Ala so aye Jéhovah ‘apika gere ti ala na ye oko pëpe’

1. Tongana nyen la mbeni wali afa so lo yeke zia lege ti kpengo loro ape?

A YEKE ngbene ye na ngoi so Marie Decker ade maseka mingi la azo ahinga lo tongana mbeni kota zo ti kpengo loro. Na ngu 1984, azo abâ atene lo la lo yeke wara lani palata ti lor na ngoi ti mbeni kota ngia ti awanguru. Me mbeni ye ti ngangu asi. Na ngoi ti kpengo loro ti mètre 3000, gere ti lo na ti mbeni mba ti lo ti kpengo loro ni apika tere na lo tï. Lo wara kä, lo toto, na a sigigi na lo. Ye oko, Marie azia lege ti kpengo loro pëpe. Nduru na ngu oko na pekoni, na ngu 1985, lo sö benda na yâ ti mbeni mandako ti kpengo loro ti mètre 1000, na lo ga wali so akpe loro ti mètre 1000 hio ahon tanga ti awali kue ti dunia.

2. Mandako ti kpengo loro wa la atâ Chrétien ayeke kpe? A lingbi e kpe loro ni tongana nyen?

² Fini ti e aChrétien ayeke mo bâ mo tene e yeke kpe loro ti wara fini ti lakue lakue. A yeke nzoni e zia pëpe si mbeni ye akanga lege na e na yâ ti kpengo loro so. A yeke pëpe mbeni nduru kpengo loro so a lingbi zo akpe loro hio si lo sö benda. A yeke nga pëpe mbeni senge kpengo loro so zo alingbi ti kpe yeke yeke nga so même na ambeni ngoi lo lingbi ti luti. Me a yeke tongana kpengo loro ti marathon. A lingbi azo so ayeke kpe loro ti marathon agbu ngangu si ala kpe loro ni juska na nda ni. Bazengele Paul atene na aChrétien ti Corinthe, lo tene: “Ala hinga pëpe so na yâ ti mbeni mandako ti kpengo loro, azo ti kpengo loro ni kue ayeke kpe loro, me gi zo oko si ayeke wara futa ni? Tongaso ala kpe loro ni ti tene ala wara ni.”​—1 aCor. 9:24.

3. Azo wa la alingbi ti sö benda ti wara fini ti lakue lakue?

³ Bible afa na e tongana nyen ti kpe loro ni. (Diko 1 aCorinthien 9:25-27.) Futa ni ayeke fini ti lakue lakue, atâa na yayu ndali ti aChrétien so a soro ala ti gue na yayu wala na sese ndali ti ambeni zo so akpe nga loro ni. Nde na mingi ti amandako ti kpengo loro, azo kue so agbu ngangu juska na nda ni na yâ ti kpengo loro ti fini ayeke wara futa ni (Mat. 24:13). Na yâ ti mandako ti kpengo loro ti e, zo ayeke wara futa ni ape gi tongana lo sara ye alingbi na andia ni pëpe wala lo si na nda ni pëpe. A yeke gi mandako so oko la futa ni ayeke fini ti lakue lakue.

4. Ngbanga ti nyen kpengo loro ti wara fini ti lakue lakue ayeke kete ye pëpe?

⁴ A yeke kete ye pëpe ti kpe loro ti wara fini ti lakue lakue. Jésus Christ la akpe loro so sân ti pika gere ti lo, me zo oko na popo ti e alingbi pëpe ti sara tongana lo. Disciple Jacques atene so “fani mingi e kue e yeke pika gere ti e.” (Jacq. 3:2). Awokongo ti e wala ti amba ti e alingbi ti sara ngangu na ndo ti e. Ni la asara si na ambeni ngoi e lingbi ti pika gere ti e, e kiri na peko wala e luti. E lingbi même ti tï; me e yeke londo na e kiri na yâ ti loro ni. Ambeni même atï sioni a sara si ala yeke na bezoin ti tene a mû maboko na ala ti londo na ti kiri ti kpe loro ni juska na nda ni. Tongaso, ngoi na ngoi wala même fani mingi e lingbi ti pika gere ti e wala e tï.​—1 aGbia 8:46.

