4 Nzapa asara ye na lege ni pëpe: A yeke tâ tënë la?

Peut-être mo mä a tene: “Dunia so kue ayeke na tïtî Nzapa, na aye kue so asi ayeke lo la lo yeda. So dunia ni asi singo na tënë ti mara, aye ti kirikiri nga na sarango ngangu na zo, a yeke biani Nzapa la ayeke na gunda ni.”

Ye so Bible afa: Nzapa la ayeke na gunda ti aye ti kirikiri so ayeke na yâ ti dunia so pëpe. Bible asara tënë ti Jéhovah atene: “Kusala ti Lo alingbi kue, lege ti Lo kue ayeke mbilimbili.”​—Deutéronome 32:4.

Nzapa ayeke mû ye mingi na azo kue, même na azo so na bango ala ala lingbi ti tene a sara nzoni bê na ala pëpe. Na tapande, “lo sara si lâ ti lo asu na ndo ti azo ti sioni nga na azo ti nzoni. Na lo sara si ngu-nzapa apika na ndo ti azo ti mbilimbili nga na azo ti mbilimbili pëpe.” (Matthieu 5:45). Lo sara ye na azo ti amara kue nga na ti akodoro kue na lege ni tongana ti so Kusala 10:34, 35 afa ni. Versê ni atene: “Nzapa ayeke sara kangbi na popo ti azo pëpe, me na yâ ti amara kue, zo so akpe mbeto ti lo na asara ye so ayeke mbilimbili, lo yeke nzere na lê ti Nzapa.”

Tongaso, zo wa la ayeke na gunda ti aye ti kirikiri so? Azo mingi asoro ti sara ye na lege ni pëpe, ala mû tapande ti mbilimbili ti Nzapa pëpe (Deutéronome 32:5). Nga, Bible afa so Nzapa azia lege na wato ti lo, Zabolo, ti komande na ndo ti duniaa (1 Jean 5:19). Ye oko, ngoi so Nzapa azia na Zabolo ti komande aga nduru ti hunzi awe. Lo zia na sese awe ye so lo yeke mû ni ti “futi akusala ti Zabolo.”​—1 Jean 3:8.

Ti hinga tâ tënë ayeke mû maboko na mo: Mo lingbi ti gi bê ti mo na mango tënë ti petengo goro, sarango ngangu na zo nga na aye ti kirikiri so mo bâ mo tene ayeke hunzi ti lo lâ oko pëpe. Ti hinga ye so ayeke na gunda ti akpale so ayeke mû maboko na mo ti hinga ngbanga ti nyen aye ayeke tambela nzoni pëpe nga ndani so angangu kue so azo ayeke sara ti tene dunia aga nzoni ayeke tï gi tingo na ngu (Psaume 146:3). Ahon ti mû ngoi nga na ngangu ti mo kue ti sara ti tene aye na yâ ti dunia so agbian aga nzoni (même tongana a ga nzoni a yeke gi teti kete ngoi) mo lingbi ti duti na nzoni beku teti kekereke na ziango bê ti mo kue na ndo ti azendo ti Nzapa.​—Apocalypse 21:3, 4.

Tongana e hinga tâ ye so ayeke na gunda ti aye ti kirikiri, a yeke mû maboko na e mbilimbili na ngoi so mbeni ye ti ngangu asi na e wala na mbeni zo so e ye lo mingi. Na ngoi so a sara ye na e na lege ni pëpe, e lingbi ti toto tongana ti wakua ti Nzapa, Habakuk, so atene: “Ndia ayeke na ngangu pëpe, na fango ngbanga ti mbilimbili ayeke lâ oko pëpe.” (Habakuk 1:4). Nzapa asuku pëpe na Habakuk ndali ti tënë so lo tene so. Me, Nzapa adë bê ti Habakuk so lo zia mbeni ngoi awe ti bâ lege ti tënë so nga lo mû maboko na Habakuk ti duti na ngia na yâ ti ngoi ti ngangu so (Habakuk 2:2-4; 3:17, 18). Legeoko nga, ziango bê kue na zendo so Nzapa amû ti zi aye ti kirikiri ayeke mû maboko na mo ti duti nzoni nga ti wara siriri ti bê na yâ ti dunia so ayeke sara ye na lege ni pëpe.

[Kete tënë na gbe ni]

[Kete tënë na lembeti 7]

Nzapa la ayeke biani na gunda ti pasi nga na aye ti kirikiri?

[Lingu ti foto na lembeti 7]

© Sven Torfinn/​Panos Pictures