A-ekole ti mandango Bible afa na gigi ndoye ti Jéhovah

JÉHOVAH ayeke Kota “Maître” ti e (És. 30:20). Ndoye apusu lo ti fa ye na azo nga ti leke ala nzoni. Na tapande, kota ndoye ti Jéhovah apusu lo ti fa na Jésus “aye kue so lo wani lo sara”. (Jean 5:20). Teti so Jéhovah andoye e, aTémoin ti lo, lo mû na e “yanga so ahinga ti sara tënë” na ngoi so e sara ngangu ti gonda lo na ti mû maboko na azo.​—És. 50:4.

Na mungo tapande ti ndoye ti Jéhovah, Komite ti Bebungbi so abâ tënë ti fango ye azia na sese a-ekole ti mandango Bible bale-oko ti fa ye na azo so ayeke na nzara ti manda ye nga so dutingo ti ala amû lege na ala ti gue na a-ekole so. Mo bâ so a-ekole so afa na gigi ndoye so Jéhovah ayeke na ni?

Gi ti hinga ye na ndo ti a-ekole so nga na atënë so ambeni zo so ague na a-ekole ni so atene. Na pekoni, hunda tere ti mo: ‘Mbi lingbi ti sara nyen ti wara ye ti nzoni na lege ti fango ye ti Nzapa so?’

WARA YE TI NZONI NA LEGE TI FANGO YE TI NZAPA

Teti so Jéhovah ayeke “Nzapa ti ndoye”, lo yeke fa ambeni ye na e ti sara si e duti na ngia na yâ ti fini ti e, ti leke e ti hon ndo ti akpale nga ti mû maboko na e ti wara kota ngia na yâ ti kusala ti e (2 aCor. 13:11). Legeoko tongana ti akozo Chrétien, e wara aye kue so e yeke na bezoin ni ti mû maboko na azo, ti “fa na ala ti bata aye kue” so a mû yanga na e ti sara.​—Mat. 28:20.

Atâa so e lingbi pëpe ti gue na a-ekole so kue, e lingbi ti sara mbeni oko wala mingi. Nga e lingbi ti sara ye alingbi na afango ye ti Bible so e wara na ngoi ni so. E lingbi nga ti ga anzoni wafango ye na ndo ti Bible na sarango kua maboko na maboko na awakua ti Jéhovah so a fa ye na ala nzoni.

Hunda tere ti mo: ‘Dutingo ti mbi amû lege na mbi ti sara ngangu ti gue na mbeni oko ti a-ekole so?’

Azo so ayeke voro Jéhovah abâ tongana mbeni kota pasa la ala wara ti manda ye na a-ekole so nga ti mû mbage dä. Zia si fango ye so mo wara asara si mo ga nduru mingi na Nzapa nga amû na mo aye so mo yeke na bezoin ni ti sara akusala so lo mû na mo, mbilimbili kusala ti fango nzoni tënë so a lingbi e sara ni hio.

[Encadré/Afoto na lembeti 13-17]

TËNË NA NDO TI A-EKOLE TI MANDANGO BIBLE

Ekole ti Kusala ti aChrétien

Ndani ayeke nyen?: Ti leke awafango tënë si ala fa tënë nzoni nga si ala hinga ti sara étude nzoni na azo.

A ninga ngoi oke?: A hunzi ka pëpe.

Na ndo wa?: Na Da ti Royaume ti ndo so awafango tënë ni ayeke dä.

Azo wa alingbi ti sara ni?: Azo kue so ayeke gue lakue na abungbi, so ayeda na aye so Bible afa nga ayeke sara ye alingbi na ni.

Lingo na ekole ni: Surveillant ti Ekole ti Kusala ti aChrétien la ayeke mû iri ti a-élève ni.

Sharon, so ayeke na mbeni sioni kobela so asara si ambage ti tere ti lo kue akui, atene: ‘Ekole so afa na mbi lege ti gi nda ti aye nga ti fa ni na mbeni lege so ayeke polele. Mbi manda nga ti bi bê na ndo ti bezoin ti azo na lege ti yingo me gi ti mbi pëpe.’