NGBÂ NA YÂ TI KPENGO LORO NI, MÊME TONGANA MO PIKA GERE TI MO

5, 6. (a) Na lege wa mbeni ye ti tene mbeni Chrétien ‘apika gere ti lo dä ayeke pëpe’? Nyen la ayeke mû maboko na mbeni Chrétien ti “londo”? (b) Ngbanga ti nyen ambeni Chrétien so apika gere ti ala alondo pëpe?

⁵ Ye so e yeke sara na ngoi so e ‘pika gere ti e’ wala e ‘tï’ la ayeke fa wala e yeke na kpengba songo na Nzapa wala pëpe. Ambeni zo so apika gere ti ala wala atï achangé bê ti ala na ala ngbâ ti sara na Nzapa. Me ambeni ake ti changé bê ti ala. A-Proverbe 24:16 atene: “Zo ti mbilimbili atï lege mbasambala, na lo kiri lo londo, me a kinda azo ti sioni na yâ sioye.”

⁶ Même tongana e ‘pika gere ti e’ wala e ‘tï’, e lingbi ti londo. Tongana e zia bê ti e lakue na Jéhovah, lo yeke mû maboko na e na ngoi so e wara akpale wala e sara afaute. Lo yeke mû maboko na e ti “londo,” ndali ti so lo hinga so e ye lo. Me azo ti sioni aye ti londo ape. Ala yeke gi pëpe mungo maboko ti yingo vulu ti Nzapa nga na ti azo ti lo, wala tongana a ye ti mû maboko na ala ala ke. Bible atene so ala so ‘andoye Ndia ti Jéhovah,’ mbeni ye ti tene ala pika gere ti ala dä ayeke pëpe. Ye so aye ti fa so e lingbi ti kiri na yâ ti kpengo loro ti e ti fini ti lakue lakue.​—Diko Psaume 119:165.

7, 8. Na lege wa Nzapa alingbi ti ngbâ ti bâ mbeni zo so atï na nzoni lê?

⁷ Wokongo ti ambeni zo asara si ala sara akete siokpari, même fani mingi. Me tongana lakue ala “londo”, so ti tene, ala changé bê ti ala biani na ala kiri asara na Jéhovah na bê ti ala kue, lo yeke ngbâ ti bâ ala tongana azo ti mbilimbili. E bâ ni na yâ ti sarango ye ti Nzapa na mbage ti azo ti Israël ti giriri (És. 41:9, 10). A-Proverbe 24:16 so e fa ni fade aluti pëpe na ndo ti ye so ayeke sioni, so ayeke ‘tingo’ ti e, me aluti na ndo ti nzoni ye, ‘londongo’ ti e grâce na nzoni bê ti Nzapa. (Diko Ésaïe 55:7.) Jéhovah Nzapa nga na Jésus ayeke na confiance so e yeke sara ande ngangu ti “londo”, ni la ala wa e ti sara ni.​—Ps. 86:5; Jean 5:19.

⁸ Même tongana mbeni zo ti kpengo loro ti marathon apika gere ti lo wala lo tï, lo lingbi ti wara ngoi ti londo na ti kpe loro ni juska na nda ni tongana lo sara ye hio. Na yâ ti kpengo loro ti fini ti lakue lakue, e hinga pëpe ‘lango nga na ngbonga’ so kpengo loro ni ayeke hunzi na ni (Mat. 24:36). Me, tongana e sara ngangu ti pika gere ti e pëpe, a yeke duti ngangu na e pëpe ti ngbâ ti kpe loro ni juska na nda ni. Tongaso, e lingbi ti sara tongana nyen ti kpe ti pika gere ti e?

AYE SO ALINGBI TI SARA SI E PIKA GERE TI E

9. Aye oku wa e yeke sara tënë na ndo ni?

⁹ Zia e bâ aye oku so alingbi ti sara si e pika gere ti e: awokongo ti e, anzara ti mitele, aye so a sara na yâ ti congrégation so e bâ e tene ayeke na lege ni ape, ‘aye ti vundu na sarango ngangu’ nga na awokongo ti aita ti e. Tongana mo pika gere ti mo, girisa ape so Jéhovah ahinga ti kanga bê na lo yeke zia mo hio ape.

