Wara ngia na yâ ti awango ti Jéhovah

1. (a) Azo ayeke sara ye tongana nyen na ngoi so a mû wango na ala? Ngbanga ti nyen? (b) Zo ti baba ayeke sara ye tongana nyen na ngoi so a mû wango na lo?

SARANGO ye ti azo ayeke nde nde na ngoi so a mû wango na ala. Na tapande, azo alingbi ti yeda na wango so mbeni zo so ayeke na komandema amû na ala me ala lingbi ti ke wango ti mbeni zo so ngu ti lo na ala ayeke oko wala ti mbeni zo so ayeke na komandema pëpe. Na ngoi so a kiri na ambeni zo na nzoni lege wala a mû wango na ala, ala lingbi ti sara ngonzo, ala tï na yâ ti kota vundu wala ala sara kamene. Me ambeni alingbi ti ala ti duti na ngia, ala yeda na wango ni nga ala gi ti sara ye nzoni ahon ti kozo. Ngbanga ti nyen la sarango ye ti azo ayeke nde nde tongaso? Mbeni raison ni ayeke baba. Tongana a mû wango na mbeni zo ti baba, lo pensé so wango ni alingbi na ni pëpe, lo ke ni na lo yeke wara pëpe ye ti nzoni so lo lingbi fade ti wara tongana lo sara ye alingbi na ye so a fa na lo.​—aProv. 16:18.

2. Ngbanga ti nyen atâ Chrétien abâ awango ti Bible na nene ni?

² Me atâ Chrétien abâ na nene ni anzoni wango, mingi ni tongana awango ni alondo na Bible. Awango ti Jéhovah ayeke mû maboko na e ti bâ kpale so ayeke ga na peko ti mbeni sioni tambela. Na tapande, a mû maboko na e ti kpe aye so ayeke sara sioni na e, aye tongana kota nzara ti akungba, bungbingo koli na wali so ayeke na lege ni pëpe, aye tongana mbangi wala nyongo sämba ahon ndo ni (aProv. 20:1; 2 aCor. 7:1; 1 aThes. 4:3-5; 1 Tim. 6:6-11). Nga, sarango ye alingbi na awango ti Nzapa asara si “ngia ayeke na bê ti [e]”.​—És. 65:14.

3. Bango ndo wa mbeni zo ti sungo psaume ayeke na ni so a yeke nzoni e gi ti duti na ni?

³ Ti bata nzoni songo na popo ti e na Babâ ti e ti yayu, a lingbi e ngbâ ti sara ye alingbi na wango ti ndara so Jéhovah amû na e. A yeke nzoni e gi ti duti na mara ti bango ndo ti mbeni zo ti sungo psaume so atene: ‘Mbi kamata awango ti Mo tongana ye ti héritier ti mbi ti lakue, teti a yeke awango so si amû ngia na bê ti mbi.’ (Ps. 119:111). E nga kue e yeke wara ngia na yâ ti acommandement ti Jéhovah wala na ambeni ngoi e bâ ni tongana aye so ane mingi? Même tongana na ambeni ngoi a yeke ngangu na e ti yeda na mbeni wango, zia bê ti e anze pëpe. E lingbi ti sara ngangu ti kiri ti zia bê ti e kue na ndara ti Nzapa so ayeke kota mingi. Zia e bâ tongana nyen e lingbi ti sara ni na alege ota.

GI TI ZIA BÊ TI MO KUE NA NZAPA NA LEGE TI SAMBELA

4. Nyen la achangé lâ oko pëpe na yâ ti fini ti David?

⁴ Na ambeni ngoi Gbia David ayeke na ngia nga na ambeni ngoi lo yeke na vundu na yâ ti fini ti lo, me mbeni ye ayeke dä so achangé lâ oko pëpe na yâ ti fini ti lo. Lo zia bê ti lo lakue na Wasarango lo. Lo tene: ‘O Jéhovah, mbi yä âme ti mbi na Mo. O Nzapa ti mbi, mbi zia bê ti mbi na Mo.’ (Ps. 25:1, 2). Nyen la amû lani maboko na David ti zia bê ti lo kue na Babâ ti lo ti yayu tongaso?

5, 6. Asambela ti David afa nyen na ndo ti songo ti lo na Jéhovah?

