“Hinga biani aye so ayeke akota ye mingi ahon atanga ni”

1, 2. Prophétie wa so andu alango ti nda ni alingbi ti sara si adisciple ahunda tere ti ala? Ngbanga ti nyen?

JÉSUS atene lani na adisciple ti lo so a yeke futi temple. Atënë ti lo so asara si Pierrre, Jacques, Jean na André agi bê ti ala mingi (Marc 13:1-4). Kete na pekoni na ngoi so ala yeke gi ala oko na Jésus, ala hunda lo atene: “Tene na e: Lawa si aye so ayeke si ande? Na fade fä ti ngoi so mo yeke si na mo yeke duti dä nga ti ngoi so aye ti ngoi so ayeke gue ti hunzi ayeke nyen?” (Mat. 24:1-3). Na yâ ti kiringo tënë ti Jésus, lo sara tënë ti akota changement so ayeke ga kozoni na futingo ti Jérusalem nga so ayeke fa so e yeke na alango ti nda ni ti sioni dunia ti Satan. Mbeni ye nde ayeke dä so agbu bê ti adisciple ti Jésus mingi. Na pekoni so Jésus asara tënë ti aye ti ngangu so ayeke si, aye tongana bira, kota nzara nga kpengo ndia pëpe so ayeke gue na li ni, lo tene nga so mbeni nzoni ye ayeke si ande so afa so e yeke na alango ti nda ni. Lo tene: “A yeke fa ande nzoni tënë ti royaume so na ndo ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.”​—Mat. 24:7-14.

² Adisciple ti Jésus afa lani tënë legeoko na lo (Luc 8:1; 9:1, 2). Peut-être ala dabe ti ala na tënë so lo tene na ala, lo tene: “Biani, akobe ti yaka ni ayeke mingi, me azo ti kua ni ayeke mingi pëpe. Tongaso, ala hunda mingi na Wa ti kua ni ti tokua azo ti kua ti fâ akobe ti yaka ti lo.” (Luc 10:2). Me ala yeke sara tongana nyen ti fa tënë “na ndo ti sese kue so azo ayeke dä tongana mbeni tënë ti témoin ndali ti amara kue”? A yeke wara ande azo ti kua ni na ndo wa? Na ngoi so Jésus asara tënë so na ala, tongana ala lingbi fade ti bâ aye so ayeke si na yâ ti ngoi so ayeke ga, ka bê ti ala ayeke dö ti bâ tongana nyen atënë so ayeke na Matthieu 24:14 aga tâ tënë.

3. Ngbanga ti nyen atënë ti Jésus so ayeke na Luc 21:34 ayeke kota ye teti e laso? Atënë wa a yeke nzoni e hunda tere ti e na ni?

³ Aye so Jésus asara tënë ni na yâ ti prophétie ti lo ayeke si na ngoi ti e. Azo kutu mingi ayeke fa nzoni tënë ti Royaume na ndo ti sese kue (És. 60:22). Me Jésus afa nga so a yeke duti ngangu na ambeni zo ti ngbâ ti zia kua ti fango tënë na kozo ndo na yâ ti fini ti ala. Ala yeke zia si ambeni ye agboto lê ti ala nga “ane bê” ti ala. (Diko Luc 21:34.) Atënë ti Jésus so ayeke kota ye teti e laso, ngbanga ti so ambeni wakua ti Jéhovah azia pëpe aye so ayeke akota ye na kozo ndo na yâ ti fini ti ala. E yeke bâ ni na ngoi so ala yeke mû adesizion so andu kua ti nginza, mandango mbeti ayo nga warango akungba. Ambeni ayeke mû ngoi mingi ti sara angia ti wanguru wala ambeni ngia nde. Bê ti ambeni anze ndali agingo bê so ala yeke wara lâ oko oko. Hunda tere ti mo: ‘Ka ti mbi ayeke tongana nyen? Adesizion so mbi yeke mû afa so aye so bê ti Nzapa aye la mbi zia na kozo ndo na yâ ti fini ti mbi?’

