Sara ye ague oko na sambela ti Jésus so

1, 2. Nyen la Jésus asara na pekoni so lo na adisciple ti lo asara lani matanga ti Pâque na ngu 33?

A YEKE lani na bï ti lango 14 ti nze ti Nisan ti ngu 33. Jésus na adisciple ti lo asara matanga ti Pâque. Matanga so adabe ti ala na ye so Nzapa asara ti zi akotara ti ala na ngbâa na Égypte. Me ti adisciple ti Jésus so ayeke be-ta-zo, a yeke zi ala na mbeni lege so ayeke kota mingi, a yeke ‘zi ala teti lakue lakue.’ Na ndade ni, awato afâ Maître ti ala so siokpari ayeke na tere ti lo ape. Me ye ti sioni so aga na ye ti nzoni. Mênë ti Jésus so atuku amû lege ti zi azo na gbe ti siokpari na kuâ.​—aHéb. 9:12-14.

² Ti sara si e girisa pëpe nzoni ye so Nzapa asara ndali ti e so, Jésus azia na sese mbeni fini matanga so ayeke sara ni ngu oko oko so amû place ti matanga ti Pâque. Lo sara ni na lege so lo mû mapa so a sara na mama ni pëpe, lo kungbi yâ ni na lo mû ni na adisciple ti lo 11 so angbâ be-ta-zo, lo tene: “So ayeke fä ti tere ti mbi so a yeke mû ni ndali ti ala. Ala ngbâ ti sara ye so ti dabe ti ala na mbi.” Lo mû nga kopo ti bengba vin lo sara legeoko tongaso, lo tene: “Kopo ti vin so ayeke fä ti fini mbele na lege ti mênë ti mbi so biani ayeke tuku ande ndali ti ala.”​—Luc 22:19, 20.

3. (a) Kota changement wa abâ gigi na peko ti kuâ ti Jésus? (b) Ahundango ndo wa e yeke gbu li ti e na ndo ni na ndo ti sambela ti Jésus so ayeke na Jean chapitre 17?

³ Ngoi angbâ lani mingi ape ti tene Nzapa afâ yâ ti mbele ti Ndia so lo te giriri na amolenge ti Israël. Fini mbele so Jéhovah ate na adisciple ti Jésus so a soro ala ti gue na yayu ayeke mû ande place ni. Tënë ti nzoni duti ti adisciple ti Jésus agbu bê ti lo mingi. Amolenge ti Israël abungbi oko ti voro Jéhovah pëpe, na ye so abi zonga na iri ti Nzapa (Jean 7:45-49; Kus. 23:6-9). Me Jésus aye si adisciple ti lo angbâ ti sara kua maboko na maboko tongaso si ala lingbi ti mû gloire na iri ti Nzapa. Nyen la Jésus asara? Lo tene mbeni sambela so ayeke pendere ahon atanga ni kue so zo kue ayeke na pasa ti diko ni (Jean 17:1-26; ba foto so ayeke na tongo nda ti article ni). Na ngoi so e yeke sara tënë na ndo ti sambela so, zia e gbu li ti e na ndo ti ahundango ndo so: “Nzapa akiri lani tënë na sambela ti Jésus so? Mbi yeke sara ye alingbi na sambela so?”

AYE SO AYEKE KOTA MINGI NA LÊ TI JÉSUS

4, 5. (a) Nyen la e manda na lege ti atënë ti tongo nda ti sambela ti Jésus? (b) Tongana nyen la Jéhovah amû na Jésus ye so lo hunda na lo ndali ti lo wani na yâ ti sambela?

⁴ Jésus afa apendere ye mingi na ndo ti Nzapa na adisciple ti lo juska l’heure ahon na bï. Na pekoni lo yô lê ti lo na nduzu na lo sambela, lo tene: “Babâ, ngbonga ni alingbi awe. Mû gloire na molenge ti mo, si molenge ti mo alingbi ti mû gloire na mo, teti mo mû na lo komandema na ndo ti azo kue, si ala kue so mo mû na lo, lo lingbi ti mû na ala fini ti lakue lakue. . . . Mbi mû gloire na mo na ndo ti sese so, mbi hunzi awe kusala so mo mû na mbi ti sara. Fadeso, Babâ, mû gloire na mbi na tere ti mo, gloire so mbi yeke na ni lani na tere ti mo kozoni si dunia so abâ gigi.”​—Jean 17:1-5.

