Ye kue so a mû ti tiri na mo ayeke tï na ngu

“Ye ti bira so azo asara ti ke mo na ni alingbi sara ye na mo pëpe.”​—ESAÏE 54:17.

1, 2. Na lege wa ye so asi na aTémoin ti Jéhovah ti Albanie afa so tënë ti Esaïe 54:17 ayeke tâ tënë?

TI LONDO na ngu 1945 tongaso ti si na ngu 1990, a yeke wara mbeni bungbi ti aChrétien so ayeke sara ye na mbeto pëpe na yâ ti mbeni kete kodoro so ahoto ayeke dä, na so ayeke na mbage ti mbongo-to ti akodoro ti Poto. Mbeni ngorogbia so aye tënë ti Nzapa pëpe asara kue ti hunzi ala. Ye oko, atâa so a sara ye ti ngangu mingi na ala, a bi ala na yâ ti kando ti sarango kua ti ngangu nga a tene asioni tënë nde nde na ndo ti ala, aye so ahunzi ala pëpe. A-Chrétien so ayeke azo wa? A yeke aTémoin ti Jéhovah ti Albanie. Atâa so a yeke lani ngangu mingi na ala ti sara bungbi nga ti fa tënë, gbungo ngangu ti ala na yâ ti angu mingi asara si azo agonda bungbi ti aChrétien nga ane ni. A sara nga si iri ti Jéhovah awara gonda. Na ngu so ahon, na ngoi ti mungo fini da ti Béthel ti kodoro ti ala na Jéhovah, mbeni Témoin ti Jéhovah so aduti be-ta-zo teti angu mingi atene: “Atâa ngangu kue so Satan asara, ye kue so lo sara angbâ lakue ti tï na ngu nga Jéhovah angbâ lakue ti sö benda!”

² Aye so kue afa polele so zendo so Nzapa amû na azo ti lo na so ayeke na Esaïe 54:17 ayeke tâ tënë. Versê ni atene: “Ye ti bira so azo asara ti ke mo na ni alingbi sara ye na mo pëpe; na fade mo fâ ngbanga na ndo menga ti azo kue so alondo na ngbanga ti ke mo.” Mbaï afa so sese ti Satan alingbi ti sara ye oko pëpe ti kanga lege na awakua ti Jéhovah Nzapa so amû tere ti ala kue na lo awe ti voro lo.

Angangu kue so Satan asara atï na ngu

3, 4. (a) Na popo ti aye ti bira ti Satan, a yeke wara nyen? (b) Na lege wa angangu kue so Zabolo asara atï na ngu?

³ Na popo ti aye so a mû ti tiri na awakua ti Jéhovah, a yeke wara kangango lege na kusala ti ala, bungbingo ti azo gbani gbani ti sara ngangu na ala, bingo ala na da ti kanga nga na ‘lungo ndia ti kirikiri ti sara sioni’ na ala (Psaume 94:20). Na yâ ti ambeni kodoro laso, même na ngoi so aTémoin ti Jéhovah ayeke manda article so, a yeke “tara” atâ Chrétien so ti bâ wala ala yeke ngbâ be-ta-zo na Nzapa.​—Apocalypse 2:10.

⁴ Na tapande, mbeni Béthel ti aTémoin ti Jéhovah afa so gi na yâ ti ngu oko, a sara ye ti ngangu fani 32 na awakua ti Jéhovah na ngoi so ala yeke fa tënë. Na ndo ni, fani 59, azo ti lapolice agbu aTémoin ti Jéhovah so ayeke fa tënë. Ala so agbu ala ayeke amaseka na ambakoro, akoli na awali. A kpo li ti maboko ti ambeni na ndo ti ambeti ti mû anzoroko ni, a sara foto ti ala nga a bi ala na da ti kanga tongana azo so ake ndia. A tene na ambeni so a yeke sara sioni na ala. Na yâ ti mbeni kodoro, a yeke wara fadeso ambeti 1 100 so asara tënë ti gbungo aTémoin ti Jéhovah, ti hundango na ala ti futa nginza na letäa wala ti pikango ala. Na popo ti aye 1 100 so a sara na ala, a sara ye ahon 200 na ala na lango so ala bungbi ti dabe ti ala na kuâ ti Jésus. Ye oko, na yâ ti akodoro so nga na yâ ti ambeni nde, yingo ti Jéhovah amû ngangu na awakua ti lo ti gbu ngangu atâa so azo abâ ti ala so ala lingbi ti gbu lê ni pëpe (Zacharie 4:6). Kota ngonzo so awato asara ayeke kanga ande yanga ti aChrétien so pëpe ti gonda Jéhovah. Biani, e hinga na bê ti e kue so mbeni ye ti kanga lege na ye so Nzapa aleke na bê ti lo ti sara ayeke dä pëpe.

