A yeke zingo ande akuâ

Béthanie ayeke mbeni kete kodoro so ayo akilomètre 3 na Jérusalem (Jean 11:18). Mbeni ye ti vundu asi kâ ayenga kete kozo na kuâ ti Jésus. Lazare, mbeni kota kamarade ti Jésus, atï kobela sioni si lo kui.

Na ngoi so Jésus amä sango ni kpâ, lo tene na adisciple ti lo so Lazare alango na ni yeke gue ti zingo lo (Jean 11:11). Me adisciple ni amä ti ala yâ ti tënë ni so ape, ni la Jésus atene na ala polele, lo tene: “Lazare akui awe.”—Jean 11:14.

Alango osio na peko ti lungo kuâ ni, Jésus asi na Béthanie na lo gue ti dë bê ti Marthe, ita ti wakuâ ni. Marthe atene: “Tongana mo yeke fade ge, ka ita ti mbi ti koli akui pëpe.” (Jean 11:17, 21). Me Jésus akiri tënë na lo, lo tene: “Mbi yeke zingongo ti akuâ nga na fini. Zo so amä na bê na mbi, atâa lo kui, lo yeke kiri na fini.”—Jean 11:25.

Ti fa so atënë ti lo ni ayeke gi senge tënë ti yanga ape, Jésus ague nduru na tere ti dû ti kuâ ni, lo dekongo, lo tene: “Lazare, mo sigigi!” (Jean 11:43). Mo ye ti bâ! koli so akui fade so, lo la lo sigigi so! Li ti azo so ayeke bâ ye ni so akpe kue.

Jésus azingo ambeni zo ni use tongaso kozo awe. Mbeni zo ni ayeke molenge ti Jaïrus ti wali. Kozo ti tene Jésus azingo molenge ni, Jésus atene lo lango langongo.—Luc 8:52.

Bâ so na ndo ti kuâ ti Lazare nga na ti molenge-wali so, Jésus ahaka kuâ na lango. Hakango ye ni so alingbi tâ na ni biani. Ngbanga ti so tongana zo alango, lo yeke hinga aye so ayeke si na tere ti lo ape, na a gue oko na tënë so a tene zo ni awu tere na peko ti pasi so lo bâ so (Zo-ti-fa-tene 9:5; bâ encadré so atene “Kuâ ayeke tongana ti so zo alango ngangu.”) Adisciple ti Jésus ti ândö ahinga ye nzoni na ndo ti kuâ. Mbeni kota bakari (Encyclopedia of Religion and Ethics) atene so “ti adisciple ti Jésus, kuâ ayeke tongana lango, na dû ti kuâ ayeke mbeni ndo ti wungo tere ndali ti azo so akui be-ta-zo.”a

Bê ti e adë ti hinga so azo so akui ayeke lango na yâ ti dû ti kuâ, na ala yeke bâ pasi ape. Ni la, teti so e hinga tâ tënë na ndo ti kuâ, e yeke sara mbeto ni encore ape.

“TONGANA ZO AKUI, FADE LO KIRI NA FINI MBENI?”

A yeke nzere ka na e ti lango ti wu tere ti e. Me zo wa la aye ti lo ti lango biani biani zo wa? Nyen la afa na e biani so a yeke zingo ande azo so kui, tongana ti Lazare na molenge-wali ti Jaïrus?

Na tango so Job aga lani nduru na kuâ, lo hunda tënë so, lo tene: “Tongana zo akui, fade lo kiri na fini mbeni?”—Job 14:14.

Na sarango tënë na Nzapa ti Ngangu Ahon Kue, Job lo wani lo kiri tënë, lo tene: “Fade Mo iri ndo, na mbi kiri tënë na Mo; bê ti Mo aye kusala ti tïtî Mo.” (Job 14:15). Job ahinga lani na bê ti lo kue so Jéhovah ayeke ku kungo ti zingo awakua be-ta-zo ti Lo. Tongana fade ye ni so ayeke si ape, ka Job ayeke ku ni? Oko ape!

So Jésus azingo ambeni zo na kuâ afa polele so Nzapa amû na lo ngangu ti sö benda na ndo ti kuâ. Nga, Bible atene so Jésus ayeke fadeso na “akelele ti kuâ”. (Apocalypse 1:18). Tongaso, lo yeke zi ande yanga ti adû ti kuâ tongana ti so lo mû lani yanga ti tene a zi tênë so ayeke na yanga ti dû ti kuâ ti Lazare.

Bible asara tënë ti zingongo ti akuâ so fani mingi. Mbeni ange atene lani na Daniel, lo tene: “Fade mo wu tere ti mo, na fade mo luti na ndo ti mo, na nda ti lâ ni.” (Daniel 12:13). Jésus atene lani na aSadducéen, so ayeke akota zo ti vorongo ti aJuif so ake ti yeda na tënë ti zingongo ti akuâ, lo tene: “Ala girisa lege awe, ngbanga ti so ala hinga Mbeti ti Nzapa nga na ngangu ti Nzapa oko pëpe.” (Matthieu 22:23, 29). Bazengele Paul nga kue atene: “Mbi yeke na beku na mbage ti Nzapa, . . . so a yeke zingo ande na kuâ azo ti mbilimbili na azo ti mbilimbili pëpe.”—Kusala 24:15.

ZINGONGO TI AKUÂ NI AYEKE LAWA?

Azo ti mbilimbili na azo ti mbilimbili pëpe ni so ayeke zingo lawa? Ange so atene lani na Daniel, zo ti mbilimbili, so lo yeke zingo “na nda ti lâ ni.” Marthe kue amä na bê so ita ti lo Lazare ayeke “zingo ande na kuâ na lango ti nda ni.”—Jean 11:24.

Bible atingbi tënë “lango ti nda ni” so na komandema ti Christ. Paul atene: “Teti a lingbi [Christ a]komande tongana gbia juska Nzapa azia awato ti lo kue na gbe ti gere ti lo. Ti kuâ so ayeke ndangba wato ni, fade a yeke futi lo biaku biaku.” (1 aCorinthien 15:25, 26). Ndali ni la a yeke nzoni e sambela ti tene Royaume ti Nzapa aga nga ti tene a sara na sese ge ye so bê ti Nzapa aye.b

Tongana ti so Job ahinga lani, ye so Nzapa aye ayeke ti zingo akuâ. Na ngoi ni so ande, kuâ ayeke duti dä mbeni pëpe. Nga zo oko ayeke hunda tere ti lo pëpe na tënë so, “Tongana zo akui, ti lo awe la?”