Sara ye tongana azo ti Royaume ni

‘Ala sara ye tongana ti so alingbi na nzoni tënë.’​—APHIL. 1:27.

KIRINGO TËNË NI AYEKE SO WA?

Azo wa la alingbi ti duti azo ti Royaume ni?

Ti tene yanga ti kodoro ti Royaume, ti hinga mbaï ni nga na andia ni aye ti tene nyen?

Tongana nyen la azo ti Royaume ayeke fa so ala ndoye andia ti Nzapa?

1, 2. Ngbanga ti nyen wango so Paul amû na congrégation ti Philippes ayeke kota mingi?

BAZENGELE Paul awa azo ti congrégation ti Philippes ti ‘sara ye tongana ti so alingbi na nzoni tënë’. (Diko aPhilippien 1:27.) Na yâ ti versê so tënë “sara ye” aye nga ti tene “ti sara ye tongana ti azo ti kodoro.” Tënë so ayeke kota mingi na lê ti azo ti congrégation ti Philippes. Ngbanga ti nyen? Peut-être ngbanga ti so kodoro-togbia ti Rome amû lani lege na azo ti Philippes ti ga azo ti Rome nga ti tene ndia ti Rome abata ala. A nzere mingi na azo ti Philippes ndali ti so ye so amû lege na ala ti wara ambeni ye ti nzoni so azo mingi la ayeke na ni na ngoi ni so pëpe.

² Amembre ti congrégation ti Philippes ayeke na kota raison ti pika kate ti ala. Paul adabe ti aChrétien so, so a soro ala ti gue na yayu, lo tene: “Âdu ti e, kodoro ti e ayeke na yayu.” (aPhil. 3:20). Ala yeke azo ti Royaume ti Nzapa so ayeke kota mingi ahon angorogbia kue ti azo. Royaume ti Nzapa abata ala nga amû na ala aye ti nzoni ahon aye kue so mbeni ngorogbia alingbi ti mû na zo.​—aÉph. 2:19-22.

3. (a) Azo wa la awara pasa ti duti azo ti Royaume ni? (b) Nyen la e yeke bâ na yâ ti article so?

³ Wango so Paul amû ti “sara ye tongana ti azo ti kodoro” abâ kozoni kue azo so ayeke komande ande na Christ na yayu (aPhil. 3:20). Me a bâ nga azo so ayeke duti ande na fini na ndo ti sese na gbe ti Royaume ti Nzapa. Ngbanga ti nyen? Ngbanga ti so e kue e yeke sara na oko Gbia, Jéhovah, nga aye so lo hunda na awakua ti lo kue ti sara ayeke legeoko (aÉph. 4:4-6). Laso, azo ayeke sara kue ti sara ye alingbi na ye so a hunda ti ga azo ti mbeni kodoro so ayeke na mosoro. A lingbi e bâ na nene ni mingi pasa so e yeke na ni ti ga azo ti Royaume ni. Ti kiri ti bâ na nene ni mingi pasa ni so, zia e haka ambeni ye so a hunda ti tene mbeni zo asara si lo ga zo ti mbeni kodoro na ati so a lingbi mbeni zo asara si lo ga zo ti Royaume ti Nzapa. Na pekoni e yeke bâ aye ota so a lingbi e sara tongana e ye ti ngbâ ti duti azo ti Royaume ni.

