Mo yeke gi ti manda ye kue na mbage ti Jéhovah?

1. Jéhovah abâ fango ye tongana nyen?

¹ Jéhovah, “Maître” ti e, aye si e manda ye (És. 30:20). Lo to nda ti fa ye na peko ti so lo leke kozo Molenge ti lo (Jean 8:28). Na peko ti so Adam ake yanga, Jéhovah azia lege ti fango ye pëpe, me na ndoye lo fa ye na azo so ayeke awasiokpari.​—És. 48:17, 18; 2 Tim. 3:14, 15.

2. Kapa wa ti fango ye laso Jéhovah ayeke fa lege na ni?

² Laso, Jéhovah ayeke fa lege na kota kapa ti fango ye so ade a sara mara ni tongaso kozo pëpe ngbene ye so zo abâ gigi. Tongana ti so prophète Ésaïe atene lani, azo kutu na kutu na ndo ti sese kue ayeke gue na ‘hoto ti da ti Jéhovah’ so ayeke na lege ti fä (És. 2:2). Ala gue kâ ti sara nyen? Ti tene Jéhovah afa lege ti lo na ala (És. 2:3). Na ngu ti kusala 2010, aTémoin ti Jéhovah amû ngbonga ngbundangbu oko na kutu ngbangbo omene na ndo ni ti fa tënë nga ti manda atâ tënë ti yâ ti Bible na azo. Na ndo ni, yenga oko oko a yeke fa ye na yâ ti acongrégation ahon 105 000 na ndo ti sese kue, nga ngbâa be-ta-zo so ayeke sara ye na ndara ayeke sigigi na ambeti na ayanga ti kodoro ahon 500 tongaso ti fa na ye na azo.

3. Nzoni ye wa mo wani mo wara na lege ti fango ye so Jéhovah afa?

³ Gi ti wara nzoni dä mingi: Biani, e manda ye mingi na mbage ti Jéhovah! E manda so Nzapa ayeke na iri nga so lo yeke bi bê ti lo na ndo ti e (Gen. 22:14; Ps. 83:19; 1 Pi. 5:6, 7). E wara akiringo tënë na ambeni kpengba hundango ndo so e yeke hunda ka na ndo ti fini ti e, ahundango ndo tongana, ngbanga ti nyen zo ayeke bâ pasi na lo yeke kui? Mbi lingbi ti wara tâ ngia tongana nyen? E yeke na fini ngbanga ti nyen? Jéhovah afa nga na e nzoni lege ti sarango ye ‘si lege ti e aga nzoni’.​—Jos. 1:8.

4. Ambeni fango ye wa awakua ti Jéhovah ayeke na pasa ti wara ni laso? Ngbanga ti nyen a yeke nzoni ti gi ti manda ye kue na mbage ti Jéhovah?

⁴ Na ndo ni, Jéhovah aleke ambeni fango ye nde ti mû maboko na mingi ti awakua ti lo ti kono yâ ti kusala so ala yeke sara na lo. Na lembeti 4-6 a fa molongo ti afango ye so ambeni na popo ti e ayeke na pasa ti wara ni. Atâa dutingo ti e amû lege na e pëpe ti wara mara ti afango ye so a fa molongo ni, e yeke gi ti wara ye ti nzoni mingi na lege ti ati so alingbi na e? Amaseka ti e so awafango mbeti na ala nga na ambeni zo ayeke pusu ala ti manda mbeti ague yongoro, e yeke wa ala ti zia na gbele ala aye ti yingo nga ti gi ti wara fango ye so ayeke kota ahon atanga ni kue, so ayeke ti Jéhovah? Ti gi ti manda ye kue na mbage ti Jéhovah ayeke sara si e duti na ngia laso nga e yeke wara fini ti lakue lakue.​—Ps. 119:105; Jean 17:⁠3.

Ambeni fango ye so e wara na yâ ti bungbi ti Jéhovah

Ekole ti mandango mbeti

• Ndani ayeke nyen?: A yeke ti fa na azo lege ti diko na ti sû mbeti si ala wara lege ti manda Bible ala wani nga ti fa tâ tënë na azo.

• A ninga ngoi oke?: A lingbi na bezoin ti azo ni.

• Na ndo wa?: Na Da ti Royaume ti ndo so azo ni ayeke dä.

• Azo wa alingbi ti gue dä?: Awafango tënë kue nga na azo so angbâ ti manda Bible.