A fâ ngbanga na ndo ti amenga ti wataka

5. Amenga ti wataka wa alondo lani ti ke akozo Chrétien?

⁵ Esaïe afa kozoni awe so awakua ti Nzapa ayeke fâ ande ngbanga na ndo ti amenga ti wataka kue so ayeke londo ti ke ala. Na ngoi ti akozo Chrétien, fani mingi, a tene atënë ti mvene na ndo ti aChrétien a tene ala yeke azo ti sioni. Tënë so e wara na Kusala 16:20, 21 afa mara ti atënë so a yeke tene lani na ndo ti aChrétien. Versê ni atene: “Azo so, . . . ala gi azo ti kodoro ti e na tënë mingi, ala fa mbeni tënë ti kodoro ti ala so a lingbi e kamata pëpe wala e bata pëpe, teti e yeke aRomain.” Mbeni lâ, amokonzi-nzapa atara ti pusu azo ti komande ti mbeni gbata ti sara ye na tere ti adisciple ti Christ, ala tene: “Azo so ayengi sese so asi na ndo so nga; . . . ala so kue asara ye ti ke kpengba tënë ti César.” (Kusala 17:6, 7). A tene lani so bazengele Paul ayeke mbeni “wagingo tënë” nga lo yeke mokonzi ti mbeni secte so ayeke pusu azo “na lê ti sese kue” ti ke azo ti komande.​—Kusala 24:2-5.

6, 7. Mbeni lege so atâ Chrétien ayeke fâ ngbanga na ndo ti asioni tënë so a bi na li ti ala ayeke so wa?

⁶ Ni la, a yeke ye ti dongo bê pëpe tongana azo ayeke tene atënë so ayeke na lege ni oko pëpe na ndo ti atâ Chrétien nga ala yeke tene asioni tënë ti mvene na ndo ti ala ti buba iri ti ala. Na lege wa e yeke fâ ngbanga na ndo ti mara ti atënë ti gingo yanga so?​—Esaïe 54:17.

⁷ Fani mingi, nzoni sarango ye ti aTémoin ti Jéhovah asara si azo abâ so atënë so a bi na li ti ala nga na asioni tënë so a tene na ndo kue na ndo ti ala ayeke tâ tënë pëpe (1 Pierre 2:12). Tongana aChrétien afa so ala yeke kpe ndia ti kodoro nga ala yeke anzoni zo so ayeke bi bê ti ala na azo, azo ayeke bâ so atënë so a bi na li ti ala ayeke gi atënë ti mvene. Nzoni sarango ye ti e afa polele so e yeke anzoni zo. Fani mingi, tongana azo abâ anzoni kusala ti e, ye so ayeke pusu ala ti mû gonda na Babâ ti e so ayeke na yayu nga ala yeke hinga so fini ti awakua ti lo ayeke nzoni mingi ahon ti tanga ti azo kue.​—Esaïe 60:14; Matthieu 5:14-16.

8. (a) Ngoi na ngoi, a hunda peut-être ti sara nyen ti fa nda ni so e sara ye tongana so Bible afa? (b) Na lege wa e yeke fâ ngbanga na ndo ti amenga ti wataka tongana ti Christ?

⁸ Na ndo ti anzoni sarango ye ti e, ngoi na ngoi, a hunda peut-être ti tene na mbeto pëpe e fa polele nda ni so e sara ye tongana so Bible afa. Mbeni oko lege ni ayeke ti gi ti tene angorogbia nga na ada-ngbanga abâ lege ti atënë ti e (Esther 8:3; Kusala 22:25-29; 25:10-12). Na ngoi so Jésus ayeke lani na sese, na ambeni ngoi, lo kiri tënë polele na azo so akasa lo, lo fa so atënë so ala tene ayeke atënë ti mvene (Matthieu 12:34-37; 15:1-11). Legeoko tongana ti Jésus, e yeke na ngia tongana lege azi na e ti fa polele na azo atâ tënë ti Bible so agbu bê ti e mingi (1 Pierre 3:15). A yeke nzoni e zia lâ oko pëpe si hengo ndo so e yeke wara na ekole, na place ti kua wala na mbage ti afami ti e so ayeke aTémoin ti Jéhovah pëpe akanga lege na e ti fa tâ tënë ti Bible na azo.​—2 Pierre 3:3, 4.