Arnie, mbeni surveillant so ague na ando nde nde na so aninga na yâ ti kua ni atene: “Mbi yeke tene guguma lani na tongana mbi bâ lê ti azo kamene ayeke sara mbi. Ekole so amû maboko na mbi ti bâ so mbi lingbi ti sara nzoni ye. Jéhovah amû maboko na mbi na lege ti ekole so na mbi manda akode so amû lege na mbi ti wu pupu nzoni nga ti bâ lege so mbi yeke sara tënë. Merci mingi ndali ti so mbi lingbi ti sepela Nzapa na yâ ti congrégation nga na fango tënë.”

Ekole ti azo so alï fini fini na Béthel.

Ndani ayeke nyen?: Ti mû maboko na azo so aga fini fini na Béthel ti sara kua ti ala nzoni.

A ninga ngoi oke?: Penze-ngbonga 45 yenga oko oko juska yenga 16.

Na ndo wa?: Na Béthel.

Azo wa alingbi ti sara ni?: A-Béthelite permanent wala avolontaire temporaire so a yeda na ala ti sara kua teti ngu oko wala ahon so.

Lingo na ekole ni: Afini Béthelite kue ayeke sara ni.

Demetrius, so asara ekole so na yâ ti angu so aga na peko ti ngu 1980, atene: “Ekole so asara si mbi maï akode ti mandango ye ti mbi nga aleke mbi ti sara kua na Béthel teti angu mingi. Awafango ye ni, aye so mbi manda nga na anzoni wango so mbi wara asara si mbi mä na bê biani so na ndoye Jéhovah abi bê ti lo na mbi nga lo ye ti mû maboko na mbi ti tene kusala ti mbi na Béthel atambela nzoni.”

Kaitlyn atene: ‘A mû maboko na mbi ti zia lê ti mbi gi na ndo ti ye so ayeke biani kota ye, so ti tene ti duti mbeni zo ti yingo. Ekole so asara si mbi kiri mbi hinga ye mingi na ndo ti Jéhovah, Béthel nga na bungbi ti lo. A sara nga si mbi kiri singila mingi ndali ti aye so kue.’

Ekole ti Kusala ti Royaume

Ndani ayeke nyen?: Ti leke asurveillant, a-ancien nga na ambeni ngoi awakua ti mungo maboko ti sara akua so ala yeke na ni na yâ ti congrégation nga na bungbi ti Jéhovah (Kus. 20:28). A fa nga ye na ndo ti aye nde nde nga na abezoin ti acongrégation so a lingbi abâ lege ni hio. A yeke sara ka ekole so na yâ ti ambeni ngu tongana Bebungbi amû yanga ti tene a sara ni.

A ninga ngoi oke?: Na yâ ti angu so ahon ade ti ninga ape, na ngoi ti ekole ni asurveillant asara lango use wala lango use na ndambo, a-ancien asara lango oko na ndambo na awakua ti mungo maboko asara lango oko.

Na ndo wa?: Mingi ni a yeke na Da ti Royaume wala na Da ti Assemblée.

Azo wa alingbi ti sara ni?: Asurveillant, a-ancien nga na awakua ti mungo maboko. Lingo na ekole ni: Ti a-ancien nga na awakua ti mungo maboko, surveillant ti circonscription la ayeke tisa ala. Ti asurveillant, filiale la ayeke tisa ala.

“Atâa so ekole ni asara tënë na ndo ti gbâ ti ye gi na yâ ti kete ngoi, a mû ngangu na a-ancien nga a mû maboko na ala ti bata ngia ti ala nga ti ‘sara ye tongana akoli’ na yâ ti kua ti Jéhovah. Afini ancien nga na ala so aninga na yâ ti kua ni amanda tongana nyen ti bâ lege ti angasangbaga nzoni nga ti duti biani beoko nga na ‘bango ndo oko.’”​—Quinn (na gbe ni ge).

Michael atene: “Ekole so amû maboko na e ti hinga ye nzoni mingi na ndo ti aye so andu mabe ti e, a fa na e aye so alingbi ti sara sioni na e nga anzoni ye so e lingbi ti sara ti bata angasangbaga nzoni. Jéhovah amû maboko na e na nzoni bê.”

