Nathan amû mbage ti tâ vorongo na bê ti lo kue

A yeke kete ye pëpe ti ga na mbeni zo so ayeke na komandema ti yeda so lo sara ye na lege ni pëpe na so a lingbi lo changé. Mo yeke yeda ti tingbi na mara ti zo tongaso tongana mo hinga so lo fâ mbeni zo ti tene nda ti lo asigigi pëpe?

David, gbia ti Israël ti giriri asara lango-sioni na Bath-Séba na lo mû ngo. Ti honde ndo ti siokpari ti ala, David asara si a fâ koli ti lo na lo mû Bath-Séba ti ga wali ti lo. Teti anze mingi, David angbâ ti sara kusala ti lo ti gbia na lo sara tënë ti siokpari so na zo oko pëpe. Me Jéhovah akanga lê na ndo ti asiokpari ti gbia ni pëpe. Lo tokua prophète ti lo Nathan ti fa na David so ye so lo sara ayeke sioni.

Kua ni so ayeke lani ngangu mingi. Zia tere ti mo na place ti Nathan. Kite ayeke pëpe so, so Nathan ayeke be-ta-zo na Jéhovah nga lo ngbâ nganganga na ndo ti afango ye ti Nzapa la apusu lo ti gue ti tene na David tënë ti asiokpari so lo sara. Prophète ni ayeke fa tënë ni tongana nyen nga lo yeke sara tongana nyen ti ga na gbia ni ti yeda so a lingbi lo changé bê ti lo?

LO FA YE NA KODE

Mû ngoi kete mo diko 2 Samuel 12:1-25. Tara ti zia tere ti mo na place ti Nathan na ngoi so lo yeke fa peko ti tënë so na David, lo tene: “Azo use ayeke na kodoro oko, zo oko ayeke zo ti mosoro, na mbeni zo ayeke wanzinga. Kundu ti akete nyama na ti akota nyama ayeke na zo ti mosoro so mingi, me ye ayeke na wanzinga so pëpe, gi molenge ti ngasangbaga oko ti mama ni, so lo vo. Na lo mû kobe na molenge ti ngasangbaga so, na ngasangbaga ni aga kota na yâ da ti lo legeoko na amolenge ti lo, ngasangbaga so ate kobe ti lo, lo nyon na kopo ti lo, lo lango na libe ti lo. Lo bâ lo tongana tâ molenge ti lo. Na zo ti lege asi na da ti zo ti mosoro so, na lo zia ti fâ anyama ti kundu ti akete nyama na ti akota nyama ti lo kue ti leke na kobe teti gene so asi na lo, me lo fâ gi molenge ti ngasangbaga ti wanzinga so, lo leke na kobe teti gene so asi na lo.”​—2 Sam. 12:1-4.

Kite ayeke pëpe so David, so ayeke nga berger kozo, apensé so ye ni so asi biani. Mbeni wasarango tënë na ndo ti Bible atene: “Peut-être Nathan ayeke gue lakue na ndo ti David ti voro yanga na lo ndali ti azo so a sara ye na lege ni na ala pëpe na zo ti mungo maboko na ala ayeke dä pëpe. Nga, David apensé so kusala ni so la Nathan ayeke sara ni fadeso.” Même tongana a yeke tongaso, a hunda ti tene Nathan aduti be-ta-zo na Nzapa nga lo sara ye na mbeto pëpe si lo sara tënë na gbia tongana ti so lo sara so. Tënë so Nathan afa pekoni so asara si ngonzo agbu David. David atene: “L’Éternel ayeke! zo so asara ye so, a lingbi lo kui.” Nathan atene droit na lo atene: “Mo yeke zo ni so!”​—2 Sam. 12:5-7.

Zia e bâ ngbanga ti nyen Nathan asara kusala na kode so ti sara tënë ti kpale so. A yeke kete ye pëpe na mbeni zo so asara ngonzo na tere ti mba ti lo ti gbu li na ndo ti lo wani nzoni. E kue, tongana e sara mbeni ye so ayeke nzoni pëpe, e yeke ka nduru ti gi araison ti fa so ye so e sara so ayeke sioni pëpe. Me tapande so Nathan amû so ague na David, sân ti hinga, ti fâ ngbanga na ndo ti ye so lo wani lo sara. Gbia ni abâ polele so ye so zo so asara si Nathan asara tënë ni so ayeke sioni mingi. Ye oko, a yeke gi na pekoni so David lo wani afâ ngbanga na ndo ni awe la Nathan afa so tapande ni so aye ti sara tënë ti lo David ni. David abâ so siokpari so lo sara so ayeke sioni mingi. Ye so apusu lo ti bâ ye polele na ti yeda na wango. David atene so lo “ke” Jéhovah na lege ti ye so lo sara na Bath-Séba so, na lo yeda na sengo ndo ni.​—2 Sam. 12:9-14; Ps. 51:1, 2.