Jérusalem ayeke “tênë so ane mingi”

9. Jérusalem wa la Zacharie 12:3 airi ni “tênë so ane mingi”? A ye ti sara tënë ti azo wa na sese ge?

⁹ Prophétie ti Zacharie afa polele nda ni so amara ake atâ Chrétien. Bâ ye so Zacharie 12:3 atene: “Na lâ ni kâ, tënë asi tongaso, fade Mbi sara si Jérusalem aga tênë so ane mingi teti amara kue.” Prophétie so ayeke sara tënë ti Jérusalem wa? Prophétie ti Zacharie na ndo ti Jérusalem andu “Jérusalem ti yayu,” Royaume ti yayu so a iri aChrétien so a sa yingo na ndo ti ala ti komande dä (aHébreu 12:22). Gi kete wungo ti aChrétien so ayeke komande ande na yâ ti Royaume ti Messie si angbâ na ndo ti sese. Ala na “ambeni ngasangbaga”, wala aChrétien so ayeke sara kusala maboko na maboko na ala, ayeke wa azo ti ga na mbage ti Royaume ti Nzapa kozoni si ngoi ayeke mbeni pëpe ti sara ni (Jean 10:16; Apocalypse 11:15). Amara ayeda na tisango ndo so? Na Jéhovah ayeke mû maboko na awakua ti lo laso tongana nyen? Zia e gi ti hinga ye na ndo ni na ngoi so e yeke gi nda ti Zacharie chapitre 12. Na sarango tongaso, e yeke hinga biani so “ye ti bira so azo asara ti ke” na aChrétien so a sa yingo na ndo ti ala nga na aChrétien so ayeke wara ande fini na sese ‘alingbi sara ye na ala pëpe.’

10. (a) Ngbanga ti nyen a yeke sara ye ti ngangu na awakua ti Jéhovah? (b) Ye wa asi na amara so atara ti zi “tênë so ane mingi” na ndo ti ala?

¹⁰ Zacharie 12:3 afa so amara ‘afâ tere ti ala sioni’ na kä. Ye so asi tongana nyen? Nzapa amû yanga ti tene a fa nzo tënë ti Royaume. A-Témoin ti Jéhovah abâ fango tënë ti Royaume tongana mbeni kota ye mingi. Ye oko, fango na azo so Royaume ayeke oko beku ti azo aga mbeni “tênë so ane mingi” na ndo ti amara. Amara so atara ti zi tênë so na lege so ala yeke gi ti kanga lege na awafango tënë ti Royaume. Na sarango tongaso, amara ‘afâ tere ti ala sioni’ na kä. Même iri ti ala abuba mingi na ngoi so ye so ala gi ti sara atï na ngu na kamene agbu ala. Ala lingbi pëpe ti kanga yanga ti atâ Chrétien, so aye mingi ti fa “Tene-nzoni ti lakue lakue” ti Royaume ti Nzapa kozoni si a futi aye ti sioni sese ti laso (Apocalypse 14:6). Na ngoi so mbeni turugu ti batango da ti kanga na yâ ti mbeni kodoro ti Afrika abâ aye ti ngangu so a sara na awakua ti Jéhovah, lo tene: ‘Ala yeke buba ngangu ti ala senge senge ti sara ye ti ngangu na azo so. Ala yeke zia lege ti Nzapa ti ala ande pëpe. Ala yeke gue gi guengo na li ni.’