⁵ Bâ so Jésus ato nda ti sambela ti lo na aye so ayeke kota mingi na lê ti lo. Kozoni, lo sambela ti tene Babâ ti lo ti yayu awara gloire, na ye so ague oko na kozo ye so lo hunda na yâ ti sambela so lo zia tongana tapande: “Babâ, zia a sara si iri ti mo aga nzoni-kue.” (Luc 11:2). Use ni, lo sambela ndali ti aye so adisciple ti lo ayeke na bezoin ni. Lo hunda ti “mû na ala fini ti lakue lakue.” Na peko ti aye so awe la Jésus aga ti sambela ndali ti ye so abâ lo wani, lo tene: “Babâ, mû gloire na mbi na tere ti mo, gloire so mbi yeke na ni lani na tere ti mo kozoni si dunia so abâ gigi.” Jéhovah amû na Molenge ti lo so ayeke be-ta-zo na lo anzoni ye mingi ahon aye so lo hunda. Lo mû na Jésus “mbeni iri so ayeke nzoni mingi ahon” ti a-ange kue.​—aHéb. 1:4.

‘MANDA TI HINGA OKO TÂ NZAPA’

6. Nyen la alingbi abazengele asara ti wara fini ti lakue lakue? E hinga tongana nyen so ala sara aye ni so lani?

⁶ Na yâ ti sambela ti Jésus, lo sara nga tënë ti ye so e so siokpari ayeke na tere ti e e lingbi ti sara ti wara matabisi so ayeke fini ti lakue lakue. (Diko Jean 17:3.) Lo tene so a lingbi e ngbâ ti “manda ti hinga” Nzapa nga na Christ. Mbeni lege so e lingbi ti sara na ni, a yeke ti sara kua na lê ti e nga na mê ti e ti manda ye mingi na ndo ti Jéhovah nga na Molenge ti lo. Mbeni nzoni lege ti hinga ye na ndo ti Nzapa, a yeke ti hinga nzoni so e yeke wara na ngoi so e sara ye alingbi na aye so e manda na ndo ti lo. Abazengele asara ye lani alingbi na aye use so, teti so Jésus atene na yâ ti sambela ti lo, lo tene: “Atënë so mo mû na mbi, mbi mû ni na ala, na ala yamba ni.” (Jean 17:8). Me ti tene ala wara fini ti lakue lakue, a lingbi ala ngbâ ti gbu li ti ala na ndo ti atënë so ayeke na yâ ti Mbeti ti Nzapa nga ti sara ye alingbi na ni lâ na lâ. Abazengele angbâ ti sara ye lani alingbi na ni juska na nda ti fini ti ala na sese? En, ala sara ni. E hinga ni ndali ti so a sû iri ti ala oko oko kue na ndo ti atênë 12 ti gere ti gbagba ti Fini Jérusalem.​—Apoc. 21:14.

7. “Ti manda ti hinga” Nzapa aye ti tene nyen? Ngbanga ti nyen a yeke kota ye ti sara ni?

⁷ Tënë ti Grec so a kiri pekoni na “ti manda ti hinga,” a lingbi nga ti kiri pekoni na “ngbâ ti manda ti hinga”. Tongaso, “ti manda ti hinga” Nzapa aye ti tene ti ngbâ ti manda ye mingi mingi na ndo ti lo. Me ye so aye ti tene pëpe ti hinga gi asarango ye ti lo nga na ye so lo leke na bê ti lo ti sara. Ti hinga Jéhovah aye nga ti tene ti ye lo mingi na ti duti na kpengba songo na lo nga ti ye amba ti e aChrétien. Bible atene: “Zo so ayeke na ndoye pëpe ahinga Nzapa pëpe.” (1 Jean 4:8). Tongaso, ti hinga Nzapa aye nga ti tene ti mä yanga ti lo. (Diko 1 Jean 2:3-5.) E yeke na kota pasa ti duti na popo ti azo so ahinga Jéhovah. Me a lingbi e sara hange si e buba pëpe pendere songo so e yeke na ni na Nzapa tongana ti so Judas Iscariote asara lani. Zia e sara ngangu ti ngbâ ti kpengba songo ti e na Jéhovah. Tongana e sara ni, e yeke wara ande pendere matabisi so ayeke fini ti lakue lakue.​—Mat. 24:13.

