Bâ na nene ni asarango ye ti Jéhovah

1. (a) Asarango ye ti Jéhovah wa mbeni Chrétien alingbi ti gbu li dä? (b) Aye ti nzoni wa e yeke wara tongana e manda ye na ndo ti asarango ye ti Nzapa?

TONGANA mo pensé na ndo ti sarango ye ti tere ti Jéhovah, aye wa ayeke ga na li ti mo? Mingi ti e ayeke pensé na ndoye, mbilimbili, ndara nga na ngangu. Ye oko, e hinga so Jéhovah ayeke na apendere sarango ye mingi. Wungo ti apendere sarango ye ti Jéhovah ahon 40 tongaso, nga na yâ ti ambeti ti e, a sara tënë na ndo ni oko oko kue. Tara ti bâ gbâ ti anzoni ye so mo yeke hinga tongana mo mû ngoi ti manda ye, mo oko wala na sewa, na ndo ti sarango ye ti tere ti Jéhovah! Aye ti nzoni wa e yeke wara tongana e manda ye na ndo ni? A yeke sara si e hinga Babâ ti e ti yayu nzoni mingi. Nga, tongana e hinga Jéhovah nzoni mingi, e yeke ye mingi ti lë songo na lo nga ti sara ye tongana lo.​—Jos. 23:8; Ps. 73:28.

2. (a) Mû mbeni tapande ti fa tongana nyen e lingbi ti bâ asarango ye ti Jéhovah na nene ni mingi. (b) Aye wa e yeke sara tënë na ndo ni?

² Ti “bâ na nene ni” mbeni ye aye ti tene nyen? A ye ti tene ti hinga so mbeni ye ayeke kota ye. A yeke gi yeke na yeke la e lingbi ti hinga so mbeni ye ayeke kota ye. Bâ tapande so: Na ngoi so a tö mbeni fini kobe, kozoni e yeke mä fion ni, na pekoni e yeke te ni yeke yeke ti hinga tâ nzerengo ni nga na nda ni e yeke tö kobe ni so e wani. A yeke nga legeoko tongaso na ngoi so e ye ti hinga ye nzoni mingi na ndo ti mbeni sarango ye ti Nzapa; kozoni e yeke gi ti hinga ye na ndo ni, na pekoni e yeke gbu li dä nga na nda ni e yeke sara ye alingbi na ni na yâ ti fini ti e (aÉph. 5:1). Nda ti article so nga na a-use so aga na peko ayeke ti sara si e hinga nzoni mingi asarango ye ti Nzapa so peut-être e yeke pensé na ni mingi ape. Na ngoi so e yeke manda ye na ndo ti sarango ye oko oko, e yeke bâ tongana nyen la Jéhovah afa so lo yeke na mara ti sarango ye ni so nga tongana nyen e lingbi ti sara ye tongana lo.

ZO ALINGBI TI GA NDURU NA JÉHOVAH

3, 4. (a) Zo so a yeke ngangu pëpe na azo ti ga nduru na lo ayeke sara ka ye tongana nyen? (b) Na lege wa Jéhovah afa so zo alingbi ti ga nduru na lo?

³ Zia e bâ kozoni sarango ye ti zo so a yeke ngangu pëpe na azo ti ga nduru na lo. Ti mo, zo so a yeke ngangu pëpe na azo ti ga nduru na lo ayeke sara ka ye tongana nyen? Peut-être mo yeke tene: ‘Lo yeke sara ye na nzoni bê nga lo yeke zo so mbeto ti tene azo asara tënë na lo asara ala pëpe.’ Mingi ni gi na mango mbeni zo, bango ageste ti lo nga na lê ti lo, mo lingbi ti hinga wala lo yeke zo so azo alingbi ti ga nduru na lo wala pëpe.

