Zo alingbi ti gbu nda ti Bible?

“Sewa ti e ayeke diko lani Bible lakue na dimanche. Dikongo ni anzere na mbi kue pëpe. Mbi hinga lani so Bible ayeke Mbeti ti Nzapa, me a yeke ngangu na mbi ti gbu nda ti mingi ti aye so e yeke diko.”​—Steven, na Grande Bretagne.

“Na ngoi so mbi yeke na ngu 17, mbi tara lani ti diko Bible. Mbi bâ so a yeke ngangu ti gbu nda ni; ni la mbi zia dikongo ni.”​—Valvanera, na Espagne.

“Mbi diko lani Bible fani oko ahunzi kue ndali ti so mbi bâ so teti so mbi yeke Catholique, a yeke nzoni mbi diko ni. Mbi mû lani ngu ota ti hunzi ni! Me mbi gbu nda ni mingi pëpe.”​—Jo-Anne, na Australie.

BIBLE angbâ lakue ti duti buku so azo mingi ahinga ni ahon tanga ti abuku kue. A ngbâ lakue ti duti buku so azo ayeke vo ni mingi, azo mingi ahon ti kozo alingbi ti wara ni, a yeke wara ni na ayanga ti kodoro mingi ahon ti kozo nga a zia ni mingi ahon ti kozo na yâ ti akasete nga na aye tongana DVD. Ye oko, gbâ ti azo so ayeke na Bible abâ so a yeke ngangu na ala ti gbu nda ni. Mo nga kue a yeke ngangu na mo ti gbu nda ni?

Wa ti Bible aye si e gbu nda ni?

Bible atene: “Atënë kue ti yâ ti Mbeti ti Nzapa, a sara ni na mbeti na gbe ti yingo ti Nzapa.” (2 Timothée 3:16). Jéhovah Nzapa ayeke biani wa ti Bible. Lo ye si e gbu nda ti atënë ti Bible? Wala lo ye fade ti tene gi mbeni kete wungo ti azo tongana amokonzi-nzapa nga na awandara ti dunia so ayeke gi nda ti atënë ti Bible si agbu nda ni?

Bâ aversê ti Bible so ayeke na gbe ni ge:

“Commandement so mbi komande mo laso ayeke ye ti hon mo pëpe, na a yeke yongoro na mo nga pëpe.”​—Deutéronome 30:11.

“Ti lungula nda ti tënë ti Mo amû lumière, a mû ndara ti hinga nda ti tënë na zo so li ti lo ayeke dä pëpe.”​—Psaume 119:130.

“Tâ gi na ngbonga ni so, bê ti Jésus asi na ngia nga na yingo vulu, na lo tene: ‘Babâ, mbi sepela mo na lê ti azo kue, mo Seigneur ti yayu na ti sese, ngbanga ti so mo honde aye so ngangu na awandara nga na azo so ahinga ndo, me mo fa ni na akete molenge.’ ”​—Luc 10:21.

Wa ti Bible aye biani si mo gbu nda ti atënë ti Bible. Ye oko, kpale ni ayeke so gbâ ti azo so ayeke tâ na nzara ti gbu nda ti Bible abâ so a yeke ngangu na ala ti gbu nda ni. Nyen la alingbi ti mû maboko na ala? Na yâ ti a-article ti peko, a mû awango ota so alingbi ti mû maboko na mo ti gbu nda ti Bible.