Jéhovah abata e ndali ti salut

“A yeke bata ala na ngangu ti Nzapa na lege ti mabe ndali ti salut so a ga nduru ti fa ni awe na ngoi ti nda ni.”​—1 PI. 1:5.

MO YEKE KIRI TËNË TONGANA NYEN?

Tongana nyen la Jéhovah agboto e ti ga na yâ ti tâ vorongo?

Tongana nyen la e lingbi ti zia si Jéhovah afa lege na e na lege ti wango ti lo?

Jéhovah ayeke kpengba e na alege wa?

1, 2. (a) Nyen la afa so Nzapa ayeke mû maboko na e ti ngbâ ti duti be-ta-zo? (b) Na lege wa Jéhovah ahinga e oko oko kue nzoni?

“ZO SO agbu ngangu juska na nda ni, lo si a yeke sö lo ande.” (Mat. 24:13). Na lege ti atënë so Jésus afa polele so tongana e ye ti sö kuâ na ngoi so Nzapa ayeke fâ ngbanga na ndo ti dunia ti Satan, a lingbi e ngbâ ti duti be-ta-zo juska na nda ni. Me ye so aye pëpe ti tene so Jéhovah aku ti tene e gbu ngangu na lege ti ndara wala ngangu ti e wani. Bible adë bê ti e atene: “Nzapa ayeke be-ta-zo, na lo yeke zia ande pëpe si a tara ala ahon ti so ala lingbi ti kanga bê dä, me tongana tara ni ayeke si na ala, lo yeke leke nga lege ti tene ala lingbi ti gbu ngangu dä.” (1 aCor. 10:13). Atënë so aye ti fa nyen na e?

² Ti tene Jéhovah azia si a tara e pëpe ahon ti so e lingbi ti kanga bê dä, a lingbi lo hinga aye kue na ndo ti e, aye ni so andu akpale so e tingbi na ni, asarango ye ti e nga juska na ndo wa la e lingbi ti gbu ngangu. Me Nzapa ahinga e biani nzoni la? En, lo hinga e nzoni. Bible afa so Jéhovah ahinga e oko oko kue tâ nzoni mingi. Lo hinga aye so e yeke sara lâ na lâ nga na fason ti sarango ye ti e. Lo lingbi même ti hinga apensé ti e nga na ye so ayeke na bê ti e.​—Diko Psaume 139:1-6.

3, 4. (a) Tongana nyen la ye so asi na David afa so Jéhovah ayeke bi bê ti lo na e kue? (b) Kpengba ye wa Jéhovah ayeke sara laso?

³ Nzapa ayeke bi bê ti lo biani na e so e yeke gi asenge zo so? David so asû ambeni Psaume agbu li ti lo na ndo ti tënë so, na lo tene na Jéhovah: “Tongana mbi bâ ayayu ti Mo, ye so li tïtî Mo asara, nze na atongoro so Mo sara, Zo ayeke nyen, si Mo dabe Mo na lo?” (Ps. 8:4, 5). Peut-être ye so asi na David la apusu lo ti hunda tënë so. Jéhovah abâ lani so tanga ti molenge ti Jessé so ayeke “mbeni zo so bê ti Lo aye” lo na lo mû lo ‘tongana lo yeke bata angasangbaga, si lo ga gbia’ na ndo ti Israël (1 Sam. 13:14; 2 Sam. 7:8). Wasarango dunia kue ahinga apensé nga na aye so agbu bê ti David so ayeke lani gi mbeni senge berger so ade maseka. Tara ti bâ tënë ti bê ti David na ngoi so lo hinga ni!

⁴ Bê ti e adö pëpe ti bâ so Jéhovah ayeke bi bê ti lo mingi na e laso. Lo yeke bungbi azo ti “amara kue” so ayeke “nzoni mingi” na lê ti lo ti ga ti voro lo; lo yeke mû nga maboko na azo so ayeke sara na lo ti ngbâ be-ta-zo (Ag. 2:7). Ti hinga nzoni mingi tongana nyen la Jéhovah ayeke mû maboko na e ti ngbâ be-ta-zo, zia e bâ kozoni kue tongana nyen la Jéhovah ayeke gboto azo ti ga na yâ ti tâ vorongo.