“NDALI TI IRI TI MO WANI”

8, 9. Nyen la ayeke kota mingi na lê ti Jésus na ngoi so lo yeke na sese? Sarango ye wa ti azo ti bungbi ti nzapa lo ke ni?

⁸ Na ngoi so e diko sambela ti Jésus so ayeke na Jean chapitre 17, e bâ polele so Jésus ayeke na ndoye mingi teti abazengele ti lo nga teti e laso (Jean 17:20). Me a lingbi e hinga so, ye so ayeke kota mingi na lê ti Jésus ahon tanga ti aye kue ayeke pëpe tënë ti salut ti e. Na ngoi so lo yeke lani na ndo ti sese, ye so ayeke kota mingi na lê ti lo a yeke ti sara si iri ti Babâ ti lo aga nzoni-kue nga ti tene a wara gloire. Na tapande, na ngoi so na synagogue ti Nazareth Jésus afa nda ti gango ti lo na sese, lo diko na mbeti ti Esaïe so arulê ni rulengo tënë so: “Yingo ti Jéhovah ayeke na ndo ti mbi, ngbanga ti so lo soro mbi ti fa nzoni tënë na awayere.” E lingbi biani ti tene so na ngoi so Jésus adiko ni, lo di iri ti Nzapa na lege ni.​—Luc 4:16-21.

⁹ Angu mingi kozoni si Jésus aga na ndo ti sese, na yâ ti sarango ye ti aJuif akota zo ti nzapa ake na azo ti di iri ti Nzapa. E lingbi ti tene so Jésus ake na kuru go sarango ye so, so ague nde na ye so Mbeti ti Nzapa afa. Lo tene na akota zo ti Nzapa so, lo tene: “Mbi ga na iri ti Babâ ti mbi na ala yamba mbi pëpe, me tongana mbeni zo nde aga fade na iri ti lo wani, ka ala yeke yamba zo so.” (Jean 5:43). Alango kete kozoni si Jésus akui, lo fa ye so ayeke kota mingi na lê ti lo na yâ ti sambela, lo tene: “Babâ, mû gloire na iri ti mo.” (Jean 12:28). Tongaso, a yeke na lege ni so na yâ ti sambela ti Jésus so ayeke na Jean chapitre 17, ye so ayeke kota mingi na yâ ti fini ti Jésus ayeke ti sara si iri ti Babâ ti lo awara gloire.

10, 11. (a) Tongana nyen la Jésus asara si azo ahinga iri ti Babâ ti lo? (b) Ngbanga ti nyen la a lingbi adisciple ti lo asara si azo ahinga iri ti Jéhovah?

¹⁰ Jésus asambela, lo tene: “Mbi fa iri ti mo polele na azo so mo mû na mbi na yâ ti dunia so. Ala yeke fade ti mo, na mo mû ala na mbi na ala bata tënë ti mo. ‘Nga, mbi yeke ngbâ na yâ ti dunia so mbeni pëpe, me ala yeke ngbâ na yâ ti dunia so na mbi yeke gue na mo. Babâ so mo yeke nzoni-kue, bâ ndo na ndo ti ala ndali ti iri ti mo wani so mo mû na mbi, tongaso si ala duti oko tongana ti so e yeke oko.”​—Jean 17:6, 11.

