Ngbâ ti bâ so a yeke kota ye ti sara ye hio

“Fa tënë ni, ngbâ na ndo ni.”​—2 TIM. 4:2.

MO LINGBI TI FA NDANI?

Ngbanga ti nyen akozo Chrétien afa tënë hio?

E lingbi ti sara nyen ti ngbâ ti fa so a lingbi e sara ye hio?

Ngbanga ti nyen laso a lingbi e yapu na fango tënë ti Royaume mingi ahon ti kozo?

1, 2. Wango so ahunda ti ‘ngbâ ti fa tënë ni’ aga na ahundango ndo wa?

AZO so kua ti ala ayeke ti sö fini ti azo, mingi ni ala yeke sara ka ye hio. Na tapande, tongana mbeni ye ti ngangu asi si a iri adagbi, ala yeke sara ye hio ndali ti so ala hinga so peut-être fini ti azo ayeke na yâ ti kpale.

² E aTémoin ti Jéhovah, e ye ti mû maboko na azo ti sö kuâ. A yeke ndali ni la e bâ na nene ni kua ti e ti fango nzoni tënë ti Royaume. Tâ tënë, e yeke kpe loro kirikiri pëpe. Tongaso, Paul aye ti tene nyen tongana lo mû wango lo tene: “Fa tënë ni, ngbâ na ndo ni”? (2 Tim. 4:2). Tongana nyen la e lingbi ti fa tënë hio? Ngbanga ti nyen la kua ti e ti fango tënë ayeke mbeni kua so a lingbi e sara ni hio?

NGBANGA TI NYEN A LINGBI E FA TËNË HIO?

3. Tongana azo ayeda na tënë ti Royaume, nyen la ala yeke wara na pekoni?

³ Tongana mo bâ so fango tënë alingbi ti sö fini ti azo, peut-être mo yeke bâ so a lingbi mo fa nzoni tënë na azo hio (aRom. 10:13, 14). Mbeti ti Nzapa atene: “Tongana Mbi tene na zo ti sioni, Fade mo kui biani; na tongana lo zia lege ti siokpari ti lo, na lo sara ye so ayeke na lege ni na ayeke mbilimbili, . . . fade lo ngbâ na fini biani, lo kui pëpe. Fade Mbi dabe Mbi oko pëpe na siokpari ti lo so lo sara.” (Ézéch. 33:14-16). Biani, Bible atene na azo so afa nzoni tënë ti Royaume atene: “Fade mo yeke sö ande mo wani nga na ala so ayeke mä mo.”​—1 Tim. 4:16; Ézéch. 3:17-21.

4. Ngbanga ti nyen na ngoi ti akozo Chrétien afango ye ti wataka asara si a yeke kota ye ti ngbâ ti fa tënë ni?

⁴ Ti bâ na nene ni ndani so Paul awa Timothée ti ngbâ ti fa tënë ni, zia e bâ atënë so angoro versê so ayeke mama-tene ti article so. Bible atene: “Fa tënë ni, ngbâ na ndo ni atâa a yeke na ngoi so aye atambela nzoni wala na ngoi ti wusuwusu; suku na zo, kiri zo na nzoni lege, wa zo, sara ni na kangango bê kue ti ku nga na kode ti fa ye na zo. Teti mbeni ngoi ayeke ga so ala yeke kanga bê gbä na nzoni fango ye ni, me ti lingbi na anzara ti bê ti ala wani, ala yeke soro gbâ ti awafango ye ti fa na ala atënë so anzere na mê ti ala; na ala yeke kanga mê ti ala na tâ tënë ni.” (2 Tim. 4:2-4). Jésus afa kozoni awe so a-apostat ayeke bâ gigi (Mat. 13:24, 25, 38). Na ngoi so ala ga lani nduru ti bâ gigi, a yeke kota ye ti tene Timothée ‘afa tënë ni’ même na yâ ti congrégation tongaso si aChrétien amû pëpe peko ti afango ye ti mvene so a leke ni nzoni ti gboto na azo. Fini ti azo ayeke lani na yâ ti kpale. Ka ti laso ayeke tongana nyen?

5, 6. Afango ye wa so amû ndo e lingbi ti tingbi na ni na fango tënë?