Ekole ti aPionnier

Ndani ayeke nyen?: Ti mû maboko na apionnier ti ‘sara kusala ti ala ni kue.’​—2 Tim. 4:5.

A ninga ngoi oke?: Yenga use.

Na ndo wa?: Filiale la ayeke soro ndo ni; mingi ni a yeke na Da ti Royaume.

Azo wa alingbi ti sara ni?: Apionnier permanent so asara ngu oko wala ahon ni.a

Lingo na ekole ni: Apionnier so alingbi na ye so a fa ndali ti ekole ni la ayeke gue dä na surveillant ti circonscription la ayeke fa na ala lawa la ala yeke gue na ekole ni.

Lily (na mbage ti koli) atene: “Ekole so amû maboko na mbi ti hon ndo ti akpale na fango tënë nga na yâ ti fini ti mbi. Kode ti mandango Bible ti mbi, ti fango ye ti mbi nga lege so mbi yeke sara kusala na Bible akiri aga nzoni mingi. A leke mbi nzoni ti mû maboko na azo, ti sara kua maboko na maboko na a-ancien nga ti sara si congrégation ague na li ni.”

Brenda so ague na ekole so fani use atene: “Ekole so amû lege na mbi ti bi tere ti mbi kue na yâ ti aye ti yingo, ti sara si yingo-ti-hinga ti mbi akiri asara kua nzoni ahon ti kozo nga asara si mbi mû bê ti mbi mingi ti mû maboko na azo. Biani, Jéhovah ayeke mû ye mingi na zo!”

[Kete tënë na gbe ni]

Ekole ti a-ancien

Ndani ayeke nyen?: Ti mû maboko na a-ancien ti sara kua ti ala nzoni na yâ ti congrégation nga ti kono gbungo nda ti ye ti ala na lege ti yingo.

A ninga ngoi oke?: Lango oku.

Na ndo wa?: Filiale la ayeke soro ndo ni; mingi ni a yeke na Da ti Royaume wala na Da ti Assemblée.

Azo wa alingbi ti sara ni?: Gi a-ancien.

Lingo na ekole ni: Filiale la ayeke tisa a-ancien ni.

Bâ tënë so ambeni ancien so asara klase 92 ni ti ekole so na États-Unis atene:

“Ekole so aga na mbi aye ti nzoni mingi, amû maboko na mbi ti bâ tere ti mbi wani nga ti bâ lege so mbi yeke bata na angasangbaga ti Jéhovah.”

“Mbi yeke nduru ti kpengba azo kue na lutingo gi na ndo ti akota tënë ti yâ ti aversê ti Bible.”

“Mbi yeke sara kusala na afango ye so na yâ ti tanga ti fini ti mbi kue.”

Ekole ti asurveillant na awali ti ala

Ndani ayeke nyen?: Ti mû maboko na asurveillant ti circonscription nga na ti district ti sara kua nzoni teti acongrégation na ti “sara kua ngangu na lege ti tënë ti yanga ti ala nga na lege ti fango ye ti ala.”​—1 Tim. 5:17; 1 Pi. 5:2, 3.

A ninga ngoi oke?: Nze use.

Na ndo wa?: Filiale la ayeke soro ndo ni.

Azo wa alingbi ti sara ni?: Gi asurveillant ti circonscription wala ti district.

Lingo na ekole ni: Filiale la ayeke tisa asurveillant na awali ti ala ti gue dä.

Joel so asara kozo klase ni na ngu 1999 atene: “Gbungo nda ti ye ti e na ndo ti komandema so Jésus ayeke na ni na ndo ti bungbi akiri aga nzoni mingi. E bâ so a lingbi e tene atënë so amû ngangu na aita ti e so e yeke sara kua ndali ti ala nga e sara si congrégation oko oko kue aduti beoko. Ekole ni asara si e hinga so na ngoi so mbeni surveillant ayeke mû wango wala même na ngoi so lo yeke kiri na aita na nzoni lege, ye so lo yeke gi ayeke ti mû maboko na ala ti bâ so Jéhovah andoye ala.”