⁵ Azo mingi ayeke sambela Nzapa gi na ngoi so ala yeke na yâ ti angangu kpale. Ala yeke tongana mbeni kamarade wala mbeni fami so ayeke sara lisoro na mo gi na ngoi so lo yeke na bezoin ti nginza wala lo ye ti tene mo sara mbeni ye ndali ti lo. Na mbeni ngoi, mo lingbi ti komanse ti gi bê ti mo wala kamarade wala fami ni so aye mo biani. Me songo ti David na Jéhovah ayeke tongaso pëpe. Na yâ ti fini ti David kue, na angoi so aye atambela nzoni nga na angoi ti ngangu, asambela ti lo afa so lo ye Jéhovah biani nga lo zia bê ti lo kue na lo.​—Ps. 40:9.

⁶ Bâ tongana nyen David asepela Jéhovah nga lo kiri singila na lo. Lo tene: ‘O Jéhovah, Seigneur ti e, iri ti Mo ayeke nzoni mingi na sese kue! Mo zia gloire ti Mo na nduzu ahon ayayu.’ (Ps. 8:2). Na lege ti atënë ti David so, mo bâ kpengba songo so lo yeke na ni na Babâ ti lo ti yayu? Kota ti Jéhovah nga na gloire ti lo adö bê ti David mingi asara si lo sepela Jéhovah “lakue.”​—Ps. 35:28.

7. Na lege wa e yeke wara ye ti nzoni tongana e ga nduru na Nzapa na yâ ti sambela?

⁷ Legeoko tongana David, a lingbi e sara lisoro lakue na Jéhovah tongaso si e zia bê ti e kue na lo ahon ti kozo. Bible atene: “Ala ga nduru na Nzapa, na fade lo yeke ga nduru na ala.” (Jacq. 4:8). Gango nduru na Nzapa na yâ ti sambela ayeke nga mbeni kota ye so e lingbi ti sara ti wara yingo vulu.​—Diko 1 Jean 3:22.

8. Ngbanga ti nyen a yeke nzoni e kpe ti tene gi a-oko tënë lakue tongana e yeke sambela?

⁸ Na ngoi so mo sambela, mo yeke tene ka lakue gi a-oko tënë? Tongana a yeke tongaso, kozoni ti tene mo sambela, mû ngoi kete ti gbu li na ndo ti tënë so mo ye ti tene. Tongana e kiri gi na ndo ti a-oko tënë lakue na ngoi so e sara lisoro na mbeni kamarade wala fami ti e, a yeke nzere na lo? Peut-être lo yeke ye ti mä e mbeni pëpe. Tâ tënë, Jéhovah ayeke ke lâ oko pëpe ti mä mbeni wakua be-ta-zo ti lo so asambela lo na bê ti lo kue. Me a yeke nzoni e kpe ti tene gi a-oko tënë lakue tongana e yeke sambela.

9, 10. (a) Aye wa e lingbi ti sara tënë ni na yâ ti asambela ti e? (b) Nyen la alingbi ti mû maboko na e ti tene asambela so alondo na gbe ti bê ti e?

⁹ Biani, tongana e ye ti ga nduru mingi na Nzapa, a yeke nzoni atënë ti yâ ti sambela ti e ane. Tongana e zi bê ti e na Jéhovah, e yeke ga nduru mingi na lo nga e yeke zia bê ti e na lo mingi ahon ti kozo. Me, aye wa la e lingbi ti sara tënë ni na yâ ti asambela ti e? Mbeti ti Nzapa atene: “Na yâ ti aye kue, na lege ti sambela, na lege ti vorongo tere na Nzapa nga na sambela ti kiringo singila, ala hunda na Nzapa aye so agbu bê ti ala.” (aPhil. 4:6). Biani, e lingbi ti sambela ndali ti ye kue so andu fini ti e wala songo ti e na Nzapa.

¹⁰ E lingbi ti manda ye mingi na lege ti asambela ti akoli na awali be-ta-zo so a sû ni na yâ ti Bible (1 Sam. 1:10, 11; Kus. 4:24-31). Na yâ ti mbeti ti Psaume a yeke wara gbâ ti asambela so azo atene na Jéhovah na gbe ti bê ti ala nga na abia so ala he na lo na bê ti ala kue. Na yâ ti asambela nga na abia so, a yeke wara tënë ti bê ti azo so ayeke na vundu nga na ti ala so ayeke na kota ngia. Ti gbu li na ndo ti atënë ti abe-ta-zo so alingbi ti mû maboko na e ti tene na Jéhovah asambela so ayeke nzoni mingi.

