Ndali ti nyen Lo so amä ka asambela azia si azo ayeke bâ pasi?

ATÂA so ambeni zo ayeke sambela, ala yeke na kite so Nzapa ayeke dä. Ngbanga ti nyen? Peut-être ngbanga ti so ala bâ so azo ayeke bâ pasi mingi na yâ ti dunia so. Mo hunda tere ti mo lâ oko awe na ndani so Nzapa azia si azo ayeke bâ pasi so?

Nzapa aleke lani azo na siokpari na tere ti ala nga ti tene ala bâ pasi? A yeke duti ngangu na e ti ye mbeni nzapa so aye gi ti tene azo abâ pasi. Bâ tapande so: Mo bâ mbeni fini oto na mo ngoro tere ni ti bâ pendere ti lo. Mo ye ti bâ! mbage ni kâ abuba. Mo yeke tene ande mo tene a leke ni gi na bubango ni? Oko ape! Mo yeke tene so a leke ni pendere me mbeni zo wala mbeni ye la abuba ni.

Legeoko nga, tongana e bâ tongana nyen la aye ayeke pendere na ndo ti sese, na tapande afleur, anyama, nga e bâ tongana nyen la nzoni songo ayeke na popo ti aye so kue, me e ga ti bâ so azo ayeke sara ye kirikiri nga aye ayeke buba gi bubango, e yeke tene nyen? Bible afa so Nzapa aleke lani kozo koli na kozo wali (Adam na Ève) tâ nzoni mingi, me na pekoni ala wani asara si tere ti ala abuba (Deutéronome 32:4, 5). Me Nzapa azia e tongaso ape! Lo mû zendo ti sara si azo akiri aga nzoni, mbilimbili azo so amä yanga ti lo. Me, ngbanga ti nyen lo ngbâ ti ku ngbii tongaso?

Lo ku ngbii ngbanga ti nyen?

Ngbanga ti so mbeni tënë abâ gigi lani so ayeke ti hinga zo wa la akpa ti komande na ndo ti azo. Jéhovah aleke lani azo ti tene ala wani la akomande tere ti ala pëpe, me a yeke lo. Bible atene: “A yeke na bê ti zo so atambela ti fa lege na gere ti lo . . . pëpe.” (Jérémie 10:23). Mawa ni ayeke so Adam na Ève asoro ti ke komandema ti lo ni. So ala kpe ndia ti Nzapa ape so, ala ga awasiokpari (1 Jean 3:4). A sara si ala na amolenge ti ala angbâ nzoni mbeni pëpe.

Teti angu saki mingi, Jéhovah azia lege na azo ti komande tere ti ala wani, me aye so asi na yâ ti mbaï afa so ala sara gbä. A fa nga so angorogbia kue ti azo aga na pasi na azo. Mbeni oko ti zi bira, sarango ye ti sioni, ye ti kirikiri wala kobela ayeke ti lo dä ape.

Nzapa ayeke sara nyen ti kiri na aye kue nzoni?

Bible atene so na yâ ti kete ngoi Nzapa ayeke ga na mbeni fini dunia so sarango ye ti mbilimbili ayeke duti dä (2 Pierre 3:13). Gi azo so asoro ti ye tere na popo ti ala na ti ye Nzapa si ayeke duti na yâ ti fini dunia ni.​—Deutéronome 30:15, 16, 19, 20.

Bible atene nga so na “lango ti ngbanga” so ayeke pusu nduru nduru, Nzapa ayeke zi apasi kue nga na azo so ayeke na gunda ni (2 Pierre 3:7). Na pekoni awe Nzapa ayeke mû Jésus Christ ti komande na ndo ti azo so amä yanga (Daniel 7:13, 14). Komandema ni so ayeke ga ande na nyen na azo? Bible atene: “Azo so ayeke na tâ be-ti-molenge, fade sese ni aga ye ti héritier ti ala, fade ala wara ngia na yâ siriri so awu mingi.”​—Psaume 37:11.

Aye kue so abuba ndali ti so azo ake yanga ti Jéhovah, “lingu so amû fini”, Jésus, Gbia so ayeke na yayu, ayeke sara ti tene a kiri a ga nzoni (Psaume 36:10). Lo yeke sara si kobela, gango mbakoro nga na kuâ ayeke duti dä mbeni pëpe. Jésus ayeke sava ande azo kue so ayeda na komandema ti lo so lo yeke komande na ndoye. Na gbe ti komandema ti lo ande, azendo so ge ayeke ga tâ tënë:

◼ “Fade wakodoro atene pëpe, Mbi yeke na kobela. Fade A pardone sioye ti azo so aduti kâ.”​—Ésaïe 33:24.

◼ “[Nzapa ayeke] mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”​—Apocalypse 21:4.

Ti hinga so Nzapa aga nduru ti zi apasi kue adë bê ti e, ni la ape? Me ti ku na ngoi ni so, a yeke nzoni e hinga na bê ti e kue so lo yeke mä asambela ti e, atâa so laso lo zia si azo angbâ ti bâ pasi.

Nzapa ayeke mä sambela ti mo, même tongana mo fa vundu ti bê ti mo na lo. Lo yeke ku kungo ngoi so lo yeke zi ande akite kue na yâ ti bê ti mo nga na apasi kue so mo yeke bâ, si mo duti na ngia.