• Tongana nyen ti mû mbage dä?: A-ancien ayeke leke ekole ni alingbi na bezoin ti congrégation ni, nga ala yeke wa azo kue so ayeke na yâ ti bezoin ni ti gue dä tongana lege ayeke dä.

Ekole ti Kusala ti aChrétien

• Ndani ayeke nyen?: Ti leke awafango tënë si ala fa tënë nzoni nga si ala hinga ti sara étude nzoni na azo.

• A ninga ngoi oke?: A hunzi ka pëpe.

• Na ndo wa?: Na Da ti Royaume ti ndo so awafango tënë ni ayeke dä.

• Azo wa alingbi ti sara ni?: Awafango tënë kue. Nga, azo so ayeke gue na bungbi lakue na so ayeke mû mbage ti ala dä, so ayeda na afango ye ti Bible, nga so ayeke sara ye alingbi na andia ti Bible.

• Tongana nyen ti mû mbage dä?: Sara tënë ni na surveillant ti Ekole ti Kusala ti aChrétien.

Ekole ti mandango mbeni yanga ti kodoro nde

• Ndani ayeke nyen?: A yeke ti fa na awafango tënë lege ti fa nzoni tënë na mbeni yanga ti kodoro nde.

• A ninga ngoi oke?: Nze osio wala oku. Mingi ni a yeke sara ni na samedi na ndapre teti l’heure oko wala use.

• Na ndo wa?: Mingi ni a yeke sara ni na Da ti Royaume so ayeke nduru na awafango tënë ni.

• Azo wa alingbi ti sara ni?: Awafango tënë so ayeke na nzoni sarango ye na so aye ti fa tënë na mbeni yanga ti kodoro nde.

• Tongana nyen ti mû mbage dä?: Filiale la ayeke leke ni tongana bezoin ni ayeke dä.

Lekengo aDa ti Royaume

• Ndani ayeke nyen?: A yeke ti leke afini Da ti Royaume nga na angbene ni. A yeke mbeni ekole pëpe, me a yeke ti fa na avolontaire ni akode ti kua nde nde si ala lingbi ti mû mbage na kua ti lekengo ada ni.

• A ninga ngoi oke?: A lingbi na dutingo ti avolontaire ni.

• Na ndo wa?: Na ndo kue so filiale ti kodoro ti mo abâ ndo na ndo ni. A lingbi ti hunda na ambeni volontaire ni ti gue na mbeni yongoro ndo so mbeni kpale asi dä ti mû maboko.

• Azo wa alingbi ti mû mbage dä?: Aita-koli na aita-wali so awara batême awe na so a-ancien ni kue ayeda na ala, atâa ala yeke na ambeni kode wala pëpe.

• Tongana nyen ti mû mbage dä?: Sû iri ti mo na ndo ti mbeti Construction des Salles du Royaume — Questionnaire pour les volontaires (S-82) so a-ancien ti congrégation ti mo amû na mo.

Ekole ti aPionnier

• Ndani ayeke nyen?: Ti mû maboko na apionnier ti ‘sara kusala ti ala kue.’—2 Tim. 4:5.

• A ninga ngoi oke?: Yenga use.

• Na ndo wa?: Filiale la ayeke soro ndo ni; mingi ni a yeke na Da ti Royaume so ayeke nduru na apionnier ni.

• Azo wa alingbi ti gue dä?: Ala so ayeke apionnier permanent a sara ngu oko awe wala ahon ni.

• Tongana nyen ti mû mbage dä?: Apionnier so alingbi na kua ti ala la ayeke gue dä na surveillant ti circonscription ti ala la ayeke fa lango ni na ala nga na ndo ni.

Ekole ti azo so alï fini fini na Béthel

• Ndani ayeke nyen?: A yeke ti mû maboko na azo so aga fini fini na Béthel ti sara kua ti ala nzoni.

• A ninga ngoi oke?: Nze osio, me l’heure oko na yâ ti yenga oko oko.

• Na ndo wa?: Na Béthel.

• Azo wa alingbi ti sara ni?: A-Béthélite permanent wala avolontaire temporaire (so aga ti sara kua teti ngu oko wala ahon so).

• Tongana nyen ti mû mbage dä?: A-Béthélite so alingbi na ye so a hunda ndali ti ekole ni si ayeke sara ni.