NZAPA LA AGBOTO E

5. Tongana nyen la Jéhovah ayeke gboto azo na mbage ti Molenge ti lo? Fa mbeni tapande ni.

⁵ Jésus atene: “Zo oko alingbi ti ga na mbi pëpe, gi tongana Babâ so atokua mbi si agboto lo aga na lo na mbage ti mbi.” (Jean 6:44). Tënë so afa so ti ga disciple ti Jésus, a lingbi e wara mungo maboko ti Nzapa. Tongana nyen la Jéhovah ayeke gboto azo so ayeke tongana angasangbaga na mbage ti Molenge ti lo? Lo yeke sara ni na lege ti fango nzoni tënë nga na lege ti yingo vulu. Na tapande, na ngoi so Paul na amba ti lo missionnaire ayeke lani na Philippes, ala wara mbeni wali so iri ti lo ayeke Lydie na ala fa nzoni tënë na lo. Bible atene: “Jéhovah azi bê ti lo kota ti dengi mê na aye so Paul ayeke tene.” Nzapa asara kusala na yingo ti lo ti mû maboko na lo ti mä yâ ti tënë ni, na ye so asara si lo na azo ti da ti lo amû batême.​—Kus. 16:13-15.

6. Tongana nyen la Nzapa agboto e kue na yâ ti tâ vorongo?

⁶ Gi Lydie oko la ye so asi na lo? Ên-ën. Tongana mo yeke mbeni Chrétien so amû tere ti lo na Nzapa awe, mo nga kue Nzapa la agboto mo na yâ ti tâ vorongo. Legeoko tongana ti so Babâ ti e ti yayu abâ lani mbeni ye ti nzoni na yâ ti bê ti Lydie, lo bâ mbeni ye ti nzoni na yâ ti mo. Na ngoi so mo komanse ti mä nzoni tënë, Jéhovah asara kusala na yingo vulu ti mû maboko na mo ti gbu nda ni (1 aCor. 2:11, 12). Na ngoi so mo yeke sara lani ngangu ti sara ye alingbi na ye so mo manda, lo iri tënë nzoni na ndo ti ngangu so mo sara ti sara ye so bê ti lo aye. Na ngoi so mo mû fini ti mo na lo, bê ti lo ayeke na ngia. Biani, ngbene ye so mo to nda ti tambela na ndo ti lege so ague na fini, Jéhovah ayeke na tere ti mo na yâ ti aye oko oko kue so mo yeke sara ti tambela na ndo ti lege ni.

7. E hinga tongana nyen so Nzapa ayeke mû maboko na e ti ngbâ lakue be-ta-zo?

⁷ Jéhovah la amû maboko na e ti to nda ti sara na lo, tongaso e hinga na bê ti e kue so lo yeke ngbâ ti mû maboko na e ti tene e ngbâ be-ta-zo. Lo hinga so legeoko tongana ti so e ga na yâ ti tâ tënë na ngangu ti e wani pëpe, e lingbi pëpe ti ngbâ na yâ ti tâ tënë na ngangu ti e wani. Bazengele Pierre asû mbeti na aChrétien so a soro ala ti gue na yayu lo tene: “A yeke bata ala na ngangu ti Nzapa na lege ti mabe ndali ti salut so a ga nduru ti fa ni awe na ngoi ti nda ni.” (1 Pi. 1:4, 5). Tënë so abâ aChrétien kue na a lingbi e oko oko kue laso e bi bê ti e na ndo ni. Ngbanga ti nyen? Ngbanga ti so e kue e yeke na bezoin ti mungo maboko ti Nzapa ti ngbâ lakue be-ta-zo na lo.

NZAPA AKANGA LEGE NA E SI E PIKA GERE TI E PËPE

8. Ngbanga ti nyen a lingbi ti si na e ti mû mbeni sioni lege?

⁸ Akpale ti gigi nga na awokongo ti e wani alingbi ti sara si e bâ ndo nzoni mbeni pëpe na lege ti yingo nga ti pusu e ti mû mbeni sioni lege sân ti tene e hinga ni. (Diko aGalate 6:1.) Mbeni ye so asi na yâ ti fini ti David afa ni.

9, 10. Tongana nyen la Jéhovah akanga lege na David ti mû mbeni sioni lege? Nyen la Lo yeke sara ndali ti e laso?