AYE SO A HUNDA TI SARA TI GA ZO TI ROYAUME NI

4. Yanga ti kodoro so ayeke tâ nzoni ni ayeke nyen? Ti tene ni aye ti tene nyen?

⁴ Manda yanga ti kodoro ni. Ambeni ngorogbia ahunda na azo so aye ti ga azo ti kodoro ti ala ti tene kota yanga ti kodoro ni. Ti ambeni zo, même na pekoni so ala ga azo ti kodoro ni, a lingbi ala sara ngangu teti angu mingi si ala tene fini yanga ti kodoro ni nzoni. Peut-être ala yeke hinga andia ti yanga ti kodoro ni hio me peut-être a hunda ngoi mingi ti hinga ti tene yanga ti kodoro ni so nzoni. Legeoko nga, Royaume ti Nzapa ahunda na azo ti lo ti manda ye so Bible airi ni “yanga ti kodoro so ayeke tâ nzoni ni”. (Diko Sophonie 3:9.a) Yanga ti kodoro so ayeke tâ nzoni ni so ayeke nyen? A yeke tâ tënë so Bible afa na ndo ti Nzapa nga na ye so lo leke ti sara. Ti tene yanga ti kodoro so ayeke tâ nzoni ni aye ti tene ti sara ye alingbi na andia nga na afango ye ti Nzapa. Azo ti Royaume ti Nzapa alingbi ti manda akozo fango ye ti Bible hio nga ti wara batême. Ye oko, même na peko ti batême ti ala, a lingbi ala sara ngangu ti tene yanga ti kodoro ni so nzoni mingi ahon ti kozo. E yeke sara ni tongana nyen? A lingbi e oko oko kue e ngbâ ti sara ngangu ti sara ye na yâ ti fini ti e alingbi na ye so e manda na yâ ti Bible.

5. Ngbanga ti nyen a yeke nzoni e manda ye kue so e lingbi ti manda na ndo ti mbaï ti bungbi ti Jéhovah?

⁵ Gi ti hinga mbaï ni. A lingbi mbeni zo so aye ti ga zo ti mbeni kodoro ahinga mbaï ti kodoro ni. Legeoko nga, a lingbi azo so aye ti ga azo ti Royaume ni agi ti hinga ye kue so ala lingbi ti hinga na ndo ti Royaume ti Nzapa. Bâ tapande ti amolenge ti Koré so asara kua lani na ndo so a yeke voro Jéhovah dä na Israël. Ala ye lani Jérusalem nga na ndo so a yeke voro Jéhovah dä mingi nga ala ye mingi ti sara tënë na ndo ti mbaï ti gbata ni so, a yeke pëpe ndali ti pendere ni me ndali ti so a yeke “kodoro ti kota Gbia”, Jéhovah. A yeke lani kâ la a yeke fa Ndia ti Jéhovah na azo. Azo so “kota Gbia” akomande lani na ndo ti ala ayeke azo so anzere na Jéhovah nga lo ndoye ala. (Diko Psaume 48:2, 3, 10, 13, 14.) Na tapande ti amolenge ti Koré, mo ye ti manda ye na ndo ti mbaï ti mbage ti bungbi ti Jéhovah so ayeke na sese ge nga ti fa ni na azo? Tongana mo manda ye mingi na ndo ti bungbi ti Jéhovah nga tongana nyen la lo mû maboko na azo ti lo, mo yeke bâ biani so Royaume ti Nzapa ayeke tâ ye. Mo yeke ye mingi ti fa nzoni tënë ti Royaume.​—Jér. 9:24; Luc 4:43.

6. Ngbanga ti nyen a yeke na lege ni ti tene Jéhovah ahunda na e ti manda andia nga na aye so lo fa?

⁶ Hinga andia ni. Angorogbia ti azo ayeke hunda na azo ti ala ti hinga andia ti kodoro ni nga ti sara ye alingbi na ni. Tongaso, a yeke na lege ni ti tene Jéhovah aku ti tene azo kue ti Royaume ti lo ahinga andia ti lo nga na aye so lo fa na ti sara ye alingbi na ni (És. 2:3; Jean 15:10; 1 Jean 5:3). Mingi ni andia ti azo ayeke andia so alingbi kue pëpe nga asara nzoni na azo kue pëpe. Me “ndia ti L’Éternel alingbi kue”. (Ps. 19:8). Mo yeke na ngia ti diko Bible lâ oko oko nga ti manda andia nga na aye so Nzapa afa? (Ps. 1:1, 2). Oko lege so e lingbi ti hinga na andia ti Nzapa ayeke ti tene e manda ni e wani. Mbeni zo alingbi ti sara ni na place ti e pëpe.

