Élisée abâ lani achar ti wâ: Mo nga kue mo bâ ni?

Gbia ti Syrie agi lani Élisée, prophète ti Nzapa, ti fâ lo. Lo tokua ti tene a gue a gi lo na Dothan, mbeni gbata so gbagba angoro ni kue so ayeke na li ti hoto. Gbia ti Syrie atokua aturugu ti lo, ambarata nga na achar ti bira na Dothan. Na kota ndapre, aturugu ti lo angoro gbata ni kue.​—2 aGbia 6:13, 14.

Na ngoi so wakua ti Élisée azingo na lango na lo sigigi, lo bâ azo so aga ti gbu prophète ni. Lo dekongo lo tene: “Aï, mveni ti mbi! fade e sara nyen?” Élisée atene na lo atene: “Sara mbeto pëpe, teti ala so ayeke na e ayeke mingi ahon ala so ayeke na ala.” Na pekoni prophète ni asambela atene: ‘Jéhovah, mbi hunda Mo, Mo lungula lê ti lo si lo lingbi bâ ndo.’ Mbaï ni afa so: ‘Jéhovah alungula lê ti pendere koli so, lo bâ ndo, na bâ, ambarata na apuse ti mbarata ti wâ asi singo na hoto na tere ti Élisée.’ (2 aGbia 6:15-17). Nyen la e lingbi ti manda na lege ti ye so asi so nga na ambeni ye so asi na Élisée na yâ ti fini ti lo?

Élisée agi bê ti lo pëpe na ngoi so lo yeke na gbele aturugu ti Syrie ndali ti so lo zia bê ti lo kue na Jéhovah nga lo bâ so Nzapa ayeke bata lo. E yeke ku pëpe ti tene Jéhovah abata e na lege ti amiracle laso, me e hinga polele so lo yeke bata azo ti lo kue. Na mbeni lege nde, e lingbi ti tene so e nga kue ambarata ti wâ nga na achar ti wâ angoro e kue. Tongana e “bâ” ala na lege ti mabe nga tongana lakue e zia bê ti e kue na Nzapa, e yeke “duti na siriri” nga Jéhovah ayeke iri tënë nzoni na ndo ti e (Ps. 4:9). Zia e bâ fadeso tongana nyen la e lingbi ti bâ nzoni na lege ti ambeni ye so asi na Élisée na yâ ti fini ti lo.

ÉLISÉE AKOMANSE TI SARA KUA NA ÉLIE

Mbeni lâ na ngoi so Élisée ayeke fâ yaka, prophète Élie aga nduru na lo na lo bi kota bongo ti lo na ndo ti Élisée. Na sarango ye so, Élie aye lani ti tene Élisée aga wakua ti lo. Élisée asara matanga, lo tisa akamarade ti lo ti te ye, na lo bara babâ na mama ti lo na lo hon ti gue ti sara kua na Élie (1 aGbia 19:16, 19-21). Teti so Élisée aye mingi ti sara akua kue so Jéhovah ahunda na lo ti sara, a mû lege na Jéhovah ti sara kua na lo na alege mingi nga na pekoni lo ga prophète na place ti Élie.

Élisée asara kua na Élie peut-être teti ngu omene. Na yâ ti ngu omene so, Élisée ayeke lani zo so “asa [wala atuku] ngu na maboko ti Élie”. (2 aGbia 3:11). Na ngoi ni so, azo ayeke te ka kobe na maboko ti ala, sân fourchette, sân zembe wala ambeni ye nde so a yeke te na kobe. Tongana mbeni maître ahunzi ti te kobe, zo ti kua ti lo ayeke tuku ngu na maboko ti lo nga ayeke sukula ni. Tongaso ambeni kua so Élisée asara lani akpa ambumbuse kua. Me lo bâ so a yeke mbeni pasa ndali ti lo ti duti wakua ti Élie.