⁹ Na ngoi so Gbia Saül ayeke gi lani ti sara sioni na David, David akanga nzara ti bê ti lo ngangu na lege so lo ke ti futa kula na tere ti gbia ni so asara bê na tere ti lo (1 Sam. 24:3-8). Me kete na pekoni, wokongo ti David asara si lo girisa nzoni sarango ye ti lo so. Lo yeke na bezoin ti kobe na ngu ndali ti lo nga na azo ti lo, tongaso na mbeni lege so ane zo lo hunda Nabal so ayeke mbeni mba ti lo zo ti Israël ti mû maboko na lo. Tongana Nabal atene tënë ti mbana na David, ngonzo ahon ndo ti David na lo londo ti gue ti fâ azo ti da ti Nabal kue. Lo girisa so na lê ti Nzapa ngbanga ti mênë ayeke duti na li ti lo tongana lo fâ azo so tënë ayeke na li ti ala pëpe. Gi ye so Abigaïl, wali ti Nabal, alondo hio ti sara la akanga lege na David ti sara kota ye ti sioni so. David ahinga so Jéhovah la apusu Abigaïl ti sara ye so, ni la lo tene na Abigaïl lo tene: “Sara tënë nzoni na L’Éternel Nzapa ti Israël, Lo so ato mo laso ti tê mbi na lege. Tënë nzoni aga na ndo mayele ti mo, na tënë nzoni aga na ndo mo mveni, teti mo gbanzi lege ti mbi laso si ngbanga ti mênë aga na li ti mbi pëpe, na maboko ti mbi afuta kula ti mbi pëpe.”​—1 Sam. 25:9-13, 21, 22, 32, 33.

¹⁰ Mbaï so afa nyen na e? Jéhovah asara kusala na Abigaïl ti kanga lege na David ti mû mbeni sioni lege. Lo yeke sara nga tongaso teti e laso. Me a lingbi e pensé pëpe so Nzapa ayeke tokua mbeni zo ti kanga lege na e na ngoi kue so e ye ti sara mbeni ye ti sioni. Nga e hinga mbilimbili pëpe tongana nyen la Nzapa ayeke sara ye na yâ ti ambeni ye wala nyen la lo yeke zia lege na ni ti si tongaso si ye so lo leke ti sara aga tâ tënë (Zo-ti. 11:5). Ye oko, e hinga biani so Jéhovah ahinga lakue aye so asi na e na lo yeke mû maboko na e ti ngbâ be-ta-zo na lo. Lo dë bê ti e lo tene: “Fade Mbi wa mo, na Mbi fa na mo lege so a lingbi mo tambela dä; fade Mbi wa mo, na lê ti Mbi angbâ na ndo mo.” (Ps. 32:8). Jéhovah ayeke wa e tongana nyen? Nyen la e lingbi ti sara ti bâ nzoni dä? Ngbanga ti nyen e lingbi ti hinga na bê ti e kue so Jéhovah ayeke fa lege na azo ti lo laso? Zia e bâ tongana nyen mbeti ti Apocalypse akiri tënë na ahundango ndo so.

LO BATA E NA LEGE TI AWANGO

11. Tongana nyen la Jéhovah ahinga nzoni mingi aye so ayeke si na yâ ti acongrégation?

¹¹ Na yâ ti suma so a sara tënë ni na Apocalypse chapitre 2 na 3, Jésus so awara gloire abâ ye so ayeke na yâ ti acongrégation mbasambala ti Asie Mineure. Suma so afa so Jésus ayeke bâ gi acongrégation ni kue tongaso pëpe, me lo bâ ambilimbili ye so asi na yâ ti acongrégation ni. Na tapande, lo sara tënë ti ambeni ye so asi na lo sara même tënë ti ambeni zo. Lo gonda nga acongrégation ni wala lo mû wango na ala alingbi na bezoin ti ala oko oko kue. Ye so afa nyen na e? Suma so aga tâ tënë na peko ti ngu 1914 na ndo ti aChrétien so a soro ala ti gue na yayu so acongrégation mbasambala ni aduti fä ti ala. Me atâa so wango so Christ amû abâ kozoni kue aChrétien so, acongrégation kue so ayeke na ndo ti sese laso alingbi ti bâ nzoni dä. Tongaso, e lingbi ti tene so Jéhovah ayeke sara kusala na Molenge ti lo ti fa lege na azo ti Lo laso. Tongana nyen la e lingbi ti zia si Jéhovah afa lege na e?