11. Na lege wa Nzapa asara ye alingbi na zendo so lo mû na Zacharie 12:4?

¹¹ Diko Zacharie 12:4. Jéhovah amû zendo so fade lo yeke vuko lê ti azo so ayeke tiri na awafango tënë ti Royaume so ayeke na mbeto pëpe, na lo yeke sara si “buba” asara ala. Lo sara ye alingbi na tënë ti yanga ti lo. Na tapande, na yâ ti mbeni kodoro so akanga lege na tâ vorongo, awato alingbi pëpe ti kanga lege na awakua ti Jéhovah ti wara kobe ti yingo. Mbeni mbeti-sango atene même so aTémoin ti Jéhovah ayeke sara kusala na akota ballon so ayeke huru tongana lapara ti lï na ambeti so a zi nda ti Bible na yâ ti kodoro ni. Zendo so Nzapa amû na awakua ti lo so ayeke be-ta-zo aga tâ tënë. Nzapa atene na ala, lo tene: “Fade Mbi lungula lê ti Mbi . . . na Mbi sara si ambarata kue ti amara aga ziba.” Teti so ngonzo ahon ndo ti ala, awato ti Royaume ahinga ye ti sara pëpe. Ye oko, e hinga na bê ti e kue so Jéhovah ayeke bata ande azo ti lo tongana mbeni bungbi nga lo yeke bâ lege ti nzoni duti ti ala.​—2 aGbia 6:15-19.

12. (a) Na lege wa Jésus atingo mbeni wâ na ngoi so lo yeke na sese? (b) Na lege wa tanga ti aChrétien so a sa yingo na ndo ti ala atingo mbeni wâ na lege ti yingo? Ye ti pekoni ayeke so wa?

¹² Diko Zacharie 12:5, 6. Tënë “amokonzi ti Juda” aye ti sara tënë ti azo so ayeke mû li ni na popo ti awakua ti Jéhovah. Jéhovah asara si ala yeke na nzara mingi ti bâ ndo na ndo ti aye so andu Royaume ti Nzapa na sese ge. Mbeni lâ, Jésus atene na adisciple ti lo, lo tene: “Mbi ga ti bi wâ na ndo sese.” (Luc 12:49). Biani, lo tingo mbeni wâ. Teti so Jésus afa tënë mingi, lo sara si azo mingi abâ tënë ti Royaume ti Nzapa tongana mbeni kota tënë mingi. Tënë so asara si dengo gaba alondo na popo ti aJuif kue (Matthieu 4:17, 25; 10:5-7, 17-20). Legeoko nga, “tongana sembe ti wâ so ayeke na popo ti keke, na tongana [taza] so agbi na popo ti gbâ ti le-kobe”, aChrétien ti ngoi ti e ayeke tingo mbeni wâ na lege ti yingo. Na ngu 1917, buku Le mystère accomplia afa polele so tënë ti yanga ti aChrétien ti wataka ayeke nde na sarango ye ti ala. Ye so asara si amokonzi-nzapa aga ngbä. Na ngu so ahon, a sigigi na Asango ti Royaume No. 37, “Bungbi ti nzapa ti wataka aga nduru ti hunzi!” Mbeti so asara si azo mingi ayeda na tënë ti Royaume wala ala ke ni.

A sö “tente kue ti Juda”

13. Tënë “tente kue ti Juda” aye ti fa nyen? Ngbanga ti nyen Jéhovah ayeke sö azo so a bâ ala tongana azo so ayeke lango na yâ ti atente?

¹³ Diko Zacharie 12:7, 8. Na Israël ti giriri, a yeke bâ ka atente na yâ ti kodoro. Ngoi na ngoi, aberger nga na azo ti fango yaka ayeke lango na yâ ti atente. Mara ti azo tongaso ayeke akozo zo so ayeke wara kpale nga so ayeke na bezoin ti mbeni ndo ti bata tere ti ala na ngoi so awato aga ti tiri na gbata ti Jérusalem. Tënë “tente kue ti Juda” aye ti fa so tanga ti aChrétien so a sa yingo na ndo ti ala aduti na ndo so mo bâ mo tene ayeke polele, me pëpe na mbeni ndo so ayeke tongana gbata so gbagba ayeke na tere ni. Na ndo ni so, na mbeto pëpe ala tiri ti bata aye ti Royaume ti Messie. Jéhovah ti aturugu ayeke sö “tente kue ti Juda kozoni” ndali ti so ala yeke akozo zo so Satan ayeke gi ti sara sioni na ala.

14. Na lege wa Jéhovah atiri ti bata ala so ayeke na yâ ti “tente kue ti Juda” na lo sara si ala tï pëpe?

¹⁴ Ti tâ tënë ni, aye so asi afa so Jéhovah ayeke tiri ti bata aChrétien so a sa yingo na ndo ti ala, so ayeke tongana alembe ti Royaume na yâ ti ‘atente’ so ayeke na mbeni ndo so gbagba ayeke na tere ni pëpe.b Lo bata ala so aye ti tï ndali ti so ala ‘yeke na ngangu pëpe’ na lege so lo sara si ala kpengba nga ala sara ye na mbeto pëpe tongana David so ayeke mbeni gbia so ayeke kpengba turugu.