Ekole ti Kusala ti Royaume

• Ndani ayeke nyen?: Ti fa na a-ancien nga na awakua ti mungo maboko tongana nyen ti bâ ndo nzoni na ndo ti congrégation nga ti leke si aye atambela nzoni na yâ ti congrégation (Kus. 20:28). Bebungbi la ayeke leke ekole ni so na yâ ti angu osio wala oku tongaso.

• A ninga ngoi oke?: Na angu so ahon ade ti ninga pëpe, ti a-ancien a sara lango oko na ndambo na ti awakua ti mungo maboko a sara lango oko.

• Na ndo wa?: Mingi ni a yeke na Da ti Royaume wala na Da ti Assemblée so ayeke nduru na aita ni.

• Azo wa alingbi ti sara ni?: A yeke gi a-ancien wala awakua ti mungo maboko.

• Tongana nyen ti mû mbage dä?: Surveillant ti circonscription la ayeke tisa a-ancien na awakua ti mungo maboko ni.

Ekole ti a-anciena

• Ndani ayeke nyen?: Ti mû maboko na a-ancien ti sara kua ti ala nzoni na yâ ti congrégation.

• A ninga ngoi oke?: Lango oku.

• Na ndo wa?: Filiale la ayeke soro ndo ni; mingi ni a yeke na Da ti Royaume wala na Da ti Assemblée so ayeke nduru na aita ni.

• Azo wa alingbi ti sara ni?: Gi a-ancien.

• Tongana nyen ti mû mbage dä?: Filiale la ayeke tisa a-ancien ni.

Ekole ti asurveillant na awali ti alab

• Ndani ayeke nyen?: Ti mû lege na asurveillant ti circonscription nga na ti district ti sara kua nzoni na yâ ti acongrégation na ti “sara kua ngangu na lege ti tënë ti yanga ti ala nga na lege ti fango ye ti ala” nga ti bâ ndo nzoni na ndo ti azo so a hunda na ala ti bâ ndo na ndo ti ala.—1 Tim. 5:17; 1 Pi. 5:2, 3.

• A ninga ngoi oke?: Nze use.

• Na ndo wa?: Filiale la ayeke soro ndo ni.

• Azo wa alingbi ti sara ni?: Gi asurveillant ti circonscription wala ti district.

• Tongana nyen ti mû mbage dä?: Filiale la ayeke tisa asurveillant so ayeke gue na ando nde nde nga na awali ti ala ti gue dä.

Ekole ti aita-koli so ayeke kumbambac

• Ndani ayeke nyen?: A yeke ti leke a-ancien nga na awakua ti mungo maboko so ala kue ayeke kumbamba ndali ti ambeni kusala. A yeke tokua mingi ti ala so asara ekole ni na ando so bezoin ayeke dä na yâ ti kodoro ti ala. A lingbi ti tokua kete wungo ti ambeni na yâ ti mbeni kodoro nde tongana dutingo ti ala amû lege na ala.

• A ninga ngoi oke?: Nze use.

• Na ndo wa?: Filiale la ayeke soro ndo ni; mingi ni a yeke na Da ti Royaume wala na Da ti Assemblée so ayeke nduru na aita ni.

• Azo wa alingbi ti gue dä?: Aita-koli so ade kumbamba na so ngu ti ala ayeke na popo ti ngu 23 na 62, so ayeke na nzoni seni na so ayeke na nzara ti sara kua ndali ti aita ti ala nga ndali ti Royaume na ndo kue so bezoin ayeke dä (Marc 10:29, 30). A lingbi a duti aita so asara ngu use awe wala ahon so na yâ ti kua ti ala ti ancien wala ti wakua ti mungo maboko sân ti fâ yâ ni.

• Tongana nyen ti mû mbage dä?: Tongana filiale ti kodoro ti mo aleke ti tene a sara ekole ni, na kota bungbi ti circonscription a yeke sara mbeni bungbi ndali ti azo so aye ti sara ni. Mo yeke wara ambeni sango na ndo ni na ngoi ti bungbi ni so.

Ekole ti aita-koli na awali ti alad

• Ndani ayeke nyen?: A yeke ti tene aita-koli na awali ti ala awara mbeni fango ye so asara si Jéhovah na bungbi ti lo alingbi ti sara kua na ala mingi. A yeke tokua mingi ti ala so asara ekole ni na ando so bezoin ayeke dä na yâ ti kodoro ti ala. A lingbi ti tokua kete wungo ti ambeni na yâ ti mbeni kodoro nde tongana dutingo ti ala amû lege na ala.

• A ninga ngoi oke?: Nze use.