GBU LI NA NDO TI AWANGO TI NZAPA

11. Ngbanga ti nyen a lingbi e gbu li na ndo ti awango ti Bible?

¹¹ David atene: “Awango ti Jéhovah, zo alingbi ti zia bê dä, na a sara si zo so ahinga ndo mingi ape aga zo ti ndara.” (Ps. 19:8, FD). Biani, même tongana e hinga ye mingi ape, tongana e sara ye alingbi na acommandement ti Nzapa e yeke ga zo ti ndara. Ye oko, ambeni wango ti Bible ahunda ti tene e gbu li dä tongana e ye ti ngbâ be-ta-zo na yâ ti aye kue na yâ ti gigi ti e. Na tapande, gbungo li na ndo ti afango ye ti Bible ayeke mû maboko na mo ti ngbâ be-ta-zo na ngoi so a pusu mo ti sara mbeni ye ti sioni na ekole wala na place ti kua. A yeke mû nga maboko na mo ti sara ye alingbi na andia ti Nzapa na ndo ti mênë, ti yôro tere ti mo pëpe na yâ ti aye ti dunia so nga ti sara ye alingbi na afango ye ti Bible na ndo ti yungo bongo nga na lekengo tere pendere. Ti gbu li na ndo ti wango ti Nzapa ayeke mû maboko na e ti leke tere ti e kozo ndali ti akpale tongaso. Na pekoni e yeke leke na yâ ti bê ti e kozoni ye so e yeke sara tongana kpale ni asi. Mara ti lekengo tere tongaso ayeke mû maboko na e ti kpe afaute so ayeke ga na vundu na zo.​—aProv. 15:28.

12. Gbungo li na ndo ti ahundango ndo wa ayeke mû maboko na e ti bata awango ti Nzapa?

¹² Fini ti e afa so e lango pëpe na lege ti yingo na ngoi so e yeke ku ti tene Nzapa asara aye so lo mû zendo ni? Na tapande, e hinga biani so na yâ ti kete ngoi a yeke futi Babylone, Ngangu gbata? Aye tongana fini ti lakue lakue na yâ ti paradis nga na zingongo ti akuâ angbâ tâ ye na yâ ti li ti e tongana ti so e manda ni lani kpâ? E ngbâ ti fa tënë na nzara ni mingi, wala aye ti e wani la e zia na kozo ndo na yâ ti fini ti e? E ngbâ ti bâ sarango si iri ti Jéhovah aga nzoni-kue nga na droit ti lo ti komande dunia tongana aye so ayeke kota mingi na lê ti e? Ti gbu li mingi na ndo ti mara ti ahundango ndo so alingbi ti mû maboko na e ti bata ‘awango ti Nzapa tongana ye ti héritier ti e ti lakue’.​—Ps. 119:111.

13. Ngbanga ti nyen a yeke ngangu na akozo Chrétien ti mä yâ ti ambeni ye? Fa mbeni tapande ni.

¹³ Na yâ ti Bible ambeni ye ayeke dä so laso e lingbi ti mä yâ ni nzoni kue pëpe ndali ti so ngoi so Jéhovah afa ti zi ndani polele ade ti lingbi pëpe. Jésus atene fani mingi na abazengele ti lo so a lingbi lo bâ pasi nga a fâ lo. (Diko Matthieu 12:40; 16:21.) Me abazengele amä yâ ti tënë so pëpe. Ala gbu ndani gi na pekoni so Jésus azingo na kuâ na lo si na gbâ ti adisciple nga lo “zi lege ti hingango ndo ti ala kue ti gbu nda ti Mbeti ti Nzapa.” (Luc 24:44-46; Kus. 1:3). Nga, a yeke gi na pekoni so adisciple ti Christ awara yingo vulu na Pentecôte ti ngu 33 la ala hinga so Royaume ti Nzapa ayeke duti ande na yayu.​—Kus. 1:6-8.