⁵ Laso a-apostat azia tâ vorongo na ala ga gbani na ala mû ndo (2 aThes. 2:3, 8). Afango ye wa anzere na mê ti azo laso ti mä? Na ando mingi, abungbi ti vorongo nzapa asara si tënë ti évolution amû ndo. Atâa so mingi ni a fa tënë ti évolution tongana mbeni tënë ti senda-ye, a ga tongana mbeni bungbi ti vorongo nzapa nga a sara ngangu na ndo ti lege so azo ayeke bâ na Nzapa nga na amba ti ala. Mbeni fango ye ni nde so amû ndo mingi atene so Nzapa ayeke bi bê ti lo na e pëpe; tongaso, e yeke na bezoin ti bi bê ti e na lo pëpe. Ngbanga ti nyen afango ye so anzere na azo kutu mingi na apusu ala ti lango na lege ti yingo? Ye so afango ye so use kue aye ti fa ayeke so: ‘Mo lingbi ti sara ye kue so mo ye teti so zo oko ayeke hunda mo ndali ni pëpe.’ A yeke biani tënë so azo mingi aye ti mä la.​—Diko Psaume 10:4.

⁶ Me ambeni tënë nde ayeke nga dä so anzere mingi na mê ti azo. Ambeni zo so ayeke gue na eglize aye ti wara awafango tënë so ayeke tene na ala: ‘Atâa nyen la mo sara, Nzapa ayeke ndoye mo.’ Aprêtre na apasteur ayeke tene na azo ti ala so amatanga, aMesse, nga na amatanga tongana Noël nga na a-image ayeke aye so Nzapa ayeda na ni. Mingi ti azo ni so abâ pëpe kpale so ala yeke na yâ ni (Ps. 115:4-8). Me e lingbi ti zingo ala na lege ti yingo tongaso si ala hinga tâ tënë so ayeke na yâ ti Bible si ala bâ nzoni na lege ti Royaume ti Nzapa.

TI FA TËNË HIO AYE TI TENE NYEN?

7. Tongana nyen la e lingbi ti fa so e ye ti sara ye hio?

⁷ A lingbi mbeni wanganga so ayeke suru zo abi bê ti lo kue na ndo ti kua ti lo ndali ti so fini ti azo ayeke na yâ ti kpale. Na fango tënë, e yeke fa so e ye ti sara ye hio na ziango bê ti e kue na ndo ti kusala ti e. E yeke zia bê ti e kue na ndo ti kusala ni na lege so e yeke bi bê ti e na ndo ti atënë, ahundango ndo wala mbeni sango so alingbi ti ndu bê ti azo so e yeke tingbi na ala. Tongana e bâ so a yeke kota ye ti tene e sara ye hio, e yeke gbian yâ ti kapa ti e tongaso si e gue e bâ azo na angoi so ala yeke nduru ti mä e.​—aRom. 1:15, 16; 1 Tim. 4:16.

8. Mingi ni ti duti na bibe ti sarango ye hio ahunda ti sara nyen?

⁸ Ti duti na bibe ti sarango ye hio ahunda nga ti zia ambeni ye na kozo ndo. (Diko Genèse 19:15.) Na tapande, tara ti bâ so docteur ahunda na mo ti tene a bâ yâ ti mênë ti mo. Na pekoni so lo wara aye so a fa na yâ ti mênë ti mo ni, lo iri mo na yâ ti bureau ti lo nga lo tene na mo polele lo tene: “Bâ, fini ti mo ayeke na yâ ti kpale a lingbi mo sara ye hio. Angbâ na mo nze oko tongaso ti tene mo sara mbeni ye ndali ti kobela ti mo ni.” Peut-être mo yeke sigigi pëpe na yâ ti bureau ti lo tongana ti so mbeni dagbi ayeke gue hio na mbeni ndo so ye ti ngangu asi dä. Me peut-être mo mä awango ti lo, mo sigigi mo gue na yanga-da na mo gbu li ti mo na ndo ti aye so a lingbi mo zia na kozo ndo.

