Mû tapande ti Jésus so alango pëpë

“Ala lango pëpe na ala ngbâ ti sambela.”​—MAT. 26:41.

MO YEKE KIRI TËNË TONGANA NYEN?

Tongana nyen la asambela ti e ayeke fa so e lango pëpe?

Na yâ ti aye wa e yeke fa so lê ti e angbâ na zingo ni ti fa tënë?

Ngbanga ti nyen a yeke kota ye ti lango pëpe na ngoi ti tara? E yeke sara ni tongana nyen?

1, 2. (a) Na ndo ti tapande ti Jésus so alango pëpe, ahundango tënë wa alingbi ti londo? (b) Tapande ti Jésus so alingbi kue alingbi ti mû maboko na azo so ayeke na siokpari? Mû mbeni tapande.

MO LINGBI ti hunda tere ti mo: ‘Zo alingbi biani ti mû tapande ti Jésus so alango pëpe? Jésus ayeke ti lo zo so alingbi kue! Nga, na ambeni ngoi, lo lingbi ti hinga ambeni ye kozo si aye ni asi, même angu saki mingi kozoni. Lo yeke biani na bezoin ti lango pëpe?’ (Mat. 24:37-39; aHéb. 4:15). Zia e sara tënë na ndo ti ahundango ndo so kozoni awe si e bâ na lege wa a yeke mbeni kota tënë nga ndani so a lingbi e sara ye hio.

² Tapande ti mbeni zo so alingbi kue alingbi ti mû maboko na azo so ayeke na siokpari na yâ ti tere ti ala? En, ndali ti so zo alingbi ti manda ye na mbage ti mbeni nzoni wafango ye nga na lege ti tapande ti lo. Na tapande, tara ti bâ mbeni zo so ayeke manda ye fini fini na ndo ti pikango kokora. Lo lingbi pëpe ti pika alê ti kokora ni nzoni ti tene akpo ye so lo ye ti pika, me lo yeke ngbâ ti manda ye mingi na ndo ni nga ti ngbâ ti tara ni. Ti gue na li ni, lo yeke manda nzoni tapande ti maître ti lo, so ayeke mbeni kpengba zo ti pikango kokora. Lo yeke sara ngangu ti bâ lege so maître ti lo ayeke luti na ni, so lo yeke zia na amaboko ti lo nga lo yeke gbu na kamba ti kokora ni. Kete na kete, zo ti mandango ye ni ayeke bâ wala a lingbi lo gboto yâ ti kamba ni ngangu wala lo gboto ni ahon ndo ni pëpe; lo yeke bi nga bê ti lo na ndo ti pupu nga lo yeke ngbâ ti sara ngangu ti gue na ni. Na mungo peko ti ye so lo bâ maître ti lo na sarango ni, na nda ni lo yeke pika alê ti kokora ti lo ti tene aga nduru nduru mingi na ye so lo ye ti pika ni. Legeoko nga, e yeke ngbâ ti sara ngangu ti sara ye tongana aChrétien na mungo peko ti afango ye ti Jésus nga na mungo tapande ti lo so alingbi kue.

3. (a) Tongana nyen la Jésus afa so a lingbi lo lango pëpe? (b) Nyen la e yeke bâ na yâ ti article so?

³ Me ti lango pëpe, e lingbi ti tene nyen na ndo ni? Jésus ayeke na bezoin ti lango pëpe? Biani, lo yeke na bezoin ti lango pëpe. Na tapande, na ndangba bï ti lo na sese, lo wa adisciple be-ta-zo ti lo, lo tene: “Mbi na ala kue e lango pëpe.” Lo kiri lo tene: “Ala lango pëpe na ala ngbâ ti sambela lakue, tongaso si ala tï na yâ ti tara pëpe.” (Mat. 26:38, 41). Atâa so Jésus ayeke zo so alango pëpe ngbene ye so lo to nda ti kusala ti lo, a yeke mbilimbili na yâ ti angoi ti ngangu so la lo ye ti lango pëpe nga lo sara kue ti ngbâ nduru mingi na Babâ ti lo ti yayu. Lo hinga so adisciple ti lo ayeke nga na bezoin ti tene lê ti ala akpengba, gi na ngoi ni so pëpe me nga na yâ ti ngoi so ayeke ga. Tongaso, zia e bâ ndani so Jésus aye ti tene e lango pëpe. Na pekoni, e yeke bâ aye ota so na yâ ni e lingbi ti mû tapande ti Jésus so alango pëpe na yâ ti aye so e yeke sara na yâ ti fini ti e ti lâ oko oko.

