Pasi amû ndo ti sese kue, a lingbi a kaï ni na ndo kue

PASI amû ndo kue, na azo mingi so ayeke bâ mawa ti zo amû maboko na ala so ayeke bâ pasi. Na tapande, azo so asara kua na da-nganga asara kua teti angoi mingi ti mû maboko na azo so ayeke na kobela wala awara akä. Adagbi, lapolice, azo ti lungo ndia, na azo ti mungo maboko na azo na yâ ti akpale nde nde so ayeke si asara ngangu ti kanga lege na apasi ti amba ti ala. Mara ti angangu tongaso ayeke mû maboko gi na azo oko oko so ayeke na yâ ti bezoin ni, me mbeni zo wala mbeni bungbi ayeke na ngangu pëpe ti zi apasi na ndo ti sese kue. Me, Nzapa alingbi ti leke akpale kue na ndo ti sese kue.

Na yâ ti ndangba buku ti Bible e wara zendo so: “Fade [Nzapa a]yeke mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.” (Apocalypse 21:4). Bâ tongana nyen si azo mingi ayeke bâ nzoni ande na lege ti zendo so. Na nduru tënë, a fa so Nzapa aleke awe ti hunzi apasi kue. Fade lo sara ni na zingo na ndo ti sese kue bira, nzara, kobela, sarango ye ti mbilimbili pëpe nga na azo ti sioni kue. Zo oko alingbi ti sara ye so pëpe.

Ye so Royaume ti Nzapa ayeke sara ande

Fade Nzapa asara si azendo ti lo aga tâ tënë na lege ti use zo so ayeke ngangu mingi na yâ ti dunia kue: Jésus Christ so azingo na kuâ. Ngoi ayeke ga so Jésus ayeke komande tongana Gbia na ndo ti sese kue sân ti tene mbeni zo akanga lege na lo. Fade azo ayeke duti na gbe ti komandema ti agbia ti sese wala ti azo ti poroso pëpe. Me, gi Gbia oko na ngorogbia oko si ayeke komande na ndo ti ala: Royaume ti Nzapa.

Fade Royaume so ayeke zi angorogbia kue ti azo. Bible asara tënë ni kozoni awe, lo tene: “Fade Nzapa ti yayu ayä royaume so afuti lâ oko pëpe, na Lo zia royaume ni na tïtî ambeni zo nde pëpe; me fade royaume so afâ mbeni royaume so kue nduru nduru, na a sara si royaume nde nde so kue awe; na fade royaume so angbâ lakue lakue.” (Daniel 2:44). Fade azo ti sese kue ayeke duti beoko na gbe ti ngorogbia ti mbilimbili: Royaume ti Nzapa.

Na ngoi so lo yeke na ndo ti sese tongana zo, fani mingi Jésus asara tënë ti Royaume so. Lo sara tënë ni na yâ ti tapande ti sambela so lo fa, lo hunda na adisciple ti lo ti sambela tongaso: “Zia royaume ti mo aga. Zia a sara ye so bê ti mo aye, na yayu legeoko nga na ndo ti sese.” (Matthieu 6:10). Bâ, Jésus afa so kamba ayeke na popo ti Royaume ni na ye so bê ti Nzapa aye so fade a yeke sara na sese, na ye so bê ti Nzapa aye ayeke ti zi pasi na ndo ti sese kue.

Fade ngorogbia ti Nzapa so ayeke mbilimbili ayeke ga na aye ti nzoni so mbeni ngorogbia ti azo alingbi ti ga na ni lâ oko pëpe. Dabe ti mo so Jéhovah amû Molenge ti lo tongana ngere so a futa ti zi azo tongaso si azo alingbi ti wara fini ti lakue lakue. Na gbe ti nzoni komandema ti Royaume ni, fade yeke na yeke siokpari ti azo ayeke hunzi. Ye ti pekoni ayeke nyen? Fade Jéhovah ‘ahunzi kui teti lakue lakue; fade lo mbô ngule na lê ti azo kue.’​—Ésaïe 25:8.

