Jéhovah amû “yingo vulu na ala so ahunda lo”

“Tongana i so i yeke sioni, i hinga lege ti mû matabisi ti nzoni na amolenge ti i, fade Babâ ti i na yayu aye mingi ahon pëpe ti mû Yingo Vulu na ala so ahunda Lo?”​—LUC 11:13.

1. A yeke na angoi wa si e yeke mbilimbili na bezoin ti mungo maboko ti yingo vulu?

‘MBI lingbi ti hon ndo ti kpale so na ngangu ti mbi wani pëpe. A yeke gi na mungo maboko ti yingo vulu si mbi lingbi ti hon ndo ti tara so.’ Mo tene mara ti tënë so lâ oko awe? Mingi ti aChrétien atene mara ti tënë so awe. Peut-être a yeke ye so mo tene na pekoni so mo mä a tene mo yeke na mbeni ngangu kobela. Wala peut-être a yeke na ngoi so koli wala wali ti mo so mo na lo asara mariage aninga awe akui. Wala peut-être a yeke na ngoi so kota vundu ato nda ti sara mo lakue, atâa so kozoni mo yeke na ngia mingi. Na yâ ti angoi ti vundu so, mo pensé so tongana mo gbu lani ngangu, a yeke gi ngbanga ti so yingo vulu ti Jéhovah amû na mo “kota ngangu” so ahon ti so mo yeke ka na ni.​—2 aCorinthien 4:7-9; Psaume 40:2, 3.

2. (a) Akpale wa atâ Chrétien ayeke tingbi na ni? (b) Ahundango tënë wa e yeke bâ ande na yâ ti article so?

² A lingbi atâ Chrétien atiri lakue na akota kpale nga na akangango lege so azo ti sese so, so ake Nzapa ayeke ga na ni (1 Jean 5:19). Na ndo ni, Satan Zabolo lo wani lo yeke sara ngangu na adisciple ti Christ, na lo yeke sara ngangu bira na ala so “abata komandema ti Nzapa, na ala bata tënë ti témoin ti Jésus.” (Apocalypse 12:12, 17). Tongaso, a yeke ye ti dongo bê pëpe tongana e yeke na bezoin ti tene yingo ti Nzapa amû ngangu na e laso mingi ahon ti kozo. Ye wa e lingbi ti sara si e ngbâ lakue ti wara mungo maboko ti yingo vulu ti Nzapa mingi? Nga, ngbanga ti nyen a lingbi e hinga biani so a nzere na Jéhovah mingi ti mû na e ngangu so e yeke na bezoin ni na angoi so e yeke na yâ ti atara? Na popo ti atapande so Jésus amû, e yeke bâ ambeni use so akiri tënë na ahundango tënë so.

E zia ti sambela pëpe

3, 4. Tapande wa Jésus amû lani? Tongana nyen Jésus afa so tënë so andu sambela?

³ Mbeni oko ti adisciple ti Jésus ahunda lo lani, lo tene: “Seigneur, Mo fa na e lege ti sambela.” (Luc 11:1). Ti kiri tënë, Jésus amû na adisciple ti lo ambeni tapande use so ague oko. Kozo tapande ni ayeke na ndo ti mbeni zo so gene aga na ndo ti lo, na use tapande ni ayeke na ndo ti mbeni babâ so adengi mê ti mä molenge ti lo ti koli. Zia e bâ oko na oko atapande use so.

⁴ Jésus atene: “Zo [wa] na popo ti i? tongana lo yeke na ndeko, na lo gue na lo na bebi, lo tene na lo, Ndeko, mo mû mapa ota na mbi, teti mbeni ndeko ti mbi so alondo na lege, aga na da ti mbi gi fade fadeso, na mbi yeke na ye ti mû na lo pëpe; na zo so ayeke na yâ da akiri tënë, Mo gi mbi pëpe. A kanga yanda ti da awe, na amolenge ti mbi ayeke na mbi na ndo tange; mbi lingbi londo ti mû mapa na mo pëpe. Mbi tene na i, kamême lo ye ti londo ti mû mapa na lo pëpe teti lo yeke ndeko ti lo, me teti lo zia ti hunda pëpe, fade lo londo, lo mû na lo ye so lo ye.” Na pekoni, Jésus afa tongana nyen tapande so andu tënë ti sambela, lo tene: “Mbi tene na i, i hunda, na fade a mû na i; i gi, na fade i wara; i golo yanga ti da, na fade a lungula na i. Teti azo kue so ahunda awara, na zo so agi awara, na zo so agolo yanga ti da, fade a lungula na lo.”​—Luc 11:5-10.