⁴ Na lege wa Jéhovah afa so zo alingbi ti ga nduru na lo? Atâa so Jéhovah la asara aye kue na yâ ti dunia na lo yeke na ngangu mingi, lo fa na e so lo ye mingi ti mä asambela ti e nga ti kiri tënë na ni. (Diko Psaume 145:18; És. 30:18, 19.) E lingbi ti sara tënë na lo tongana ti so bê ti e aye na ngoi kue nga na ndo kue. E lingbi ti ga nduru na lo na ngoi kue so bê ti e aye, e hinga so lo yeke suku na e ndali ni pëpe (Ps. 65:3; Jacq. 1:5). Bible asara kusala na ambeni tënë so e azo e lingbi ti gbu nda ni ti fa so lo ye ti tene e ga nduru na lo. Na tapande, David atene so “lê ti [Jéhovah] ayeke na ndo” ti e nga so ‘maboko ti Lo ti koti abata e’. (Ps. 34:16; 63:9). Prophète Ésaïe ahaka Jéhovah na mbeni berger, lo tene: “Lo kamata amolenge ti ngasangbaga na tïtî Lo, Lo yô ala na libe ti Lo.” (És. 40:11). Tara ti bâ kete! Jéhovah aye si e duti nduru na lo tongana ti so mbeni berger ayeke yô kete taba ti lo na ndo ti kate ti lo. Jéhovah ayeke tâ mbeni Babâ so aye si e ga nduru na lo! Tongana nyen la e lingbi ti sara ye tongana Jéhovah na dutingo zo so aye ti tene azo aga nduru na lo?

MBENI SARANGO YE SO AZO ABÂ NI NA NENE NI MINGI

5. Ngbanga ti nyen a yeke kota ye ti tene a-ancien aduti azo so a yeke ngangu pëpe na azo ti ga nduru na ala?

⁵ Ade ti ninga pëpe, a hunda tënë so na aTémoin so ayapu na yâ ti kua ti Nzapa na so ayeke na akodoro nde nde, a tene: “Sarango ye wa mo ye mingi na mbage ti mbeni ancien?” Mingi ti ala atene: “E ye si lo duti zo so a yeke ngangu pëpe na azo ti ga nduru na lo.” Biani, a lingbi aChrétien oko oko kue agi ti duti na sarango ye so, me a yeke mbilimbili kota ye ti tene a-ancien aduti azo so a yeke ngangu pëpe na azo ti ga nduru na ala (És. 32:1, 2). Mbeni ita-wali afa ndani so lo bâ so sarango ye so ayeke kota mingi, lo tene: “E yeke bâ nzoni na lege ti tanga ti apendere sarango ye kue so mbeni ancien ayeke na ni gi tongana lo yeke mbeni zo so a yeke ngangu pëpe na azo ti ga nduru na lo.” Mo bâ tongana nyen tënë ti ita-wali so ayeke tâ tënë? Nyen la mbeni zo alingbi ti sara ti tene azo aga nduru na lo?

6. Mbeni kpengba ye wa asara si azo ayeke ga nduru na mbeni zo?

⁶ Mbeni kpengba ye so asara si azo ayeke ga nduru na mbeni zo ayeke tongana zo ni abi bê ti lo biani na azo. Tongana mbeni ancien ayeke bi bê ti lo na azo na lo yeke nduru ti mû maboko na ala, aita, même akete molenge, ayeke hinga ni (Marc 10:13-16). Carlos so ayeke na ngu 12 atene: “Na yâ ti Da ti Royaume mbi yeke bâ a-ancien so ayeke he ngia nga ayeke sara ye na nzoni bê, asarango ye ti ala so anzere na mbi mingi.” A lingbi mbeni ancien atene gi pëpe na yanga so lo ye ti tene azo aga nduru na lo; a yeke nzoni lo fa ni na yâ ti sarango ye ti lo (1 Jean 3:18). Lo yeke fa ni tongana nyen?

7. Ngbanga ti nyen yungo badge ti kota bungbi ayeke pusu ka azo ti sara lisoro? Ye so afa nyen na e?

⁷ Gbu li na ndo ti ye so. Na yâ ti angu so ahon ade ti ninga pëpe, mbeni ita-koli ayü badge ti lo na ngoi so lo mû avion ti kiri na kodoro ti lo na pekoni so lo gue na mbeni kota bungbi ti district na kodoro wande. Tongana mbeni zo so ayeke sara kua na yâ ti avion abâ badge so a sû mbeti na lê ni atene ‘Zia Royaume ti Nzapa aga!’ lo tene na ita-koli ni lo tene: “Biani, zia a ga; mbi ye ti tene e sara lisoro dä mingi.” Na pekoni ala sara lisoro, na zo ti kua ni ayeke na ngia ti mû apériodique. Mara ti ye so asi na mingi ti e awe. Ngbanga ti nyen badge ti kota bungbi ayeke pusu ka azo ti sara lisoro? Ngbanga ti so a yeke tene na azo na mbeni fason atene: “Sara mbeto ti ga nduru na mbi ape. Hunda mbi na ndo ti ndo so mbi yeke gue dä.” Badge ayeke mbeni ye so amû lege polele na azo ti hinga so e yeke nduru ti sara lisoro na azo na ndo ti atënë ti mabe ti e. Legeoko nga, a lingbi a-ancien asara ambeni ye so afa polele na aita ti ala aChrétien atene: “Ala sara mbeto ti ga nduru na mbi pëpe.” Ambeni ye ni ayeke so wa?

