Tâ zo so ayeke na peko ti bira na pasi

Na lango 11 ti novembre 1918, Kozo Bira so Amû Sese Kue ahunzi. A kanga andokua ti dengo buze, nga azo adodo na ndo ti alege. Me, nzerengo tere ni so aninga ape. Mbeni ye ayeke hara ala, ye ni so ayeke sioni même ahon angombe, na ye ni so asi gi hio tongaso na peko ti kozo bira ni.

Mbeni sioni kobela so a iri ni grippe espagnole amû aturugu na France na nze ti juin ngu 1918. Makongo ti grippe ni so ayeke tâ lani sioni mingi. Na tapande, gi na yâ ti kete nze, grippe ni afâ aturugu ti États-Unis, so ayeke lani na France, sioni ahon ti so awato afâ ala na ngoi ti bira ni. Na hunzingo ti bira ni, aturugu ni akiri na kodoro ti ala, na ala mû grippe ni ague na ni kâ. Gi hio tongaso grippe ni amû ndo ti sese kue.

Na yâ ti angu so aga na peko ti bira ni, kota nzara nga na yere asara pasi na azo mingi. Na ngu 1918, na hunzingo ti bira ni, nzara afâ azo mingi na Poto. Na ngu 1923, nginza ti Allemagne atï na gbe ni. Ngu omene na pekoni, konomi ti dunia mobimba akiri na peko mingi. Na nda ni, na ngu 1939, use bira ni atï. A kpa mo bâ mo tene kozo bira ni so la angbâ gi ti gue. Nyen la ayeke na peko ti akpale ni so aga gi na peko ti tere so?

FÄ TI LÂ TI NDA NI

Na yâ ti Bible, e yeke wara aprophétie so amû lege na e ti hinga ye so ayeke na peko ti aye so asi na yâ ti mbaï ti azo, mbilimbili ye so ayeke na peko ti Kozo Bira so Amû Sese Kue. Jésus Christ afa kozoni awe so “fade mara ayeke londo na bira na tere ti mbeni mara” nga kota nzara na asioni kobela ayeke mû ndo ti sese kue (Matthieu 24:3, 7; Luc 21:10, 11). Lo tene na adisciple ti lo so aye ni so ayeke fä ti lâ ti nda ni. Mbeti ti Apocalypse afa anzene nzene tënë na ndo ni; aye ni so afa kamba so ayeke na popo ti vundu so ayeke na ndo ti sese na bira so asi lani na yayu kâ.—Bâ encadré so atene “Bira na ndo ti sese ge nga bira na yayu.”

Na yâ ti mbeti ti Apocalypse ni, a sara tënë ti azo ti kpengo na ambarata osio. Ota na popo ti azo ti kpengo na ambarata ni ayeke fä ti aye so Jésus asara tënë ni kozo awe, so ti tene bira, kota nzara nga na asioni kobela. (Bâ encadré so atene “Azo ti kpengo na ambarata osio so ayeke kpe loro laso biani?”) Tongana ti so e bâ awe, a yeke na ngoi ti kozo bira so amû sese kue la si akota kpale ti azo ato nda ni nga aga gi ngangu ngangu. Bible afa so Satan la ayeke na peko ti akpale so kue (1 Jean 5:19). Ngangu ti lo ni so ayeke hunzi lâ oko ape?

Mbeti ti Apocalypse adë bê ti e nga atene Satan ayeke “na ngoi mingi pëpe.” (Apocalypse 12:12). Ndali ni la lo yeke na ngonzo mingi nga lo ga na aye ti vundu mingi na ndo ti sese. Me aye ni so aye nga ti fa na e atene ngoi ti Satan ni aga tâ nduru ti hunzi awe.

A YEKE FUTI AKUSALA TI ZABOLO

Ngoi ti Kozo Bira so Amû Sese Kue ayeke lani mbeni ngangu ngoi mingi na yâ ti mbaï ti azo. Ngoi ni so aga gi na bira, a sara si na ando nde nde azo ayeke ke yanga ti azo ti komande ti ala nga ala yeke na confiance na ala mbeni ape. Bira ni afa nga polele so a tomba Satan na yayu kâ awe (Apocalypse 12:9). Sioni zo ti komande ni so, so zo ayeke bâ lo pëpe so, asara ye tongana ti mbeni sioni zo so ayeke komande gi na ngangu ngangu ngbanga ti so lo hinga lo tene ngoi ti lo angbâ mingi encore ape. Tongana lango ti Satan ni alingbi awe, akpale kue so Kozo Bira so Amû Sese Kue aga na ni ayeke hunzi.

Na dikongo aprophétie ti Bible, mo hinga mo tene Jésus Christ, Gbia ti e ti yayu, aga nduru awe ti “futi akusala ti Zabolo.” (1 Jean 3:8). Azo kutu mingi ayeke sambela ti tene Royaume ti Nzapa aga. Mo nga kue? Grâce na Royaume ni so, atâ wakua ti Nzapa ayeke bâ ande biani so a yeke sara ye so bê ti Nzapa aye na sese ge, me pëpe ye so bê ti Satan aye (Matthieu 6:9, 10). Ande na gbe ti Royaume ti Nzapa, e yeke mä encore ape tënë ti mbeni bira so amû sese kue, wala ti ambeni bira nde (Psaume 46:10). Manda ye na ndo ti Royaume ni, nga ku ti bâ ngoi so siriri ayeke mû ande ndo ti sese kue!—Ésaïe 9:5, 6.