Moïse asara ye na ndoye

NDOYE AYEKE NYEN?

Ndoye ayeke yengo zo na bê ti mo kue. Zo so aye amba ti lo ayeke fa ni na lege ti atënë ti yanga ti lo nga na asarango ye ti lo, même tongana sarango tongaso ahunda na lo ti sara sacrifice.

NA YÂ TI AYE WA MOÏSE AFA SO LO SARA YE NA NDOYE?

Moïse afa lani so lo ye Nzapa. Na yâ ti aye wa? Kozo mbeti ti Jean 5:3 atene: “Ndoye ti Nzapa ayeke so: e bata acommandement ti lo.” Moïse abata lani acommandement ti Nzapa. Ye kue so Nzapa ahunda na lo ti sara, atâa ayeke ti tingbi na Pharaon, so ayeke mbeni kua so amû mbeto, wala ti yôro keke so ayeke na maboko ti lo na ndo ti Kota Ngu-Bengba, so akpa kete kua, Moïse asara ni. Lo mä yanga, même si kua ni ayeke ngangu wala akpengba ape. Bible atene: “Lo sara tongaso.”​—Exode 40:16.

Moïse afa so lo ye nga amba ti lo, azo ti Israël. Teti so azo ni ahinga so na lege ti lo la si Jéhovah ayeke fa lege na azo ti lo, ala yeke ga lani na akpale ti ala na gbele Moïse. Bible atene: “Azo aluti na tere ti Moïse na ndapre juska lakui.” (Exode 18:13-16). Moïse adoit ti fatigué mingi na peko ti so azo ayeke fa kpale ti ala na lo depuis ndapre juska na lakui so! Me teti so Moïse aye ala, a nzere na lo ti mû maboko na ala.

Nde na ti so lo yeke nduru ti mä ala, Moïse asambela nga ndali ti azo so lo ye ala, même ndali ti ala so asara sioni na lo. Na tapande, lani tongana Miriam, ita ti Moïse, akasa Moïse, Jéhovah apika lo na buruma. Ahon ti huru na ngia ndali ti so Nzapa apunir Miriam, hio Moïse atoto na Jéhovah, lo tene: “Mbi voro Mo, O Nzapa, Mo sara si tere ti lo aga nzoni.” (Nombre 12:13). Biani, gi ndoye la si apusu Moïse ti sambela Nzapa ndali ti Miriam.

NYEN LA E MANDA DÄ?

E nga kue e lingbi ti ye Nzapa mingi tongana ti Moïse. Ndoye so ayeke pusu e ti bata acommandement ti lo ‘na bê ti e kue’. (aRomain 6:17). Tongana na bê ti e kue la si e mä yanga ti Jéhovah, a yeke nzere na lo mingi (aProverbe 27:11). A yeke sara nga nzoni na e, teti tongana e sara na Nzapa na tâ ndoye, e yeke sara ye so ayeke nzoni nga e yeke duti na ngia mingi ti sara ni.​—Psaume 100:2.

Mbeni ye nde so e lingbi ti sara ayeke ti gi ti ye azo ngangu tongana ti Moïse. Tongana akamarade ti e wala ambeni fami ti e aga afa kpale ti ala na e, ndoye ayeke pusu e (1) ti dengi mê na ala, (2) ti zia tere ti e na place ti ala, nga (3) ti fa na ala so tënë ni agbu bê ti e.

Legeoko tongana ti Moïse, e lingbi ti sambela ndali ti azo so e ye ala. A si ka so e hinga ye ti sarango ni ape tongana ala ga ala fa na e akpale ti ala. Peut-être e yeke tene, “Oko ye so mbi peut ti sara, a yeke gi ti sambela ndali ti mo.” Me zia e girisa ape so “sambela ti zo ti mbilimbili ayeke na ngangu ti sara ye mingi.” (Jacques 5:16, La Sainte Bible en sango). Sambela ti e alingbi biani ti pusu Jéhovah ti sara ye so peut-être lo yeke sara ni fade pëpe. Ni la, tâ nzoni ye so e lingbi ti sara ndali ti azo ti e ayeke gi ti sambela ndali ti ala.a

Tapande ti Moïse afa na e ye mingi, ni la ape? Atâa so lo yeke tongana tanga ti azo kue, lo zia na e mbeni pendere tapande, na lege so lo fa so lo mä na bê na Nzapa, lo sara ye na tâ be-ti-molenge nga na ndoye. Tongana e gi ti sara ye tâ gi tongana ti lo, e yeke bâ nzoni dä nga a yeke sara nzoni na amba ti e.​—aRomain 15:4.