Zia e woko pëpe ti sara ye ti nzoni

1, 2. Asuma so asara tënë ti bungbi ti Jéhovah so ayeke na yâ ti dunia apusu e ti sara nyen?

TI BÂ so e yeke mbage ti kota bungbi ti Jéhovah so ayeke na yâ ti dunia apika bê ti e mingi. Asuma so a sara tënë ni na Ézéchiel chapitre oko nga na Daniel chapitre 7 afa na mbeni lege so ayeke pendere mingi tongana nyen la Jéhovah ayeke sara aye ti tene ye so lo leke na bê ti lo ti sara aga tâ tënë. Jésus ayeke fa lege na mbage ti bungbi ti Jéhovah so ayeke na sese. Lo yeke fa lege na ni ti fa tënë, ti fa ye na azo so ayeke sara kua ni na ti kpengba ala, nga ti mû maboko na azo mingi ti ga ti voro Jéhovah. Ye so apusu e ti zia bê ti e kue na bungbi ti Jéhovah.​—Mat. 24:45.

² E wani e yeke tambela legeoko na pendere bungbi so na lege so e yeke sara aye mingi na yâ ti kua ti Nzapa? Wala e bâ so e yapu tongana ti kozo ape? Tongana e gbu li na ndo ti ahundango ndo so, peut-être e yeke bâ so e komanse ti woko wala peut-être e yapu tongana ti kozo ape. Ye so alingbi ti si. Na ngoi ti akozo Chrétien, bazengele Paul awa amba ti lo aChrétien ti gbu li na ndo ti tapande ti Jésus so ayapu na yâ ti kusala ti Nzapa. Lo tene so sarango tongaso ayeke sara si ala “woko pëpe nga ngangu ahunzi na âme ti ala kue kue kue pëpe.” (aHéb. 12:3). Na yâ ti article so ahon, e sara tënë na ndo ti kpengba kua so bungbi ti Jéhovah ayeke sara laso. Tapande ti Christ amû lani ngangu na akozo Chrétien. Legeoko nga, tapande ti bungbi ti Jéhovah alingbi ti mû maboko na e laso ti ngbâ ti sara kua ti Nzapa na nzara ni nga ti gbu ngangu.

3. Nyen la a lingbi e sara si e woko pëpe? Aye wa la e yeke bâ na yâ ti article so?

³ Me, Paul afa so aye mingi ayeke dä so a lingbi e sara tongana e ye ti woko pëpe. Lo tene so a lingbi e “dö lege ti sarango ye ti nzoni e zia pëpe”. (aGal. 6:9). Ye so ahunda ti tene e sara ambeni ye. Zia e bâ aye oku so alingbi ti mû maboko na e ti ngbâ ti yapu na yâ ti kusala ti Nzapa nga ti ngbâ ti tambela legeoko na bungbi ti Jéhovah. Na pekoni e wani e lingbi ti bâ ye wa la a lingbi e wala sewa ti e abi lê mingi dä.

E GUE NA BUNGBI TI WA TERE NGA TI VORO JÉHOVAH

4. Ngbanga ti nyen e tene so bungbi ayeke lakue mbeni kota ye na yâ ti tâ vorongo?

⁴ Abungbi ayeke lakue mbeni kpengba ye na lê ti awakua ti Jéhovah. Na yayu, Jéhovah na a-ange ayeke sara bungbi (1 aGbia 22:19; Job 1:6; 2:1; Dan. 7:10). Na ngoi ti giriri, azo ti Israël ayeke bungbi oko ‘si ala mä tënë na ala manda’ ye (Deut. 31:10-12). A-Juif ti ngoi ti akozo Chrétien ayeke gue ka lakue na yâ ti asynagogue ti diko Mbeti ti Nzapa (Luc 4:16; Kus. 15:21). Na ngoi so congrégation ti aChrétien abâ gigi, bungbi angbâ lani kota ye. Na ngoi ti e laso nga kue bungbi angbâ lakue kota ye na yâ ti aye so e yeke sara ti voro na Jéhovah. Atâ Chrétien ayeke “bi lê na ndo ti mba ti pusu mba ti duti na ndoye na ti sara apendere kusala”. A lingbi e ngbâ ti “wa tere na popo ti e nga e ngbâ ti sara ni mingi ahon ti kozo, so [e] bâ lango [ti Jéhovah] ayeke pusu nduru.”​—aHéb. 10:24, 25.