4. (a) Paul asambela lani ti tene aChrétien ti Philippes asara nyen? Ngbanga ti nyen? (b) Ye wa e yeke sara tënë na ndo ni na yâ ti article so nga na ti peko? Tongana nyen la a-article so ayeke mû maboko na e?

⁴ A lingbi lani akozo Chrétien asara ngangu ti ngbâ ti zia aye ti yingo na kozo ndo na yâ ti fini ti ala. Bazengele Paul abâ so a yeke lani kota ye ti sambela ti tene aChrétien ti Philippes ‘ahinga biani aye so ayeke akota ye mingi ahon atanga ni’. (Diko aPhilippien 1:9-11.) Legeoko tongana Bazengele Paul, mingi ti aChrétien ‘afa so ala yeke na ngangu mingi ahon ti kozo ti tene tënë ti Nzapa na mbeto pëpe.’ (aPhil. 1:12-14). E nga kue laso, mingi ti e ayeke fa tënë ti Nzapa na mbeto pëpe. Ti sara tënë na ndo ti lege so Jéhovah ayeke sara kua na bungbi ti lo laso ti sara si atënë so ayeke na Matthieu 24:14 aga tâ tënë, a yeke mû ngangu na e. Ye so ayeke mû maboko na e ti duti na kota nzara ti fa tënë. Ye wa bungbi ti Jéhovah asara laso? Tongana nyen la ye so alingbi ti mû maboko na e nga na sewa ti e ti duti na kota nzara ti fa tënë? Na yâ ti article ti peko, e yeke sara tënë na ndo ti ye so alingbi ti mû maboko na e ti gbû ngangu na yâ ti kusala ti Jéhovah nga ti mû peko ti fango lege ti bungbi ti lo.

MBAGE TI BUNGBI TI JÉHOVAH SO AYEKE NA YAYU

5, 6. (a) Ngbanga ti nyen Jéhovah afa aye so asi na yayu na awakua ti lo na lege ti asuma? (b) Nyen la Ézéchiel abâ na yâ ti suma?

⁵ Aye mingi ayeke dä so Jéhovah azia ni na yâ ti Bible ape. Na tapande, lo fa pëpe anzene nzene ye na ndo ti lege so mongoli ti zo ayeke sara kua wala lege so aye ayeke tambela na yâ ti dunia. Me Jéhovah afa na e aye so e yeke na bezoin ni ti hinga ye so lo leke ti sara nga ti sara ye alingbi na ni (2 Tim. 3:16, 17). A nzere na e mingi so Jéhovah afa na e ye na ndo ti mbage ti bungbi ti lo so ayeke na yayu. A nzere na e mingi ti wara asango so na yâ ti mbeti ti Ésaïe, ti Ézéchiel, ti Daniel nga na ti Apocalypse (És. 6:1-4; Ézéch. 1:4-14, 22-24; Dan. 7:9-14; Apoc. 4:1-11). Ngbanga ti nyen Jéhovah amû lege na e ti hinga ye na ndo ti ambeni ye so ayeke si na yayu?

⁶ Jéhovah aye si e girisa la oko ape so e yeke mbeni mbage ti bungbi ti lo so ayeke na yâ ti dunia. Mbage ti bungbi ti Jéhovah so ayeke na yayu ayeke sara kua ngangu ti sara ye so bê ti lo aye. Na tapande, na yâ ti suma Ézéchiel abâ mbeni kota char so ayeke fä ti mbage ti bungbi ti Jéhovah so ayeke na yayu. Char ni alingbi ti tambela na loro mingi nga lo lingbi ti changé lege na ngoi kue (Ézéch. 1:15-21). Lo bâ nga zo so akpe na char ni. Ézéchiel atene: “Mbi bâ mbeni ye tongana gengere so aza na yâ wâ, a bâ tongana wâ ayeke na yâ ni na tere ni kue . . . So ayeke ye so a bâ tongana gloire ti L’Éternel.” (Ézéch. 1:25-28). Ye so Ézéchiel abâ na yâ ti suma so apika lani bê ti lo mingi. Lo bâ Jéhovah so ayeke bâ ndo na ndo ti bungbi ti lo nga lo yeke sara kua na yingo ti lo ti fa lege na ni. So char so Ézéchiel abâ na yâ ti suma ayeke tambela, a fa tâ pendere mingi tongana nyen bungbi ti Jéhovah so ayeke na yayu ayeke sara kua.

