Fa tënë hio!
1. Wango wa ti Paul a hunda ti bi bê na ni na ngoi ti e laso?
1 “Fa tënë ni, ngbâ na ndo ni.” (2 Tim. 4:2). Ngbanga ti nyen wango ti Paul so ayeke kota mingi na ngoi ti e laso? Tongana nyen atënë so alingbi ti sara ngangu na ndo ti fini ti e nga na ti ambeni zo?
2. Ngbanga ti nyen e yeke sara kue ti gi azo so ade ti mä nzoni tënë pëpe?
2 Tënë ni andu fini ti azo: A lingbi azo kutu mingi so ayeke na yâ ti dunia so amä nzoni tënë so alingbi ti gue na ala ti wara salut (aRom. 10:13-15; 1 Tim. 4:16). Mingi ti azo so aye tâ tënë ayeke na yâ ti territoire so e yeke fa ka tënë dä lakue. Tongana e fa tënë na alango nde nde wala na angoi nde nde, e lingbi ti wara mara ti azo nde nde. Sarango kue tongaso ti gi azo ayeke sara si e duti na nzoni yingo-ti-hinga na ngbanga ti mênë ti zo oko ayeke duti na li ti e pëpe.—Kus. 20:26.
3. Tongana nyen e lingbi ti sara kusala na ngoi ti e na lege ti ndara na fango tënë?
3 Atâa so a kanga lege lani ngangu mingi na ala, akozo Chrétien ‘asara si fango ye ti ala amû yâ ti Jérusalem kue’. (Kus. 5:28). E nga kue e leke na bê ti e ti “fa nda ti tënë ni kue”? (Kus. 10:42). Na ngoi so e yeke na fango tënë, e yeke sara kusala na ngoi ti e na lege ti ndara? Tongana e ngbâ ti ku amba ti e na ngoi so ala yeke sara visite na mbeni zo, e yeke mû li ni ti fa tënë na ambeni zo so ayeke hon hongo na lege?
4. Tongana nyen ti fa tënë hio ayeke sara si lê ti e angbâ na zingo ni?
4 Zia si lê ti e akpengba ahon ti kozo: So hunzingo ti aye ti ngoi so ayeke pusu nduru nduru, a lingbi lê ti e angbâ ti kpengba na angbâ na zingo ni (1 aThes. 5:1-6). Tongana e sara tënë lakue na ndo ti beku ti e ti Royaume, e yeke sara si aye ti ngoi ti laso akanga lege na e pëpe (Luc 21:34-36). Na ndo ni, ti ngbâ ti “bata na li” ti e lâ ti Jéhovah ayeke pusu e ti fa tënë mingi ahon ti kozo ti sö fini ti azo.—2 Pi. 3:11, 12.
5. Tongana nyen bango fini na nene ni apusu e ti fa tënë?
5 Tongana e fa tënë hio, e yeke fa so e bâ fini tongana ti so Jéhovah abâ na ni: “Lo ye si zo oko akui pëpe, me lo ye si azo kue achangé bê ti ala.” (2 Pi. 3:9; Ezéch. 33:11). Zia e leke na bê ti e ti fa tënë na azo mingi wala kue ti yâ ti territoire ti e ti sepela Jéhovah!—Ps. 109:30.