5. Na lege wa e yeke wa tere na popo ti e na ngoi ti abungbi?

⁵ Mbeni kpengba ye so e lingbi ti sara ti wa tere na popo ti e ayeke ti mû acommentaire na ngoi ti abungbi. E lingbi ti fa tënë ti mabe ti e na gbele azo na kiringo tënë droit na ahundango ndo so andu mbeni paragraphe, na fango tongana nyen ti sara ye alingbi na mbeni versê, wala na fango na nduru tënë aye so asi so afa so a yeke na lege ti ndara ti sara ye alingbi na afango ye ti Bible, wala tongana nyen ti sara kusala na afango ye ti Bible so na mbeni lege nde (Ps. 22:23; 40:10). Atâa e sara ngu oke na yâ ti bungbi, kite ayeke pëpe so e yeke yeda so acommentaire kue so e mä na ngoi ti abungbi, ti akota zo nga na ti amolenge, amû ngangu na e mingi.

6. Na alege wa abungbi ayeke mû maboko na e?

⁶ Abungbi nga na akota bungbi ayeke mû maboko na e na alege mingi. Na tapande, a yeke mû maboko na e ti wara ngangu ti sara tënë na mbeto pëpe nga ti ngbâ ti fa tënë même tongana a kanga lege na e wala azo asara nzara ti tënë ti e pëpe (Kus. 4:23, 31). Adiskur nga na ambeni mbage ti bungbi so asara tënë na ndo ti Bible ayeke kpengba mabe ti e (Kus. 15:32; aRom. 1:11, 12). Afango ye so e yeke wara na ngoi ti abungbi nga na alisoro so e yeke sara ti wa tere na popo ti e ayeke mû maboko na e ti wara tâ ngia nga ti wara “lege ti wu tere na lâ ti vundu”. (Ps. 94:12, 13). Komite ti Bebungbi so abâ tënë ti fango ye ayeke leke akapa ti fango ye so awakua ti Jéhovah ayeke wara na ngoi ti abungbi. E kiri singila mingi ndali ti nzoni fango ye so e yeke wara na ngoi ti abungbi ti e yenga na yenga.

7, 8. (a) Kota raison so e yeke gue na abungbi ndali ni, a yeke so wa? (b) Na lege wa abungbi ayeke mû maboko na mo na lege ti yingo?

⁷ Ye oko, mbeni ye ayeke dä so ayeke kota mingi ahon aye ti nzoni so e wani e yeke wara na ngoi ti abungbi. Kota raison so e yeke gue na abungbi ndali ni, a yeke ti voro Jéhovah. (Diko Psaume 95:6.a) So kota pasa si e yeke na ni ti sepela Nzapa! (aCol. 3:16). Jéhovah alingbi biani ti tene e voro lo na guengo lakue na abungbi nga na mungo mbage na abungbi ni (Apoc. 4:11). A yeke ndali ni la a wa e ti “kpe bungbi ti e pëpe, tongana ti so ambeni zo ayeke sara ka”.​—aHéb. 10:25.

⁸ E yeke bâ abungbi tongana mbeni ye so ayeke mû maboko na e ti gbu ngangu juska ti si na ngoi so Jéhovah ayeke futi sioni dunia so? Tongana e bâ ni tongaso, atâa e yeke na aye mingi ti sara, e yeke zia abungbi na popo ti “aye so ayeke akota ye mingi ahon atanga ni”. (aPhil. 1:10). E yeke manke bungbi gi tongana mbeni ngangu ye la akanga lege na e.

