“Kozo commandement so ahon atanga ni kue ayeke so wa?”

Nzapa ahunda nyen na e? Eskê Nzapa amû na e acommandement gbani gbani? Ên-ën. Ti gue oko na tënë so Jésus Christ, Molenge ti Nzapa atene, ye so Nzapa ahunda na e ti sara a lingbi ti fa ni gi na tënë oko.​—Diko Marc 12:28-31.

Zia e bâ kozoni kue na ngoi wa Jésus asara tënë so. Jésus ayeke fa ye na yâ ti temple na lango 11 ti nze so a iri ni Nisan, alango kete kozoni si lo kui. Awato ti lo ahunda ambeni tënë ti tara lo na ala yeke ku ti gbu lo na yâ ti atënë ti lo. Lakue lo yeke kanga yanga ti ala na akiringo tënë ti lo. Ti so ni so, ala hunda lo, ala tene: “Kozo commandement so ahon atanga ni kue ayeke so wa?”​—Versê 28.

So ngangu hundango tënë la. Ndia ti Moïse ayeke na andia ahon 600, tongaso ambeni Juif adë gaba ti hinga ndia wâ na popo ni ayeke kota ahon atanga ni kue. Ti ambeni Juif ni, ala bâ ti ala so andia ni kue alingbi tere na a yeke na lege ni pëpe ti tene zo abâ mbeni ndia ni kota ahon atanga ni. Jésus ayeke kiri tënë na hundango tënë so tongana nyen?

Na kiringo tënë na ala, Jésus asara pëpe gi tënë ti ndia oko, me ti andia use. Kozoni, lo tene: “Mo ndoye Jéhovah Nzapa ti mo na bê ti mo kue, na âme ti mo kue, na bibe ti mo kue nga na ngangu ti mo kue.” (Versê 30; Deutéronome 6:5). Atënë “bê,” “bibe,” “âme” na “ngangu” ayeke atënë so ndani ague nde nde pëpe.a Ndani ayeke so: Ti ndoye Jéhovah ahunda na zo ti mû tere ti lo kue, ahingango ndo ti lo kue nga na aye ti lo kue. Mbeni buku so asara tënë na ndo ti Bible atene: “A lingbi zo andoye Nzapa na bê ti lo kue.” Tongana mo ndoye Nzapa, lâ oko oko mo yeke sara kue ti sara ye so anzere na lo.​—1 Jean 5:3.

Use ni, Jésus atene: “Mo ndoye mba ti mo tongana mo wani.” (Versê 31; Lévitique 19:18). Kangbi ayeke pëpe na popo ti ndoye ti Nzapa na ti mba ti mo, ti tâ tënë ni ala kue ague legeoko. Ndoye ti Nzapa la apusu zo ti ndoye mba ti lo (1 Jean 4:20, 21). Tongana e ndoye amba ti e tongana e wani, e yeke sara ye na ala tongana ti so e ye ala sara na e (Matthieu 7:12). Na sarango tongaso e yeke fa so e ndoye Nzapa lo so asara e nga na amba ti e kue na image ti lo.​—Genèse 1:26.

Ngbanga ti nyen commandement so ahunda na e ti ndoye Nzapa nga na amba ti e ayeke kota? Jésus atene: “Mbeni commandement ti hon ala so ayeke dä pëpe.” (Versê 31). Na yâ ti oko tënë ni so ayeke na Matthieu, Jésus atene andia ni kue aluti na ndo ti acommandement use so.​—Matthieu 22:40.

Ti nzere na lê ti Nzapa ayeke ngangu ape. Ye kue so lo hunda na e a lingbi ti fa ni gi na tënë oko: ndoye. Nzapa ahunda lakue na awakua ti lo ti ndoye lo, lo yeke ngbâ ande lakue ti hunda na ala ti sara tongaso. Me ndoye ni angbâ gi na tënë ti yanga pëpe, a lingbi e fa ni na asarango ye ti e (1 Jean 3:18). Ngbanga ti nyen mo gi pëpe ti hinga lege so mo lingbi ti fa so mo ndoye Jéhovah, Nzapa “ti ndoye”?​—1 Jean 4:8.