9. Ngbanga ti nyen e lingbi ti tene so Paul afa lani tënë hio na ngoi so lo yeke lani na Éphèse?

⁹ E lingbi ti gbu nda ti wango ti Paul so ahunda ti ngbâ ti fa tënë ni tongana e bâ tënë so lo tene na a-ancien ti Éphèse na ndo ti fango nzoni tënë so lo fa na yâ ti kodoro-komanda ti Asie. (Diko Kusala 20:18-21.) Na bango ni, gi na kozo lango so lo si na ni, lo mû ngoi mingi ti fa nzoni tënë na azo da na da. Nga, “lâ na lâ, lo yeke mû tënë na yâ ti da ti ekole ti Tyrannus” na lege ti mbeni kapa so lo leke na so lo bata teti ngu use (Kus. 19:1, 8-10). Biani, bibe so Paul ayeke na ni ti ngbâ ti fa tënë ni la apusu lo ti sara ye so. Tongana a hunda na e ti ‘ngbâ na ndo ti fango tënë’ ayeke pëpe ti fa na e so kua ni ahon ndo ti e. Me, a lingbi e zia fango tënë na kozo ndo na yâ ti fini ti e.

10. Ngbanga ti nyen e yeke na ngia so aChrétien so ayeke lani kozo na ngu 1914 asara ye hio?

¹⁰ Tapande ti kete groupe ti aWamandango Bible so ayeke lani kozo na ngu 1914 so agi ti fa nzoni tënë afa ye so aye ti tene ti sara ye hio. Atâa so wungo ti ala yeke gi kete, ala hinga so ngoi angbâ mingi pëpe ti tene ala fa tënë nga na ngia na bê ala bi tere ti ala kue na yâ ti kusala ni. Ala sû adiskur ti tene andokua ti ambeti-sango asigigi na ni mingi nga ala leke mbeni limon na lege ti diapo so a iri ni “Photo Drame de la Création.” Kusala ti aWamandango Bible amû lege na azo kutu mingi ti mä nzoni tënë. Mingi ti e awara lege ti mä tënë ti Royaume ndali ti so ala yeke na bibe ti sarango ye hio.​—Diko Psaume 119:60.

SARA HANGE SI MO ZIA PËPE TI SARA YE HIO

11. Nyen la asara si ambeni Chrétien azia ti sara ye hio?

¹¹ Angia alingbi ti sara si mbeni zo apensé pëpe so kusala ti fango tënë ayeke kota mingi. Bungbi ti aye ti Satan ayeke gi ti pusu e ti bi tere ti e kue ti tomba gi peko ti aye ti e wani nga na asenge senge ye (1 Pi. 5:8; 1 Jean 2:15-17). Ambeni zo so ândö azia kusala ti Jéhovah na kozo ndo agirisa so a lingbi ala sara ye hio. Na tapande, Démas ayeke lani mbeni ‘mba ti Paul wakua’ na ngoi ti akozo Chrétien, me lo zia si aye ti dunia ti ngoi ni so agboto lo. Ahon ti ngbâ ti kpengba aita ti lo na yâ ti ngoi ti ngangu so, Démas adö Paul lo zia lo hon.​—Phm. 23, 24; 2 Tim. 4:10.

12. Pasa wa e yeke na ni laso? Alege wa e yeke wara teti lakue lakue na yâ ti ngoi so ayeke ga?

¹² Tongana e ye ti bata bibe ti sarango ye hio, a lingbi e kpe bibe so ayeke pusu e ti sara aye so alingbi ti gboto lê ti e yongoro na kusala ti e ti fango tënë. A lingbi e sara kue ti gbu “fini so ayeke tâ fini ni biani.” (1 Tim. 6:18, 19). Peut-être mo yeke na kite pëpe so fini ti lakue lakue na ndo ti sese na gbe ti Royaume ti Nzapa ayeke sara si zo ayeke wara alege mingi ti sara anzoni kua. Me pasa so e yeke na ni laso ti mû maboko na azo ti sö kuâ na Harmaguédon ayeke kiri ti duti dä mbeni pëpe.

13. So e ga aChrétien awe so, e lingbi ti sara tongana nyen ti ngbâ ti sara ye hio?

¹³ Teti so mingi ti azo so angoro e na yâ ti dunia alango na lege ti yingo, nyen la alingbi ti mû maboko na e ti ngbâ ti sara ye hio? E lingbi ti gbu li ti e so na mbeni ngoi e lango lani na yâ ti bingo. Me a zingo e nga Christ asu na ndo ti e, tongana ti so Paul afa ni. Fadeso e yeke na pasa ti sara si lumière asu. (Diko aÉphésien 5:14.) Na pekoni so Paul asara tënë so lo tene: “Zia ala sara hange mingi na tambela ti ala si a duti tongana ti awabuba pëpe, me tongana ti awandara, na sarango kusala nzoni na ngoi ti ala, teti ngoi ni ayeke sioni.” (aÉph. 5:15, 16). Teti so e yeke na yâ ti sioni dunia so, zia e ‘sara kusala nzoni na ngoi ti e’ ti sara akusala so ayeke sara si e lango pëpe na lege ti yingo.