5. Nyen la tapande ti koli so azia pëpe ti hunda ye afa na e na ndo bibe so a lingbi e duti na ni na ngoi so e yeke sambela?

⁵ Nzoni tapande ti koli so azia pëpe ti hunda ye afa na e mara ti bibe so a yeke nzoni e duti na ni na ngoi so e yeke sambela. Bâ so Jésus atene so koli so awara ye so lo hunda “ teti lo zia ti hunda pëpe”. (Luc 11:8). Tënë “zia ti hunda pëpe” asigigi gi fani oko na yâ ti Bible. A yeke mbeni tënë ti yanga ti Grec so a kiri pekoni na tënë “sarango ye na kamene pëpe”. Mingi ni, azo ayeke bâ sarango ye na kamene pëpe tongana mbeni sioni sarango ye. Ye oko, tongana zo azia pëpe ti hunda mbeni ye so ayeke na lege ni na lo sara ni na kamene pëpe, a lingbi ti gonda lo ndali ni. A yeke ye so zo so gene aga na ndo ti lo na yâ ti tapande ti Jésus asara ni. Kamene asara lo pëpe ti ngbâ ti hunda ye so lo yeke na bezoin ni. Teti so Jésus afa koli so tongana mbeni tapande so e lingbi ti mû pekoni, a yeke nzoni e kue e zia pëpe ti sambela. Jéhovah aye si e ngbâ ‘ti hunda, ti gi na ti golo yanga-da’. Ye ti pekoni ayeke so fade lo yeke “mû Yingo Vulu na ala so ahunda Lo.”

6. Na ngoi ti Jésus, azo ayeke bâ yambango agene tongana nyen?

⁶ Atâa so Jésus afa na e so a yeke nzoni e zia pëpe ti hunda Nzapa na lege ti sambela, lo fa na e nga nda ni so a yeke nzoni e sara tongaso. Ti gbu nda ti tënë so polele, a yeke nzoni e hinga lege so azo so ayeke mä tapande ti Jésus lani ayeke bâ na tënë ti yambango agene. Aversê ti Bible mingi afa so na ngoi so a sû Bible, yambango agene ayeke mbeni ye so azo amû na nene ni mingi, na mingi ni awakua ti Nzapa (Genèse 18:2-5; aHébreu 13:2). Ti ke ti yamba agene ayeke mbeni sioni sarango ye (Luc 7:36-38, 44-46). Tongana e gbu nda ti tënë so polele awe, zia e kiri e bâ tapande so Jésus amû.

7. Ngbanga ti nyen koli so awara gene na yâ ti tapande ti Jésus asara kamene pëpe ti zingo kamarade ti lo?

⁷ Koli ti yâ ti tapande so awara mbeni gene na bê ti bï. Koli ni abâ so a lingbi lo mû kobe na gene ti lo ni, me lo yeke na “ye ti mû na lo pëpe”. Na lê ti lo, ye so ahunda ti tene lo sara ye hio! Atâa ye ni ayeke tongana nyen, a lingbi lo wara mbeni mapa. Na tongaso lo gue na mbeni kamarade ti lo, na sân kamene, lo zingo lo. Lo iri kamarade ti lo ni lo tene: “Ndeko, mo mû mapa ota na mbi.” Lo zia ti hunda pëpe juska kamarade ti lo ni amû na lo ye so lo yeke na bezoin ni. A yeke gi na ngoi so lo wara mapa ni awe si lo lingbi ti yamba gene ti lo nzoni.

