Pierre na Ananias atene lani mvene: E manda nyen dä?

Ti tene mvene aye ti tene ti sara mbeni tënë so mo hinga ayeke tâ tënë pëpe. Ade mo tene mvene lâ oko ape?—a Même ambeni kota zo so andoye Nzapa atene mvene lani. Peut-être mo hinga mbeni zo so Bible asara tënë ti lo so lo tene mvene lani. A yeke Pierre, mbeni oko ti abazengele 12 ti Jésus. Zia e bâ ndani so lo tene mvene.

Na peko ti so a gbu Jésus, a gue na lo na da ti kota prêtre. L’heure ahon asi na bê ti bï. Pierre alï na yâ ti gbagba ti kota prêtre ni sân ti tene zo ahinga lo. Wâ aza na tere ti Pierre na maseka-wali so ayeke zo ti kua ti kota prêtre ni abâ lo na ahinga lo. Maseka-wali ni atene: “Mo kue mo yeke fade na tere ti Jésus.” Mbeto asara Pierre si lo tene ni hinga Jésus ape.

Bible atene so na pekoni “mbeni maseka wali ni nde abâ lo.” Lo tene: “Koli so kue ayeke lani na tere ti Jésus.” Pierre akiri abere. Kete na pekoni ambeni zo aga na tere ti Pierre na atene na lo: “Ti tâ tënë ni, mo kue mo yeke oko ti ala.”

Mbeto agbu Pierre. Ni la ti fani ota ni, lo tene: “Mbi hinga ti mbi koli so oko pëpe!” Mbeni koli-kondo atoto. Jésus abâ lê ti Pierre, na Pierre adabe ti lo na tënë so Jésus atene na lo angbonga kete kozoni, Jésus atene: “Kozo si mbeni koli-kondo atoto, fani ota mo yeke tene so mo hinga mbi pëpe.” Pierre akanga bê gbä lo tï na toto. Vundu ahon ndo ti lo!

Mo nga kue mara ye so alingbi ti si na mo?— Peut-être mo yeke na ekole na mo mä amba ti mo élève ayeke sara tënë ti aTémoin ti Jéhovah. Mbeni apeut ti tene: “Ala yeke bara ka ti ala drapeau ape! Mbeni nde atene: “Ala yeke tiri ngbanga ti kodoro ti ala ape. Wala mbeni akiri atene: “Ti tâ tënë ni, ala yeke aChrétien ape, ndali ti so ala yeke sara ka matanga ti Noël ape.” Mo ye ti bâ, mbeni ahunda mo atene: “Mo kue mo yeke Témoin ti Jéhovah ape?” Mo yeke tene ande nyen?—

Ti tene mo kiri tënë nzoni na ngoi so mara ti ye tongaso asi na mo, mo yeke na bezoin ti leke tere ti mo kozoni. Pierre aleke tere ti lo kozoni pëpe, na tongana ye ni asi, lo tene mvene! Me Pierre asara lani mawa mingi ndali ti ye so lo sara, ndani la Nzapa apardonne lo.

Mbeni disciple ti Jésus, so iri ti lo ayeke Ananias atene nga mvene lani. Me Nzapa apardonne lo na wali ti lo Saphira pëpe. Saphira na koli ti lo amä tere ti tene mvene. Zia e bâ ngbanga ti nyen Nzapa apardonne lani Ananias na Saphira pëpe.

Lango bale-oko na peko ti so Jésus akiri na yayu, azo 3000 tongaso awara batême na Jérusalem. Mingi ti azo ni alondo na ando so ayo si ala ga ti sara matanga ti Pentecôte, na peko ti so ala ga adisciple awe, ala ye ti ngbâ ti manda ye mingi na ndo ti tënë ti Nzapa so ala wara ni fini fini. Ambeni disciple ti ndo ni amû nginza ti ala wani ti bâ lege ti aita so.

Ananias na wali ti lo akä mbeni sese ti wara nginza ti mû maboko na afini zo so awara batême so. Tongana Ananias aga na nginza ni na devant ti abazengele, lo tene so nginza ni kue la. Andâ a yeke tâ tënë pëpe. Lo honde mbeni mbage ti nginza ni. Nzapa afa na Pierre ye so Ananias asara so, tongaso Pierre atene na lo: “Mo tara ti handa azo pëpe, me ti handa Nzapa.” Na ndo ti tënë so, Ananias atï na sese lo kui! Ngbonga ota na pekoni, wali ti lo aga. Wali ni ahinga ye so asi na koli ti lo ape, lo kue lo tene mvene na pekoni lo tï lo kui.

Kota ye so e manda dä ayeke so: Ti tene tâ tënë ayeke nzoni mingi! A lingbi e kue e manda ti tënë tâ tënë. Tâ tënë e kue e sara afaute, mingi ni na ngoi so e ngbâ lani kete. Anzere na mo ape so Jéhovah andoye mo na lo yeke pardonne mo tongana ti so lo pardonne lani Pierre so?— Me girisa ape so, e doit ti tene gi tâ tënë. Même tongana mbeni la e tene kota mvene, e yeke na bezoin ti hunda lakue na Nzapa ti pardonne e. A yeke ye so Pierre adoit ti sara ni si Nzapa apardonne lo so la. Tongana e yeke sara kue ti kiri ti tene mvene mbeni ape, Nzapa ayeke pardonne e nga kue.