E YEKE NA YÂ TI MBENI NGOI SO AYEKE NGANGU MINGI

14-16. Nyen la asara si laso e yeke na bezoin ti ngbâ ti fa tënë ti Royaume mingi ahon ti kozo?

¹⁴ Kusala ti fango tënë ayeke lakue mbeni kusala so a lingbi a sara ni hio, me ti fadeso ngoi ni akiri ayeke ngangu mingi ahon ti kozo. Ngbene ye na ngu 1914, fä so Mbeti ti Nzapa asara tënë ni akiri asigigi polele mingi (Mat. 24:3-51). Fini ti azo ayeke na yâ ti kpale mingi ahon ti kozo. Atâa so akodoro so ayeke na ngangu mingi na yâ ti dunia amä tere ade ti ninga pëpe, ala ngbâ ti bata anene lê ti ngombe 2000 so ala lingbi ti sungba ni na ngoi kue. Akota zo so ayeke bâ ndo na ndo ti anene lê ti ngombe atene so anene lê ti ngombe ngbangbo mingi “agirisa.” Aterroriste amû ambeni? Ambeni zo atene so mbeni terroriste alingbi ti londo na mbeni bira so alingbi ti fâ azo kue. Ye oko, a yeke pëpe gi bira la asara si fini ti azo ayeke na yâ ti kpale.

¹⁵ Na ngu 2009 mbeni mbeti (The Lancet) nga mbeni da senda-gi (University College London) asigigi na mbeni tondo so atene: “Tënë ti ndowa nga na dê so aga kirikiri la ayeke ga ande na kpale ti seni mingi ahon atanga ti aye kue.” Tondo ni atene so aye so aga na peko ti ndowa nga na dê so aga kirikiri ayeke sara sioni na seni ti azo mingi nga a zia fini ti azo ngbundangbu mingi na yâ ti kpale. Ando mingi alingbi ti buba ndali ti angu-ingo so ayeke suku, akota buru, akota ngu-nzapa so ayeke pika amû ndo, akobela so ayeke mû azo mingi, akota pupu nga na abira so ayeke si ndali ti so aye so azo ayeke na bezoin ni akiri na peko. Biani, abira nga na aye so e sara tënë ni ge so alingbi ti zia fini ti azo kue na yâ ti kpale.

¹⁶ Ambeni zo alingbi ti pensé so kpale ti bira ti anene lê ti ngombe ayeke sara si “fä” so Jésus asara tënë ni na yâ ti prophétie ti lo na ndo ti alango ti nda ni aga tâ tënë. Me, azo mingi ahinga pëpe tâ nda ti fä so. A sara fadeso angu mingi awe la fä so aga tâ tënë, fä ni afa nga so Christ asi biani awe na lo yeke dä nga so a ga nduru awe ti futi aye ti dunia so (Mat. 24:3). Laso, e bâ biani mingi ti aye so ayeke na yâ ti fä so Jésus asara tënë ni na yâ ti prophétie ti lo. A yeke ngoi ti tene azo azingo na lango na lege ti yingo la. Fango tënë ti e la alingbi ti mû maboko na ala ti zingo na lango.

17, 18. (a) E yeke na alango ti nda ni, na lege wa ye so asara ngangu na ndo ti e? (b) Aye wa alingbi ti pusu azo ti changé bango ndo ti ala na ndo ti tënë ti Royaume?

¹⁷ Ngoi so angbâ ti tene e fa so e ndoye Jéhovah nga ti hunzi kusala ti fango tënë so lo mû na e na alango ti nda ni so ayeke mingi pëpe. Tënë so Paul atene lani na aChrétien ti Rome ayeke kota mingi laso. Lo tene: “Ala hinga ngoi ni, ngbanga ti so ngbonga ni alingbi awe ti tene ala zingo na lango, teti fadeso salut ti e aga nduru mingi ahon ti ngoi so e ga lani azo so amä na bê.”​—aRom. 13:11.

