Ngbâ ti bata tere ti mo na yâ ti popo-hoto ti Jéhovah

1, 2. Na yâ ti kete ngoi bira wa ayeke londo? Nyen la e yeke pëpe na bezoin ti sara na yâ ti bira so?

NA LANGO 30 ti octobre, ngu 1938, azo kutu mingi na Amerika ayeke mä lani mbeni kua-singa na radio. Kua-singa ni ayeke mbeni théâtre so azo ni so asara ye tongana awagosinga atene so ambeni créature alondo na ndo ti mbeni sese tongana ti so e yeke na ndo ni so, so a iri ni Mars, aga amû sese nga ala yeke futi ni. Atâa so a tene a yeke gi mbeni théâtre la ayeke hon na radio so, azo mingi so amä ni apensé so a yeke mbeni tâ bira. Ambeni asara ambeni ye ti bata tere ti ala ndali ti aye so ayeke nga tâ ye ape so.

² Na yâ ti kete ngoi mbeni bira ayeke londo. Me mingi ti azo aleke tere ti ala ndali ni pëpe. Bira ni so ayeke Harmaguédon, bira ti Nzapa so ayeke futi sioni dunia so. A yeke mbeni senge tënë ti pande pëpe. E hinga so bira so ayeke ga ndali ti so Nzapa asara tënë ni na yâ ti Mbeti ti lo, Bible (Apoc. 16:14-16). E yeke pëpe na bezoin ti tiri bira ni. Jéhovah ayeke sara kusala na ngangu ti lo ti sö e na mbeni lege so adö bê.

3. Prophétie wa la e yeke sara tënë na ndo ni? Ngbanga ti nyen prophétie so ayeke nzoni mingi ndali ti e laso?

³ Mbeni prophétie so ayeke na Zacharie chapitre 14 afa aye mingi na ndo ti bira ti Harmaguédon. Atâa so a sû prophétie so a sara ngu 2500 tongaso awe, a yeke nzoni mingi ndali ti e laso (aRom. 15:4). Mingi ti aye so a sara tënë ni na yâ ti prophétie so andu aye so asi na azo ti Nzapa ngbene ye so Royaume ti Messie ato nda ti komande na yayu na ngu 1914. A ndu nga apendere ye so ayeke si ande na yâ ti kete ngoi. Prophétie so asara tënë ti ‘popo-hoto so ayeke kota mingi’ nga na ti “ngu so amû fini”. (Zach. 14:4, 8). Na yâ ti article so, e yeke gi ti hinga popo-hoto ni, nga tongana nyen la azo so avoro Jéhovah alingbi ti gue ti bata tere ti ala dä. E yeke gi nga ti hinga ngu so amû fini nga tongana nyen la e lingbi ti bâ nzoni dä. Ye so ayeke sara si e yeke bâ gi pëpe so a yeke kota ye ti tene e nyon ngu so me nga so e ye ti nyon ni. Zia e gi ti hinga ye nzoni na ndo ti prophétie so.​—2 Pi. 1:19, 20.

‘LÂ TI JÉHOVAH’ ATO NDA NI

4. (a) ‘Lâ ti Jéhovah’ ato nda ni lawa? (b) Nyen la azo so avoro Jéhovah afa na azo angu mingi kozo na ngu 1914? Akota zo ti dunia so asara ye tongana nyen?