Ekole ti aita-koli so ayeke kumbamba

Ndani ayeke nyen?: Ti leke a-ancien nga na awakua ti mungo maboko ndali ti ambeni kusala na yâ ti bungbi ti Jéhovah. A yeke tokua mingi ti azo so asara ekole ni na yâ ti kodoro ti ala, na ando so bezoin ayeke dä. A lingbi ti tokua ambeni na yâ ti ambeni kodoro nde tongana dutingo ti ala amû lege na ala. Ambeni alingbi ti sara kua ti pionnier spécial temporaire ti to nda ti fa tënë na ndo so ayo so a yeke fa tënë dä pëpe.

A ninga ngoi oke?: Nze use.

Na ndo wa?: Filiale la ayeke soro ndo ni; mingi ni a yeke na Da ti Royaume wala na Da ti Assemblée.

Azo wa alingbi ti sara ni?: Aita-koli so ayeke kumbamba na so ngu ti ala ayeke na popo ti ngu 23 na 62, so ayeke na nzoni seni na so ayeke na nzara ti sara kua na ndo kue so bezoin ayeke dä (Marc 10:29, 30). A lingbi ala yeke apionnier permanent asara ngu use awe wala ahon so nga ala sara kua ti ancien wala ti wakua ti mungo maboko ngu use wala ahon so sân ti fâ yâ ni.

Lingo na ekole ni: A yeke sara mbeni bungbi na ngoi ti kota bungbi ti circonscription ti mû asango na ndo ni na azo so aye ti sara ekole ni.

Rick so asara klase 23 ni na États-Unis atene: “So mbi bi tere ti mbi kue na yâ ti ekole so amû lege na yingo ti Jéhovah ti sara aye mingi na ndo ti mbi. Tongana Jéhovah amû mbeni kua na mo, lo yeke mû maboko na mo ti sara kua ni. Mbi manda so tongana mbi zia bê ti mbi na ndo ti ye so bê ti Nzapa aye me ti mbi pëpe, lo yeke kpengba mbi.”

Andreas so ayeke na Zamani atene: “Mbi manda so lege so bungbi ti Nzapa ayeke sara na kua akpa mbeni miracle. Ekole so aleke mbi ndali ti ambeni kua na devant. Nga, gbâ ti atapande so ayeke na yâ ti Bible afa na mbi tâ tënë so: Sarango kua ndali ti aita ti mbi nga na Jéhovah ayeke ga na mbi tâ ngia.”

Ekole ti aita-koli na awali ti ala

Ndani ayeke nyen?: A yeke ti tene aita-koli na awali ti ala awara mbeni fango ye so asara si Jéhovah na bungbi ti lo alingbi ti sara kua na ala mingi. A yeke tokua mingi ti ala so asara ekole ni na ando so bezoin ayeke dä na yâ ti kodoro ti ala. A lingbi ti tokua ambeni na yâ ti mbeni kodoro nde tongana dutingo ti ala amû lege na ala. Ambeni alingbi ti sara kua ti pionnier spécial temporaire ti to nda ti fa tënë na ndo so ayo so a yeke fa tënë dä pëpe.

A ninga ngoi oke?: Nze use.

Na ndo wa?: A sara ekole so na États-Unis, nga ti to nda ni na septembre 2012, a yeke sara ni na yâ ti aterritoire ti ambeni filiale, mingi ni na Da ti Royaume wala na Da ti Assemblée.

Azo wa alingbi ti sara ni?: Aita-koli na awali ti ala so ngu ti ala ayeke na popo ti ngu 25 na 50, so ayeke na nzoni seni na so alingbi ti gue na ndo kue so bezoin ayeke dä nga so ayeke na oko bibe ti Ésaïe so lo tene: “Mbi yeke, Mo to mbi.” (És. 6:8). A lingbi a duti aita so asara mariage a sara ngu use awe wala ahon ni nga so ayeke na yâ ti kua ti ngoi kue a sara ngu use awe wala ahon ni sân ti fâ yâ ni. A lingbi koli ni aduti ancien wala wakua ti mungo maboko a sara ngu use wala ahon ni sân ti fâ yâ ni.

Lingo na ekole ni: A yeke sara mbeni bungbi na ngoi ti kota bungbi ti district ti mû asango na ndo ni na azo so aye ti sara ekole ni. Tongana a sara mbeni bungbi ndali ni pëpe na ngoi ti akota bungbi ti district so a sara na yâ ti kodoro ti mo na mo ye ti gue na ekole so, mo lingbi ti sû mbeti na filiale ti kodoro ti mo ti wara ambeni sango na ndo ni.