NDANI SO JÉSUS AYE TI TENE E LANGO PËPE

4. Ti hinga pëpe ye so ayeke si kekereke nga ti lango pëpe ayeke aye use so kamba ayeke na popo ni. Kamba ni ayeke so wa?

⁴ Na nduru tënë, Jésus aye ti tene lê ti e angbâ na zingo ni ndali ti so e hinga ambeni ye pëpe nga na mbage e hinga ambeni ye. Na ngoi so Jésus ayeke lani zo na ndo ti sese, lo hinga aye kue so ayeke si ande kekereke? Ên-ën, ndali ti so na tâ be-ti-molenge lo tene: “Na ndo ti tënë ti lango ni so nga na ngbonga ni so, zo oko ahinga ni pëpe, atâa a-ange so ayeke na yayu, wala Molenge ni ahinga ni pëpe, me gi Babâ ni.” (Mat. 24:36). Na ngoi ni so, Jésus, “Molenge ni,” ahinga pëpe mbilimbili lawa la a yeke futi sioni dunia so. Ka ti e laso, e hinga aye kue so ayeke si ande kekereke? Biani, e hinga aye kue pëpe. E hinga pëpe lawa la Jéhovah ayeke tokua Molenge ti lo ti futi sioni dunia so. Tongana e hinga ni fade, e yeke biani na bezoin ti lango pëpe? Tongana ti so Jésus afa, nda ni ayeke si ande gi gbagburu tongaso sân ti tene zo aku tere ti lo na ni; ni la a lingbi e lango pëpe.​—Diko Matthieu 24:43.

5, 6. (a) So e hinga ye so ayeke si kekereke nga na ye so Nzapa aleke ti sara, na lege wa aye so apusu e ti lango pëpe? (b) Ngbanga ti nyen a yeke nzoni ye so e hinga na ndo ti Satan apusu e ti sara kue ti lango pëpe?

⁵ Na mbeni mbage, Jésus ahinga lani gbâ ti apendere ye so ayeke si ande na yâ ti ngoi so ayeke ga, me mingi ti azo so angoro lo ahinga atâ tënë so pëpe. Hingango ye ti e alingbi na ti Jésus pëpe, me grâce na lo, e hinga ye mingi na ndo ti Royaume ti Nzapa nga na aye so Royaume ni ayeke sara ande na yâ ti kete ngoi. Tongana e bâ ndo na tere ti e, atâa na ekole, na place ti kua, wala na yâ ti territoire so e yeke fa tënë dä, e bâ so mingi ti azo ahinga oko pëpe apendere tâ tënë so. Ye so ayeke nga mbeni raison ti tene e lango pëpe. Tongana ti Jésus, a lingbi lê ti e akpengba lakue, e gi alege kue so azi ti fa na azo ye so e hinga na ndo ti Royaume ti Nzapa. Alege oko oko kue so azi ayeke kota mingi, nga e ye pëpe ti zia mbeni ahon senge senge. Fini ti azo ayeke na yâ ti kpale!​—1 Tim. 4:16.

⁶ Jésus ahinga nga lani mbeni ye nde so apusu lo ti lango pëpe. Lo hinga so Satan ayeke gi alege kue ti tara lo, ti sara ye ti ngangu na lo nga ti sara si lo duti be-ta-zo mbeni pëpe. Sioni wato so ayeke gi lakue “mbeni ngoi so alingbi” ti tara Jésus (Luc 4:13). Lê ti Jésus akpengba lakue. Lo ye ti duti nduru ndali ti atara kue, atâa a yeke kangango lege wala sarango ye ti ngangu. A lingbi e nga kue e sara tongaso ape? E hinga so Satan ayeke sara ye lakue “tongana mbeni bamara so ayeke toto, na lo yeke gi mbeni zo ti te lo.” Ndani la Mbeti ti Nzapa awa aChrétien kue atene: “Ala zia li ti ala kpô, zia lê ti ala akpengba.” (1 Pi. 5:8). Me, e yeke sara ni tongana nyen?