¹¹ Ti tene Jésus asara si adisciple ti lo ahinga iri ti Babâ ti lo, lo di gi iri ni na ala pëpe. Jésus amû nga maboko na ala ti hinga nda ti iri ti Nzapa, apendere sarango ye ti lo nga lege so lo yeke sara ye na e (Ex. 34:5-7). Nga, atâa so Jésus ayeke fadeso Gbia na yayu, lo ngbâ lakue ti mû maboko na adisciple ti lo ti sara si azo ahinga iri ti Jéhovah na ndo ti sese kue. Ngbanga ti nyen? A yeke ti sara si ambeni zo nga aga adisciple kozoni si a futi sioni dunia so. Na pekoni, lo yeke sö awakua ti lo so ayeke be-ta-zo, na azo kue ayeke hinga ande so iri ti Jéhovah ayeke kota mingi.​—Ézéch. 36:23.

“SI DUNIA SO ALINGBI TI MÄ NA BÊ”

12. Ti sara kua ti songo fini ti azo nzoni aye ota wa alingbi e sara?

¹² Na ngoi so Jésus ayeke lani na ndo ti sese, lo sara ngangu ti mû maboko na adisciple ti lo ti hon ndo ti awokongo ti ala. A yeke kota ye mingi ti tene ala sara ni ndali ti so a yeke mû maboko na ala ti hunzi kua so lo komanse ti sara ni lani awe. Lo sambela lo tene: “Gi tongana ti so mo tokua mbi na yâ ti dunia so, mbi nga mbi tokua ala fade na yâ ti dunia so.” Ti mû lege na adisciple ti lo ti sara kua ti songo fini ti azo so nzoni, Jésus agboto lê na ndo ti ambeni kpengba ye ota na yâ ti sambela ti lo. Kozoni, lo hunda na Jéhovah ti mû maboko na adisciple ti lo ti mû mbage ti dunia ti Satan pëpe. Use ni, lo sambela ti tene adisciple ti lo angbâ nzoni-kue, na lege so ala yeke sara ye alingbi na ye so ayeke na yâ ti Bible. Ota ni, Jésus hunda mingi ti tene adisciple ti lo angbâ ti duti beoko, tongana ti so lo na Babâ ti lo ayeke beoko. Ye so apusu e ti gbu li ti e. A yeke nzoni e oko oko kue e hunda tere ti e: ‘Mbi yeke sara ye alingbi na aye ota so Jésus ahunda na yâ ti sambela ti lo so?’ Jésus ayeke na confiance so tongana adisciple ti lo asara aye so, azo mingi ayeke yeda na afango ye ti ala.​—Diko Jean 17:15-21.

13. Tongana nyen la Jéhovah akiri tënë na sambela ti Jésus na ngoi ti akozo Chrétien?

¹³ Tongana e diko mbeti ti Kusala, e yeke bâ so Jéhovah akiri tënë na sambela ti Jésus. Na popo ti akozo Chrétien mo yeke wara aJuif na aGentil, azo ti mosoro na awayere, angbâa na amaître ti ala. Me ala kue ayeke lani beoko, ni la Paul ahaka ala na amembre ti tere so abungbi kue si aga tere oko na Jésus ayeke li ni (aÉph. 4:15, 16). Ti tene azo abungbi tongaso ti duti beoko na yâ ti dunia ti Satan so kangbi ayeke dä, a yeke mbeni ye ti dongo bê! Gonda ni kue akiri na Jéhovah, lo so lo sara si ala duti beoko na lege ti ngangu ti yingo vulu ti lo.​—1 aCor. 3:5-7.

