A lingbi mo ga membre ti mbeni église?

‘MBI yeke pëpe na bezoin ti ga membre ti mbeni église wala ti gue lakue na église si mbi lingbi mä na bê na Nzapa!’ A yeke tongaso si mingi ti azo ayeke bâ ti ala tënë ti dutingo membre ti mbeni église wala ti mbeni bungbi ti vorongo. Biani, ambeni zo atene so ala bâ tele ti ala ndulu mingi na Nzapa na ngoi so ala yeke na gigi na so ala yeke bâ aye so lo créé ahon ti gue na bungbi na yâ ti mbeni église. Laso, mbeni bibe so amû ndo kue ayeke so, ti duti membre ti mbeni bungbi ti vorongo ayeke pëpe kota ye so a hunda ti tene zo amä na bê na Nzapa.

Ye oko, ambeni zo, na bê kue, abâ ye ni na mbeni lege nde. Ala tene ti ala so a hunda ti ga membre ti mbeni église na ti gue lakue na abungbi ti vorongo; na même a yeke kota ye mingi tongana mbeni zo aye si Nzapa ayeda na lo. Teti so abibe ayeke nde nde na ndo tënë so, ti ga membre ti mbeni église wala pëpe ayeke mbeni kota hundango tënë so andu zo oko oko. A yeke pëpe mbeni tënë so abâ gi azo ti gingo nda ti ye nde nde na ndo alege ti vorongo. Ye oko, ngbanga ti so tënë ni andu songo ti e na Nzapa, a yeke na lege ni pëpe ti gi ti hinga bango ndo ti Nzapa na ndo ti tënë ti gango membre ti mbeni église? Tongaso, ye nyen e lingbi ti manda na yâ Tënë ti lo, Bible, na ndo tënë so?

Lege so Nzapa asala ye na mbage ti azo giriri

A sala ndulu na ngu 4 400 tongaso awe, mbeni kota moa so ayeke ngangu mingi amene biaku sese mobimba. Azo alingbi ti girisa hio pëpe mara ti ye so asi lani. Na ndo lê sese kue, azo ayeke tene atere na ndo tënë ti kota moa so na yâ ti angbele mbaï ti ala. Atâa so anzene nzene tënë ti yâ ti atere so ayeke nde nde, ala yeke na atënë mingi so ague legeoko; so na popo ni, tënë so atene gi wungo ti azo kete nga na ambeni nyama si asö lani kuâ.

A yeke gi na lege ti pasa si azo so asö kuâ lani na ngoi ti Kota Moa so? Tondo ti Bible atene so a yeke tongaso pëpe. A yeke nzoni ti bâ so Nzapa asala tënë ti gango ti Kota Moa so na zo oko oko kue pëpe. Nde na so, lo sala lani tënë ni na Noé so akiri ague ti gboto mê ti azo ti ngoi ti lo na ndo tënë ti Kota Moa so ayeke ga.​—Genèse 6:13-16; 2 Pierre 2:5.

Songo kuâ lani ahunda ti tene zo aduti na yâ ti bungbi so ayeke ndulu ti mû maboko na mba, na ti yeda na fango lege ti Nzapa so lo mû na Noé. Même anyama so ayeke lani na yâ ti arche na so asö kuâ na Kota Moa ni angbâ na fini ngbanga ti so ala duti ndo oko na bungbi ti azo so. A mû lani na Noé afango lege so ayeke polele ti tene lo leke aye ti tengo so alingbi ti tene a bata fini ti anyama.​—Genèse 6:17–7:8.

Angu ngbangbo mingi na pekoni, ahale ti Noé, na lege ti molenge ti lo ti koli Sem, aga angbâa na Egypte. Ye oko, ye so Nzapa aleke lani na bê ti lo ti sala ayeke ti zi ala na gbe ti ngbâa so na ti gue na ala na sese so lo zê ti mû na kotara ti ala Abraham. Ge nga, a fa na gigi tënë ni na zo oko oko kue pëpe. Me a fa ni kozo gi na ala so a soro ala ti ga awafango lege na ala: Moïse na Aaron (Exode 3:7-10; 4:27-31). Na pekoni, tongana a zi ala kue na ngbâa na Egypte awe, a mû Ndia ti Nzapa na ala na Hoto ti Sinaï na a sala si ala ga mara ti Israël.​—Exode 19:1-6.

Zingo zo ni alingbi ti ga lani tâ ye teti amolenge ti Israël oko oko kue, gi tongana ala ga ndulu na bungbi so Nzapa azia ni na sese, na ala mû peko ti afango lege ti azo so Nzapa azia ala na ndo ti bungbi ni. A leke même aye ti tene zo ti Egypte oko oko awara lege ti duti ndulu na kete bungbi so a yeke polele so Nzapa ayeda na ni. Na ngoi so amolenge ti Israël ayeke zia Egypte, azo ti Egypte so asigigi legeoko na ala. Tongaso, ala nga ayeke na beku ti wara adeba nzoni ti Nzapa.​—Exode 12:37, 38.

Na pekoni, na kozo siècle Jésus ato nda ti sala kusala ti lo ti fango tënë ti bungbi lani azo na ndo oko tongana adisciple ti lo. Atâa so na ndoye lo mû li ni na bingo bê na ndo aye so atia zo oko oko, lo sala ye na mbage ti ala tongana mbeni bungbi ti azo. Na abazengele ti lo 11 so angbâ be-ta-zo, Jésus atene: “I yeke ala so angbâ na Mbi na yâ ye ti handa so atara Mbi; na Mbi mû royaume na i, legeoko tongana Babâ ti Mbi amû na Mbi.” (Luc 22:28, 29). Na pekoni, yingo vulu ti Nzapa azu na ndo adisciple na ngoi so ala yeke duti na mbeni ndo oko tongana mbeni bungbi ti azo.​—Kusala 2:1-4.

Atapande so kue afa na e polele so giriri Nzapa asala ye lakue na azo ti lo tongana mbeni bungbi ti azo so a leke ni nzoni. Kete wungo ti azo so Nzapa mveni asala lani kusala na ala ti sala lisoro na mbeni bungbi, so azo ti yâ ni ala yeke ndulu mingi na mba, ayeke azo tongana Noé, Moïse, Jésus nga na ambeni zo nde. Nda ti tënë oko ayeke dä pëpe ti tene so Nzapa ayeke sala ye na awakua ti lo laso na mbeni lege so ayeke nde. Biani, ye so ague na e na mbeni hundango tënë nde: ti ga gi membre ti mbeni église tongaso alingbi awe? Fade e yeke bâ kiringo tënë na kota hundango tënë so na yâ article ti peko.

[Foto na lembeti 4]

A ninga awe so Nzapa asala ye na mbage ti azo ti lo tongana mbeni bungbi ti azo so a leke ni nzoni