AZO TI ROYAUME NI ANDOYE ANDIA TI NZAPA

7. Ngbanga ti nyen la azo ti Royaume ayeke sara ye alingbi na andia ti Nzapa?

⁷ Ti ngbâ ti duti azo ti Royaume ni, a lingbi e hinga andia ti Nzapa nga e ndoye ni. Mingi ti azo ti mbeni kodoro ayeke tene so ala yeda na andia ti kodoro ni. Me tongana ambeni ndia ti kodoro ni anzere na ala pëpe na ala bâ so zo oko abâ ala pëpe, ala yeke doro ndia ni. Mingi ni, azo ni so ayeke azo so “agi ti nzere na lê ti azo”. (aCol. 3:22). Azo ti Royaume ayeke sara ye alingbi na andia ti Nzapa ndali ti mbeni raison nde. E ndoye Jéhovah. A yeke ndali ni la e yeke na ngia ti sara ye alingbi na andia ti lo, même tongana mbeni zo abâ e pëpe.​—És. 33:22; diko Luc 10:27.

8, 9. Tongana nyen la mo lingbi ti hinga so mo ndoye biani andia ti Nzapa?

⁸ Tongana nyen la mo lingbi ti hinga so mo ndoye biani andia ti Nzapa? Gbu li ti mo na ndo ti lege so mo yeke sara ye na ngoi so a mû na mo wango na ndo ti mbeni ye so mo pensé so a bâ gi mo; na tapande tënë ti yungo bongo nga na lekengo tere nzoni. Kozoni si mo ga zo ti Royaume, peut-être mo yeke yü bongo gi tongaso wala mo yeke yü abongo so ayeke zingo nzara ti tere ti zo. Na ngoi so ndoye ti mo na mbage ti Nzapa ayeke kono, mo manda ti yü bongo na mbeni lege so ane lo (1 Tim. 2:9, 10; 1 Pi. 3:3, 4). Peut-être mo bâ so fadeso mo yeke yü bongo nzoni. Me ka tongana mbeni ancien atene na mo so azo mingi na yâ ti congrégation abâ so yungo bongo ti mo ayeke nzoni ape, mo yeke sara ye tongana nyen? Mo yeke gi araison, mo yeke sara ngonzo wala mo yeke ke ti changé? Mbeni kota ndia so a lingbi azo ti Royaume asara ye alingbi na ni ayeke ti sara ye tongana ti Christ (1 Pi. 2:21). Paul asara tënë na ndo ti tapande ti Jésus, lo tene: “Zia zo oko oko na popo ti e agi ti nzere na mba ti lo na yâ ti ye so ayeke nzoni ti kpengba mba ti lo ni. Teti même Christ agi ti nzere na lo wani pëpe.” (aRom. 15:2, 3). Ti sara si siriri angbâ na yâ ti congrégation, Chrétien so ayeke biazo ayeke gi lakue ti kpe ti sara aye so ayeke sara sioni na yingo-ti-hinga ti amba ti lo.​—aRom. 14:19-21.

⁹ Zia e bâ fadeso ambeni kota tënë use: bango ndo ti e na ndo ti tënë ti bungbingo koli na wali nga na mariage. Azo so ayeke azo ti Royaume ti Nzapa pëpe alingbi ti pensé so a yeke sioni pëpe ti bungbi koli na koli wala wali na wali, ti bâ porno, ti gi mbeni koli wala wali nde wala ti sara divorce. Me azo ti Royaume amanda ti gbu li na ndo ti aye so ayeke ga na peko ti aye so ala sara nga tongana nyen aye so ala sara ayeke sara ye na ndo ti amba ti ala. Kozoni si ala manda tâ tënë, mingi ti ala asara aye so andu lango-sioni. Me fadeso ala hinga so bungbingo koli na wali nga na mariage ayeke amatabisi so alondo na Nzapa. Ala ndoye andia ti Jéhovah nga ala hinga so azo so ake ti sara ye alingbi na andia ti Nzapa na ndo ti tënë ti bungbingo koli na wali nga na mariage alingbi pëpe ti duti azo ti Royaume ni (1 aCor. 6:9-11). Ye oko, ala hinga nga so bê ti zo ayeke handa zo mingi (Jér. 17:9). Ni la, ala yeke na ngia tongana a mû na ala ambilimbili wango so ayeke mû maboko na ala ti ngbâ ti sara ye alingbi na andia ti Nzapa.