⁴ Chapitre 14 ti Zacharie ato nda ni na lege ti atënë so: ‘Lâ ti Jéhovah ayeke ga’. (Diko Zacharie 14:1, 2.) Lâ ti Jéhovah ni ayeke nyen? A yeke “lâ ti Seigneur” so ato nda ni na ngoi so “royaume ti dunia” aga “royaume ti Seigneur ti e na ti Christ ti lo”. (Apoc. 1:10; 11:15). A to nda ni na ngu 1914 na ngoi so Royaume ti Messie akomanse ti komande na yayu. Angu mingi kozo na ngu 1914, azo so avoro Jéhovah afa na azo so “ngoi so a diko teti amara” ayeke hunzi na ngu 1914 nga na yâ ti dunia aye ti wusuwusu ayeke duti ande dä mingi (Luc 21:24). Amara adengi mê na tënë so? Oko pëpe. Amokonzi ti poroso nga na akota zo ti abungbi ti vorongo nzapa ahe aChrétien so a soro ala ti gue na yayu so ayeke fa tënë na nzara ni, nga ala sara ye ti ngangu na ala. Na sarango tongaso, akota zo so ayeke he Nzapa ti Ngangu Ahon Kue, ndali ti so aChrétien so a soro ala ti gue na yayu ayeke sara kusala na iri ti “Jérusalem ti yayu” so ti tene Royaume ti Nzapa.​—aHéb. 12:22, 28.

5, 6. (a) Ye wa Zacharie afa tënë ni kozoni awe atene a yeke sara na “kodoro ni” nga na azo ti yâ ni? (b) Azo wa la ayeke “tanga ti azo ti kodoro ni”?

⁵ Zacharie afa kozoni awe ye so amara ayeke sara, lo tene: “Fade ala kamata kodoro ni [Jérusalem].” “Kodoro ni” ayeke fä ti Royaume ti Nzapa. A-Chrétien so a soro ala ti gue na yayu so angbâ na sese ge ayeke nga azo ti Royaume ni so (aPhil. 3:20). Na ngoi ti Kozo Bira so Amû Sese Kue, a “kamata”, wala a gbu aita so ayeke na akota kusala na yâ ti bungbi ti Jéhovah nga a bi ala na da ti kanga na Atlanta, Géorgie, na Amerika. Awato asara ye na lege ni pëpe na aChrétien so a soro ala ti gue na yayu nga ala sara ye ti ngangu na ala, ala kanga lege na ambeti ti ala nga ala gi ti kaï kusala ti fango tënë. A yeke mo bâ mo tene awato ‘anzi ye ti yâ ti da’, wala ala mû aye ni na ngangu.

⁶ Angangu wato atene mvene na iri ti azo ti Nzapa, ala kanga lege na ala nga ala sara ye ti ngangu na ala, me ala lingbi pëpe ti futi tâ vorongo. A yeke wara na ndo ti sese “tanga ti azo ti kodoro ni”, so ayeke tanga ti aChrétien so a soro ala ti gue na yayu so ake ti tene a ‘lungula ala na yâ ti kodoro ni’.

7. Tapande wa aChrétien so a soro ala ti gue na yayu azia na e laso?

⁷ Ye so prophétie ti Zacharie asara tënë ni so asi kue kue kue na ngoi so Kozo Bira so Amû Sese Kue ahunzi? Ên-ën. Awato akiri asara ambeni ye ti ngangu mingi na tanga ti aChrétien so a soro ala ti gue na yayu nga na aChrétien so ayeke be-ta-zo so ayeke ku ti wara fini na ndo ti sese (Apoc. 12:17). Na tapande, a sara lani aye ti ngangu mingi na aita na ngoi ti Use Bira so Amû Sese Kue. Tapande ti aChrétien so a soro ala ti gue na yayu so agbu ngangu amû ngangu na e laso ti gbu ngangu na yâ ti atara kue so e lingbi ti tingbi na ni. Na yâ ti atara ni so, a yeke wara kango lege so alondo na mbage ti afami ti e, amba ti e ti place ti kua wala amba ti e ti ekole so ayeke he e ndali ti mabe ti e (1 Pi. 1:6, 7). Atâa ndo wa la atâ Chrétien ayeke dä, ala yeke sara kue ti tene ala “luti ngangu na yâ ti yingo oko” nga ti “dö na mbeto oko pëpe na gbele azo so akanga lege na ala”. (aPhil. 1:27, 28). Me, azo ti Nzapa alingbi ti bata tere ti ala na ndo wa na yâ ti dunia so azo ni ake ala so?​—Jean 15:17-19.