7. Tongana nyen la suma ti Daniel apusu e ti zia bê ti e kue na Jéhovah nga na Jésus?

⁷ Daniel nga kue abâ mbeni suma so asara si e zia bê ti e kue na Jéhovah nga na Jésus. Lo bâ Jéhovah, “Lo Ti Giriri”, aduti na ndo ti trône so menga-wa ti wâ ayeke na tere ni. Trône ni ayeke na ndo ti aroue (Dan. 7:9). Jéhovah aye lani ti tene Daniel abâ so bungbi ti Jéhovah ayeke tambela, so ti tene, ayeke sara ye so bê ti Jéhovah aye. Daniel abâ nga “Zo oko tongana Molenge Ti Zo”, Jésus, so Jéhovah amû na lo ngangu ti tene lo bâ ndo na ndo ti mbage ti bungbi ti Jéhovah so ayeke na sese. Komandema ti Jésus na ndo ti azo ayeke ninga ande gi teti ambeni ngu pëpe. Komandema ti lo “ayeke ti lakue lakue, fade a hon pëpe, na a lingbi futi royaume ti Lo pëpe.” (Dan. 7:13, 14). Suma so apusu e ti zia bê ti e kue na Jéhovah nga ti yeda na aye so lo yeke sara. Teti so Jéhovah la amû “ngangu ti komande, na gloire, na royaume” na Jésus, molenge ti lo, a fa so lo zia bê ti lo kue na lo. Tongaso e nga kue e lingbi ti zia bê ti e kue na Jésus, Mokonzi ti e.

8. Asuma so Jéhovah afa na Ézéchiel nga na Ésaïe asara nyen na ndo ti ala? A yeke nzoni asuma so asara nyen na ndo ti e?

⁸ A yeke nzoni asuma ti mbage ti bungbi ti Jéhovah so ayeke na yayu asara nyen na ndo ti e? Tongana ti Ézéchiel, bê ti e adö mingi ti bâ ye so Jéhovah ayeke sara (Ézéch. 1:28). Tongana e gbu li na ndo ti bungbi ti Jéhovah, a lingbi ti pusu e ti sara ye tongana ti so a pusu lani Ésaïe ti sara ye. Na ngoi so lege azi na Ésaïe ti fa na azo ye so Jéhovah ayeke sara, lo sara ni sân ti ku. (Diko Ésaïe 6:5, 8.) Ésaïe ahinga na bê ti lo kue so na mungo maboko ti Jéhovah, lo lingbi ti hon ndo ti akpale kue so lo lingbi ti tingbi na ni. Legeoko tongana ti Ésaïe, bê ti e apusu e ti mû maboko na bungbi ti Jéhovah na lege so e yeke gi ti sara aye mingi na yâ ti kua ti Jéhovah. Bê ti e adë ti hinga so e yeke mbage ti mbeni bungbi so ayeke sara lakue gi ye so bê ti Jéhovah aye.

MBAGE TI BUNGBI TI JÉHOVAH SO AYEKE NA SESE

9, 10. Ngbanga ti nyen la a yeke na bezoin ti mbeni mbage ti bungbi ti Jéhovah na sese?

⁹ Jéhovah aleke na lege ti molenge ti lo mbeni bungbi ti lo so ayeke na sese so ayeke sara kua legeoko na ti so ayeke na yayu. Lo sara tongaso ti tene a sara kua so a sara tënë ni kozo awe so ayeke na Matthieu 24:14. Ngbanga ti nyen? Zia e bâ araison ota.

