Nda ti hunda ni so gi nyen?

“Mo yeke na bezoin ti Nzapa ape? Gbâ ti azo ayeke na bezoin ti lo ape.” Ambeni païen la asû tënë so na ndo ti mbeni kota pancarte. Na yâ ti akodoro mingi, azo gbani gbani abâ so ala yeke pëpe na bezoin ti Nzapa.

Na mbeni mbage, gbâ ti azo so atene ala mä na bê na Nzapa ayeke mû adesizion mo bâ mo tene Nzapa ni ayeke dä ape. Salvatore Fisichella, mbeni kota bua ti Eglize Catholique, atene tënë so na ndo ti amembre ti eglize ti lo, lo tene: “Na bango e laso, e kpa aChrétien ape ngbanga ti so sarango ye ti tere ti e ahon tere na ti apaïen ape.”

Ti ambeni zo ni, ala yeke même na ngoi ti pensé na ndo ti Nzapa ape. Na ala, lo yeke yongoro mingi na ala wala lo yeke na ye oko ti sara na yâ ti gigi ti ala ape. Amara ti zo tongaso ayeke pensé na Nzapa gi na ngoi so ala yeke na yâ ti kpale wala ala yeke na bezoin ti mbeni ye. A yeke mo bâ mo tene Nzapa ni aga gi zo ti kua ti ala.

Ambeni zo ni ayeke sara ape ye so eglize ti ala afa na ala, peut-être ngbanga ti so ala pensé so aye ni ayeke kota ye ape. Na tapande, na yâ ti Eglize Catholique ti Allemagne, tongana a mû azo 100, ala 76 tongaso ayeda na tënë ti bungbingo ti koli na wali kozo na mariage. Bango ndo ti ala ni so ague tâ nde mingi na ye so eglize ti ala nga na Bible afa (1 aCorinthien 6:18; aHébreu 13:4). Biani, gi aCatholique oko la si abâ mara ti kpale ni so ape. Azo ti a-eglize mingi abâ so atâa so gbâ ti azo atene ala yeke aChrétien, sarango ye ti tere ti ala akpa ti aChrétien ape. Akota zo ti a-eglize mingi ayeke dema tere ti ala atene, sarango ye ti tere ti amembre ti a-eglize ti ala ni akpa “tâ gi ti apaïen.”

Atapande so ague na e ti hunda tënë so: E yeke tâ biani na bezoin ti Nzapa? Tënë so ayeke fini tënë ape, ngbanga ti so kozo buku ti Bible asara tënë na ndo ni. Ti wara kiringo tënë na hunda so, zia e bâ ambeni tënë ni so buku ti Genèse atene na ndo ni.