JÉHOVAH ALEKE ‘POPO-HOTO SO AYEKE KOTA MINGI’

8. (a) Na yâ ti Bible, ahoto alingbi ti duti fä ti nyen? (b) “Hoto ti Oliviers” ayeke fä ti nyen?

⁸ Teti so Jérusalem, “kodoro ni”, ayeke fä ti Jérusalem ti yayu, “Hoto ti Oliviers, so ayeke na gbele Jérusalem” ayeke nga na lege ti fä. Hoto ni ayeke fä ti nyen? Na lege wa yâ ti hoto ni “asuru” aga ahoto use? Na Hébreu ti giriri, Jéhovah airi ahoto ni use kue lo tene ‘ahoto ti mbi.’ Ngbanga ti nyen? (Diko Zacharie 14:3-5.) Ngoi na ngoi, na yâ ti Bible ahoto alingbi ti duti fä ti aroyaume, wala angorogbia. Nga, fani mingi Bible atene so a yeke grâce na hoto ti Nzapa la azo ayeke wara aye ti nzoni nga na batango tere (Ps. 72:3; És. 25:6, 7). Tongaso, ‘Hoto ti Oliviers, so gere ti Nzapa aluti na ndo ni na gbele Jérusalem na mbage ti est,’ ayeke fä ti droit ti Jéhovah ti komande na ndo ti dunia kue.

9. So a tene yâ ti “Hoto ti Oliviers asuru” use, a ye ti tene nyen?

⁹ Prophétie ni atene so yâ ti “Hoto ti Oliviers asuru” use. Ye so aye ti tene nyen? A ye ti tene so Jéhovah asigigi na mbeni use komandema ti sara na mbeni kua so ayeke nde. Komandema ni so ayeke nga ti Nzapa, nga Jésus Christ la ayeke Gbia ni. Teti so akomandema ni use kue ayeke ti Jéhovah, ni la lo iri ahoto ni use kue ‘ahoto ti mbi.’​—Zach. 14:4, FD.

10. ‘Popo-hoto so ayeke kota mingi’ so ayeke na popo ti ahoto use ayeke fä ti nyen?

¹⁰ Prophétie ni atene so, na ngoi so yâ ti “Hoto ti Oliviers asuru” use, mbeni ague na mbage ti banga nga mbeni ague na mbage ti mbongo, gere ti Jéhovah angbâ na ndo ti ahoto ni use kue. Mbeni ‘popo-hoto so ayeke kota mingi’ abâ gigi na milieu ti gere ti Jéhovah. Popo-hoto ni so ayeke fä ti nyen? A yeke fä ti batango tere so alondo na Nzapa. Legeoko tongana ti so azo ayeke duti na popo ti ahoto use ti bata tere ti ala, awakua ti Jéhovah ayeke duti nzoni na gbe ti komandema ti lo nga na ti Molenge ti lo. Jéhovah ayeke zia ande lege lâ oko pëpe ti tene a futi tâ vorongo. Lawa la yâ ti “Hoto ti Oliviers asuru” use? A yeke na ngu 1914, na ngoi so Jésus akomanse ti komande na yayu. Prophétie ni atene nga so azo ti Jéhovah ayeke kpe ti gue na yâ ti ‘popo-hoto so ayeke kota mingi’. Ye so akomanse lawa?

AZO TI NZAPA ATO NDA TI KPE TI GUE NA YÂ TI POPO-HOTO

11, 12. (a) Lawa la azo ti Nzapa ato nda ti kpe ti gue na yâ ti popo-hoto? (b) Nyen la afa so Jéhovah ayeke bata azo ti lo?