• Na ndo wa?: Na ndembe so e yeke dä a yeke sara akozo ekole ni na kota ndo ti mandango ye ti Société Watchtower na gbata ti Patterson, na Amerika. Na pekoni ande, a yeke sara ekole ni na ando so filiale ayeke soro ni; mingi ni a yeke duti na Da ti Royaume wala na Da ti Assemblée.

• Azo wa alingbi ti gue dä?: Aita-koli na awali ti ala so ngu ti ala ayeke na popo ti ngu 25 na 50, so ayeke na nzoni seni na so alingbi ti gue na ndo kue so bezoin ayeke dä nga so ayeke na oko bibe ti Ésaïe so lo tene: “Mbi yeke, Mo to mbi.” (És. 6:8). Na ndo ni, a lingbi a duti aita so asara mariage a sara ngu use awe wala ahon ni nga so ayeke na yâ ti kua ti pionnier a sara ngu use awe wala ahon ni sân ti fâ yâ ni.

• Tongana nyen ti mû mbage dä?: Tongana filiale ti kodoro ti mo aleke ti tene a sara ekole ni, na kota bungbi ti lango oko a yeke sara mbeni bungbi ndali ti azo so aye ti sara ni. Mo yeke wara ambeni sango na ndo ni na ngoi ti bungbi ni so.

Ekole ti Galaad ti Mandango Bible ti Société Watchtower

• Ndani ayeke nyen?: Ti leke apionnier na ambeni wakua ti ngoi kue ti sara kua ti missionnaire.

• A ninga ngoi oke?: Nze oku.

• Na ndo wa?: Na kota ndo ti mandango ye ti Société Watchtower na gbata ti Patterson, na Amerika.

• Azo wa alingbi ti gue dä?: Akoli na awali ti ala so awara batême a sara ngu ota na so ngu ti ala ayeke na popo ti ngu 21 na 38 na ngoi so ala sû kozo demande ti ala ni. A lingbi ala tene Anglais, ala sara mariage a sara ngu use awe wala ahon ni nga so ayeke na yâ ti kua ti ngoi kue a sara ngu use awe wala ahon ni sân ti fâ yâ ni. A lingbi ala duti na nzoni seni. Ala so asara kua ti pionnier na mbeni kodoro nde (même ala so a yeda na ala ti sara kua ti missionnaire); asurveillant so ayeke gue na ando nde nde; amembre ti sewa ti Béthel; ala so asara Ekole ti Formation Ministérielle, Ekole ti aita-koli so ade kumbamba, Ekole ti aita-koli na awali ti ala alingbi nga ti gue dä tongana a bâ so ala lingbi.

• Tongana nyen ti mû mbage dä?: Na yâ ti afiliale so a soro ni awe, a yeke sara ka mbeni bungbi ndali ti azo so aye ti sara ekole ni na kota bungbi ti district. Mo yeke wara ambeni sango na ndo ni na ngoi ti bungbi ni so. Tongana a yeke sara bungbi ni na yâ ti kodoro ti mo pëpe na mo ye ti mû mbage dä, sû mbeti na filiale ti kodoro ti mo ti wara asango na ndo ni.

Ekole ti amembre ti Komite ti Filiale na awali ti ala

• Ndani ayeke nyen?: Ti mû maboko na amembre ti Komite ti Filiale ti bâ ndo nzoni na ndo ti ada ti Béthel, ti bâ lege ti aye so andu kua ti fango tënë na yâ ti acongrégation, ti bâ ndo na ndo ti akua so asurveillant ti circonscription na ti district ayeke sara na yâ ti aterritoire ti ala. Ti bâ nga ndo nzoni na ndo ti kua ti kiringo na peko ti ambeti na ayanga ti kodoro nde nde, kua ti petengo mbeti nga na ti tokuango ni nga ti bâ lege ti andokua nde nde so ayeke na yâ ti Béthel.​—Luc 12:48b.

• A ninga ngoi oke?: Nze use.

• Na ndo wa?: Na kota ndo ti mandango ye ti Société Watchtower na gbata ti Patterson, na Amerika.

• Azo wa alingbi ti gue dä?: Gi amembre ti Komite ti Filiale wala amembre ti Komite ti Kodoro wala ala so ayeke duti ande amembre ti akomite ni.

• Tongana nyen ti mû mbage dä?: Bebungbi la ayeke tisa aita-koli ni nga na awali ti ala ti gue dä.

[Akete tënë na gbe ni]