8. Na lege wa a-ancien ayeke fa so ala bi bê ti ala biani na azo? Ye so ayeke sara nyen na ndo ti congrégation?

⁸ Angobo ti ando so azo ayeke dä ayeke nde nde, me mingi ni tongana e he ngia kete na aita ti e, e bara ala na maboko nga na ngia, e yeke fa na ala so e bi bê ti e biani na ala. A lingbi zo wa la amû li ni ti sara ni? Bâ tapande so Jésus azia. Bible afa so na ngoi ti mbeni bungbi so Jésus asara na adisciple ti lo, “Jésus aga nduru na ala, lo sara tënë na ala”. (Mat. 28:18). Legeoko nga, a-ancien ti laso ayeke mû li ni ti ga nduru na aita ti sara lisoro na ala. Ye so ayeke sara nyen na ndo ti congrégation? Mbeni ita-wali pionnier so ayeke na ngu 88 atene: “Hengo ngia ti a-ancien nga na atënë so ala tene ti kpengba mbi na ngoi so mbi lï na yâ ti Da ti Royaume asara si mbi ye ala mingi.” Mbeni ita-wali be-ta-zo atene: “Na ngoi so a-ancien ayamba mbi na ngia na yanga na ngoi ti bungbi, zo alingbi ti bâ ni tongana kete ye, me a sara ye mingi na ndo ti mbi.”

DUTI NDURU TI YAMBA AZO

9, 10. (a) Nzoni tapande wa Jéhovah azia? (b) Na lege wa a-ancien ayeke fa so ala yeke nduru ti yamba azo?

⁹ Biani, azo alingbi ti ga nduru na e tongana e yeke nduru ti yamba ala. Jéhovah azia nzoni tapande na ndo ti tënë so. Bible atene: “Lo yeke yongoro na e oko oko kue pëpe.” (Kus. 17:27). Mbeni lege so a-ancien ayeke fa so ala yeke nduru ti yamba azo ayeke so ala yeke mû ngoi kozo na abungbi nga na pekoni ti sara lisoro na aita, amaseka nga na akangba. Mbeni ita-koli pionnier atene: “Tongana mbeni ancien ahunda mbi atene ‘tongana nyen?’ na lo dengi mê lo mä kiringo tënë ti mbi, a nzere na mbi mingi.” Mbeni ita-wali so asara na Jéhovah nduru na ngu 50 atene: “So a-ancien amû ngoi ti sara lisoro na mbi na peko ti bungbi asara si mbi bâ so mbi yeke mbumbuse zo pëpe.”

¹⁰ Tâ tënë, a lingbi a-ancien abâ nga ndo na ndo ti ambeni kua. Ye oko, a yeke nzoni kozo ye so ala zia na gbele ala na ngoi ti abungbi ayeke ti bi bê ti ala na ndo ti angasangbaga.

JÉHOVAH ASARA KANGBI NA POPO TI AZO PËPE

11, 12. (a) Zo so ayeke sara kangbi na popo ti azo pëpe ayeke sara ye tongana nyen? (b) Na lege wa Bible afa so Jéhovah ayeke sara kangbi na popo ti azo pëpe?