¹¹ Jésus awa adisciple ti lo, lo tene: “Fade ala yeke ga azo so amara kue ake ala ndali ti iri ti mbi.” (Mat. 24:9). Amara akiri ake adisciple ti Jésus ngangu mingi, ngbene ye na ngu 1914, ngoi so alango ti nda ni ti dunia ti Satan ato nda ni. Na ngoi ti Kozo Bira so Amû Sese Kue, awato asara pasi mingi na aChrétien so a soro ala ti gue na yayu, me ala wara lege ti futi tâ vorongo pëpe. Na ngu 1919, azo ti Nzapa asigigi na yâ ti Babylone, Ngangu gbata so ayeke bungbi ti vorongo nzapa ti wataka kue (Apoc. 11:11, 12).a A yeke na ngu so la azo ti Nzapa ato nda ti kpe ti gue na yâ ti popo-hoto.

¹² Ngbene ye na ngu 1919 popo-hoto ti batango tere so alondo na Nzapa angbâ ti bata azo so ayeke voro Jéhovah na ndo ti sese kue. Na yâ ti angu mingi, gbâ ti angorogbia agi ti kanga lege na aTémoin ti Jéhovah ti fa tënë wala ti kanga lege na ambeti ti ala. A ngbâ ti sara aye so na yâ ti ambeni kodoro. Me Jéhovah ayeke zia lege pëpe na angorogbia so ti futi tâ vorongo. Atâa ye wa la angorogbia asara, Jéhovah ayeke ngbâ ti sara kusala na kota ngangu ti lo ti bata azo ti lo.​—Deut. 11:2.

13. Na lege wa e yeke ngbâ na yâ ti popo-hoto ti batango tere so alondo na Jéhovah? Ngbanga ti nyen a yeke kota ye mingi laso ti tene e ngbâ na yâ ni?

¹³ Tongana e ngbâ ti duti be-ta-zo na Jéhovah, e yeke ngbâ na yâ ti popo-hoto ti batango tere so alondo na lo. Lo na Molenge ti lo ayeke zia e pëpe nga Nzapa ayeke zia lege pëpe na mbeni zo wala mbeni ye ti ‘gboto e na maboko ti lo’. (Jean 10:28, 29). Jéhovah ayeke nduru ti mû na e aye kue so e yeke na bezoin ni tongaso si e lingbi ti mä yanga ti lo ndali ti so lo yeke Kota Gbia ti Dunia Kue nga si e ngbâ be-ta-zo na Royaume ti Messie. E yeke duti ande na bezoin ti mungo maboko ti lo mingi na ngoi ti kota ye ti vundu so aga nduru ti si awe. Ni la, a yeke kota ye mingi laso ti tene e ngbâ na yâ ti popo-hoto ti batango tere so alondo na Jéhovah.

NA “LÂ TI BIRA” TI LO

14, 15. Na “lâ ti bira” ti Nzapa na awato ti lo, nyen la ayeke si na azo so ayeke pëpe na yâ ti popo-hoto ti batango tere so alondo na Nzapa?

¹⁴ So e yeke pusu nduru nduru na futingo ti sioni dunia so, Satan ayeke kiri ti sara aye ti ngangu mingi na awakua ti Jéhovah. Me na yâ ti kete ngoi Satan ayeke londo na tanga ti bira ti lo. Na lango ni so, Jéhovah ayeke tiri na awato ti azo ti lo nga lo yeke futi ala kue. Ye ni so ayeke si na “lâ ti bira” ti Nzapa so Zacharie afa tënë ni kozo awe. Bira so ayeke kiri ti fa na mbeni lege so ayeke kota mingi so Jéhovah ayeke kpengba Zo ti bira.​—Zach. 14:3.

