Sarango ye na lege ni aga ngbene ye awe?

Na anze so aga na pekoni, tënë ti gingo kua aga na vundu mingi na Hitoshi. Na tapande, na ngoi ti mbeni lisoro so a sara na lo, ti bâ wala a lingbi ti mû lo na kua, Hitoshi atene na zo ni so ni lingbi pëpe ti yôro tere ti ni na yâ ti mbeni kua so ayeke na lege ni ape. Koli so asara lisoro na lo atene: “Bango ndo ti mo ayeke nde!” Afami nga na akamarade ti Hitoshi awa lo ti changé sarango ye ti lo so ape. Ye oko, na ambeni ngoi, lo komanse ti wara kite. Na tapande, lo yeke hunda tere ti lo wala ti ngbâ ti sara ye na lege ni ayeke nzoni ye la.

Ye so asi na Hitoshi so afa na e so, a yeke azo kue ape la si aye tënë ti sarango ye na lege ni. Na ndo ni, ambeni apeut ti bâ même ni tongana ye ti buba, mbilimbili tongana andu tënë ti dengo buze. Mbeni wali so ayeke sara kua na Afrique du Sud atene: “Mbi yeke sara ka kua na popo ti azo so ayeke sara ye na lege ni ape. Na ambeni ngoi, mo sara ngia ape, mo kue mo yeke sara ye tongana ala.”

Mbeni sarango ye na lege ni ape so laso amû ndo mingi ayeke tenengo mvene. Na yâ ti angu so ahon lani, mbeni gingo nda ti ye ti Robert Feldman, so ayeke fa mbeti na mbeni dasendagi (University of Massachusetts Amherst), afa so tongana a mû zo ngbangbo-oko, 60 na popo ti ala ayeke tene mvene na amba ti ala kamême fani oko na yâ ti penze-ngbonga 10. Feldman atene: “E ku tere ti e na mara ti ye ni so ape. E hinga ti e lâ oko ape so azo ayeke tene mvene tongaso.” Mingi ti azo aye ti tene a tene mvene na ala ape, me a sara zo ngia ti bâ so gbâ ti azo ayeke tene mvene.

Ngbanga ti nyen la sarango ye na lege ni ape, so na popo ni a yeke wara tenengo mvene nga na nzi, amû ndo mingi tongaso? Tongana nyen la sarango ye na lege ni ape apeut ti buba yâ ti nzoni duti ti azo? Nyen la e peut ti sara ti kpe ti ga zo so ayeke sara ye na lege ni ape?