KIRINGO TËNË NA AHUNDA TI AZO

Zo alingbi ti mä tâ yâ ti Bible la?

Bible ayeke tënë ti yanga ti Nzapa. A yeke tongana mbeni lettre so mbeni babâ so aye amolenge ti lo mingi atokua ni na ala (2 Timothée 3:16). Na yâ ti Bible, Nzapa afa na e ye so e lingbi ti sara ti nzere na lo, ndani so lo zia si sioni amû ndo ti sese. Lo fa nga ye so lo leke ti sara ande ndali ti azo. Ye oko, akota zo ti eglize aba yâ ti afango ye ti Bible, a sara si gbâ ti azo abâ so ala lingbi ti mä yâ ti Bible lâ oko ape.​—Kusala 20:29, 30.

Jéhovah Nzapa aye si e hinga tâ tënë na ndo ti lo, ndani la si lo mû na e mbeni mbeti so zo alingbi ti mä yâ ni.​—Diko 1 Timothée 2:3, 4.

Mo lingbi ti sara nyen ti mä yâ ti Bible?

Biani, Jéhovah amû na e Bible. Me lo sara nga si e lingbi ti mä yâ ni. Ni la, lo tokua Jésus ti zi ndani na e (Luc 4:16-21). Jésus amû lani maboko na azo ti mä yâ ti atënë ti yâ ni na sarango kusala na aversê.​—Diko Luc 24:27, 32, 45.

Jésus azia nga congrégation ti aChrétien na sese ge si kua so lo zi li ni dä angbâ ti gue na li ni (Matthieu 28:19, 20). Laso, atâ disciple ti Jésus ayeke mû maboko na azo ti mä yâ ti ye so Bible afa na ndo ti Nzapa. Tongana mo ye ti mä yâ ti Bible, aTémoin ti Jéhovah ayeke duti nduru ti mû maboko na mo.​—Diko Kusala 8:30, 31.