Tongana mbeni ye agbu bê ti mo mingi, hunda ni fani mingi

8. Ye wa ayeke pusu e ti ngbâ lakue ti sambela ti wara yingo vulu?

⁸ Ye wa tapande so afa na e na ndo nda ni so e yeke zia pëpe ti sambela? Koli so azia pëpe ti hunda mapa ndali ti so lo bâ so a lingbi lo wara ni si lo yamba na gene ti lo nzoni (Esaïe 58:5-7). Tongana mapa ayeke dä pëpe, lo lingbi ande ti yamba gene ti lo ni nzoni pëpe. Legeoko nga, teti e hinga so a lingbi e wara yingo vulu ti Nzapa si e sara kusala ti e tongana atâ Chrétien, e yeke ngbâ ti sambela Nzapa ti hunda yingo vulu ti lo (Zacharie 4:6). Sân yingo ti Nzapa, e lingbi ti sara kusala ti e nzoni pëpe (Matthieu 26:41). Mo bâ kota ye so e lingbi ti gboto na yâ ti tapande so? Tongana e bâ yingo ti Nzapa tongana mbeni ye so e yeke tâ na bezoin ni, kite ayeke dä pëpe so e yeke ngbâ lakue ti hunda ni.

9, 10. (a) Mû mbeni tapande ti fa ngbanga ti nyen e yeke na bezoin ti ngbâ lakue ti sambela Nzapa ti mû na e yingo ti lo. (b) A yeke nzoni e hunda tere ti e na atënë wa? Ngbanga ti nyen?

⁹ Ti mû maboko na e ti bâ tongana nyen ngbongboro tënë ti yâ ti tapande so andu ngoi ti e laso, bâ so mbeni zo ti yâ ti sewa ti mo atï kobela na bê ti bï. Mo yeke zingo mbeni docteur ti mû maboko na mo? Mo yeke sara ni pëpe tongana kobela ni ayeke ngangu pëpe. Ye oko, tongana a yeke kobela ti bê la abi lo, mo yeke sara kamene pëpe ti iri mbeni docteur. Ndali ti nyen? Ndali ti so mo yeke na yâ ti mbeni ye so ahunda ti tene mo sara ye hio. Mo bâ so a yeke kota ye ti tene mbeni zo so ahinga ye nzoni na ndo ti kobela ni amû maboko na mo. Tongana mo hunda mungo maboko pëpe, zo ni alingbi ti kui. Legeoko nga, e lingbi ti tene so aChrétien ayeke na yâ ti mbeni kpale so ahunda lakue ti tene ala sara ye hio. Senge pëpe, ngbanga ti so Satan ayeke tambela tongana “bamara so atoto,” na lo yeke gi ti te e (1 Pierre 5:8). Ti tene e kui pëpe na lege ti yingo, a lingbi e wara mungo maboko ti yingo ti Nzapa. Tongana e hunda mungo maboko ti Nzapa pëpe, e lingbi ti wara sioni. Tongaso, e yeke zia pëpe ti hunda Nzapa ti mû na e yingo vulu ti lo (aEphésien 3:14-16). A yeke gi na sarango tongaso si e lingbi ti wara ngangu so e yeke na bezoin ni ti ‘gbu ngangu juska na nda ni’.​—Matthieu 10:22; 24:13.

¹⁰ Tongaso, a yeke kota ye ti tene ngoi na ngoi e hunda tere ti e: ‘Biani, tongana mbi yeke hunda mbeni ye na Nzapa, mbi yeke zia pëpe ti hunda ye ni?’ E girisa pëpe so tongana e hinga na bê ti e kue so e yeke na bezoin ti mungo maboko ti Nzapa, e yeke sambela ti hunda yingo vulu ti lo mingi ahon ti kozo.

Ye wa apusu e ti zia bê kue na Nzapa na yâ sambela?