E ZIA LÊ TI E AKPENGBA TI SAMBELA

7, 8. Wango wa Jésus amû na ndo ti sambela? Mara ti tapande wa la lo zia?

⁷ Bible afa so ti lango pëpe na lege ti yingo nga ti sambela ayeke aye so kamba ayeke na popo ni (aCol. 4:2; 1 Pi. 4:7). Kete na pekoni so Jésus ahunda na adisciple ti lo ti tene lo na ala kue alango pëpe, lo tene: “Ala lango pëpe na ala ngbâ ti sambela lakue, tongaso si ala tï na yâ ti tara pëpe.” (Mat. 26:41). Jésus aye ti tene so wango ti lo so andu gi ngoi ti ngangu so ala yeke na yâ ni so? Oko pëpe. Wango ti lo so ayeke mbeni ye so a lingbi e sara ye alingbi na ni na yâ ti fini ti e ti lâ oko oko.

⁸ Na ndo ti tënë ti sambela, Jésus ayeke nga mbeni nzoni tapande. Mo lingbi ti dabe ti mo so mbeni lâ lo mû mbeni bï kue ti sambela Babâ ti lo. Zia e tara ti bâ ye ni na yâ ti li ti e. (Diko Luc 6:12, 13.) Jésus ayeke peut-être nduru na gbata ti Capernaüm, ndo so lo sara kodoro dä nga so azo ni mingi ayeke sara kua ti gingo susu. Tongana ndo avuko, Jésus ague na li ti mbeni oko ti ahoto so tongana zo aduti kâ lo yeke bâ lê ti Kota Ngu ti Galilée. Na ngoi so lo yeke bâ ndo ni so ayeke vuko yeke yeke, peut-être lo bâ awâ ti lampe so ayeke za na yâ ti gbata ti Capernaüm nga na akete kodoro so ayeke na tere ni. Ye oko, na ngoi so Jésus ayeke sara tënë na Jéhovah, lo zia bê ti lo kue na ndo ti sambela ti lo. Lo sambela teti angbonga mingi. Lo bâ pëpe tongana nyen alumière so ayeke na gbe ni ayeke mingo oko na oko, lo bâ nga pëpe nze so ayeke hon yeke yeke na lê ti nduzu wala anyama so ayeke sigigi na bï ti gi ye ti te na yâ ti apere. Sambela ti lo aluti peut-être mingi na ndo ti kota desizion so ayeke na gbele lo: sorongo abazengele ti lo 12. E lingbi ti tara ti bâ Jésus so ayeke fa na Babâ ti lo abibe ti lo kue nga na agingo bê ti lo kue na ndo ti disciple oko oko na ngoi so lo yeke hunda na bê kue ti wara fango lege nga na ndara.

9. Nyen la e lingbi ti manda na lege ti tapande ti Jésus so asambela na mbeni bï kue?

⁹ Nyen la e lingbi ti manda na lege ti tapande ti Jésus? So a ye ti tene so a lingbi e mû angbonga mingi ti sambela? Ên-ën, teti so na nzoni bê Jésus asara tënë so na ndo ti adisciple ti lo, lo tene: “Yingo aye ti sara ye, me mitele awoko.” (Mat. 26:41). Ye oko, e lingbi ti mû tapande ti Jésus. Na tapande, tongana e ye ti mû adesizion kue so alingbi ti sara ye na ndo ti e, sewa ti e wala aita ti e na lege ti yingo, e yeke hunda Babâ ti e ti yayu kozoni si e mû adesizion ni? Na yâ ti asambela ti e e yeke fa nga so e bi bê ti e na ndo ti aita ti e so e na ala e yeke voro Jéhovah? Atënë ti yâ ti sambela ti e alondo na gbe ti bê ti e wala e yeke kiri gi na ndo ti a-oko tënë? Bâ nga so Jésus aye mingi ti duti lo oko ti sara tënë na Babâ ti lo. Na yâ ti dunia ti laso, so aye ayeke gue gi na loro, a yeke ngangu pëpe ti zia si aye so e yeke sara lâ na lâ asara si e girisa aye so ayeke kota ahon atanga ni. Ti mû mbeni ngoi ti sambela ngangu gi e oko ayeke sara si lê ti e akiri akpengba mingi na lege ti yingo (Mat. 6:6, 7). E yeke ga nduru mingi na Jéhovah, e yeke ye mingi ti kpengba songo ti e na lo nga e yeke kpe ti sara aye kue so alingbi ti buba yâ ni.​—Ps. 25:14.

