘Ên-ën’ na Nzapa.” Ye oko, na nzoni bê, Jéhovah apardone ala na ngoi so ala fa so ala changé bê ti ala. Me na pekoni ala kiri na yâ ti ngbene sarango ye ti ala na ala kiri ake yanga, na ala ngbâ ti sara ni ti gue na ni.​—Psaume 78:10-19, 38.

Bê ti Jéhovah ayeke lani tongana nyen na angoi kue so azo ti mara ti Israël ake yanga ti lo? Versê 40 atene: “Ala mû vundu na Lo.” Mbeni bible atene so ala “zia ngonzo na bê ti lo.” Mbeni buku so asara tënë na ndo ti Bible atene: “Tënë so aye ti tene so sarango ye ti aHébreu ason bê ti zo, legeoko tongana ti so sarango ye ti mbeni molenge ti kengo yanga ason bê ti zo.” Gi tongana ti so mbeni molenge ti kpengba-li alingbi ti mû vundu na babâ na mama ti lo, azo ti Israël so ake yanga ‘amû vundu na Lo Ti Nzoni-kue ti Israël.’​—Versê 41.

Nyen la e lingbi ti manda na lege ti psaume so? A dë bê ti e ti bâ so Jéhovah aye awakua ti lo ngangu nga lo yeke gi nduru ti dö ala ti zia pëpe. Na oko ngoi ni, ti bâ so Jéhovah ayeke na bê nga so asarango ye ti e alingbi ti sara ye na ndo ti lo apusu e ti gbu li ti e. So mo hinga so sarango ye ti mo alingbi ti sara ye na ndo ti Nzapa asara nyen na ndo ti mo? A pusu mo ti gi ti sara ye so ayeke na lege ni? Ahon ti ngbâ ti sara siokpari nga ti zia vundu na bê ti Jéhovah, e lingbi ti soro ti ngbâ ti sara ye so ayeke na lege ni na ti zia ngia na bê ti lo. A yeke tâ ye so lo hunda na awakua ti lo la: “Molenge ti mbi, mo duti na ndara na mo mû ngia na bê ti mbi.” (aProverbe 27:11). Mbeni nzoni ye so e lingbi ti mû na Jéhovah ti hon dutingo na fini na mbeni lege so azia ngia na bê ti lo ayeke dä pëpe.

[Kete tënë na lembeti 32]

Mbeni nzoni ye so e lingbi ti mû na Jéhovah ti hon dutingo na fini na mbeni lege so azia ngia na bê ti lo ayeke dä pëpe.