Ye Nyen Ayeke na Tâ Ngele Ngangu?

Ti duti na mbeni ye so ayeke na tâ ngele ngangu alingbi ti mu ngia mingi na bê. Me ye so alingbi ti duti nyen? Mbeni kota wungo ti nginza? Mbeni ye ti mê wala ti go so aza zango, so ngele ni ayeke ngangu mingi wala so pendere ni ayeke nde mingi? Kota iri na kota ndo? Azo mingi ayeke ba aye so na ngele ngangu mingi. Ti duti na aye so alingbi ti bata zo na fini, ti mu ngia mingi ahon na fini ti zo, wala ti kaï nzala so zo ayeke na ni na yâ bê ti lo ti wara yango-iri na ti sala kpengba ye na yâ fini ti lo. E yeke sala ngangu kue ti wara mara ti aye so, na bingo bê so ala yeke lingbi na aye so e zia na gbele e ti si dä nga aye so e sala nzala ti wara teti gigi ti kekereke?

FANI mingi, azo aba ngele ti mbeni ye na lege so ye ni ayeke lingbi na abezoin ti ala wala ayeke kaï anzala ti bê ti ala mveni. E yekia mingi aye so asala si e wara mbeni bibe ti nzoni duti, na so amu na zo beku ti mbeni nzoni gigi ti kekereke. E yekia aye so hio aga na hungo tele, dengo bê wala yekiango ndo. Ye oko, ti ba ngele ti aye gi na lege ti anzala ti bê ti e so ayeke gbian lakue, wala aye so agbu bê ti e, ayeke fä ti hingango ye so alï mingi pepe, na ayeke lege ti ndara pepe. Ti tâ tene ni, a yeke ba tâ ngele ti mbeni ye na lege ti ye so e ba tongana ye so e yeke na bezoin ni mingi ahon.

Ye nyen e yeke na bezoin ni mingi ahon? Mbeni ye nde ayeke pepe na ngele ngangu tongana zo ayeke pepe na kpengba ye so: fini. Tongana e yeke na fini pepe, e yeke dä pepe. Gbia Salomon ti Israël ti giriri asû na mbeti: “Me ti akinda, ala hinga ye oko pepe . . . Kusala, ye ti bibe, hingango ye, na ndara, ayeke na ndo-ti-awakinda pepe [“Shéol,” NW].” (Zo-ti-fa-tene 9:5, 10) Tongana kuâ amu e, a lingbi e zia aye kue so e yeke na ni. Tongaso, bezoin ti e ti kota ahon ayeke ti wara mbeni ye so ayeke bata ande fini ti e. Ye nyen ayeke sala ni?

Ye Nyen Ayeke Bata Ande Fini ti E?

Gbia Salomon atene: “Nginza ayeke ye ti bata zo.” (Zo-ti-fa-tene 7:12) Tongana e yeke na nginza alingbi na ni, e lingbi ti wara kobe na nzoni da. Nginza alingbi peut-être nga ti mu lege na e ti wara ngia ti tambela na ayongoro ndo. A lingbi ti mu na e aye so e yeke na bezoin ni tongana e lingbi ti sala kua mbeni pepe ngbanga ti so e ga mbakoro awe wala e nze na kobela. Anzoni ye ti peko ti dutingo na nginza ayeke mingi. Ye oko, nginza alingbi pepe ti bata fini ti e. Bazengele Paul awa Timothée tongaso: “Mo wa ala so ayeke na mosoro na sese so, si bê ti ala aga kota pepe, na ala zia bê ti ala pepe na mosoro so fade awe, me na Nzapa.” (1 Timothée 6:17) Nginza kue ti sese alingbi pepe ti vo fini na e.

Ba ye so asi na mbeni koli so iri ti lo ayeke Hitoshi. Teti so a bata lo na yâ mbeni sewa so ayeke na nzinga, Hitoshi ayeke na kota nzala ti ga zo ti mosoro. Lo yeke na tâ kota mabe mingi na yâ ngangu ti nginza, a sala si lo bi bê so a lingbi même ti vo bê ti zo. Na pekoni, mbeni koli aga na yanga-da ti Hitoshi na ahunda na lo wala lo hinga so Jésus Christ akui teti lo. Hundango tene so azingo nzala ti Hitoshi ti hinga tene ni mingi ahon, ngbanga ti so lo bi bê la ni so zo oko pepe alingbi ti kui teti mbeni zo tongana lo. Lo ga na bungbi na lo mä mbeni kota diskur na ndo Bible, na bê ti lo apika tongana lo mä wango ti ‘bata lê so aba ndo nzoni.’ Wamungo diskur ni afa so lê so “aba ndo nzoni” ayeke lê so agi ti ba ndo na gigi ti kekereke, na so aluti na ndo aye ti yingo. (Luc 11:34) Ahon ti sala kusala ngangu teti nginza, Hitoshi ato nda ti zia aye ti yingo na kozo ndo na yâ fini ti lo.

Aye ti mitele alingbi nga ti ga na zo dutingo so ayengi mingi pepe nga nzoni duti. Ti duti na aye mingi alingbi ti dë gingo bê ti e na ndo abezoin ti e ti lâ oko oko. Mbeni pendere da na yâ mbeni pendere vaka alingbi peut-être ti mu na e bibe so e sala ye nzoni. Abongo ti pendere nga na mbeni pendere kutukutu alingbi ti sala si ambeni zo ane e.

