KIRINGO TËNË NA AHUNDA TI AZO

Nzapa asara sese ngbanga ti nyen?

Sese ayeke tâ ndo so fini alingbi ti duti dä. Ngu, so ayeke sara si aye angbâ na fini, asi singo na ndo ti sese. Dengingo so sese adengi na ni nga turnengo so lo turnê na ni asara si angu-ingo aga glason ape wala ahule ape. Nga pupu so angoro na tere ti sese nga na ngangu so sese ayeke na ni ti gboto aye na mbage ti lo akanga lege na asioni ye so lâ ayeke tokua ni. Ti bâ tongana nyen la si akeke nga na anyama ayeke na bezoin ti mba, a pika bê mingi. Ye so asara si azo mingi atene so sese ni abâ gigi gi tongaso ape, ndani ayeke dä.​—Diko Ésaïe 45:18.

Me peut-être mo hunda tere ti mo, mo tene: ‘Donc a sara azo ti tene ala bâ pasi na ala sara sioni na mba?’​—Diko Deutéronome 32:4, 5.

Sese ayeke ga ande mbeni nzoni ndo ti duti dä la?

Nzapa asara lani sese nga na azo ti tene ala duti na ndo ni na ngia, ala ne mba nga ala ye lo. Nzapa asara e azo nde mingi na akeke nga na anyama. A yeke ti tene e hinga lo nzoni, nga e bâ tongana nyen la si lo sara ye na ndoye nga mbilimbili si e nga kue e sara tongana ti lo.​—Diko Zo-ti-fa-tene 12:15; Michée 6:8.

Nzapa ayeke na ngangu ti sara aye kue so lo leke na bê ti lo ti sara. Ni la, e hinga e tene lo yeke zi ande apasi kue nga na asioni ye kue, na lo yeke sara ande si sese aga mbeni pendere ndo so azo alingbi ti duti dä na ngia.​—Diko Psaume 37:11, 29; Ésaïe 55:11.