Legeoko nga, laso aChrétien mingi ayeke nduru ti sara akua nde nde so andu kua ti ngoi kue. Ala sara ni ngbanga ti so ala yeke na mabe na Jéhovah nga ala ye ti sara na lo na ngangu ti ala kue. Ambeni azia ndo ti ala ti sara akua so ambeni zo alingbi ti bâ ni tongana ambumbuse kua; na tapande kua ti Béthel wala ti lekengo ada so bungbi ti Jéhovah ayeke sara na kusala. Me a yeke nzoni e bâ akua so tongana akete kua wala ambumbuse kua pëpe, ndali ti so Jéhovah abâ na nene ni mingi akua kue so awakua ti lo ayeke sara.​—aHéb. 6:10.

ÉLISÉE AHULE NA TERE TI KUA TI LO

Kozo ti tene Nzapa “akpala Élie na yayu na lege ti gingisale,” wala kota pupu, lo tene na lo ti londo na Guilgal ti gue na Béthel. Élie atene na Élisée ti mû peko ti lo pëpe, me Élisée atene: “Fade mbi zia mo pëpe.” Na ngoi ti tambela ni, fani use Élie atene na Élisée ti mû peko ti lo pëpe, me lo ke (2 aGbia 2:1-6). Élisée ahule na tere ti Élie tâ gi tongana ti so Ruth ahule lani na tere ti Naomi (Ruth 1:8, 16, 17). Ngbanga ti nyen? Ngbanga ti so Élisée abâ na nene ni mingi pasa so Nzapa amû na lo ti sara kua na Élie.

Élisée azia na e mbeni pendere tapande. Tongana a mû na e ambeni kua na yâ ti bungbi ti Jéhovah, e yeke bâ ni na nene ni tongana e dabe ti e so e yeke sara kua ni na Jéhovah. Mbeni kota pasa ti hon ni ayeke dä pëpe.​—Ps. 65:5; 84:11.

‘MO FA NA MBI YE SO MO YE MBI SARA TETI MO’

Na ngoi so akoli use so ayeke tambela, Élie atene na Élisée atene: “Mo fa na mbi ye so mo ye mbi ti sara teti mo, kozoni si A kpala mbi na tere ti mo.” Élisée akiri tënë atene: “Mbi voro mo, zia yingo ti mo aga na ndo mbi alingbi na azo use.” Legeoko tongana ti so Salomon asara lani angu mingi kozoni, Élisée ahunda mbeni ye so ayeke mû maboko na lo ti sara na Jéhovah nzoni mingi ahon ti kozo (1 aGbia 3:5, 9; 2 aGbia 2:9). Nyen la Élisée ahunda lani? Na Israël, kozo molenge ayeke wara ambage use ti ye ti héritier (Deut. 21:15-17). Tongaso Élisée ahunda lani ti duti héritier ti Élie, wala ti ga prophète na place ti lo. Lo hunda nga lani ti wara yingo ti Élie, wala bango ndo ti lo, tongaso si lo sara ye na mbeto pëpe tongana ti Élie so ‘asara mbanda mingi teti Jéhovah’.​—1 aGbia 19:13, 14.

Élie atene nyen na ndo ti ye so zo ti kua ti lo ahunda so? Prophète ni atene: “Ye so mo hunda ayeke ngangu; me tongana mo bâ mbi tongana A kpala mbi na tere ti mo, fade ye so aga na mo tongaso; me tongana mo bâ mbi pëpe, fade a ga tongaso pëpe.” (2 aGbia 2:10). Aye use ayeke dä na yâ kiringo tënë ti Élie. Kozoni, gi Nzapa oko la alingbi ti fa wala Élisée alingbi ti wara ye so lo hunda so. Use ni, tongana Élisée aye ti wara ni, a lingbi lo ngbâ na tere ti Élie atâa ye wa la asi.