11. Tongana nyen Jésus atingbi tapande ti mbeni babâ na molenge ti lo ti koli na sambela?

¹¹ Tapande so Jésus amû na ndo koli so awara gene, so azia pëpe ti hunda ye agboto lê na ndo bibe ti mbeni zo so ayeke sambela: wamabe. Use tapande ni agboto lê na ndo bibe ti zo so amä sambela: Jéhovah Nzapa. Jésus atene: “Babâ [wa] na popo ti i, tongana molenge ti lo [ti koli] ahunda susu, fade lo mû na lo ngbo na place ti susu ni? Wala tongana lo hunda para, lo mû na lo kpalakongo?” Jésus afa nda ni lo tene: “Tongaso, tongana i so i yeke sioni, i hinga lege ti mû matabisi ti nzoni na amolenge ti i, fade Babâ ti i na yayu aye mingi ahon pëpe ti mû Yingo Vulu na ala so ahunda Lo?”​—Luc 11:11-13.

12. Na lege wa tapande ti mbeni babâ so adengi mê na ye so molenge ti lo ahunda afa so Jéhovah ayeke nduru ti kiri tënë na asambela ti e?

¹² Jésus amû tapande ti mbeni babâ so ayeda na ye so molenge ti lo ahunda na lo ti fa bibe so Jéhovah ayeke na ni na mbage ti azo so ayeke sambela lo ti mû maboko na ala (Luc 10:22). Kozoni kue, bâ kangbi so ayeke na popo ti atapande use so. Nde na koli ti yâ ti kozo tapande so, so ayeke nduru pëpe ti mû ye na kamarade ti lo, Jéhovah ayeke tongana mbeni babâ so ayeke bi bê na molenge ti lo nga lo yeke nduru ti mû na lo ye so lo hunda (Psaume 50:15). Jésus akiri afa so Jéhovah ayeke nduru ti mû ye na e na lege so lo mû tapande na ndo ti mbeni babâ so ayeke na sese ti gboto lê na ndo ti Babâ ti e ti yayu. Lo tene tongana mbeni babâ so ayeke “sioni” ndali ti so lo yeke wasiokpari amû nzoni matabisi na molenge ti lo, e lingbi mingi ahon ti ku ti tene Babâ ti e ti yayu so ayeke na nzara ti mû ye amû yingo vulu ti lo na awakua ti lo so ayeke na sese!​—Jacques 1:17.

13. Ye wa a lingbi e hinga biani na ngoi so e sambela Jéhovah?

¹³ Ye so aye ti tene nyen na e? A ye ti tene so tongana e hunda Babâ ti e ti yayu ti mû na e yingo vulu ti lo, e hinga biani so a yeke nzere na lo mingi ti mû ni na e (1 Jean 5:14). Tongana e ngbâ lakue ti sambela Jéhovah na peko ti tere ndali ni, lo yeke tene lâ oko pëpe mara ti tënë so na e: “Mo gi mbi pëpe. A kanga yanga ti da awe.” (Luc 11:7). Nde na so, ti fa na e ye so a yeke nzoni e ngbâ ti sara, Jésus atene: “I hunda, na fade a mû na i; i gi, na fade i wara; i golo yanga ti da, na fade a lungula na i.” (Luc 11:9, 10). Biani, Jéhovah ayeke ‘kiri tënë na e tongana e iri Lo.’​—Psaume 20:10; 145:18.

14. (a) Bibe wa so ayeke na lege ni pëpe ambeni zo ayeke gi bê ti ala dä na ngoi so ala tingbi na atara? (b) Ngbanga ti nyen e lingbi ti zia bê ti e kue na Jéhovah na yâ sambela na ngoi so e yeke na yâ ti atara?