E ZIA LÊ TI E AKPENGBA TI FA TËNË

10. Tapande wa afa so Jésus azia si lê ti lo angbâ na zingo ni ti gbu alege so azi ti fa tënë?

¹⁰ Lê ti Jésus akpengba na ndo ti kusala so Jéhovah amû na lo ti sara. Ambeni kua ayeke dä so zo ti sarango ni alingbi ti zia pensé ti lo na ndo ni pëpe me lo yeke wara kpale na pekoni pëpe. Me ambeni kua mingi ahunda ti tene zo azia li ti lo kpô na ndo ni nga lê ti lo akpengba dä, na kusala ti fango tënë ayeke biani tongaso. Lê ti Jésus akpengba lani na ndo ti kusala ti lo, lo yeke gi alege so azi ti fa nzoni tënë na azo. Na tapande, na ngoi so lo na adisciple ti lo asi na gbata ti Sychar na peko ti yongoro tambela so ala sara na ndapre, adisciple ni ague ti vo kobe. Jésus aduti nduru na dungu ti gbata ni ti wu tere ti lo, me lo zia si lê ti lo angbâ na zingo ni, na lo bâ mbeni lege so azi na lo ti fa tënë. Mbeni wali ti kodoro ti Samarie aga ti gboto ngu. Jésus alingbi fade lani ti soro ti wu tere ti lo. Lo lingbi ti gi ambeni raison ti ke ti sara lisoro. Ye oko, lo sara mbeni tënë so apusu wali ni ti sara lisoro na lo nga kpengba tënë so lo fa asara ye mingi na ndo ti fini ti azo mingi ti yâ ti gbata ni (Jean 4:4-26, 39-42). E lingbi ti sara kue ti sara ye tongana ti Jésus so alango pëpe, peut-être na sarango ngangu ti gi alege so azi ti fa nzoni tënë na azo so e yeke tingbi na ala lâ oko oko.

11, 12. (a) Jésus atene nyen na azo so ayeke gi ti gboto lê ti lo yongoro na kusala ti lo? (b) Tongana nyen la Jésus afa so lo sara ye ahon ndo ni pëpe tongana andu kusala ti lo?

¹¹ Na ambeni ngoi, na sioni bibe pëpe, ambeni zo agi ti gboto lê ti Jésus yongoro na kusala ti lo. Na Capernaüm, amiracle so Jésus asara ti kaï kobela asara si gbâ ti azo aye ti tene lo ngbâ na ala. Ye so ala sara so ayeke sioni pëpe. Me, kua ti Jésus ayeke ti fa tënë na “angasangbaga ti da ti Israël so agirisa”, me pëpe gi na mbeni gbata oko (Mat. 15:24). Tongaso lo tene na ala lo tene: “A lingbi mbi fa nga nzoni tënë ti royaume ti Nzapa na ambeni gbata nde, ngbanga ti so a yeke ndali ni si a tokua mbi.” (Luc 4:40-44). Biani, fini ti Jésus aluti gi na ndo ti kusala ti lo. Lo zia lege na mbeni ye oko pëpe ti gboto lê ti lo.