Ye so afa nyen na e? Ye so mbeni zo so ayeke manda Bible na azo ayeke gi ayeke ti mû maboko na awamango lo ti bâ ye na lege ni. Nathan ane David ni la lo sara tënë na lo na kode. Nathan ahinga so na yâ ti bê ti David, lo ndoye ye so ayeke na lege ni nga fango ngbanga ti mbilimbili. Na lege ti tapande so, prophète ni apusu David ti sara ye na lege ni nga na lege ti mbilimbili, a yeke asarango ye so anzere na Nzapa. E nga kue e lingbi ti mû maboko na azo so bê ti ala ayeke nzoni ti hinga bango ndo ti Jéhovah. E yeke sara ni tongana nyen? Mingi ni azo ahinga ye so ayeke na lege ni. E lingbi ti mû maboko na ala ti sara kua na hingango ye so sân ti sara si ala bâ so e yeke nzoni e hon ala wala e yeke na droit ti fa na ala ye so a lingbi ala sara. A yeke Bible, me pëpe bibe ti e wani, la ayeke na droit ti fa ye so ayeke nzoni na ye so ayeke sioni.

Dutingo be-ta-zo na Nzapa la ayeke kota ye so apusu Nathan ti suku na ngangu gbia so (2 Sam. 12:1). Legeoko nga tongana e yeke be-ta-zo, a yeke sara si e wara ngangu ti mû lakue mbage ti afango ye ti Nzapa so ayeke mbilimbili.

LO SARA SI TÂ VORONGO AMAÏ

Peut-être David na Nathan ayeke lani anzoni kamarade ndali ti so David azia iri ti mbeni molenge ti lo Nathan (1 Chron. 3:1, 5). Na ngoi so Bible asara tënë ti Nathan ti kozoni, lo yeke na tere ti David. Ala use kue andoye Jéhovah. Kite ayeke pëpe so Gbia David azia bê ti lo kue na atënë ti Nathan ndali ti so lo fa na prophète ni so lo ye mingi ti leke mbeni temple na Jéhovah. David atene: “Bâ, mbi duti na da ti keke ti cèdre, me Arche ti Nzapa ayeke na gbe ti rideau. Na Nathan atene na gbia, Mo gue, mo sara ye kue so ayeke na bê ti mo, teti L’Éternel ayeke na mo.”​—2 Sam. 7:2, 3.

Teti so Nathan ayeke mbeni zo so ayeke voro Jéhovah na bê ti lo kue, lo yeke na ngia ti mû maboko na pialo ti David so ti leke mbeni kozo ndo so a yeke voro Jéhovah dä na ndo ti sese. Ye oko, na ngoi ni so Nathan afa atënë ti bê ti lo wani me pëpe tënë so Jéhovah atene na lo. Na bï ni, Nzapa atene mbeni tënë nde na prophète ti lo ti gue ti tene ni na gbia ni. Lo tene so David la ayeke leke temple ti Jéhovah pëpe. Mbeni oko ti amolenge ti David la ayeke sara ni. Me Nathan atene lani na David so Nzapa ate mbele na David so fade trône ti lo “angbâ lakue.”​—2 Sam. 7:4-16.

Bibe ti Nathan na ndo ti zo so ayeke leke temple ni so ague oko pëpe na ye so bê ti Nzapa aye. Ye oko, sân ti diko tënë na gbe ti go, prophète ni asara tere ti lo kete lo yeda na ye so Jéhovah aleke ti sara na lo sara ye alingbi na ni. Ye so ayeke mbeni nzoni tapande teti e tongana Nzapa ase e na yâ ti ambeni ye. Aye so Nathan asara na pekoni tongana prophète afa so lo ngbâ lakue ti nzere na lê ti Nzapa. Biani, e bâ so na lege ti yingo ti Jéhovah, lo pusu Nathan na Gad zo ti bango nda ti ye ti fa na David tongana nyen ti leke yâ ti azo 4000 so ayeke pika mozoko na yâ ti temple.​—1 Chron. 23:1-5, FD; 2 Chron. 29:25.

