Bâ ye so Bible afa
Mo lingbi ti sara nyen ti ga nduru na Nzapa?
Article so ayeke sigigi na ahundango tënë so mo lingbi ti hunda tere ti mo na ni nga a yeke fa na mo ndo so mo lingbi ti wara akiringo tënë ni dä na yâ ti Bible ti mo. A yeke nzere mingi na aTémoin ti Jéhovah ti sara lisoro na mo na ndo ti akiringo tënë ni.
1. Nzapa ayeke mä asambela kue?
Jéhovah atisa azo ti amara kue ti ga nduru na lo na lege ti sambela (Psaume 65:3). Me lo yeke mä pëpe asambela kue. Na tapande, na ngoi so azo ti Israël angbâ ti sara ye ti sioni, Nzapa ake ti mä asambela ti ala (Ésaïe 1:15). Nga, lege ti sambela ti mbeni koli alingbi ti kanga tongana lo sara sioni na wali ti lo (1 Pierre 3:7). Ye oko, Nzapa ayeke mä même sambela ti azo so asara akota siokpari tongana ala changé bê ti ala.—Diko 2 Chronique 33:9-13.
2. A lingbi e sambela tongana nyen?
A yeke mbeni kota pasa la e yeke na ni ti sambela Nzapa nga a yeke mbeni ye so e yeke sara ti voro na lo. Tongaso, a lingbi e sambela gi Jéhovah oko (Matthieu 4:10; 6:9). Teti so e yeke awasiokpari nga na lege ti ngangu ti e wani e lingbi pëpe ti ‘ga na Babâ’, a lingbi e sambela na iri ti Jésus ndali ti so lo la Nzapa amû lo tongana “lege ni”. (Jean 14:6). Jéhovah aye pëpe si e kiri gi na ndo ti asambela so e manda ni na li wala ati so a sû ni na lê ti mbeti. Me, lo ye si atënë ti sambela ni alondo na bê ti e.—Diko Matthieu 6:7; aPhilippien 4:6, 7.
Wasarango e alingbi même ti mä asambela so e tene na yâ ti bê ti e (1 Samuel 1:12, 13). Lo hunda na e ti sambela lo na ngoi kue, na tapande na ndapre nga na lakui, na angoi ti tengo kobe nga na angoi so e yeke na yâ ti akpale.—Diko Psaume 55:23; Matthieu 15:36.
3. Ngbanga ti nyen aChrétien ayeke bungbi oko ti voro Nzapa?
Ti ga nduru na Nzapa ayeke kete ye pëpe teti so e yeke na popo ti azo so amä na bê na Nzapa pëpe nga ala bâ zendo so lo mû ti ga na siriri na ndo ti sese tongana ye ti ngia (2 Timothée 3:1, 4; 2 Pierre 3:3, 13). Ni la, e yeke na bezoin ti bungbi oko na amba ti e aChrétien si e wara ngangu.—Diko aHébreu 10:24, 25.
Mo lingbi ti ga nduru na Nzapa tongana mo sara kamarade na azo so andoye Nzapa. Abungbi ti aTémoin ti Jéhovah ayeke mû lege na zo ti kpengba na lege ti mabe ti amba ti lo.—Diko aRomain 1:11, 12.
4. Mo lingbi ti sara nyen ti ga nduru na Nzapa?
Gbungo li na ndo ti aye so mo manda na yâ ti Bible ayeke mû lege na mo ti ga nduru na Jéhovah. Gbu li na ndo ti aye so lo sara, afango lege so lo yeke fa nga na azendo ti lo. Tongana mo gbu li ti mo na ndo ti ndoye ti Nzapa nga na ndara ti lo na mo sambela, a yeke pusu mo ti kiri ti bâ ni na nene ni mingi.—Diko Josué 1:8; Psaume 1:1-3.
Mo lingbi ti ga nduru na Nzapa gi tongana mo zia bê ti mo kue na lo, so ti tene, tongana mo mä na bê na lo. Me mabe ayeke tongana mbeni keke so a lingbi mo zia ngu dä lakue si amaï. A lingbi mo gbu li lakue na ndo ti aye so mo manda tongaso si mabe ti mo akono.—Diko 1 aThessalonicien 5:21; aHébreu 11:1, 6.
5. Tongana mo ga nduru na Nzapa, ye ti nzoni wa mo yeke wara?
Jéhovah ayeke bâ lege ti azo so andoye lo. Lo yeke bata ala yongoro na aye kue so alingbi ti buba mabe ti ala nga ti sara si ala girisa beku ti ala ti fini ti lakue lakue (Psaume 91:1, 2, 7-10). Lo gboto mê ti e na ndo ti aye so alingbi ti buba seni ti e nga na ngia ti e. Jéhovah afa na e lege ti dutingo na fini so ayeke nzoni ahon atanga ni kue.—Diko Psaume 73:27, 28; Jacques 4:4, 8.
Ti hinga atënë mingi na ndo ni, bâ chapitre 17 ti buku so, Bible afa nyen biani?, so aTémoin ti Jéhovah asigigi na ni.