FA TËNË NA NZARA NI

9. E hinga tongana nyen so kua ti fango tënë ayeke kota ye mingi?

⁹ Ti fa tënë na nzara ni ayeke mû nga maboko na e ti ngbâ ti tambela legeoko na bungbi ti Jéhovah. Jésus akomanse ti sara kua so na ngoi so lo yeke lani na sese (Mat. 28:19, 20). Ngbene ye na ngoi ni so, kusala ti fango tënë nga na sarango si azo aga adisciple ayeke mbeni oko ti akota kua so ahon atanga ni kue so bungbi ti Jéhovah ayeke sara. Aye mingi so asi na ngoi ti e afa so a-ange ayeke mû maboko na kua so nga ala yeke mû maboko na e ti wara azo so ayeke “nduru ti yeda na tënë ni ti wara fini ti lakue lakue”. (Kus. 13:48; Apoc. 14:6, 7). Kota ye so mbage ti bungbi ti Jéhovah so ayeke na sese aleke ti sara ayeke ti leke aye ti mû maboko na kusala ti fango tënë. Fango tënë ayeke nga oko ti aye so ayeke akota ye na yâ ti fini ti mo?

10. (a) Nyen la mbeni ita-koli asara so amû maboko na lo ti ngbâ ti ye tâ tënë ngangu? (b) Na lege wa fango tënë amû maboko na mo ti ye tâ tënë ngangu?

¹⁰ Tongana e yapu na fango tënë, a yeke mû maboko na e ti ngbâ ti ye tâ tënë ngangu. Bâ atënë so Mitchel, mbeni ancien so aninga na yâ ti kua ni nga so ayeke pionnier permanent, atene: “Mbi ye mingi ti fa tâ tënë na azo. Mbi yeke pensé na ndo ti mbeni fini article ti yâ ti Tour ti Ba Ndo wala Réveillez-vous! Tongana mbi bâ atënë ti ndara so ayeke na yâ ni, lege so azo ni agi na nda ti aye nzoni nga nzoni lege so a sara na a-article oko oko kue, aye so kue apika bê ti mbi mingi. Mbi ye ti gue na fango tënë ti bâ tongana nyen la azo ayeke sara ye nga tongana nyen la mbi lingbi ti zia nzara ni na yâ ti ala.” Mitchel atene nga so fango tënë amû nga maboko na lo ti ngbâ ti zia aye so ayeke akota ye ahon atanga ni na kozo ndo na yâ ti fini ti lo nga lo yeke sara kue si mbeni ye amû ngoi ti lo ti fango tënë pëpe. E nga kue tongana e ngbâ ti sara aye mingi na yâ ti kua ti Nzapa, a yeke mû maboko na e ti ngbâ ti gbu ngangu na alango ti nda ni so.​—Diko 1 aCorinthien 15:58.

BÂ NZONI NA LEGE TI AMBETI TI E

11. Ngbanga ti nyen a yeke nzoni e diko ambeti ti e na e gbu li na ndo ti aye so e diko?

¹¹ Mbeni lege so Jéhovah ayeke kpengba e ayeke na lege ti gbâ ti ambeti so e yeke wara. Kite ayeke pëpe so mo yeke dabe ti mo na mbeni ngoi so mo diko mbeni mbeti ti e na mo tene: ‘So ayeke tâ ye so mbi yeke na bezoin ni la! A yeke mo bâ mo tene Jéhovah asara si a sû ni tâ gi ndali ti mbi!’ Mo yeke na raison ti tene tongaso. Jéhovah ayeke fa ye na e nga lo yeke fa lege na e na lege ti ambeti so. Lo tene: “Fade Mbi wa mo, na Mbi fa na mo lege so a lingbi mo tambela dä.” (Ps. 32:8). E yeke sara ngangu ti diko ambeti kue so e wara nga e yeke gbu li na ndo ti aye so e diko? Tongana e sara tongaso, a yeke mû maboko na e ti ngbâ ti lë lengo nga e yeke woko pëpe na lege ti yingo na alango ti nda ni so ayeke ngangu mingi.​—Diko Psaume 1:1-3; 35:28; 119:97.