AZO TI ROYAUME NI ABÂ AWANGO NA NENE NI

10, 11. Akpengba wango wa Royaume ti Nzapa amû na e? Mo pensé ti mo nyen na ndo ti awango so?

¹⁰ Angorogbia ti azo alingbi ti mû wango na azo ti ala na ndo ti ambeni kobe na ambeni yorö. Ti tâ tënë ni, a yeke pëpe akobe na ayorö kue la ayeke sioni. Me tongana mbeni ye alingbi ti sara sioni na zo, ngorogbia ayeke mû wango na azo ti lo na ndo ni ti bata ala. A yeke ti ngorogbia ni ti mû awango so. Royaume ti Nzapa ayeke mû nga awango na azo ti lo. Lo yeke mû na e awango na ndo ti aye so alingbi ti gue na e ti ke andia ti Nzapa nga ti buba songo ti e na lo. Na tapande, azo mingi ayeke sara kusala na Internet ti sara lisoro, ti manda ye nga ti sara ngia. Bungbi ti Jéhovah ayeke sara kusala na Internet ti sara aye ti nzoni mingi. Me asite mingi ayeke nzoni pëpe ndali ti azo so aye ti ngbâ ti sara ye so ayeke na lege ni. Asite so ayeke fa porno ayeke biani sioni. Teti angu mingi, ngbâa be-ta-zo ayeke mû na e wango na ndo ti asite ni so na e kiri singila mingi ndali ti awango so.

¹¹ Ambeni site ayeke dä so asigigi ade ti ninga pëpe na azo mingi ayeke sara kua na ni. A iri asite ni so réseaux sociaux. Asite ni so alingbi ti ga na ye ti nzoni me ala lingbi nga ti ga na kpale mingi. Tongaso, a lingbi e sara hange tongana e ye ti sara kua na ni. A lingbi ti gue na e ti lë songo na asioni zo (1 aCor. 15:33). A yeke ndali ni la bungbi ti Jéhovah amû anzoni wango na ndo ti sarango kusala na asite ni so. Mo diko ambeti kue so ngbâa be-ta-zo asigigi na ni ade ti ninga pëpe na ndo ti sarango kusala na aréseau sociaux so awe? A yeke na lege ti ndara pëpe ti sara kua na asite so sân ti diko ambeti so.b A yeke tongana nyongo mbeni ngangu yorö sân ti diko wango so ayeke na tere ni.

12. Ngbanga ti nyen a yeke ye ti buba ti sara sanka ti awango?

¹² Azo so asara sanka ti awango so ngbâa be-ta-zo amû ayeke sara biani sioni na tere ti ala wani nga na azo so ala ye ala. Ambeni zo aga ngbâa ti bango porno wala ala sara lango-sioni na ala pensé so Jéhovah alingbi pëpe ti bâ ye so ala yeke sara so. A yeke ye ti buba ti pensé so e lingbi ti honde na Jéhovah ye so e sara. (aProv. 15:3; diko aHébreu 4:13.) Nzapa aye ti mû maboko na azo tongaso na lo yeke sara kua na a-ancien ti gi ti mû maboko na ala (aGal. 6:1). Ye oko, legeoko tongana ti so angorogbia ti azo alingbi ti zi na maboko ti mbeni zo droit ti duti zo ti kodoro ti ala ndali ti mbeni sioni ye so lo sara, Jéhovah ayeke zi azo so adoro andia ti lo na ake ti changé bê ti ala (1 aCor. 5:11-13).c Ye oko, Jéhovah ayeke sara ye na nzoni bê. Azo so achangé bê ti ala na azia ti sara ye so ayeke sioni alingbi ti kiri ti ga akamarade ti Jéhovah na ti ngbâ ti duti azo ti Royaume (2 aCor. 2:5-8). So kota pasa si e yeke na ni ti sara kua na mbeni Gbia so ayeke sara ye na ndoye!