¹⁴ Tapande ti Jésus na ndo mbeni babâ so ayeke bi bê na molenge ti lo afa nga so nzobe ti Jéhovah ayeke kota mingi ahon nzobe so mbeni babâ alingbi ti fa na mbage ti molenge ti lo. Ye oko, a lingbi e tene lâ oko pëpe so akpale so e yeke wara afa so Nzapa ake e awe. A yeke kota wato ti e Satan la aye si e bi bê ti e tongaso (Job 4:1, 7, 8; Jean 8:44). Mbeni ye oko na yâ ti Bible amû lege na e pëpe ti fâ ngbanga na ndo e wani tongaso. Jéhovah atara e lâ oko pëpe na “sioye”. (Jacques 1:13). Lo yeke zia na ndo e pëpe mbeni tara so ayeke sara sioni na e tongana ti so ngbo wala kpalakongo ayeke sara sioni na zo. Babâ ti e ti yayu ayeke mû ‘ye ti nzoni na ala so ahunda Lo.’ (Matthieu 7:11; Luc 11:13). Biani, tongana e hinga so Jéhovah ayeke sara ye na nzobe nga lo ye mingi ti mû maboko na e, aye so ayeke pusu e ti zia bê kue na lo na ngoi so e yeke sambela. Tongana e sara tongaso, e lingbi ande ti fa oko bibe ti wasungo psaume so atene: “Biani, Nzapa amä mbi awe, Lo mä tënë ti sambela ti mbi.”​— Psaume 10:17; 66:19.

Lege so yingo vulu ayeke mû maboko na e

15. (a) Zendo wa Jésus amû lani na ndo yingo vulu? (b) Mbeni lege so yingo vulu ayeke mû maboko na e ayeke so wa?

¹⁵ Ngoi kete kozo ti tene Jésus akui, lo kiri na ndo ti atënë ti dengo bê so ayeke na yâ ti atapande so lo mû. Na ngoi so lo yeke sara tënë na ndo yingo vulu, Jésus atene na abazengele ti lo, lo tene: “Fade Mbi hunda Babâ, na fade Lo mû na i mbeni Consolateur si Lo lingbi duti na i lakue lakue.” (Jean 14:16). Tongaso, Jésus amû zendo so fade wamungo maboko wala yingo vulu ayeke duti na adisciple ti lo na yâ ti ngoi so ayeke ga, na a ndu ngoi ti e nga. Mbeni oko ti akpengba lege so yingo vulu ayeke mû maboko na e laso ayeke so wa? Yingo vulu ayeke mû maboko na e ti gbu ngangu na gbele atara nde nde. Na lege wa? Bazengele Paul, so atara asi nga na lo afa na yâ ti lettre so lo tokua na aChrétien ti Corinthe tongana nyen yingo ti Nzapa amû maboko na lo. Zia e bâ na nduru tënë ambeni tënë ti yâ ti lettre so.

16. Tongana nyen e lingbi peut-être ti duti na yâ ti oko mara ti kpale ti Paul?

¹⁶ Kozoni kue, Paul afa lani polele na amba ti lo Chrétien so lo yeke tiri na ‘kî na yâ tere ti lo,’ mbeni kpale so lo yeke na ni. Na pekoni, lo tene: “Mbi hunda Seigneur [Jéhovah] lege ota ti lungula ye so.” (2 aCorinthien 12:7, 8). Atâa so Paul atoto na Nzapa ti zi kpale so, kpale ni angbâ lakue. Peut-être mo yeke na yâ ti mara ti kpale so laso. Legeoko tongana ti Paul, peut-être mo sambela lani Jéhovah na peko ti tere na mo zia bê kue na lo nga mo hunda na lo ti zi tara ni. Ye oko, atâa so mo hunda lo fani mingi ti zi kpale ni, mo ngbâ lakue na yâ ni. Ye so aye ti fa so Jéhovah akiri tënë na sambela ti mo pëpe nga yingo vulu ti lo ayeke mû maboko na mo pëpe? A yeke tongaso oko pëpe! (Psaume 10:1, 17). Zia e bâ ye so bazengele Paul atene na pekoni.