¹⁸ Aye so a fa tënë ni kozo awe na ndo ti alango ti nda ni alingbi ti sara si azo ahinga bezoin ti ala na lege ti yingo. Ambeni abâ so zo ayeke na bezoin ti mungo maboko tongana ala bâ so angorogbia alingbi pëpe ti kanga lege na akpale ti nginza, aye ti sioni so anene lê ti ngombe aga na ni, sarango ye ti ngangu wala bubango ti aye so angoro e. Me ti ambeni, aye so asi na yâ ti sewa ti ala wani la asara si ala sara nzara ti aye ti yingo. A lingbi ti duti aye tongana kpale ti seni, divorce wala kuâ ti mbeni zo so ala ye lo mingi. Na ngoi so e yeke fa tënë, e yeke mû tere ti e ti mû maboko na azo tongaso.

BIBE TI SARANGO YE HIO LA APUSU E TI FA TËNË

19, 20. Na lege wa bibe ti sarango ye hio apusu aChrétien mingi ti changé aye na yâ ti fini ti ala?

¹⁹ Bibe ti sarango ye hio apusu aChrétien mingi ti kiri ti fa tënë mingi. Na tapande, na pekoni so mbeni ita-koli na wali ti lo so ala use kue ayeke azo ti kodoro ti Équateur ague na kota bungbi ti lango oko ti ngu 2006 so mama-tene ni ayeke “Zia lê ti mo angbâ nzoni”, ala mû desizion ti duti na aye mingi pëpe. Ala sû molongo ti aye so ala yeke na bezoin ni pëpe, nga nze ota na pekoni ala sigigi na yâ ti da ti ala ti chambre ota ala mû mbeni da ti chambre oko, ala kä ambeni ye ti ala na ala futa abon ti ala kue. Kete na pekoni, ala mû kua ti pionnier auxiliaire nga ala sara ye alingbi na wango so mbeni surveillant ti circonscription amû na ala ti gue ti fa tënë na yâ ti mbeni congrégation so ayeke na bezoin ti awafango tënë mingi.

²⁰ Mbeni ita-koli so ayeke ti kodoro ti Amerika ti Banga atene: “Na ngoi so mbi na wali ti mbi e gue lani na kota bungbi na ngu 2006, e wara batême asara lani ngu 30 awe. Na ngoi so e yeke kiri na yanga-da na peko ti kota bungbi ni, e sara lisoro na ndo ti lege so e lingbi ti sara ye alingbi na wango so ahunda ti duti na aye mingi pëpe na yâ ti fini ti e (Mat. 6:19-22). E yeke na da ota, terrain, a-oto so ngere ni ayeke mingi, bateau nga na mbeni da so aroue ayeke na gbe ni. Tongana e bâ so e sara ye tongana aChrétien so ayeke na ndara pëpe, e zia na gbele e ti sara kusala ti ngoi kue. Na ngu 2008 e tï na peko ti molenge ti e ti wali na yâ ti kusala ti pionnier permanent. So ngia si e yeke na ni ti sara kusala nduru mingi na tere ti aita ti e! E wara lege ti sara kua na ando so kota bezoin ayeke dä. Nga, ti sara kua mingi na Jéhovah asara si e ga nduru mingi na lo. A nzere na e mingi ti bâ ngia so azo ayeke na ni na ngoi so ala mä tâ tënë ti Mbeti ti Nzapa na ala gbu ndani.”

²¹ E hinga so na yâ ti kete ngoi “lango ti ngbanga nga ti futingo azo so akpe Nzapa pëpe” ayeke tï na ndo ti sioni dunia so (2 Pi. 3:7). Ye so e hinga na yâ ti Mbeti ti Nzapa apusu e ti mû tere ti e kue ti fa tënë ti kota ye ti vundu so ayeke ga nga na tënë ti fini dunia so ayeke ga na pekoni. E yeke ngbâ ti sara ye hio na fango na azo tënë ti tâ beku ti kekereke. Tongana e bi tere ti e kue na yâ ti kusala so, e yeke fa tâ ndoye so e yeke na ni teti Nzapa nga teti amba ti e azo.

21. Nyen la apusu e ti sara ye hio?