5 Nzapa ayeda na alege kue so a yeke voro na lo: A yeke tâ tënë la?

Peut-être mo mä a tene: “Tongana ti so alege so ague na mbeni ndo ayeke mingi, alege so ague na Nzapa ayeke nga mingi. A lingbi zo oko oko amû lege ti lo so ague na Nzapa.”

Ye so Bible afa: A lingbi e voro Nzapa na bê ti e kue, e kpe ti sara ye gi ndali ti lê ti azo nga ti gi ti handa lê ti azo. Jésus atene na akota zo ti nzapa ti ngoi ti lo ndani so Nzapa ake ala, lo tene: “Ala awahandango lê ti zo so, a yeke na lege ni si Ésaïe atene prophétie na ndo ti ala, tongana ti so Mbeti ti Nzapa atene: ‘Azo so agonda mbi na yanga ti ala, me bê ti ala ague yongoro mingi na mbi.’” (Marc 7:6). Ye oko, a yeke gi vorongo Nzapa na bê ti e kue la ayeke sara si Nzapa ayeda na vorongo ti e pëpe.

Jésus afa ni polele tongana lo fa ye so ayeke na lege ni pëpe na yâ ti aye so akota zo ti nzapa so nga na azo so amû peko ti ala ayeke sara ti voro na Nzapa. Lo tene atënë ti Nzapa so na ndo ti ala: “A yeke senge senge si ala ngbâ ti voro mbi, ngbanga ti so aye so ala yeke fa ayeke gi acommandement so alondo na azo.” (Marc 7:7). Vorongo so ala yeke voro na Nzapa ayeke “senge senge” ndali ti so ala bâ angobo ti akotara ti ala na nene ni ahon aye so Nzapa ahunda na ala ti sara.

Azo atene so anzoni lege so ague na Nzapa ayeke mingi, me Bible afa ti lo so lege ni ayeke gi oko. Matthieu 7:13, 14 atene: “Ala lï na kete yanga ti gbagba ni; teti lege so ayeke gue na futingo ayeke kota nga lê ni akono, na gbâ ti azo si ayeke hon dä; me lê ti lege so ague na fini akono pëpe na yanga ti gbagba ni ayeke kete, na azo mingi pëpe si ayeke wara ni.”

Ti hinga tâ tënë ayeke mû maboko na mo: Tara ti bâ so mo mû anze mingi ti leke tere ti mo ti sara mandako ti kpengo loro ti marathon, na mo kpe loro ni mo sö benda, me a tene na mo so mo yeke wara matabisi ni pëpe ndali ti so mo doro ndia ti kpengo loro ni so mo hinga ni pëpe. Mo lingbi ti bâ so angangu kue so mo sara ayeke senge senge. Mara ti ye tongaso alingbi ti si na vorongo so e yeke voro na Nzapa?

Bazengele Paul ahaka vorongo so e yeke voro na Nzapa na mandako ti kpengo loro. Lo tene: “Tongana mbeni zo ayeke sara mandako na yâ ti angia ti wanguru, lo yeke wara couronne ni gi tongana lo sara mandako ni alingbi na andia ni si.” (2 Timothée 2:5). E yeke nzere na lê ti Nzapa tongana e voro lo “alingbi na andia ni”, so ti tene na lege so lo yeda na ni. Legeoko tongana ti so mbeni zo ti kpengo loro alingbi pëpe ti sö benda na kpengo loro tongana ti so bê ti lo aye, e nga kue e lingbi pëpe ti nzere na lê ti Nzapa tongana e wani la e soro lege so e yeke voro na Nzapa.

Ti nzere na lê ti Nzapa, a lingbi e zi na yâ ti vorongo ti e amvene kue so azo atene na ndo ti lo. Jésus atene: “Atâ zo ti vorongo Nzapa ayeke voro Babâ na yingo nga na tâ tënë.” (Jean 4:23). A yeke na lege ti Bible la e yeke hinga tâ lege so ague na Nzapa.​—Jean 17:17.a

[Kete tënë na gbe ni]

[Kete tënë na lembeti 8]

Abungbi ti vorongo Nzapa kue afa na azo ti voro Nzapa na lege so lo ye?