YE SO ÉLISÉE ABÂ

Nzapa amû lani na Élisée ye so lo hunda so? Bible atene: “Tongana ala de ti gue, na ala yeke sara tënë, bâ, puse ti wâ na ambarata ti wâ asi, a kangbi popo ti ala; na Elie ague na yayu na lege ti gingisale. Elisée abâ ye so.”a Ye so asi so ayeke kiringo tënë ti Jéhovah na hunda ti Élisée. Élisée abâ so a zi Élie na tere ti lo, lo wara mbage ti yingo ti Élie fani use na lo ga prophète na place ti lo.​—2 aGbia 2:11-14.

Élisée amû kota bongo ti Élie so atï na sese lo yü ni. Na ngoi so azo abâ kota bongo ni na tere ti Élisée, ala hinga so lo ga prophète ti Nzapa awe. Mbeni ye so afa nga so lo yeke lani prophète ti Nzapa ayeke so, na mbeni ngoi na pekoni, na lege ti miracle lo kangbi yâ ti Ngu ti Jourdain use.

Kite ayeke dä ape so ye so Élisée abâ na ngoi so a mû Élie a gue na lo na yayu na lege ti gingisale adö bê ti lo mingi. Zo kue so abâ char ti wâ nga na ambarata ti wâ so, bê ti lo ayeke dö. Aye so afa na Élisée so Jéhovah amû na lo ye so lo hunda. Na ngoi so Nzapa akiri tene na asambela ti e, e yeke bâ pëpe ambarata ti wâ nga na char ti wâ na yâ ti suma. Me e hinga so Nzapa ayeke sara kua na kota ngangu ti lo ti bâ si a sara ye so bê ti lo aye. Tongana e bâ nga so Jéhovah ayeke iri tënë nzoni na ndo ti mbage ti bungbi ti lo so ayeke na sese, a yeke mo bâ mo tene e yeke “bâ” char ti lo ti yayu so ayeke tambela.​—Ézéch. 10:9-13.

Aye mingi asi na Élisée so asara si lo hinga kota ngangu ti Jéhovah. Yingo ti Nzapa amû lege na prophète Élisée ti sara amiracle 16. Amiracle ti lo ahon ti Élie fani use.b Élisée abâ ambarata ti wâ nga na achar ti wâ ti fani use ni na ngoi ti kpale so asi na Dothan so a sara tene ni na tongo nda ti article so.

ÉLISÉE AZIA BÊ TI LO KUE NA JÉHOVAH

Atâa so awato angoro Élisée lani kue na Dothan, lo gi bê ti lo pëpe. Ngbanga ti nyen? Ngbanga ti so lo yeke na kpengba mabe na Jéhovah. E nga kue e yeke na bezoin ti mara ti mabe so. Zia si e sambela ti wara yingo ti Nzapa tongaso si e lingbi ti duti na mabe nga na ambeni mbage ti lengo ti yingo.​—Luc 11:13; aGal. 5:22, 23.

Ye so asi na Dothan apusu nga Élisée ti zia bê ti lo kue na Jéhovah nga na a-ange ti lo ahon ti kozo. Prophète ni abâ so Nzapa atokua a-ange ti lo ti ngoro gbata ni kue nga ti bata lo ndali ti awato ti lo. Nzapa asö Élisée na wakua ti lo na lege so lo sara si lê ti awato ti lo akanga (2 aGbia 6:17-23). Na yâ ti ngoi ti ngangu so nga na ambeni nde, Élisée asara ye na mabe nga lo zia bê ti lo kue na Jéhovah.

Zia e zia bê ti e kue na Jéhovah legeoko tongana Élisée (aProv. 3:5, 6). Tongana e sara tongaso, Nzapa ayeke “sara be-nzoni na e, na [Lo] iri tënë nzoni na ndo e”. (Ps. 67:2). Biani, a yeke atâ char ti wâ nga na ambarata ti wâ la angoro e pëpe. Ye oko, na ngoi ti “kota ye ti vundu” so ayeke ga, Jéhovah ayeke bata sewa ti e ti aita kue (Mat. 24:21; Apoc. 7:9, 14). Juska ti si na ngoi ni so, zia e dabe ti e lakue so “Nzapa ayeke Ndo Ti Bata Tere ti e.”​—Ps. 62:9