17. Tongana nyen Jéhovah akiri tënë lani na asambela ti Paul?

¹⁷ Ti kiri tënë na asambela ti Paul, Nzapa atene: “Grâce ti Mbi alingbi na mo, teti na ndo so ngangu ayeke pëpe, ngangu ti Mbi alingbi kue.” Paul atene: “Tongaso mbi yeke na ngia mingi ahon ti yä iri ti mbi teti ngangu pëpe ti mbi, si ngangu ti Christ alingbi duti na ndo mbi [tongana tente, NW, ].” (2 aCorinthien 12:9; Psaume 147:5). Tongana Paul asara lani tënë ti ngangu ti Nzapa so aduti na ndo ti lo, lo sara kusala na mbeni tënë so afa so na lege ti Christ, ngangu ti Nzapa abata lo tongana mbeni tente, mbeni ye so ayeke tongana bâche so a bi na li ti oto ti bata na akungba. Laso nga, Jéhovah ayeke kiri tënë na asambela ti e legeoko tongaso. Jéhovah ayeke bata awakua ti lo tongana ti so zo ayeke bi bâche na li ti oto ti bata na akungba.

18. Ngbanga ti nyen e lingbi ti gbu ngangu na gbele atara?

¹⁸ Ti tâ tënë ni, mbeni bâche alingbi pëpe ti kanga lege na ngu-nzapa ti pika wala ti kanga lege na pupu ti ya, me a lingbi kamême ti bata akungba so ayeke na gbe ni. Legeoko nga, “ngangu ti Christ” so ayeke bata e ayeke kanga lege pëpe na akpale wala aye ti ngangu ti si na e. Ye oko, a yeke bata e na lege ti yingo na asioni ye ti sese so nga na bira so Satan, mokonzi ti sese ayeke sara na e (Apocalypse 7:9, 15, 16). Tongaso, atâa mo yeke tiri na mbeni kpale so Nzapa ‘alungula’ ni pëpe, zia mo hinga na bê ti mo kue so Jéhovah ahinga ngangu so mo yeke sara, na lo sara mbeni ye ti fa so lo ‘mä toto ti mo’. (Esaïe 30:19; 2 aCorinthien 1:3, 4). Paul atene: “Nzapa ayeke Be-Ta-Zo, fade Lo zia handa ahon ngangu ti i pëpe; me legeoko na handa so, fade Lo leke lege ti sigigi nga, si i lingbi gbu ngangu.”​—1 aCorinthien 10:13; aPhilippien 4:6, 7.

19. Ye wa mo leke na bê ti mo ti sara? Ngbanga ti nyen?

¹⁹ A yeke tâ tënë so a hinga “lâ ti nda ni” ti sese so ake Nzapa tongana mbeni ngoi so “lâ ti ye ti ngangu aga.” (2 Timothée 3:1). Atâa so kue, awakua ti Nzapa alingbi ti luti na gbele akpale ti ngoi so. Ngbanga ti nyen? Ngbanga ti so yingo vulu ti Nzapa ayeke mû maboko na ala nga ayeke bata ala. Na Jéhovah amû yingo vulu ti lo so na bê ti lo kue nga mingi mingi na azo kue so azia pëpe ti hunda ni na lo nga ala zia bê kue na lo. Tongaso, zia e leke na bê ti e kue ti ngbâ ti sambela Nzapa lâ oko oko ti mû na e yingo vulu ti lo.​—Psaume 34:7; 1 Jean 5:14, 15.

Fade mo kiri tënë tongana nyen?

• A lingbi e sara nyen ti wara yingo vulu ti Nzapa?

• Ngbanga ti nyen e hinga na bê ti e kue so fade Jéhovah ayeke mû yingo vulu ti lo na e tongana e hunda ni na lo?

• Na lege wa yingo vulu ayeke mû maboko na e ti gbu ngangu na gbele atara?

[Foto na lembeti 13]

Ye wa e lingbi ti manda na yâ ti tapande ti Jésus na ndo mbeni koli so azia pëpe ti hunda ye?

[Foto na lembeti 15]

Mo yeke ngbâ lakue ti sambela ti wara yingo vulu ti Nzapa?

[Foto na lembeti 16]

E manda nyen na yâ ti tapande ti Jésus na ndo mbeni koli so ayeke bi bê na molenge ti lo?