12. Nyen la alingbi ti mû maboko na e ti bâ ambeti ti e na nene ni mingi?

¹² E yeke bâ ambeti ti e na nene ni mingi tongana e gbu li na ndo ti akua kue so a sara ti sara ni. A hunda ti tene a gi nda ti aye, a sû atënë ni, a bâ kode so a sû na atënë ni, a zia afoto dä nga a kiri na peko ti ambeti kue so a pete ni na yanga ti ambeni kodoro wala a zia na ndo ti site ti e. Komite ti Bebungbi so ayeke bâ ndo na ndo ti sungo ambeti la ayeke bâ lege ti kua so. Afiliale so ayeke pete ambeti ni ayeke tokua ni na yâ ti acongrégation so ayeke nduru nga na ati so lege ni ayo. A yeke sara akua so kue ngbanga ti nyen? Ti tene awakua ti Jéhovah ate kobe nzoni na lege ti yingo (És. 65:13). Zia e sara ngangu ti te akobe ti yingo kue so e yeke wara na lege ti bungbi ti Jéhovah.​—Ps. 119:27.

MÛ MABOKO NA BUNGBI TI JÉHOVAH

13, 14. Azo wa la ayeke mû maboko na bungbi ti Jéhovah na yayu? Na lege wa e lingbi ti sara nga tongaso na sese?

¹³ Na yâ ti mbeni suma, Jean abâ Jésus na ndo ti vuru mbarata na lo yeke gue ti sö benda na yâ ti bira so lo yeke sara na azo so ake yanga ti Jéhovah (Apoc. 19:11-15). Lo bâ nga aChrétien so a soro ala so a zingo ala na kuâ na yayu nga na a-ange be-ta-zo so ayeke na ndo ti ambarata na peko ti Jésus. Ye so afa so ala yeke mû maboko na Jésus tongana Mokonzi ti ala (Apoc. 2:26, 27). Nzoni tapande ti ala afa so a yeke nzoni e mû maboko na aye so bungbi ti Jéhovah azia na sese.

¹⁴ Legeoko nga, azo mingi mingi ayeke mû maboko mingi na kua ti aita ti Christ so a soro ala ti gue na yayu na so angbâ na sese ge nga so ayeke mû li ni na yâ ti bungbi laso. (Diko Zacharie 8:23.) Nyen la e oko oko e lingbi ti sara ti fa so e yeda na aye so Jéhovah azia na sese? Mbeni ye ni ayeke ti woko tere ti e na gbe ti azo so ayeke mû li ni (aHéb. 13:7, 17). Ye so ayeke to nda ni na yâ ti congrégation ti e wani. Atënë so e yeke tene na ndo ti a-ancien ti congrégation ti e apusu amba ti e ti ne ala nga na kua so ala yeke sara? E yeke wa amolenge ti e ti ne aita be-ta-zo so nga ti gue na mbage ti ala ti gi awango so alondo na yâ ti Bible? Nga, e yeke sara lisoro na yâ ti sewa na ndo ti lege so e lingbi ti sara kusala na nginza ti e ti mû na offrande ti mû maboko na kua ti fango tënë so ayeke sara na ndo ti sese kue? (aProv. 3:9; 1 aCor. 16:2; 2 aCor. 8:12). Nga, e yeke mû maboko ti sara si Da ti Royaume ti e aduti na saleté pëpe nga angbâ nzoni? Tongana Jéhovah abâ so e yeke mû maboko na bungbi na yâ ti aye so, lo yeke mû yingo vulu ti lo na e. Yingo ti lo ayeke mû nga na e ngangu so e yeke na bezoin ni ti woko pëpe na alango ti nda ni so.​—És. 40:29-31.