10, 11. Wokongo wa David ayeke na ni?

¹⁰ Awokongo ti e ayeke tongana atênë so ayeke na ndo ti lege. Aye so asi na yâ ti fini ti Gbia David na ti bazengele Pierre afa na e awokongo use. David akanga nzara ti bê ti lo lakue pëpe nga na ambeni ngoi mbeto ti lê ti zo asara Pierre.

¹¹ Gbia David akanga nzara ti bê ti lo lakue pëpe. Wokongo ti lo so asara si lo sara lango-sioni na Bath-Séba. Nga na ngoi so Nabal azonga David, angbâ kete lo sara sioni na Nabal. Me atâa so na ambeni ngoi David akanga nzara ti bê ti lo ape, lo zia lâ oko pëpe ti gi ti nzere na Jéhovah. Na lege ti mungo maboko ti amba ti lo, lo kiri lo wara ngangu na lege ti yingo.​—1 Sam. 25:5-13, 32, 33; 2 Sam. 12:1-13.

12. Atâa so Pierre apika gere ti lo, nyen la asara si lo ngbâ na yâ ti kpengo loro ni?

¹² Pierre asara mbeto ti lê ti zo, na ambeni ngoi lo pika gere ti lo sioni; me lo ngbâ be-ta-zo na Jésus nga na Jéhovah. Na tapande, na lê ti azo dandara lo tene mvene lo tene ni hinga Jésus ape, lo sara ni lege oko ape me lege ota (Luc 22:54-62). Na mbeni ngoi nde, Pierre asara ye tongana Chrétien ape na lege so lo sara ye na aChrétien so ayeke aGentil mo bâ mo tene aChrétien so ayeke aJuif so afâ ganza la ayeke nzoni ahon ala. Bango ndo ti Pierre so ayeke na lege ni ape, nga ambeni zo na yâ ti congrégation alingbi ti mû peko ti lo na ni. Tongaso Paul amû na lo ngangu wango (aGal. 2:11-14). Pierre asara ngonzo ndali ti wango so na lo zia lege ti kpengo loro ti lo ti wara fini? Oko pëpe. Lo gbu li ti lo nzoni na ndo ti wango ti Paul so, lo changé bango ndo ti lo na lo ngbâ na yâ ti kpengo loro ni.

13. Na lege wa akpale ti seni alingbi ti sara si e pika gere ti e?

¹³ Akpale ti seni alingbi ti sara si gigi akpengba na e ngangu. A sara si ambeni zo azia lege ti kpengo loro ni. Na tapande, na pekoni so mbeni ita-wali na Japon awara batême, tere ti lo ason ngangu asara ngu 17. Lo zia si kpale ti lo ti seni asara si lo woko na lege ti yingo, na lo fa tënë mbeni pëpe. A-ancien use ague abâ lo. Teti so ala sara tënë na lo na nzoni bê, lo wara ngangu lo kiri lo komanse ti ga na abungbi. Lo tene: “Aita abara mbi na ngia a sara si ngu ti lê ti mbi asigigi.” Laso ita-wali so akiri na yâ ti kpengo loro ni.

14, 15. Nyen la a lingbi e sara tongana asioni nzara asara e? Fa mbeni tapande ni.

¹⁴ Anzara ti mitele asara si azo mingi apika gere ti ala. Tongana anzara ti mitele apusu e ti pika gere ti e, a lingbi e sara ngangu kue ti bata si apensé ti e, asarango ye ti e nga na vorongo so e yeke voro na Jéhovah aduti na saleté pëpe. Jésus atene so tongana lê ti e wala maboko ti e asara si e pika gere ti e, a yeke nzoni e “bi ni yongoro”. A yeke nzoni e zi na yâ ti li ti e nga na yâ ti sarango ye ti e asioni ye kue so alingbi ti sara si e zia lege ti kpengo loro ni.​—Diko Matthieu 5:29, 30.