12. Tongana nyen la e lingbi ti zia si Jéhovah afa lege na e?

¹² Mbeni ye so e lingbi ti sara ti bâ nzoni na lege ti fango lege so Jéhovah ayeke fa na ndoye a yeke ti manda ye e wani. Jéhovah ayeke mû na e anzoni wango na lege ti ambeti so ngbâa be-ta-zo so ayeke sara ye na ndara ayeke sigigi na ni (Mat. 24:45). Me tongana e ye ti bâ nzoni dä, a lingbi e mû ngoi ti manda ni nga ti sara ye alingbi na ye so e manda. Mandango ye e wani ayeke mbeni ye so Jéhovah ayeke sara kusala na ni ti ‘bata e si e tï pëpe’. (Jude 24). Asi na mo awe ti manda mbeni ye na yâ ti ambeti ti e na mo bâ so a sara mbeti ni so tâ gi ndali ti mo? Bâ ni tongana wango so alondo na Jéhovah na yeda na ni. Legeoko tongana ti so mbeni kamarade ti mo ayeke ndu mo ti fa na mo mbeni ye, Jéhovah alingbi ti sara kusala na yingo ti lo ti fa na mo ambeni sarango ye ti mo so a lingbi mo changé ni. Tongana e yeke nduru ti sara ye alingbi na fango lege ti yingo, e yeke zia si Jéhovah afa lege na e. (Diko Psaume 139:23, 24.) Ni la, zia e bâ wala e yeke manda ka ye tongana nyen.

13. Ngbanga ti nyen a yeke na lege ti ndara ti gbu li na ndo ti lege so e yeke manda na ye?

¹³ Tongana e mû ngoi mingi ndali ti angia, e yeke wara pëpe ngoi so e yeke na bezoin ni ti manda ye e wani. Mbeni ita-koli atene: “A yeke ngangu pëpe ti tene zo agirisa ti manda ye lo wani. Fadeso aye ti ngia ahon ndo ni, na ngere ni ayeke mingi pëpe tongana a haka ni na ti ândö. A yeke wara ni na télé, na ndo ti ordinateur nga na yâ ti téléphone. Aye ti ngia amû ndo kue.” Tongana e sara hange pëpe, wungo ti ngoi so e yeke na bezoin ni ti manda ye e wani nzoni ayeke kiri na peko yeke yeke ngbii na nda ni e yeke na ngoi mbeni pëpe (aÉph. 5:15-17). A yeke nzoni e oko oko e hunda tere ti e: ‘Fani oke la mbi yeke mû ngoi ti manda aye so nda ni alï mingi so ayeke na yâ ti Mbeti ti Nzapa? Mbi yeke manda ye ka gi na ngoi so a lingbi mbi leke tere ti mbi ndali ti mbeni diskur wala mbeni devoir?’ Tongana a yeke tongaso, peut-être e lingbi ti sara kusala nzoni na ngoi so e zia ti manda ye e wani wala ti voro Nzapa na sewa ti manda ye nzoni nga ti gi ndara ti Jéhovah so ayeke na yâ ti Bible, legeoko tongana ti so e yeke gi mbeni mosoro. Ndara ni so alingbi ti bata e nga ti mû maboko na e ti ngbâ be-ta-zo juska na nda ni.​—aProv. 2:1-5.

ATËNË SO AKPENGBA ZO ASARA SI E GBU NGANGU

14. Tongana nyen la Bible afa so Jéhovah abi bê na avundu ti e?

¹⁴ David atingbi lani na aye ti ngangu mingi na yâ ti fini ti lo (1 Sam. 30:3-6). Tënë so lo sû na gbe ti yingo ti Nzapa afa so Jéhovah ahinga vundu ti lo. (Diko Psaume 34:19; 56:9.) Nzapa ahinga nga avundu ti e. Na ngoi so ‘bê ti e afâ’ wala ‘yingo ti e ayeke na vundu’, lo yeke ga nduru na e. Ye so alingbi ti sara si bê ti e adë tongana ti so a dë nga lani bê ti David so ahe bia atene: “Mbi yeke na ngia na mbi duti na ngia teti nzobe ti Mo; teti Mo bâ vundu ti mbi, na Mo hinga vundu ti âme ti mbi.” (Ps. 31:8). Me Jéhovah ayeke sara ye mingi ahon ti bâ gi vundu so e yeke na ni. Lo yeke mû ngangu na e na lege ti atënë so adë bê nga akpengba zo. Mbeni lege so lo yeke sara ni ayeke na lege ti abungbi ti congrégation.