SARA YE ALINGBI NA TËNË SO E YEKE FA

15. Ngbanga ti nyen a lingbi e ngbâ ti sara ngangu ti sara ye so ayeke na lege ni?

¹⁵ Ti hunzi na ni, tongana e ye ti gbu ngangu nga ti ngbâ ti tambela legeoko na bungbi ti Jéhovah, a lingbi e wani e sara ye alingbi na tënë so e yeke fa. E yeke sara ni na lege so e yeke “bâ yâ ti aye nzoni ti hinga ye so anzere biani na lê ti Seigneur.” (aÉph. 5:10, 11). Satan, sioni dunia so nga na siokpari so ayeke na tere ti e, a sara si a yeke kete ye pëpe na e ti sara ye so ayeke na lege ni. Lâ oko oko ambeni ita ti mo ayeke tirika ngangu ti bata nzoni songo na Jéhovah. Jéhovah aye mo mingi ndali ti angangu so mo yeke sara. Woko pëpe! Ti sara ye alingbi na ye so bê ti Jéhovah aye, a yeke sara si e duti na kota ngia nga a yeke sara si vorongo so e yeke voro na Nzapa aduti senge senge pëpe.​—1 aCor. 9:24-27.

16, 17. (a) Nyen la a lingbi e sara tongana e sara kota siokpari? (b) Nyen la e lingbi ti manda na lege ti tapande ti Anne?

¹⁶ Me, nyen la a lingbi e sara tongana e sara mbeni kota siokpari? Gi mungo maboko hio. Ti honde ndo ni ayeke sara si kpale ni akiri aga ngangu. Dabe ti mo so, David atene tongana lo honde ndo ti asiokpari ti lo, ‘bio ti lo awoko na lege ti bimango ti lo lakue.’ (Ps. 32:3). Biani, tongana e honde ndo ti asiokpari ti e, a yeke sara si e duti na ngia pëpe nga e yeke woko na lege ti yingo, me “zo so afa tënë ti kengo-ndia ti lo na gigi na lo zia lege ni, fade lo wara be-nzoni.”​—aProv. 28:13.

¹⁷ Zia e gbu li na ndo ti tapande ti Anne.b Na ngoi so Anne aga lani nduru ti wara ngu 20, lo yeke pionnier permanent. Me lo komanse ti sara aye ti sioni. Ye so asara ngangu na ndo ti lo mingi. Lo tene: “Ye so asara lani si yingo-ti-hinga ti mbi agi mbi mingi. Mbi yeke lani na ngia ape nga mbi yeke gi na kota vundu lakue.” Nyen la Anne asara? Lo tene so mbeni lâ na bungbi, a sara tënë na ndo ti versê ti Jacques 5:14, 15. Anne abâ so lo yeke na bezoin ti mungo maboko na lo gue lo bâ a-ancien ti mû maboko na lo. Lo tene: “Aversê so ayeke yorö so Jéhovah amû ti kaï kobela ti mbi na lege ti yingo. Nyongo yorö ni ayeke kete ye ape, me a kaï kobela ti mbi. Mbi sara ye alingbi na wango so ayeke na yâ ti aversê so, na a sara nzoni na mbi.” Ti fadeso, Anne akiri asara kua na Jéhovah na nzara ni nga na nzoni yingo-ti-hinga.

18. Aye wa la a yeke nzoni e sara ngangu ti sara?

¹⁸ So kota pasa si e yeke na ni ti duti mbage ti bungbi ti Jéhovah na alango ti nda ni so! Zia e na azo ti sewa ti e e sara kue ti gue na abungbi lakue, ti fa tënë na nzara ni na yâ ti territoire ti e nga ti bâ nzoni na lege ti ambeti ti e kue. Zia e mû maboko na azo so ayeke mû li ni nga e sara ye alingbi na tënë so e yeke fa. Tongana e sara aye so, e yeke tambela legeoko na bungbi ti Jéhovah nga e yeke woko pëpe ti sara ye ti nzoni.