15. Ngbanga ti nyen Jéhovah ‘azia bê ti lo na amara kue ti fâ ala’? Lo yeke sara ande ni na mbilimbili ngoi wa?

¹⁵ Diko Zacharie 12:9. Ngbanga ti nyen Jéhovah ‘azia bê ti lo na amara kue ti fâ ala’? Ngbanga ti so ala yeke gi lakue ti kanga lege na Royaume ti Messie. Lo fâ ngbanga na ndo ti ala ndali ti so ala tënë asioni tënë na awakua ti Jéhovah nga ala sara ye ti ngangu na ala. Na yâ ti kete ngoi, fade Satan na azo ti lo so ayeke na sese ge ayeke londo ande ti sara ndangba bira na atâ Chrétien; na ye so ayeke gue ande ti si na ye so Bible airi ni Harmaguédon (Apocalypse 16:13-16). Ye so ayeke pusu ande Juge so ayeke kota ahon atanga ni kue ti tiri ti bata awakua ti lo nga ti sara si iri ti lo aga nzoni-kue na popo ti amara kue.​—Ezéchiel 38:14-18, 22, 23.

16, 17. (a) “Ye ti héritier ti aboi ti L’Eternel” ayeke nyen? (b) Ti gbu ngangu na yâ ti bira so Satan ayeke sara na tere ti e afa nyen?

¹⁶ Satan ayeke pëpe na mbeni ye so alingbi ti sara si mabe ti e awoko wala ti sara si nzara ti fango tënë ahunzi na bê ti awakua ti Jéhovah na ndo ti sese kue. Siriri so e yeke na ni, so e wara na lege ti ngangu so Jéhovah ayeke na ni ti sö e, ayeke “ye ti héritier ti aboi ti L’Eternel”. (Esaïe 54:17). Zo oko ti buba yâ ti siriri ti e nga na nzoni duti ti e na lege ti yingo ayeke dä pëpe (Psaume 118:6). Satan ayeke ngbâ ande lakue ti pusu azo ti kanga lege na e nga ti tara ti sara ye ti ngangu na e. Tongana e gbu ngangu atâa a zonga e, a yeke fa so yingo ti Nzapa ayeke na ndo ti e (1 Pierre 4:14). Na ndo ti sese kue, a yeke fa nzo tënë ti Royaume ti Jéhovah so ayeke komande. Legeoko tongana mbeni ye so zo apika na mbeni zo na li ti lo na akanga lege na lo ti sara ye hio, awato ti awakua ti Jéhovah ayeke sara aye nde nde ti kanga lege na ala; na a haka aye so ala yeke sara na mbeni “mvingi”, wala lance so zo ayeke pika na mbeni ye. Ye oko, Jéhovah ayeke mû ngangu na awakua ti lo ti hon ndo ti aye so a yeke sara ti kanga lege na ala, na tongaso aye ni so asara ye oko na ala pëpe (Zacharie 9:15). Mbeni ye ti kanga ande lege na aChrétien so a sa yingo na ndo ti ala nga na aChrétien so ayeke na beku ti wara fini ti lakue lakue na sese ayeke dä pëpe.

¹⁷ E yeke ku kungo ngoi so a yeke zi e biaku biaku na yâ ti bira so Zabolo ayeke sara na tere ti e. So tâ dengo bê si e yeke na ni ti hinga so ‘ye ti bira so azo asara ti ke e na ni alingbi ti sara ye na e pëpe; na fade e fâ ngbanga na ndo menga ti azo kue so alondo na ngbanga ti ke e’!

[Akete tënë na gbe ni]

Mo yeke kiri tënë tongana nyen?

• Ye wa afa so aye so Satan amû ti tiri na e atï na ngu?

• Na lege wa Jérusalem ti yayu aga mbeni “tênë so ane mingi”?

• Na lege wa Jéhovah asö “tente kue ti Juda”?

• Na ngoi so e yeke ga nduru na Harmaguédon, ye wa mo hinga ni na bê ti mo kue?

[Afoto na lembeti 23]

A-Témoin ti Jéhovah ti Albanie angbâ be-ta-zo atâa so Satan atiri na ala

[Foto na lembeti 25]

Jésus ake atënë ti mvene so a bi na li ti lo

[Afoto na lembeti 26]

Ye kue so a mû ti tiri na azo so ayeke fa nzo tënë ayeke tï na ngu