14. Na lege wa la Nzapa akiri tënë na sambela ti Jésus na ngoi ti e?

¹⁴ Mawa ni ayeke so, na peko ti kuâ ti abazengele akozo Chrétien angbâ lani ti duti beoko pëpe. Tongana ti so a fa tënë ni kozo awe, fango ye ti wataka abâ gigi na yâ ti congrégation, na a buba dutingo beoko ti akozo Chrétien (Kus. 20:29, 30). Me na ngu 1919, Jésus azi aChrétien so a soro ala ti gue na yayu na gbe ti ngbâa ti vorongo nzapa ti wataka na lo bungbi ala oko na “kamba ti bungbingo ye mbilimbili.” (aCol. 3:14). Nyen la kusala ti ala ti fango tënë asara na ndo ti tanga ti azo na yâ ti dunia? Wungo ti “ambeni ngasangbaga” ahon kutu mbasambala alondo na popo ti “amara kue, akete mara kue, azo ti kodoro kue, ayanga ti kodoro kue” aga abungbi na aChrétien so a soro ala ti gue na yayu na ala ga kundu oko (Jean 10:16; Apoc. 7:9). A yeke mbeni pendere kiringo tënë so Jéhovah akiri na ni na ye so Jésus atene na lo na yâ ti sambela atene: “Si dunia so alingbi ti hinga so mo [Jéhovah mo] tokua mbi nga so mo ndoye ala tongana ti so mo ndoye mbi.”​—Jean 17:23.

PENDERE TËNË SO JÉSUS ATENE NA HUNZINGO TI SAMBELA TI LO

15. Sambela wa Jésus asara ni mbilimbili ndali ti adisciple ti lo so a soro ala ti gue na yayu?

¹⁵ Na bï ti lango 14 ti nze ti Nisan, Jésus amû gloire, wala gonda na abazengele ti lo na lege so lo te mbele na ala ti tene ala komande legeoko na lo na yâ ti Royaume ti lo (Luc 22:28-30; Jean 17:22). Ni la Jésus asambela fadeso ndali ti azo kue so ayeke ga ande adisciple ti lo so a soro ala ti gue na yayu, lo tene: “Âdu ti ala so mo mû na mbi, Babâ, mbi ye si ndo so mbi yeke dä, ala nga aduti na tere ti mbi si ala bâ gloire ti mbi so mo mû na mbi, ngbanga ti so mo ndoye mbi kozo si a zia gere ti dunia.” (Jean 17:24). Azo so ayeke ti ambeni ngasangbaga ayeke na ngia ndali ti futa so aChrétien so a soro ala ti gue na yayu ayeke wara, ala sara bê pëpe. Ye so nga afa so atâ Chrétien kue laso na ndo ti sese ayeke beoko.

16, 17. (a) Na hunzingo ti sambela ti Jésus nyen la lo tene lo yeke ngbâ lakue ti sara? (b) Nyen la a yeke nzoni e ngbâ lakue ti sara?

¹⁶ Ndali ti afango ye ti wataka so akota zo ti eglize ayeke fa, mingi ti azo na yâ ti dunia ake ti yeda so Jéhovah ayeke na bungbi ti azo ti lo so ayeke beoko nga so ahinga lo. A yeke ye so asi nga lani na ngoi ti Jésus. Ni la lo hunzi sambela ti lo na apendere tënë so: “Babâ so mo yeke mbilimbili, biani, dunia so ahinga mo pëpe. Me mbi, mbi hinga mo, na ala so, ala hinga so mo tokua mbi. Na mbi sara si ala hinga iri ti mo na fade mbi yeke sara si a hinga ni, tongaso si ndoye so mo ndoye na mbi aduti na popo ti ala nga mbi duti beoko na ala.”​—Jean 17:25, 26.

¹⁷ Zo wa la alingbi ti tene so Jésus asara ye alingbi na sambela ti lo ape? Teti so lo yeke Mokonzi ti congrégation, lo ngbâ lakue ti mû maboko na e ti sara si azo ahinga iri ti Babâ ti lo nga na ye so Babâ ti lo aleke ti sara. Zia e ngbâ lakue ti sara ye alingbi na fango lege ti lo na sarango ye alingbi na yanga so lo mû na e ti fa tënë na ti sara si azo aga adisciple (Mat. 28:19, 20; Kus. 10:42). Zia e sara nga kue ti bata pendere dutingo beoko ti e. Tongana e sara aye so, e yeke sara ye ague oko na sambela ti Jésus. Ye so ayeke sara si e yeke mû gloire na iri ti Jéhovah nga e yeke wara ngia teti lakue lakue.