¹¹ Mbeni pendere sarango ye ti Jéhovah ayeke so lo yeke sara kangbi na popo ti azo pëpe. Zo so ayeke sara kangbi na popo ti azo pëpe ayeke zo so ayeke gi ti sara nzoni na mbeni zo na ti zia mbeni pëpe. Ti zia kangbi na popo ti azo pëpe andu bango ndo ti zo nga na asarango ye ti lo. Ngbanga ti nyen aye use so ayeke kota ye? Ngbanga ti so tongana na yâ ti bango ndo ti mbeni zo lo yeke zia kangbi pëpe na popo ti azo, a yeke pusu lo ti sara ye na azo kue sân ti zia kangbi na popo ti ala. Na yâ ti mbage ti Mbeti ti Nzapa so a sû na yanga ti Grec, tënë “sara kangbi na popo ti azo pëpe” aye mbilimbili ti tene ti ‘yekia mbeni zo teti lê ti lo pëpe’. (Kus. 10:34, La Sainte Bible en sango). Tongaso, zo so ayeke sara kangbi na popo ti azo pëpe ayeke bâ tâ gi sarango ye ti tere ti mbeni zo, me pëpe pendere ti zo ni wala dutingo ti lo.

¹² Jéhovah azia nzoni tapande so ahon atanga ni kue na ndo tënë ti sarango kangbi pëpe na popo ti azo. Bible afa so lo “sara kangbi na popo ti azo pëpe” nga lo “yä iri ti zo teti lê ti lo pëpe”. (Diko Kusala 10:34, 35; Deutéronome 10:17.) Mbeni ye so asi na ngoi ti Moïse afa so tënë so ayeke tâ tënë.

13, 14. (a) Kpale wa amolenge-wali oku ti Tsélophcad atingbi na ni? (b) Na lege wa Jéhovah afa so lo yeke zia kangbi na popo ti azo pëpe?

¹³ Ngoi kete kozo ti tene azo ti Israël alï na Sese ti Zendo, amolenge-wali oku so ayeke aita nga so ade asara mariage pëpe atingbi na mbeni kpale. Kpale ni ayeke so wa? Tongana ti so a yeke sara na yâ ti asewa na Israël, ala hinga so sewa ti ala ayeke wara sese so a mû na babâ ti ala (Nom. 26:52-55). Ye oko, babâ ti ala Tsélophcad, zo ti kete mara ti Manassé, akui. Na lege ti ngobo ti azo ti Israël, amolenge ti Tsélophcad ti koli la ayeke na droit ti mû sese ti babâ ti ala na peko ti lo, me lo yeke gi na amolenge-wali (Nom. 26:33). Teti so na yâ ti sewa ni mbeni molenge-koli ayeke dä pëpe ti mû sese ni, a yeke mû ande sese ti sewa ni na ambeni fami na a zia amolenge-wali ni senge tongaso?

¹⁴ Amolenge-wali oku so aga ahunda Moïse atene: “Teti nyen a lungula iri ti babâ ti e na popo ti asewa ti lo, gi teti lo dü molenge-koli pepe?” Ala voro yanga atene: “I mu na e ye ti e na popo ti aita ti babâ ti e ti koli.” Moïse atene na ala atene: ‘Teti so molenge-koli ayeke dä pëpe, a lingbi ti sara ye oko na ala pëpe’? Ên-ën, lo ‘ga na tënë ti ala na gbele Jéhovah.’ (Nom. 27:2-5). Jéhovah atene nyen? Jéhovah atene na Moïse atene: “Tënë ti amolenge ti Tsélophcad ti wali ayeke tâ tënë; a lingbi mo mû na ala sese ti ala teti ye ti héritier ti ala na popo ti aita ti babâ ti ala ti koli; na mo sara si ye ti héritier ti babâ ti ala aga ti ala.” Jéhovah angbâ gi ge pëpe. Lo tene na Moïse ti zia tënë so na yâ ti Ndia. Lo tene: “Tongana mbeni zo akui, na lo dü molenge-koli pëpe, fade mo sara si ye ti héritier ti lo aga ti molenge ti lo ti wali.” (Nom. 27:6-8; Jos. 17:1-6). Ngbene ye na ngoi ni so, Ndia ayeke bata awali kue ti Israël so atingbi na mara ti kpale so.

15. (a) Jéhovah ayeke sara ye tongana nyen na awakua ti lo, même ala so ye ti ala ayeke dä ape? (b) Ambeni mbaï ti Bible wa afa so Jéhovah ayeke zia kangbi na popo ti azo pëpe?

