Mbeni zo ayeke mä ka asambela ti e?

Ambeni zo apensé so sambela ayeke gi bubango ngoi la, mbeni zo ti mango ni ayeke ti lo dä ape. Ambeni zo atara ti sambela kamême, me ala bâ so ala wara pëpe kiringo tënë na asambela ti ala ni. Mbeni zo so atene Nzapa ayeke dä ape a-imaginé wala Nzapa ayeke tongana nyen, na pekoni lo sambela, lo tene: “Tene gi mbeni tënë kete na mbi awe.” Me, lo tene so Nzapa ni azi nga yanga kete na lo ape.

Me, Bible adë bê ti e so Nzapa ayeke mä ka asambela ti e. Bible asara tënë so na ambeni zo ândö, a tene: “Tongana [Nzapa amä] toto ti i, fade Lo sara na i na lege ti grâce; tongana Lo mä, fade Lo kiri tënë na i.” (Ésaïe 30:19). Mbeni versê ti Bible ni nde atene: “Sambela ti azo ti mbilimbili amû ngia na Lo.”—aProverbe 15:8.

Bible afa nga tapande ti ambeni zo so Nzapa amä lani asambela ti ala. Mbeni versê atene so Jésus asambela, na “lo hunda aye so agbu bê ti lo na Nzapa so alingbi ti sö lo,” na Nzapa ‘amä lo nzoni’. (aHébreu 5:7). E lingbi ti wara ambeni tapande ni na Daniel 9:21 nga na 2 Chronique 7:1.

Me, ngbanga ti nyen la ambeni zo abâ so Nzapa ayeke mä ka asambela ti ala ape? Ti wara akiringo tënë na asambela ti e, a lingbi e sambela gi Jéhovah,a Nzapa so a sara tënë ti lo na yâ ti Bible, me ambeni nzapa nde wala akotara ti e pëpe. Nzapa aye si aye so e hunda ni na lo ague “oko na ye so bê ti lo aye”. Ni la, tongana e sambela tongaso, lo tene so “lo yeke mä e.” (1 Jean 5:14). Ti tene a mä asambela ti e, a yeke nzoni e gi ti hinga tâ Nzapa ni nga ti hinga ye so bê ti lo aye.

Azo mingi atene so sambela ayeke pëpe gi mbeni senge mbage ti vorongo, me so Nzapa ayeke mä asambela ni nga lo yeke kiri tënë na ni. Isaac, so ayeke na Kenya, atene: “Mbi sambela ti tene a aidé mbi ti mä yâ ti Bible. Kete na pekoni, mbeni zo aga, na lo hunda ti aidé mbi.” Hilda, so ayeke na Philippines, aye ti ke manga. Na peko ti so lo sara effort gbä ti ke ni, koli ti lo atene na lo, a tene: “Ngbanga ti nyen mo sambela Nzapa ti aidé mo ape?” Lo sara ye alingbi na wango ni, na lo tene: “Bê ti mbi adö ti bâ tongana nyen la Nzapa a-aidé mbi. Mbi bâ ni na ngoi so mbi komanse ti girisa nzara ti nyongo manga ni. Mbi wara lege ti arrêté ni lani.”

Tongana aye so mo ye ti hunda na Nzapa ague oko na aye so bê ti lo aye, eskê lo yeke kiri tënë na ni la?