¹⁵ Mbeni ita-koli so akono na yâ ti sewa ti aChrétien atene so lo yeke dabe ti lo lakue so lani lo yeke na nzara ti bungbingo koli na koli. Lo tene so lakue lo bâ tere ti lo so lo yeke nde nga lo duti nzoni ape na popo ti azo. Na ngoi so lo wara lani ngu 20, lo mû kua ti pionnier permanent na lo ga wakua ti mungo maboko na yâ ti congrégation. Na pekoni lo sara kota siokpari, bungbi asuku na lo, na a-ancien amû maboko na lo. Lo sambela, lo manda Bible, nga lo sara ngangu ti mû maboko na azo. Aye so kue amû maboko na lo ti ngbâ ti kpe loro ni. Angu mingi na pekoni, lo tene: “Na ambeni ngoi nzara ti bungbingo koli na koli ayeke sara mbi, me mbi zia pëpe si a hon ndo ti mbi. Mbi hinga so Jéhovah ayeke zia pëpe si a tara mo ahon ti so mo lingbi ti kanga bê dä. Tongaso mbi bâ so Nzapa apensé so mbi lingbi ti kanga bê. “ Ita-koli so atene na nda ni, lo tene: “Aye so kue mbi gbu ngangu dä, mbi yeke wara ande futa ni na yâ ti fini dunia. Mbi ye ti wara ni! Mbi yeke ngbâ ti tiri juska ti si na ngoi ni so.” Lo yeke sara kue ti ngbâ na yâ ti kpengo loro ni.

16, 17. (a) Nyen la amû maboko na mbeni ita-koli so abâ atene a sara ye na ni na lege ni ape? (b) Ti tene e pika gere ti e ape, a lingbi e zia lê ti e na ndo ti zo wa?

¹⁶ Aye so a sara na yâ ti congrégation so e bâ e tene ayeke na lege ni ape alingbi ti sara si e pika gere ti e. Na France, mbeni ita so kozo lo yeke ancien apensé so a sara ye na lo na lege ni ape, na lo sara ngonzo ngangu. Lo zia lege ti guengo na abungbi nga na fango tënë. A-ancien use aga abâ lo na ala dengi mê nzoni amä lo na ngoi so lo fa na ala peko ti ye so lo bâ lo tene ayeke na lege ni ape so. Ala wa lo ti zia bê ti lo na Jéhovah nga ala dabe ti lo so ye so ayeke kota mingi ayeke ti nzere na Nzapa. Lo mä wango ti ala nga kete na pekoni lo kiri na yâ ti kpengo loro ni, lo kiri lo bi tere ti lo na yâ ti akua ti congrégation.

¹⁷ A lingbi aChrétien kue azia lê ti ala gi na ndo ti Jésus Christ, lo so Nzapa azia lo Mokonzi ti congrégation, me pëpe na ndo ti azo so siokpari ayeke na tere ti ala. Jésus, so lê ti lo ayeke “tongana menga-wa”, ayeke bâ aye kue so ayeke si na yâ ti congrégation nzoni mingi ahon e (Apoc. 1:13-16). Na tapande, e lingbi ti tene so a sara mbeni ye na lege ni ape na yâ ti congrégation, me ti tâ tënë ni peut-être a yeke e la e gbu nda ti ye ni nzoni ape wala e hinga pëpe ngbanga ti nyen la ye ni asi. Jésus ayeke bâ lege ti akpale ti congrégation na mbeni lege so ayeke nzoni nga na ngoi so alingbi. Tongaso, a yeke nzoni e zia lâ oko pëpe si ye so mbeni mba ti e Chrétien asara asara si e pika gere ti e na e zia lege ti kpengo loro ni.