LO GBU KOKO TI ZO SO AYEKE NA DROIT TI LË GBIA

Nathan ahinga lani so Salomon la ayeke ga gbia na peko ti David so aga mbakoro awe. Ni la, Nathan asara ye hio na ngoi so Adonija agi ti mû mbata ti gbia na ngangu na ngoi so David aga mbakoro mingi. Ge nga kue Nathan asara ye na kode nga lo duti be-ta-zo. Kozoni, lo wa Bath-Séba ti dabe ti David na zendo so lo mû lo tene molenge ti lo Salomon la ayeke ga gbia na peko ti lo. Na pekoni Nathan lo wani lo lï na gbele gbia ti hunda wala gbia ni la amû yanga ti tene Adonija amû mbata ti gbia na peko ti lo. Tongana gbia ni so aga mbakoro awe abâ kpale ni, lo mû yanga na Nathan nga na ambeni zo so ayeke be-ta-zo ti tuku mafuta na li ti Salomon na ti sara si lo ga gbia. Ye so Adonija aleke ti sara atï na ngu.​—1 aGbia 1:5-53.

MBENI ZO TI SUNGO MBAÏ SO ASARA TERE TI LO KETE

Mingi ni azo atene Nathan na Gad la asû atene so ayeke na 1 Samuel chapitre 25 ti si na chapitre 31 nga na atënë so kue ayeke na 2 Samuel. Bible asara tënë ti ambaï so a sû na gbe ti yingo ti Nzapa na yâ ti abuku ni so atene: “Tënë ti kusala ti gbia David, a komanse na kusala ti kozoni juska na kusala ti nda ni, ayeke na mbeti ti Samuel zo ti bâ nda ti ye, na mbeti ti prophète Nathan, na mbeti ti Gad zo ti bâ nda ti ye.” (1 Chron. 29:29). Bible afa nga so Nathan la asû tondo na ndo ti “kusala ti Salomon”. (2 Chron. 9:29). Ye so aye peut-être ti fa biani so Nathan angbâ ti sara kua na yâ ti da ti gbia même na peko ti kuâ ti David.

A yeke peut-être prophète Nathan lo wani la asû na mbeti gbâ ti aye so e hinga na ndo ti lo. Ye oko, so lo sara tënë na ndo ti ambeni ye pëpe afa ye mingi na e na ndo ti lo. E bâ so Nathan ayeke mbeni zo ti sungo mbaï so asara tere ti lo kete nga lo ye pëpe ti tene iri ti lo awu. Mbeni bakari ti Bible atene so na yâ ti Bible lo sara nga mbeni nduru tënë na ndo ti lo wala na ndo ti sewa ti lo pëpe. E hinga ye oko na ndo ti fini ti Nathan pëpe.

LO YE TI DUTI BE-TA-ZO NA JÉHOVAH

Na lege ti akete ye so e hinga na ndo ti Nathan na yâ ti Bible, a yeke polele so lo yeke lani mbeni zo so asara tere ti lo kete, me na mbeto pëpe lo mû mbage ti ye so Nzapa azia na sese. Jéhovah Nzapa amû lani na lo akota kusala. Gbu li na ndo ti asarango ye ti Nathan, na tapande dutingo be-ta-zo na Nzapa nga bango na nene ni aye so Nzapa ahunda na e ti sara. Sara ngangu ti sara nga tongaso.

Peut-être a yeke hunda ande na mo pëpe ti suku na agbia so asara lango-sioni wala ti kanga lege na azo so aye ti mû mbata ti gbia na ngangu. Ye oko, na lege ti mungo maboko ti Nzapa, mo lingbi ti ngbâ be-ta-zo na Nzapa nga ti yä na nduzu afango ye ti lo so ayeke mbilimbili. Mo nga kue mo lingbi ti sara ye na mbeto pëpe nga na kode ti fa tâ tënë na ti sara si tâ vorongo amaï.

[Foto na lembeti 25]

Teti so Nathan ayeke gbu koko ti mbata ti gbia, lo sara tënë na kode na Bath-Séba