“Ala ngbâ ti hunda ye, na fade a yeke mû ni na ala”

Mbeni disciple ti Jésus ahunda lani tënë so na lo: “Seigneur, fa na e tongana nyen ti sambela.” (Luc 11:1). Na yâ ti kiringo tënë ti lo, Jésus amû tapande use so afa na e tongana ti sambela si Nzapa amä e. Tongana a si na mo awe ti hunda tere ti mo wala Nzapa ayeke mä nga asambela ti mo la, kiringo tënë ti Jésus so ge ayeke mû maboko na mo.​—Diko Luc 11:5-13.

Kozo tapande ni agboto lê na ndo ti zo so asambela (Luc 11:5-8). Tapande ni atene so mbeni koli awara gene na da ti lo na bï me lo yeke na mbeni ye ti tengo ni ti mû na gene ti lo ni ape. A lingbi lo sara mbeni ye. Lo londo na bï ni lo gue na da ti mbeni kamarade ti lo si lo hunda lo ti mû na lo mapa. Kamarade ti lo ni ake na lo kozo ngbanga ti so lo na sewa ti lo ni ala ngbâ ti lango. Me koli ni angbâ gi ti hunda juska kamarade ti lo ni alondo amû na lo mbeni ye ti tengo ni.a

Tapande so afa na e nyen na ndo ti sambela? Jésus aye ti fa na e so a lingbi e zia ti sambela pëpe. A lingbi e ngbâ ti hunda ye, e ngbâ ti gi ye na e ngbâ ti pika yanga-da (Luc 11:9, 10). Ngbanga ti nyen? Jésus aye ti fa na e so tongana e sambela, Nzapa ayeke mä e ape? Oko ape. Lo ye ti fa so Nzapa ayeke tongana kamarade so ape, me Nzapa ayeke nduru ti mû ye na ala so asambela na mabe. E yeke fa mabe so na ziango lege pëpe ti sambela. Tongana e sara tongaso, e yeke fa so e yeke biani na bezoin ti ye so e hunda lo na ni nga so e hinga e tene lo yeke mû ni na e, tongana ye ni so e hunda so ague oko na ye so lo ye.​—Marc 11:24; 1 Jean 5:14.

Use tapande ni agboto lê na ndo ti lo so ayeke “mä sambela” ti azo: Jéhovah (Psaume 65:3). Jésus ahunda tënë so, lo tene: “Na popo ti ala so, babâ wa tongana molenge ti lo ahunda susu, lo yeke mû na lo ngbo ahon ti mû na lo susu? Wala tongana molenge ni ahunda nga para ti kondo, fade lo yeke mû na lo kpalakongo?” Kiringo tënë ni ayeke polele: Babâ so aye molenge ti lo ayeke mû sioni ye na molenge ti lo ape. Na pekoni, Jésus afa nda ti tapande so: Asinga ababâ so ayeke gi asenge zo ayeke mû “amatabisi so ayeke nzoni” na amolenge ti ala, “si fade Babâ so ayeke na yayu ayeke mû yingo vulu,” so ayeke matabisi so ahon amatabisi kue, na amolenge ti lo, azo, ape?b​—Luc 11:11-13; Matthieu 7:11.

Tapande so afa na e nyen na ndo ti Jéhovah, lo so ayeke “mä sambela” ti azo? Jésus aye si e bâ Jéhovah tongana mbeni Babâ so aye e na so ayeke nduru ti mû na amolenge ti lo ye so ala bezoin ni. Tongaso, awakua ti Jéhovah alingbi ti fa tënë ti bê ti ala na lo sân mbeto. Nga teti so ala hinga so lo ye gi nzoni ti ala, ye so Jéhovah amû na ala, ala yeke nduru ti yeda na ni, même si a yeke nde na ti so ala ku fade tere ti ala na ni.c