18. Tongana nyen la e lingbi ti luti na lê ti atara wala akpale?

¹⁸ Ambeni ye use so alingbi ti sara si e pika gere ti e ayeke ‘aye ti vundu wala sarango ngangu’ nga na awokongo ti aita ti e na yâ ti congrégation. Na yâ ti toli ti Jésus ti zo ti lungo ye, lo fa so ambeni zo ayeke pika gere ti ala ndali ti ‘aye ti vundu’ so asi wala ‘sarango ngangu’ so a sara na ala ndali ti tënë ni. Afami ti e, azo so ayeke nduru na e, wala akota zo ti kodoro alingbi ti sara si aye ti vundu asi na e wala ala lingbi ti sara ngangu na e ndali ti tâ tënë. A yeke duti ngangu pëpe na mbeni zo ti pika gere ti lo tongana “gunda ti lo ayeke dä pëpe,” so ti tene tongana lo woko na lege ti yingo (Mat. 13:21). Me tongana e sara kue ti ngbâ ti kpengba songo ti e na Jéhovah, tënë ti Royaume ayeke mû maboko na e ti tene gunda ti e alï sese ngangu. Tongaso, na ngoi so mo yeke na yâ ti akpale, gbu li na ndo ti aye so “a lingbi ti gonda ni”. (Diko aPhilippien 4:6-9.) Na lege ti ngangu ti Jéhovah, e yeke luti na lê ti atara, na e yeke zia lege pëpe na akpale ti kanga lege na e na yâ ti kpengo loro ni.

19. E lingbi ti sara nyen ti kpe ti pika gere ti e tongana mbeni zo ason bê ti e?

¹⁹ Ambeni zo azia lege ti sarango na Jéhovah ndali ti awokongo ti amba ti ala. Wala mbeni zo alingbi ti pika gere ti lo ndali ti so amba ti lo asara aye so yingo-ti-hinga ti lo amû lege na lo pëpe ti sara (1 aCor. 8:12, 13). Tongana mbeni zo ason bê ti e, e yeke sara ngonzo e zia bungbi? Bible awa aChrétien ti zia ti fâ ngbanga na li ti azo, ti pardone azo nga ti luti nganganga pëpe na ndo ti adroit ti ala (Luc 6:37). Tongana ye so asi na mo, hunda tere ti mo: ‘Mbi yeke fâ ngbanga na ndo ti azo alingbi gi na aye so bê ti mbi aye? So mbi hinga so siokpari ayeke na tere ti aita ti mbi, mbi yeke zia si mbeni zo so alingbi kue ape asara si mbi zia kpengo loro ti fini?’ Ndoye ti e na mbage ti Jéhovah ayeke mû maboko na e ti zia pëpe si mbeni ye so mbeni zo asara akanga lege na e ti kpe loro ti si na nda ni.

GBU NGANGU NA YÂ TI KPENGO LORO NI, PIKA GERE TI MO PËPE

20, 21. Nyen la mo leke na bê ti mo ti ngbâ ti sara na yâ ti kpengo loro ti fini?

²⁰ Mo leke na bê ti mo ti ngbâ ti “kpe loro ni ahunzi”? (2 Tim. 4:7, 8). A lingbi mo manda ye mo wani. Sara kua na Bible nga na ambeti ti e ti sara na recherche, gbu li na ndo ti aye so mo manda, nga gi ti bâ aye so mo lingbi ti pika gere ti mo dä. Sambela Jéhovah ti mû yingo vulu ti lo na mo ti kpengba mo. Girisa ape so, tongana e pika gere ti e wala e tï, e lingbi ti londo ti kiri na yâ ti kpengo loro ni ti kpe juska na nda ni. E lingbi ti manda ye na lege ti afaute so e sara tongaso si e kpe loro ni nzoni mingi ahon ti kozo.

²¹ Bible afa so a lingbi e kpe loro ni juska na nda ni tongana e ye ti wara futa ni so ayeke fini ti lakue lakue. Na ngoi so e yeke kpe loro ni Jéhovah ayeke mû na e ‘siriri mingi’. (Ps. 119:165). Lo yeke ngbâ ti mû maboko na e laso nga lo yeke mû na e aye ti nzoni so ayeke ngbâ lakue lakue tongana e kpe loro ni juska na nda ni.​—Jacq. 1:12.