“Fini ti e achangé mingi na yâ ti ayenga miombe so e sara nga a yeke mbeni kota pasa teti aita-koli na awali ti ala so aye ti sara aye mingi na yâ ti kusala ti Jéhovah! E leke na bê ti e ti ngbâ ti duti na aye mingi na yâ ti fini ti e ape tongaso si e sara kusala nzoni na ngoi ti e.”​—Eric na Corina (na gbe ni ge) so asara kozo klase ni na ngu 2011.

Ekole ti Galaad ti Mandango Bible ti Société Watchtower

Ndani ayeke nyen?: Ti leke a-élève ni ti sara kua tongana amissionnaire na ando so azo ayeke dä mingi, ti ga asurveillant so ague na ando nde nde wala ti ga aBéthelite. Ndani ayeke ti mû ngangu na kua ti fango tënë nga ti bâ lege ti filiale nzoni.

A ninga ngoi oke?: Nze oku.

Na ndo wa?: Na kota ndo ti mandango ye ti Société Watchtower na gbata ti Patterson, na Amerika.

Azo wa alingbi ti sara ni?: Akoli na awali ti ala so ayeke amissionnaire me so ade ague na ekole ni ape, apionnier spécial, asurveillant so ague na ando nde nde wala aBéthelite. A lingbi ala use kue asara ngu use wala ahon ni na yâ ti kusala ni sân ti fâ yâ ni. A lingbi ala hinga ti tene Anglais, ti diko ni nga ti sû ni nzoni.

Lingo na ekole ni: Filiale ti kodoro ti ala la alingbi ti tisa ala ti gue na ekole ni.

Lade na Monique alondo na États-Unis na ala yeke fadeso na Afrika. Lade atene: “Ekole ti Galaad aleke e ti gue na ndo kue na yâ ti dunia nga e yeke nduru ti sara kua maboko na maboko na aita ti e.”

Monique atene: “Na ngoi so mbi sara ye alingbi na aye so mbi manda na yâ ti Mbeti ti Nzapa, mbi wara ngia mingi na yâ ti kusala ti mbi. Mbi bâ ngia so tongana mbeni ye so afa ndoye ti Jéhovah.”

Ekole ti amembre ti Komite ti Filiale na awali ti ala

Ndani ayeke nyen?: Ti mû maboko na aita ti Komite ti Filiale ti bâ ndo nzoni na ndo ti ada ti Béthel, ti bâ lege ti aye so andu acongrégation, acirconscription nga na adistrict. Ala manda nga ye na ndo ti kua ti kiringo na peko ti ambeti na ayanga ti kodoro nde nde, kua ti petengo mbeti nga na ti tokuango ni.

A ninga ngoi oke?: Nze use.

Na ndo wa?: Na kota ndo ti mandango ye ti Société Watchtower na gbata ti Patterson, na Amerika.

Azo wa alingbi ti sara ni?: Gi amembre ti Komite ti Filiale wala amembre ti Komite ti Kodoro wala ala so ayeke duti ande amembre ti akomite ni.

Lingo na ekole ni: Bebungbi la ayeke tisa aita-koli ni nga na awali ti ala ti gue dä.

Lowell na Cara asara klase 25 ni na ala yeke na kodoro ti Nigeria. Lowell atene: “Ekole ni afa na mbi so atâa mbi yeke na aye mingi ti sara wala kusala wa a mû na mbi ti sara, a lingbi mbi sara ni tongana ti so Jéhovah aye tongaso si mbi nzere na lê ti lo. Ekole ni afa nga na mbi so a yeke kota ye mingi ti mû tapande ti ndoye so Jéhovah afa na mbage ti awakua ti lo.”

Cara atene: “Mbeni tënë so mbi gbu li ti mbi na ndo ni ayeke so: Tongana mbi lingbi pëpe ti fa mbeni ye na mbeni lege so akpengba pëpe, a lingbi mbi manda ye ni kozoni si mbi gi ti fa ni na azo.”