¹⁵ Na lango ti bira ti Nzapa, nyen la ayeke si na azo so ayeke pëpe na yâ ti popo-hoto ti batango tere so alondo na Nzapa? Prophétie ni atene so ala yeke wara ande “lumière” pëpe. Ye so afa so Nzapa ayeke bâ ande ala na nzoni lê pëpe. Prophétie ni akiri atene so fade kobela ayeke mû ande ‘ambarata, apakara, achameau, alele, na anyama kue’, fä ti aye ti bira ti amara. Ye so aye ti tene so angombe nga na ambeni ye so azo ayeke sara na bira ayeke sara ande ye oko pëpe. Zacharie atene so Jéhovah ayeke punir ande awato ti lo na “kobela so afuti kodoro”. Fade lê ti ala nga na menga ti ala “ajon [wala afun].” E hinga pëpe wala a yeke duti ande tâ kobela. Me e hinga so ala lingbi ande ti sara sioni na e ape nga ti tene sioni tënë na tere ti Nzapa pëpe (Zach. 14:6, 7, 12, 15). ‘Agbia ti sese kue nga na aturugu ti ala’ ayeke mû ande mbage ti Satan. Atâa ndo wa la ala yeke dä, a yeke futi ande ala kue (Apoc. 19:19-21). “Fade kuâ ti azo so L’Éternel afâ ala ayeke na mbage oko ti sese juska na mbeni mbage ni.”​—Jér. 25:32, 33.

16. Ahundango ndo wa a yeke nzoni e hunda na tere ti e? Nyen la a lingbi e sara ande na ngoi ti kota ye ti vundu?

¹⁶ Na ngoi ti bira azo kue ayeke bâ pasi, même ala so asö benda na nda ni. E nga kue e lingbi ti bâ pasi na ngoi ti kota ye ti vundu. Warango kobe alingbi ti ga ngangu. Mingi ti aye ti e alingbi ti hon. Peut-être e yeke perdre adroit so e yeke na ni laso. Tongana aye tongaso asi na e, e yeke sara ye tongana nyen? E yeke sara ye kirikiri? Bê ti e ayeke nze na e yeke duti na beku mbeni pëpe? E yeke zia lege ti sarango na Jéhovah? Na ngoi ti kota ye ti vundu, a lingbi e ngbâ na yâ ti popo-hoto ti batango tere na dutingo be-ta-zo na Jéhovah nga na hingango biani so lo yeke bata e.​—Diko Habakuk 3:17, 18.

“FADE NGU SO AMÛ FINI ASIGIGI”

17, 18. (a) “Ngu so amû fini” ayeke nyen? (b) “Kota Ngu ti Ingo Mingi na mbage ti est” ayeke nyen? “Kota Ngu ti Ingo na mbage ti ouest” ayeke nyen? (c) Nyen la e yeke sara kue ti ngbâ ti sara?

¹⁷ Na peko ti Harmaguédon “ngu so amû fini” ayeke ngbâ ande ti londo na mbage ti trône ti Royaume ti Messie ti sua. “Ngu so amû fini” ayeke aye kue so Nzapa asara teti azo ti mû lege na ala ti duti fini lakue lakue. “Kota Ngu ti Ingo Mingi na mbage ti est” ayeke Ngu-ingo Mingi, nga “Kota Ngu ti Ingo na mbage ti ouest” ayeke Ngu-ingo ti Méditerannée. Angu-ingo so use kue aye ti sara tënë ti azo. Ngu-ingo Mingi aye ti sara tënë ti azo so akui so ayeke na dû ti kuâ na so a yeke zingo ande ala na kuâ. Teti so na yâ ti Ngu-ingo ti Méditerannée a yeke wara aye mingi so ayeke na fini, a ye ti sara tënë ti “azo mingi mingi” so ayeke sö kuâ na Harmaguédon. (Diko Zacharie 14:8, 9; Apoc. 7:9-15.) Ala kue ayeke nyon ande “ngu so amû fini” so alondo na “bale so ngu ni amû fini na zo”. Ye so ayeke sara ande si ala kue aga azo so alingbi kue nga ala yeke ngbâ na fini lakue lakue.​—Apoc. 22:1, 2.

¹⁸ Na ngoi so Jéhovah ayeke futi ande sioni dunia so, lo yeke bata e na e yeke lï na yâ ti fini dunia ti lo so ayeke mbilimbili. Atâa so amara kue so ayeke na yâ ti dunia ake e, e yeke sara kue ti ngbâ be-ta-zo na Royaume ti Nzapa nga ti ngbâ na yâ ti popo-hoto ti batango tere so alondo na Jéhovah.