¹⁰ Kozoni, Jésus atene so adisciple ti lo ayeke fa tënë même “juska na ambage ti sese so ayeke tâ yongoro.” (Kus. 1:8). Use ni, a yeke nzoni a leke ambeni ye ti mû kobe ti yingo na ala so ayeke fa nzoni tënë ni nga ti bâ lege ti abezoin ti ala (Jean 21:15-17). Ota ni, a yeke nzoni a leke ambeni ye tongaso si ala bungbi oko ti voro Jéhovah nga a fa na ala lege so a lingbi ala sara na kua ni (aHéb. 10:24, 25). Ti tene adisciple ti Christ asara aye so kue, a lingbi a leke yâ ti kua ni nzoni.

11. Tongana nyen la e yeke fa so e yeda na aye so bungbi ti Jéhovah azia na sese?

¹¹ Tongana nyen la e yeke fa so e yeda na aye so bungbi ti Jéhovah azia na sese? Mbeni nzoni lege ni ayeke ti zia bê ti e kue na aita so ayeke mû li ni na yâ ti kua ti fango tënë. Jéhovah na Jésus azia bê ti ala kue na aita so na a yeke nzoni e nga kue e sara tongaso. Aita so alingbi fade ti mû ngoi ti ala nga na ngangu ti ala ti gi ti leke akpale ti dunia so. Me ala sara tongaso ape. Zia e sara tënë na ndo ti aye so mbage ti bungbi ti Jéhovah so ayeke na sese ayeke gi lakue ti sara.

ZIA LÊ TI MO NA NDO TI “AYE SO AYEKE AKOTA YE MINGI AHON ATANGA NI”

12, 13. A-ancien ayeke sara kua so a mû na ala tongana nyen? Ngbanga ti nyen ye so amû ngangu na mo?

¹² Na ndo ti sese kue a mû ambeni ancien so aninga na yâ ti kua ni ti bâ ndo na ndo ti kua ti fango tënë ti Royaume na ando so ala yeke dä nga ti sara si kua ni ague na li ni. Na ngoi so aita so ayeke mû adesizion, ala yeke gi fango lege na yâ ti Mbeti ti Nzapa, ala sara si aga ‘lampe teti gere ti ala, na lumière teti lege ti ala.’ Nga ala yeke sambela na bê ti ala kue ti tene Jéhovah afa lege na ala.​—Ps. 119:105; Mat. 7:7, 8.

¹³ Legeoko tongana ti so a-ancien ti ngoi ti akozo Chrétien asara, a-ancien so laso ayeke bâ ndo na ndo ti kua ti fango tënë amû tere ti ala kue “na kusala ti fango ye na ndo ti tënë ti Nzapa.” (Kus. 6:4). A nzere na ala mingi ti bâ so kua ti fango tënë ayeke gue na li ni na yâ ti akodoro ti ala nga na ndo ti sese kue (Kus. 21:19, 20). Ala lu pëpe gbâ ti andia. Me ala mû peko ti fango lege ti Mbeti ti Nzapa nga na ti yingo vulu na ngoi so ala yeke leke aye so a hunda ti tene a sara ti mû maboko na kua ti fango tënë ti gue na li ni. (Diko Kusala 15:28.) Na sarango tongaso, aita so amû li ni so azia nzoni tapande na azo kue na yâ ti acongrégation ti ando so ala yeke dä.​—aÉph. 4:11, 12.

14, 15. (a) Aye wa a leke ti mû maboko na kua ti fango tënë na ndo ti sese kue? (b) Mo bâ kua so mo yeke sara ti mû maboko na kua ti fango tënë tongana nyen?

¹⁴ Lâ oko oko aita ti e mingi ayeke sara kua ngangu ti leke ambeti, abungbi nga na akota bungbi. Aita saki mingi so amû tere ti ala wani ayeke sara kua ngangu ti kiri na peko ti ambeti ti e na ayanga ti kodoro ahon 600 ti mû lege na azo mingi ti hinga “apendere ye so Nzapa asara” na yanga ti kodoro ti ala (Kus. 2:7-11). Aita so ade maseka ayeke sara kua na angangu masini ti sigigi na ambeti ti e. Na pekoni, a yeke tokua ambeti so na yâ ti acongrégation même na ando so ayo mingi.