15. E lingbi ti manda nyen na yâ ti ye so asi na Asaph?

¹⁵ Mbeni ye so asi na Asaph so asû ambeni Psaume afa mbeni nzoni ye so zo ayeke wara na guengo na abungbi. Asaph agbu li ti lo na ndo ti ndani so azo ti mbilimbili ayeke bâ pasi me na bango azo ti sioni aye ti ala ayeke tambela nzoni; na lo to nda ti hunda tere ti lo wala a yeke kota ye ti sara na Nzapa. Ye so asara si bê ti lo anze ngangu. Lo fa tënë ti bê ti lo lo tene: “Teti bê ti mbi asui, na tënë ni akpo lenge ti mbi.” Ye so asara si angbâ kete lo zia lege ti sarango na Jéhovah. Nyen la amû maboko na Asaph ti kiri ti bâ ye nzoni? Lo tene: “Mbi gue na Ndo ti Nzoni-kue ti Nzapa.” Kâ na popo ti amba ti lo so ayeke voro Jéhovah, lo changé bango ndo ti lo. Lo bâ so maïngo ti azo ti sioni ayeke gi teti kete ngoi, nga so Jéhovah ayeke leke ande tënë ni (Ps. 73:2, 13-22). Mara ti ye tongaso alingbi ti si nga na e na ambeni ngoi. Aye ti kirikiri so e bâ na yâ ti dunia ti Satan alingbi ti sara e vundu nga bê ti e anze. Guengo na abungbi legeoko na aita ti e ayeke dë bê ti e nga ayeke mû maboko na e ti bata ngia ti e na sarango na Jéhovah.

16. Tapande ti Anne alingbi ti mû maboko na e tongana nyen?

¹⁶ Me ka tongana mbeni ye na yâ ti congrégation asara si a yeke ngangu na mo ti gue na abungbi? Peut-être a zi na maboko ti mo mbeni kusala so a mû na mo na yâ ti congrégation na kamene asara mo, wala mo na mbeni ita amä tere pëpe. Tongana a yeke tongaso, tapande ti Anne alingbi ti mû maboko na mo. (Diko 1 Samuel 1:4-8.) Dabe ti mo so bê ti lo ason lani ngangu ndali ti mbeni ye so asi na yâ ti sewa ti ala so abâ lo na sambâ ti lo Peninna. Ye ni aga ngangu mingi na Anne ngu oko oko na ngoi so ala yeke gue na Shilo ti mû asandaga na Jéhovah. A sara lo vundu mingi na asara si “lo toto, lo te kobe pëpe.” Ye oko, lo zia pëpe si kpale so akanga lege na lo ti gue ti voro Jéhovah. Jéhovah abâ dutingo be-ta-zo ti lo na lo iri tënë nzoni na ndo ti lo.​—1 Sam. 1:11, 20.

17, 18. (a) Aye wa ayeke kpengba e na ngoi ti abungbi? (b) So Jéhovah abâ lege ti mo na ndoye asara si mo bâ tere ti mo tongana nyen?

¹⁷ A yeke nzoni aChrétien laso amû tapande ti Anne. A lingbi e gue lakue na abungbi. A si na e kue awe ti bâ so abungbi ti e ayeke kpengba zo (aHéb. 10:24, 25). Ndoye ti aita ti e ayeke dë bê ti e. Mbeni tënë so e mä na yâ ti mbeni diskur wala mbeni commentaire alingbi ti ndu bê ti e. Na yâ ti lisoro so e sara kozo na bungbi wala na pekoni, mbeni ita alingbi ti dengi mê ti mä e wala ti tene ambeni tënë so adë bê ti e (aProv. 15:23; 17:17). Na ngoi so e yä lego ti e ti he bia na Jéhovah, e yeke yapu nga tere ti e ayeke nzere. Mingi ni na ngoi so “bibe ayeke mingi na bê” ti e la e yeke na bezoin ti atënë so akpengba zo so e yeke wara na abungbi, ndo so Jéhovah ayeke kpengba e na lege ti ‘tënë ti Lo so alungula vundu’ nga lo yeke mû maboko na e ti tene e ngbâ lakue be-ta-zo.​—Ps. 94:18, 19.

¹⁸ So Nzapa ti e ayeke bâ lege ti e na ndoye asara si e duti nzoni tongana ti Asaph so ahe bia na Jéhovah atene: “Mo gbu maboko ti mbi ti koti. Fade Mo fa lege na mbi na tënë ti wango ti Mo.” (Ps. 73:23, 24). E kiri singila mingi so Jéhovah ayeke bata e ndali ti salut!

[Foto na lembeti 28]

Mo nga kue Jéhovah la agboto mo

[Foto na lembeti 30]

Sarango ye alingbi na wango ti Nzapa ayeke bata e

[Foto na lembeti 31]

E yeke wara ngangu na lege ti atënë so akpengba zo