AZO TI ROYAUME ABÂ MANDANGO YE NA NENE NI

13. Tongana nyen la azo ti Royaume ayeke fa so ala bâ mandango ye na nene ni?

¹³ Angorogbia mingi ayeke sara ngangu ti fa ye na azo ti ala. Ala yeke leke a-ekole ti tene azo amanda ti diko na ti sû mbeti nga ti manda anzoni kode ti kua. Azo ti Royaume abâ a-ekole so na nene ni nga ala yeke gi ti manda ti diko na ti sû mbeti nga ti manda akode so ala yeke na bezoin ni ti sara na kua. Ala bâ na nene ni mingi fango ye so Jéhovah ayeke fa na ala na lege ti bungbi ti lo. Na tapande, bungbi ti lo ayeke wa e ti diko mbeti. A wa ababâ na amama ti diko mbeti na amolenge ti ala. Nze oko oko, ngbâa be-ta-zo ayeke sigigi na a-Tour ti Ba Ndo na Réveillez-vous ! Tongana lango oko oko mo diko alembeti use tongaso, mo yeke diko ni kue na yâ ti nze oko. Na sarango tongaso, mo yeke ngbâ ti wara ye ti nzoni na lege ti fango ye so Jéhovah ayeke fa na e.

14. (a) Fango ye wa e yeke wara? (b) Awango wa so andu vorongo Nzapa na yâ ti sewa mo sara kusala na ni awe?

¹⁴ Na yâ ti yenga oko oko, azo ti Royaume ayeke manda ye na ngoi ti abungbi ti congrégation. Na tapande, ahon angu 60 awe la Ekole ti Kusala ti aChrétien amû maboko na a-élève ni ti duti azo so ahinga ti fa ye nzoni na ndo ti Mbeti ti Nzapa. Mo zia iri ti mo na ekole so awe? Ngbâa be-ta-zo afa nga na e nene ti vorongo Nzapa na yâ ti sewa yenga oko oko. Ye so ayeke kpengba dutingo beoko ti sewa. Mo sara kusala awe na awango so ayeke na yâ ti ambeti ti e so andu vorongo Nzapa na yâ ti sewa?d

15. Kota pasa wa e yeke na ni?

¹⁵ Azo mingi ti ambeni kodoro ayeke tara ka ti ga na ambeni zo ti mû peko ti mbeni kama-poroso. Ambeni ayeke gue même da na da ti sara ni. Na ndo ti sese kue azo ti Royaume ayeke fa so ala mû peko ti Royaume ti Nzapa na fango tënë na azo na ndo ti lege nga da na da. Na tapande, nda ti Tour ti Ba Ndo ayeke ti fa tënë ti Royaume ti Jéhovah. Tongana ti so a sara tënë ni na yâ ti kozo article so, laso Tour ti Ba Ndo ayeke mbeti-sango so a kangbi ni mingi na ndo ti sese ahon tanga ti ambeti-sango kue. Ti sara tënë na azo na ndo ti Royaume ti Nzapa ayeke mbeni kota pasa. Mo yeke fa nzoni tënë ti Royaume na nzara ni?​—Mat. 28:19, 20.

16. Tongana nyen la mo lingbi ti fa so mo yeke mbeni nzoni zo ti Royaume ti Nzapa?

¹⁶ Na yâ ti kete ngoi Royaume ti Nzapa ayeke duti ande gi oko ngorogbia so ayeke komande sese. Gi andia ti Royaume so la ayeke fa lege na azo. Mo yeke duti ande mbeni nzoni zo ti Royaume ti Nzapa na ngoi ni so? Laso la ayeke ngoi ti tene mo fa ni. Na yâ ti adesizion kue so mo yeke mû lâ oko oko, sara ye kue teti gloire ti Nzapa na fa so mo yeke sara ye tongana mbeni nzoni zo ti Royaume ti Nzapa.​—1 aCor. 10:31.

[Akete tënë na gbe ni]

[Tënë na lembeti 14]

Mo yeke sara ye alingbi na awango so ngbâa be-ta-zo amû so andu Internet?

[Foto na lembeti 12]

Na tapande ti amolenge ti Koré, mo ye tâ vorongo nga na mbaï ni?

[Foto na lembeti 15]

Vorongo Nzapa na yâ ti sewa alingbi ti mû maboko na mo nga na sewa ti mo ti ga anzoni zo ti Royaume