¹⁵ Na yâ ti congrégation, a leke ambeni ye mingi ti mû maboko na e ti zia lê ti e gi na ndo ti kua ti fango nzoni tënë. Na tapande, aita saki mingi so amû tere ti ala wani ayeke mû maboko na yâ ti akua ti lekengo aDa ti Royaume nga na aDa ti assemblée. Ambeni ayeke mû maboko na aita so ayeke na kpale ti seni nga na ala so awara kpale na yâ ti aye tongana angu so asuku amû ndo wala asese so ayengi. Ambeni ayeke leke akota bungbi nga ambeni ayeke fa ye na ngoi ti a-ekole ti mandango Bible. A sara akua so kue ngbanga ti nyen? Ti sara si kua ti fango nzoni tënë ayapu, ti mû lege na azo so ayeke sara kua ni ti gue na li ni na lege ti yingo nga ti mû maboko na azo mingi ti ga ti voro Jéhovah. Mbage ti bungbi ti Jéhovah so ayeke na sese azia biani aye so ayeke akota ye mingi ahon atanga ni na kozo ndo.

MÛ PEKO TI TAPANDE TI BUNGBI TI JÉHOVAH

16. Nyen la mo lingbi ti sara recherche na ndo ni na ngoi ti vorongo Nzapa na yâ ti sewa wala na ngoi ti mandango ye mo wani?

¹⁶ Ngoi na ngoi e yeke mû ngoi ti gbu li na ndo ti aye so bungbi ti Jéhovah asara? Ambeni asoro ti sara recherche na ndo ti aye so bungbi ti Jéhovah asara nga ti gbu li na ndo ni na ngoi ti vorongo Nzapa na yâ ti sewa wala na ngoi ti mandango ye ala wani. Na tapande, a yeke nzere mingi ti manda ye na ndo ti asuma so Ésaïe, Ézéchiel, Daniel wala Jean abâ. Buku Les Témoins de Jéhovah : Prédicateurs du Royaume de Dieu nga na ambeni mbeti wala avidéo ayeke fa nga na e gbâ ti anzoni ye na ndo ti bungbi ti Jéhovah.

17, 18. (a) Tongana nyen la article so amû maboko na mo? (b) Ahundango ndo wa a yeke nzoni e hunda tere ti e na ni?

¹⁷ Ti gbu li na ndo ti lege so Jéhovah ayeke sara kua na bungbi ti lo ti mû maboko na kua ti fango tënë ayeke sara nzoni na e. Legeoko na pendere bungbi so, zia e sara kue ti ngbâ ti zia lê ti e gi na ndo ti aye so ayeke akota ye ahon atanga ni. Tongana e sara tongaso, e yeke duti na oko bibe ti Paul so atene: “So e wara kusala so ndali ti so Nzapa asara nzoni bê na e, e yeke kiri na peko pëpe.” (2 aCor. 4:1). Lo wa nga aita ti lo, lo tene: “Zia e dö lege ti sarango ye ti nzoni e zia pëpe, ngbanga ti so tongana ngoi ni alingbi, fade e yeke ko lengo ni tongana e woko pëpe.”​—aGal. 6:9.

¹⁸ Ambeni ye ayeke dä so e wala sewa ti e ayeke na bezoin ti leke ti mû lege na e ti zia aye so ayeke akota ye mingi ahon atanga ni na kozo ndo na yâ ti fini ti e ti lâ oko oko? E lingbi ti gi ti duti na aye mingi pëpe na yâ ti fini ti e wala ti kiri na ngoi so e zia ndali angia na gbe ni tongaso si e bi bê ti e mingi na ndo ti kota kua so ayeke kua ti fango tënë? Na yâ ti article ti peko, e yeke sara tënë na ndo ti aye oku so ayeke mû maboko na e ti ngbâ ti tambela legeoko na bungbi ti Jéhovah.