E Mu Tapande ti Jéhovah ti Sala Pepe Nzoni Gi na Ambeni Zo

¹ Jéhovah ayeke bi bê ti lo na azo. Na kangbingo popo ti azo pepe, lo yeda na zo kue so asala ye so bê ti lo aye. (Kus. 10:34, 35) Tongana lo yeke fa tene la ni na azo, Jésus nga ayeke sala pepe nzoni gi na ambeni zo. (Luc 20:21) A lingbi e mu tapande ti ala, tongana Paul so asû na mbeti: “Seigneur ti ala kue ayeke oko, na Lo yeke na mosoro teti ala kue so adi iri ti Lo.”​—aRom. 10:12.

² Na fango nzo tene ti Royaume ti Nzapa na azo kue so e wara, e yeke mu gloire na Nzapa. A lingbi e ngbâ lakue ti fa pendere tokua so na amba ti e, atä mara ti ala, dutingo ti ala, hingango ye ti ala na lege ti sese so wala dutingo ti ala na lege ti mitele ayeke tongana nyen. (aRom. 10:11-13) So aye ti tene ti fa tene na ala so aye biani ti mä: akoli, awali, apendere na ambakoro. A lingbi e pika ayanga-da kue ti mu lege na zo oko oko ti mä tâ tene.

³ E bi bê ti e na ndo azo kue: E yeke gi ti tingbi na mingi ti azo. Na batango ye so na li, ambeni wafango tene awara anzoni lengo na fango tene na ando ti salango kua ti awanganga, ando ti kaïngo kobela, ada ti hungo tele nga na ando ti savango azo ti nyongo mbangi. Ambeni wafango tene afa tene nga na akota zo so aba tene ti lungo akuâ, adirecteur ti ekole, awamungo wango na ndo tene ti fango mbeti nga na awafango ngbanga. Tongana mo yeke sala tene na amara ti azo tongaso, a yeke nzoni ti fa bê ti kiri singila ti mo teti kusala ti ala so amu maboko mingi. E duti na yekiango ndo na e soro a-article so alingbi, so andu tene ti kusala ti ala wala akpale so andu ni.

⁴ Na tapande, mbeni ita-wali awara lege ti sala tene na mbeni wafango ngbanga na yâ biröo ti lo. Na peko ti mbeni lisoro so ague nzoni, koli ni asala tene so: “Mo hinga ye so mbi ye na mbage ti aTémoin ti Jéhovah? A yeke so ala yeke na akpengba-ndia na ala yeke gue nde na ni pepe.” A mu mbeni nzoni fango tene ti témoin na kota zo so.

⁵ E lingbi pepe ti diko ye na yâ bê ti azo. Ye oko, na salango tene na azo kue so e wara, e yeke fa mabe ti e na yâ ngangu ti Nzapa ti fa lege na kusala ti e. Na ndo ni, e yeke mu na ala matabisi ti mä na ti yeda na tokua ti beku. (1 Tim. 2:3, 4) Tongaso, e sala kusala na ndara na ngoi so e yeke na ni, na e sala ngangu ti manda Jéhovah so asala nzoni pepe gi na ambeni zo na fango nzo tene na azo mingi ahon.​—aRom. 2:11; aEph. 5:1, 2.