Ye so asi na mbeni sioni zo afa na e nyen?

Sioni zo ni so ayeke zo so mo bâ Jésus ayeke sara tënë na lo na lê ti foto so. Vundu asara lo ndali ti asioni ye so lo sara. Lo tene na Jésus: “Dabe ti mo na mbi tongana mo ga na yâ ti royaume ti mo.” Ni la, tongana ti so mo yeke bâ na lê ti foto ni, Jésus ayeke sara tënë na sioni zo ni so. Tënë wa la Jésus ayeke tene na lo so?—a Jésus atene na lo: “Ti tâ tënë ni, mbi tene na mo laso: Mo yeke duti ande na mbi na Paradis.”

Ti mo, Paradis ni so ayeke duti ande tongana nyen?—Ti hinga wala kiringo tënë ni ayeke na lege ni, zia e sara tënë na ndo ti Paradis so Nzapa azia lani kozo koli na kozo wali, Adam na Ève, dä. Paradis ni ayeke lani na ndo wa? Na yayu wala na sese?—

Ni la, a yeke na sese. Tongaso, tongana e tene sioni zo ni ayeke “na Paradis”, a ye ti tene so lo yeke duti ande ge na sese na ngoi so sese ni ayeke ga Paradis. Paradis ni ayeke duti ande tongana nyen?— Zia e bâ ni.

Lani tongana Jéhovah asara Adam na Ève, Bible atene so lo zia ala na yâ ti mbeni “yaka na yâ [ti] Éden” na ndo ti sese ge. Mo pensé yaka ti Éden ni lani ayeke tongana nyen?— Biani, a yeke lani pendere ndo mingi, mbeni ndo so zo oko ade ti bâ mara ni laso ape.

Na mo, Jésus ayeke ga ande ge na sese ti duti ndo oko na sioni zo so?— Oko ape. Jésus ayeke duti Gbia na yayu kâ na lo yeke komande na ndo ti Paradis ni so ayeke na sese ge. Jésus ayeke duti na koli ni so na lege so lo yeke zingo ande koli ni nga lo yeke bâ lege ti lo na yâ ti Paradis ni. Me ngbanga ti nyen la Jésus ayeda ti tene sioni zo ni so aduti na yâ ti Paradis?— Zia e bâ raison ni.

A yeke tâ tënë so koli ni so asara lani aye ti sioni mingi. Me tongana e bâ nzoni, gbâ ti azo nga asara tongana lo. Me, mingi ti azo ni so, ala sara aye ti sioni ni ngbanga ti so a fa ye na ala na ndo ti Jéhovah lâ oko ape nga a fa na ala ape aye so Jéhovah aye na mbage ti ala.

Mara ti azo tongaso, même koli so Jésus asara lani tënë na lo na ndo ti keke so, a yeke zingo ande ala ti duti na yâ ti Paradis ni na sese ge. A yeke fa nga ande na ala aye so Nzapa aye, tongaso si ala fa wala ala ye Jéhovah.

A lingbi ala sara nyen ti fa so ala ye Jéhovah?— Ye ni ayeke ti tene ala sara ye so Jéhovah aye na mbage ti ala. Biani dutingo ande na yâ ti Paradis nga ndo oko na azo so aye Jéhovah nga so aye amba ti ala ayeke duti tâ pendere ye mingi!