14. Na ngoi ti e, nzoni tapande wa aita mingi azia atâa so ala hinga ye nzoni pëpe na ndo ti alango ti nda ni?

¹⁴ Legeoko nga, na ngoi ti e, atâ Chrétien aku ambeni ye so ala pensé atene a yeke si na “alango ti nda ni,” me aye ni so asi pëpe tongana ti so ala ku ni (2 Tim. 3:1). Na tapande, na ngu 1914, ambeni apensé so na yâ ti kete ngoi ala yeke gue na yayu, me ala gue pëpe. A-Chrétien so angbâ ti manda Mbeti ti Nzapa na ala bâ so mbeni kota kua ti fango tënë ayeke dä so a lingbi a sara ni kozoni si (Marc 13:10). Ni la na ngu 1922, Joseph F. Rutherford, so amû li ni lani na yâ ti kua ti fango tënë, atene na azo so abungbi na assemblée internationale na Cedar Point, Ohio, na Amerika, lo tene: ‘Ala bâ nzoni, Gbia ni akomande! Ala yeke awatokua ti lo. Tongaso ala fa, ala fa, ala fa tënë ti Gbia ni na Royaume ti lo.’ Ti londo na ngoi ni so ti ga na ni, a hinga awakua ti Jéhovah na fango “nzoni tënë ti royaume”.​—Mat. 4:23; 24:14.

15. Na lege wa gbungo li na ndo ti lege so Nzapa asara ye na azo ti lo ayeke ga na ye ti nzoni na e?

¹⁵ Tongana e gbu li na ndo ti pendere lege so Jéhovah asara ye na azo ti lo ti giriri nga na ti laso, e yeke kiri ti zia bê ti e mingi na ndo ti ngangu so lo yeke na ni ti sara ye so bê ti lo aye nga na ye so lo leke ti sara na yâ ti ngoi so ayeke ga. Na oko ngoi ni, awango ti Jéhovah ayeke mû maboko na e ti bata na li ti e nga na bê ti e aprophétie ti lo so ade ti si pëpe. E hinga biani so tongana e sara tongaso, a yeke mû maboko na e ti zia bê ti e mingi na azendo ti lo.

GI TI ZIA BÊ TI MO KUE NA NZAPA NA SARANGO AKUA TI LO

16. Aye ti nzoni wa e yeke wara tongana e bi tere ti e kue na yâ ti kua ti Nzapa?

¹⁶ Jéhovah ayeke mbeni Nzapa so ayeke na ngangu mingi, mbeni Nzapa so ayeke sara ye. Mbeni zo ti sungo psaume atene: ‘Zo nyen ayeke ngangu tongana Mo, O Jéhovah?’ Lo kiri lo tene: “Tïtî Mo ayeke ngangu, na tïtî Mo ti koti ayeke na nduzu.” (Ps. 89:9, 14). Teti so Jéhovah ayeke Nzapa so ayeke sara ye, lo yeke bâ na nene ni ngangu so e yeke sara ti tene aye ti Royaume ague na li ni nga lo yeke iri tënë nzoni na ndo ni. Lo bâ so awakua ti lo kue, akoli na awali, amaseka na akangba ayeke te kobe pëpe “na lege ti kusala ti goigoi”. (aProv. 31:27). Tongana e bi tere ti e kue na yâ ti kua ti Nzapa, e mû tapande ti Wasarango e. Sarango kua ti Nzapa na ngangu ti e kue ayeke sara nga si e yeke na ngia nga e nzere na lê ti Jéhovah.​—Diko Psaume 62:13.

17, 18. Na lege wa kusala so e sara na Jéhovah na mabe ayeke mû maboko na e ti zia bê ti e na awango ti lo mingi? Fa mbeni tapande ni.

¹⁷ Na lege wa kusala so e sara na Jéhovah na mabe ayeke mû maboko na e ti zia bê ti e na lo mingi? Gbu li na ndo ti mbaï ti Bible so asara tënë ti lingo ti azo ti Israël na Sese ti Zendo. Jéhovah ahunda na aprêtre so ayô arche ti mbele ti tambela droit na yâ ti Ngu ti Jourdain. Ye oko, na ngoi so azo aga nduru na ngu ni, ala bâ so kota ngu apika asara si ngu ni asuku amû ndo. Nyen la azo ti Israël ayeke sara? Ala yeke lango na yanga ti ngu ni ti ku teti ayenga mingi ti tene a kiri na gbe ni awe si? Ên-ën, ala zia bê ti ala kue na Jéhovah nga ala mû peko ti afango lege ti lo. Ye ti pekoni ayeke so wa? Bible atene: ‘Tongana gere ti aprêtre so ayô Arche alï na ngu, ngu so alondo na mbage ti nduzu asua, ngu so asuku, a luti na nduzu na ndo oko tongana gbagba; . . . aprêtre so ayô Arche ti Mbele ti L’Éternel aluti kpô na ndo kuru sese na yâ Ngu ti Jourdain; na azo ti Israël kue ahon na ndo kuru sese ni, juska azo kue afâ Ngu ti Jourdain.’ (Jos. 3:12-17). Tara ti bâ ngia ti bê ti azo ti Israël na ngoi so ala bâ so ngu so asua ngangu so aluti! Biani, mabe so azo ti Israël ayeke na ni na mbage ti Jéhovah akpengba ndali ti so ala sara ye alingbi na afango lege ti lo.