Ambeni zo alingbi ti hunda tere ti ala: ‘Ngbanga ti nyen Nzapa asara mbeni ye pëpe? Lo yeke ku nyen?’ Jéhovah alingbi fade ti zi wala ti kanga lege na apasi kue ândö giriri. Me, lo zia si a ngbâ ti gue, lo zia ni senge pëpe, lo sara tongaso ti tene amolenge ti lo so ayeke na sese abâ nzoni na pekoni teti lakue lakue. Babâ na mama ti ndoye ayeke zia molenge ti ala abâ pasi tongana ala hinga so lo yeke duti nzoni na pekoni aninga. Legeoko nga, Jéhovah azia si azo abâ pasi teti kete ngoi ndali ti araison mingi, na Bible afa nda ni kue. Araison so andu tënë ti liberté ti soro ye, ti siokpari na tënë so abâ droit ti Jéhovah ti komande. Bible afa nga so teti mbeni kete ngoi, Nzapa azia lege na mbeni sioni créature ti yingo ti komande dunia.a

Atâa so place amanke na e ti sara tënë kue na ndo ti nda ti pasi so e yeke bâ, atâ tënë use ayeke dä so alingbi ti mû na e beku nga na ngangu. Kozoni ayeke so: Fade Jéhovah airi tënë nzoni na ndo ti e ahon apasi kue so e bâ. Na ndo ni, Nzapa adë bê ti e atene: “Fade azo adabe ala na kozo ye pëpe, na ala bi bê ti ala dä mbeni pëpe.” (Ésaïe 65:17). Fade Nzapa azi mawa na pasi so aga na lege ti ziango lege na sioni teti kete ngoi, lo yeke zi ni kue nga teti lakue lakue.

Use ni ayeke so: Ngoi so Nzapa adiko awe ti kaï na pasi ayeke changé pëpe. Dabe ti mo so prophète Habakuk ahunda Jéhovah: Fade lo zia lege na sioni ye ti ngangu na tiri aninga ngoi oke? Jéhovah akiri tënë na lo atene: “Ye so mo bâ tongana suma, fade a si na l’heure ni so a leke awe, fade . . . a manke pëpe.” (Habakuk 2:3). Tongana ti so e yeke bâ ande na yâ ti article ti peko, “l’heure ni so a leke awe” so aga nduru.

[Kete tënë na gbe ni]

[Encadré na lembeti 7]

Aversê so afa pendere gigi ti kekereke

ABIRA AYEKE MBENI PËPE:

“Ga, i bâ kusala ti L’Éternel, bâ lege so Lo futi ndo na sese so. Lo sara si bira awe juska na nda ti sese”.​—Psaume 46:9, 10.

AZO SO E NDOYE ALA AKIRI NA FINI:

“A yeke zingo ande na kuâ azo ti mbilimbili na azo ti mbilimbili pëpe.”​—Kusala 24:15.

KOBE TETI AZO KUE:

“Fade le-kobe ayeke mingi na sese na li ti ahoto”.​—Psaume 72:16.

FADE KOBELA AYEKE MBENI PËPE:

“Fade wakodoro atene pëpe, Mbi yeke na kobela.”​—Ésaïe 33:24.

FADE A ZI AZO TI SIONI:

“Me azo ti sioni, fade a lungula ala na sese so, na fade a gboto azo ti handa na yâ sese ni.”​—aProverbe 2:22.

FADE FANGO NGBANGA TI MBILIMBILI AMÛ NDO KUE:

“Bâ, fade gbia [Christ Jésus] akomande na lege ti mbilimbili, na amokonzi akomande na lege ti fango ngbanga ti mbilimbili.”​—Ésaïe 32:1.

[Afoto na lembeti 7]

Fade Royaume ti Nzapa ayeke kaï apasi kue so e bâ