¹² So Jésus azia lê ti lo gi na ndo ti kusala ti lo so, lo sara ye ahon ndo ni wala lo ke aye ti nzoni ti gigi kue? So lo mû tere ti lo mingi na fango tënë aye ti tene so lo sara sanka ti anzoni ye so asewa ayeke na bezoin ni? Oko pëpe, Jésus ayeke mbeni nzoni tapande ti zo so ahinga ti zia aye oko oko na place ti ala. Gigi anzere na lo, nga lo yeke mû ngoi ti duti na akamarade ti lo ti sara anzoni lisoro. Lo bâ asewa na nene ni, lo yeke zia tere ti lo na place ti ala ti hinga abezoin nga na akpale ti ala, nga lo yeke nduru ti fa ndoye ti lo na mbage ti amolenge.​—Diko Marc 10:13-16.

13. Tongana nyen la e lingbi ti mû tapande ti Jésus so alango pëpe nga so ahinga ti zia aye na place ti ala tongana andu fango tënë ti Royaume?

¹³ Tongana e mû tapande ti Jésus so alango pëpe, na lege wa e lingbi ti sara kue ti sara ye ahon ndo ni pëpe? E yeke zia pëpe si dunia so agboto lê ti e yongoro na kusala ti e. Na sioni bibe pëpe akamarade nga na afami alingbi ti wa e ti kiri kete na peko na yâ ti kusala ti e ti fango tënë wala ti gi aye so ala bâ ni tongana aye so ayeke nzoni na yâ ti gigi ti zo. Ye oko, tongana e mû tapande ti Jésus, e yeke bâ fango tënë tongana kobe ti tengo ni (Jean 4:34). Fango tënë ayeke mû ngangu na e na lege ti yingo nga ayeke sara si e duti na ngia mingi. Me, e ye lâ oko pëpe ti sara ye ahon ndo ni, ti fa so e la e yeke mbilimbili mingi wala ti ke anzoni ye ti gigi kue. Tongana ti Jésus, e ye ti duti na ngia nga e ye ti duti awakua ti “Nzapa so ayeke na ngia” so ayeke zia aye oko oko na place ti ala.​—1 Tim. 1:11.

E ZIA LÊ TI E AKPENGBA NA ANGOI TI TARA

14. Na angoi ti tara nyen la azo ayeke ka nduru ti sara so a lingbi e kpe ni? Ngbanga ti nyen?

¹⁴ Tongana ti so e bâ, a yeke na ngoi so Jésus ayeke na gbele ngangu tara la lo wa mingi adisciple ti lo ti lango pëpe. (Diko Marc 14:37.) Na ngoi so e yeke na yâ ti akpale, e yeke na bezoin ti tapande ti Jésus mingi. Na ngoi ti akpale, azo mingi ayeke ka nduru ti girisa mbeni kpengba tâ tënë, tâ tënë so ayeke kota mingi ni la mbeti ti aProverbe asara tënë ni fani use atene: “Mbeni lege ayeke so ayeke nzoni na lê ti zo, me nda ti lege so ayeke lege ti si na kui.” (aProv. 14:12; 16:25). Tongana e zia bê ti e na ndo ti hingango ye ti e, mbilimbili na ngoi so e tingbi na angangu kpale, e yeke ga peut-être na kpale na tere ti e nga na ti azo so e ye ala.

15. Tara wa mbeni mokonzi ti sewa alingbi ti wara na ngoi so warango nginza ayeke ngangu?

¹⁵ Na tapande, mbeni mokonzi ti sewa alingbi ti tingbi na mbeni ngangu kpale so asara si a yeke ngangu na lo ti mû ye na lege ti mitele na “azo ti da ti lo”. (1 Tim. 5:8). Bê ti lo alingbi ti pusu lo ti sara mbeni kua so ayeke pusu lo lakue ti manke abungbi, ti mû li ni na yâ ti vorongo Nzapa na sewa, wala ti fa tënë. Tongana lo bâ ye na lege ti mitele, lo lingbi ti tene so a yeke sioni pëpe wala même a yeke na lege ni. Ye oko, a lingbi ti sara si zo atï kobela wala lo wara kuâ na lege ti yingo. A yeke biani nzoni mingi ti sara ye alingbi na wango so ayeke na aProverbe 3:5, 6. Salomon atene: “Zia bê ti mo kue na L’Éternel, na zia bê ti mo na hingango ye ti mo mveni pëpe. Mo bi bê ti mo na Lo na lege ti mo kue, na fade Lo sara si lege ti mo aga mbilimbili.”