¹⁸ Biani, Jéhovah ayeke sara mara ti amiracle tongaso ndali ti azo ti lo laso pëpe. Me lo yeke iri tënë nzoni na ndo ti e tongana e sara ye na mabe nga e mû peko ti afango lege ti lo. Yingo vulu ti Nzapa ayeke mû na e ngangu so e yeke na bezoin ni ti fa tënë ti Royaume na ndo ti sese kue. Jésus Christ, kota Témoin ti Jéhovah, adë bê ti adisciple ti lo so lo yeke mû maboko na ala na yâ ti kota kua so. Lo tene: “Ala gue, ala sara si azo na popo ti amara kue aga adisciple . . . mbi yeke na tere ti ala juska na lâ ni so aye ti ngoi so ayeke gue ti hunzi.” (Mat. 28:19, 20). A-Témoin ti Jéhovah mingi so ayeke na kamene wala na mbeto ti sarango tënë na azo atene so yingo ti Nzapa amû ngangu na ala ti fa tënë na azo so ala hinga ala pëpe.​—Diko Psaume 119:46; 2 aCorinthien 4:7.

19. Même tongana e lingbi pëpe ti sara ye mingi na yâ ti kua ti Nzapa tongana ti so e ye, nyen la e hinga biani?

¹⁹ Ambeni ita so ayeke na kobela wala so aga mbakoro alingbi pëpe ti bi tere ti ala mingi na yâ ti kua ti Nzapa tongana ti so ala ye. Me, zia si ala hinga biani so “Babâ so ayeke sara nzoni bê mingi na zo nga Nzapa ti dengo bê kue” ahinga ye so asi na ala (2 aCor. 1:3). Lo bâ na nene ni mingi aye kue so e sara ti tene aye ti Royaume ague na li ni. A lingbi e kue e girisa pëpe so salut ti e aluti kozoni kue na ndo ti mabe so e yeke na ni na sandaga ti Christ.​—aHéb. 10:39.

20, 21. Ambeni ye wa e lingbi ti sara ti fa so e zia bê ti e kue na Jéhovah?

²⁰ Vorongo so e yeke voro na Jéhovah ahunda ti mû ngoi ti e, ngangu ti e nga na amosoro ti e ti sara na aye kue so e lingbi ti sara na yâ ti kua ti Nzapa. Biani, e ye ti “sara kusala ti wafango nzoni tënë” na bê ti e kue (2 Tim. 4:5). E yeke na ngia ti mû maboko na azo ti “si na tâ hingango ye na ndo ti tâ tënë.” (1 Tim. 2:4). Biani, ti gonda Jéhovah nga ti sepela lo asara si e wara aye mingi na lege ti yingo (aProv. 10:22). A mû nga maboko na e ti zia bê ti e kue na Wasarango e, atâa ye wa la asi.​—aRom. 8:35-39.

²¹ Tongana ti so e londo ti bâ, a lingbi e sara ngangu si e zia bê ti e kue na fango lege ti Jéhovah so ayeke nzoni. Tongaso, gi ti zia bê ti mo kue na Jéhovah na lege ti sambela. Gbu li na ndo ti lege so Jéhovah asara aye so lo mû zendo ni ândö nga tongana nyen la lo yeke sara ni na yâ ti ngoi so ayeke ga. Ngbâ ti zia bê ti mo mingi na Jéhovah na sarango akua ti lo. Biani, awango ti Jéhovah ayeke ngbâ kpu na kpu. Mo nga kue, mo lingbi ti ngbâ na fini lakue lakue!