KIRINGO TËNË NA AHUNDA TI AZO

Nzapa ayeke tongana nyen?

Nzapa ayeke yingo, so ti tene zo alingbi ti bâ lo ape. Lo sara ayayu, sese nga na aye kue so ayeke na fini. A leke lo lekengo ape, lo yeke gi dä lakue (Psaume 90:2). Nzapa aye si azo agi lo nga ala hinga tâ tënë na ndo ti lo.​—Diko Kusala 17:24-27.

Nzapa ayeke na iri, na e lingbi ti hinga ni. E lingbi nga ti hinga ambeni sarango ye ti tere ti lo gi na bango aye so lo leke (aRomain 1:20). Me ti hinga lo Nzapa ni nzoni, a lingbi e diko Bible, so ayeke tënë ti yanga ti lo. Na yâ ni, a fa na e so Nzapa ayeke sara ye na ndoye.​—Diko Psaume 103:7-10.

Aye ti sioni so azo ayeke sara, Nzapa abâ ni tongana nyen?

Jéhovah, lo so asara azo, ake sarango ye ti sioni. Lo leke azo na image ti lo (Deutéronome 25:16). Ni la si mingi ti e aye nga sarango ye ti sioni ape. Nzapa la ayeke na peko ti aye ti sioni so e yeke bâ so ape. Lo mû na azo lani liberté ti soro ye so ala wani aye. Mawa ni ayeke so, mingi ti azo asara kua nzoni na liberté ni so ape nga ala yeke sara gi aye ti sioni. Ala zia vundu na bê ti Nzapa.​—Diko Genèse 6:5, 6; Deutéronome 32:4, 5.

Jéhovah aye sarango ye ti mbilimbili, ni la lo yeke kanga ande gi lê na ndo ti asioni sarango ye ngbii ape (Psaume 37:28, 29). Bible atene Nzapa aga nduru awe ti futi asioni sarango ye kue.​—Diko 2 Pierre 3:7-9, 13.