16. (a) Tapande wa Jésus azia na ndo ti tënë ti ziango bê na ndo ti ndara ti Jéhovah ahon ti ti lo wani? (b) Na lege wa amokonzi ti sewa mingi amû tapande ti Jésus na ziango bê ti ala na Jéhovah na angoi ti ngangu?

¹⁶ Na ngoi so Jésus atingbi lani na tara, lo ye pëpe ti zia bê ti lo na ndo ti hingango ye ti lo. Gbu li kete! Zo so ayeke na ndara ahon tanga ti azo kue na ndo ti sese asoro pëpe ti zia bê ti lo na ndo ti ndara ti lo ti wara akiringo tënë. Na tapande, na ngoi so Satan atara Jésus, fani mingi lo kiri tënë lo tene: “A sû na Mbeti ti Nzapa a tene.” (Mat. 4:4, 7, 10). Lo zia bê ti lo kue na ndo ti ndara ti Babâ ti lo ti luti na lê ti tara. Na sarango tongaso Jésus afa so lo sara tere ti lo kete, mbeni sarango ye so Satan ayeke na ni kete pëpe nga so lo ke ni. E yeke sara nga tongana Jésus? Mbeni mokonzi ti sewa so alango pëpe tongana ti Jésus ayeke zia si Mbeti ti Nzapa afa lege na lo, mbilimbili na angoi ti ngangu. Na ndo ti sese kue, a yeke wara amokonzi ti sewa saki mingi so ayeke sara tongaso. Ala yeke sara kue ti zia Royaume ti Nzapa nga na aye so ala yeke sara ti voro na Nzapa na kozo ndo na yâ ti fini ti ala, même kozo na abezoin ti ala ti mitele. Tongaso, ala yeke bâ lege ti sewa ti ala na mbeni lege so ayeke nzoni mingi. Jéhovah airi tënë nzoni na ndo ti ngangu so ala yeke sara ti mû na sewa ti ala aye ti mitele so ala yeke na bezoin ni, tongana ti so lo mû zendo ni na yâ ti Bible.​—Mat. 6:33.

17. Nyen la apusu mo ti mû tapande ti Jésus so alango pëpe?

¹⁷ A yeke polele so na ndo ti tënë ti zo so alango pëpe, Jésus la ayeke nzoni tapande so ahon atanga ni kue. Tapande ti lo ayeke mû maboko na zo nga ayeke sö même fini ti zo. Girisa pëpe so Satan aye mingi ti tene mo lango na lege ti yingo, mabe ti mo awoko, mo yapu pëpe na yâ ti aye so mo yeke sara ti voro na Jéhovah nga mo duti be-ta-zo pëpe (1 aThes. 5:6). Mû lege na lo pëpe ti sö benda! Mû tapande ti Jésus so alango pëpe. Zia lê ti mo angbâ na zingo ni na lege ti sambela, fango tënë nga na ngoi ti atara. Tongana mo sara aye so, gigi ti mo ayeke duti nzoni nga mo yeke wara ngia na yâ ti fini ti mo même laso na yâ ti dunia so a ga nduru ti futi ni awe. Tongana mo lango pëpe, a yeke sara nga si na ngoi so Jésus ayeke ga ti futi dunia so, lo yeke wara mo lê ti mo angbâ na zingo ni, na mo yeke sara ye so bê ti Babâ ti lo aye. Bâ tongana nyen Jéhovah ayeke duti na ngia ti futa mo teti so mo ngbâ be-ta-zo!​—Apoc. 16:15.

[Foto na lembeti 6]

Jésus afa tënë na mbeni wali na tere ti dungu. Alege wa mo yeke gbu ti fa tënë lâ na lâ?

[Foto na lembeti 7]

Ti bâ lege ti nzoni duti ti sewa ti mo na lege ti yingo afa so mo lango pëpe