¹⁵ Desizion ti Jéhovah so ayeke biani nzoni nga afa so lo sara kangbi na popo ti azo pëpe. Jéhovah ane awali so, so ye ti ala ayeke dä pëpe, tongana ti so lo yeke sara na azo ti Israël so dutingo ti ala ayeke nzoni (Ps. 68:6). Mbaï so ayeke gi mbeni oko ti gbâ ti ambaï ti Bible so afa biani so Jéhovah ayeke sara kangbi pëpe na popo ti awakua ti lo kue.​—1 Sam. 16:1-13; Kus. 10:30-35, 44-48.

E LINGBI TI SARA YE TONGANA JÉHOVAH

16. E lingbi ti sara nyen ti sara ye tongana Jéhovah so asara kangbi na popo ti azo pëpe?

¹⁶ E lingbi ti sara nyen ti sara ye tongana Jéhovah so asara kangbi na popo ti azo pëpe? Girisa ape so ti sara kangbi na popo ti azo pëpe andu aye use. Tongana na yâ ti bê ti e, e sara kangbi na popo ti azo pëpe, na yâ ti sarango ye ti e e yeke zia nga kangbi na popo ti ala pëpe. Tâ tënë, e kue e ye ti bâ tere ti e tongana azo so ayeke na nzoni bibe na ndo ti azo kue nga so ayeke sara kangbi na popo ti azo pëpe. Ye oko, mo hinga so a yeke lakue kete ye pëpe na e ti hinga mbilimbili wala atënë ti bê ti e ayeke nzoni wala pëpe. Tongaso, nyen la e lingbi ti sara ti hinga wala a hinga e tongana zo so ayeke sara kangbi na popo ti azo pëpe? Na ngoi so Jésus ayeke gi lani ti hinga tënë so azo ayeke tene na ndo ti lo, lo hunda tënë na adisciple ti lo so lo yeke na confiance na ala, lo tene: “Azo ayeke tene ti ala so Molenge ti zo ayeke zo wa?” (Mat. 16:13, 14). Ngbanga ti nyen mo mû tapande ti Jésus so pëpe? Mo lingbi ti hunda na mbeni kamarade ti mo so mo yeke na confiance na lo ti tene na mo wala a hinga mo tongana mbeni zo so ayeke sara kangbi na popo ti azo wala pëpe. Tongana lo tene so na yâ ti aye tongana tënë ti mara, tënë ti sarango kamarade wala tënë ti nginza, mo yeke sara kamême kangbi na popo ti azo, a yeke nzoni mo sara nyen? Sambela Jéhovah na bê ti mo kue ti bâ atënë ti bê ti mo, voro yanga na lo ti mû maboko na mo ti changé bango ndo ti mo tongaso si sarango ye ti mo afa so mo yeke sara kangbi na popo ti azo pëpe.​—Mat. 7:7; aCol. 3:10, 11.

17. Na yâ ti aye wa e lingbi ti fa so e yeke sara kangbi na popo ti azo pëpe?

¹⁷ Na yâ ti congrégation, e yeke fa so e ye ti sara ye tongana Jéhovah so asara kangbi na popo ti azo pëpe na sarango ye na aita ti e kue na nengo ala nga na nzoni bê. Na tapande, tongana e tisa aita ti e na da ti e, e yeke tisa azo kue, azo so ndo so e na ala e kono dä ayeke nde nde, awayere, anyindu wala awomua. (Diko aGalate 2:10; Jacques 1:27.) Na ngoi ti fango tënë ti Royaume, e yeke sara kangbi na popo ti azo pëpe na lege so e yeke fa tënë na azo kue, même na awande. E yeke na ngia so e lingbi ti wara ambeti ti e na ayanga ti kodoro 600 tongaso. Ye so afa biani so Jéhovah ayeke sara kangbi na popo ti azo pëpe!

18. Jéhovah aye si azo aga nduru na lo nga lo yeke sara kangbi na popo ti azo pëpe. Na lege wa mo yeke fa so mo ye asarango ye so mingi?

¹⁸ Tongana e mû ngoi ti bâ tongana nyen Jéhovah aye si azo aga nduru na lo nga lo yeke sara kangbi na popo ti azo pëpe, e yeke kiri ti ye lo mingi. Ye so ayeke pusu e ti gi ti duti na asarango ye ti Jéhovah nga e yeke fa ni na yâ ti sarango ye ti e na mbage ti amba ti e nga na azo so e yeke fa tënë na ala.