A yeke ye ti nzoni ti ‘wara ngia na yâ kusala kue ti e.’ (Zo-ti-fa-tene 3:13) Na dutingo na ye mingi ahon alingbi peut-être ti mu lege na azo so e ndoye ala ‘ti duti nzoni, ti te, ti nyon, na ti sala ngia.’ Ye oko, ngele ti amosoro ti mitele ayeke gi teti kete ngoi. Na yâ mbeni gbotongo mê na ndo salango bê, Jésus Christ atene: “I bata nzoni si tene ti bê asala i pepe, teti fini ti zo ayeke pepe na ye mingi mingi so ayeke na lo.” (Luc 12:15-21) Aye so zo ayeke na ni, atä konongo ni wala ngele ni, alingbi pepe ti bata zo na fini lakue.

Na tapande, Liz asala mariage na mbeni koli so ayeke na nginza mingi. Lo tene: “E yeke la ni na mbeni pendere da na akutukutu use, na nginza so e yeke na ni amu lege na e ti wara ngia na yâ ye kue so sese alingbi ti mu na zo na lege ti mitele . . . Me, tongana mbeni ye so a yeke ngangu ti mä na bê na ni, mbi ngbâ lakue ti gi bê ti mbi na ndo nginza.” Lo tene: “E yeke na aye mingi so e lingbi ti glisa. A ba atene so mingi ahon e yeke na aye, mingi ahon nga e ba so e yeke na nzoni duti pepe.”

Azo mingi ayeke ba na ngele ngangu dutingo na kota iri na kota ndo ngbanga ti so ala lingbi ti mu na zo gonda na yango-iri. Na yâ sese ti laso, mbeni kusala so amu lege ti wara nzoni ayeke mbeni ye so azo asala nzala ni mingi. Ti wara akode wala alege ti salango ye so ayeke nde alingbi ti mu maboko na e ti wara mbeni kota iri teti e mveni. Ambeni zo nde alingbi ti gonda e, ti ba bango ndo ti e tongana kota ye, na ti sala kue ti tene e yeda na ala. Ye so kue alingbi ti duti ye ti mungo ngia na ti nzerengo na bê ti zo. Ye oko, na nda ni, ngele ti ye so ayeke miro. Salomon ayeke la ni na gloire nga na ngangu kue so mbeni gbia alingbi ti duti na ni; me, lo dema tongaso: “Wandara, legeoko tongana wabuba, ye ti dabe azo na ala lakue lakue ayeke pepe . . . Fade azo aglisa ala kue.” (Zo-ti-fa-tene 2:16) Kota iri wala kota ndo ayeke mu fini na zo pepe.

Mbeni walekengo a-statue ti kango ni, so iri ti lo ayeke Celo, awara lege ti yekia mbeni ye so ngele ni ahon dutingo na kota iri. Teti lo yeke na mbeni kode ti salango kusala so ayeke nde, lo wara lege ti gue na mbeni ekole so amu lege na lo ti maï akode ti lo. Na yâ ngoi kete, andokua ti sango nga na akota wakode-kua ato nda ti gonda kusala ti lo. Na yâ akota gbata ti Poto, a fa mingi ti a-statue so lo leke. Celo atene: “A lingbi mbi yeda so teti mbeni ngoi, aye ti ndara ayeke la ni ye so ayeke kota mingi ahon na yâ fini ti mbi. Ye oko, mbi ba so ti mbi, tombango peko ti kusala ti mbi ayeke duti ande tongana tarango ti sala na amaître use. (Matthieu 6:24) Mbi hinga la ni na bê ti mbi so ye ti kota mingi ahon so mbi lingbi ti sala ayeke ti fa nzo tene ti Royaume ti Nzapa. Tongaso, mbi mu desizion mbi mveni ti zia kusala ti mbi ti lekengo a-statue.”

Ye Nyen Ayeke na Ngele Ahon Tanga ti Aye Kue?

Teti so ye oko pepe ayeke kota wala ayeke na ngele ngangu tongana fini ayeke dä pepe, ye nyen e lingbi ti wara so alingbi ande ti mu na e tâ beku so e yeke ngbâ na fini? Fini kue alondo na Jéhovah Nzapa. (Psaume 36:10 [36:9, NW]) Biani, “na yâ Lo, e yeke na fini, e yeke tambela, na e yeke.” (Kusala 17:28) Lo mu fini ti lakue lakue tongana mbeni matabisi na ala so lo ndoye ala. (aRomain 6:23) Ye nyen a lingbi e sala ti lingbi na matabisi so?

Warango matabisi ti fini ti lakue lakue aga na lege ti kpengba songo ti e na Jéhovah. Tongaso, yengo dä ti lo ayeke na kota ngele mingi ahon ye kue so e lingbi biani ti duti na ni. Tongana e yeke na yengo dä so, e yeke duti na beku ti wara tâ ngia so ayeke ngbâ teti lakue lakue. Ye oko, tongana e yeke na yengo dä ti Nzapa pepe, e yeke ku ti wara futingo ti lakue lakue. Tongaso, ti tene ni polele, ye kue so amu ande maboko na e ti duti na nzoni songo na Jéhovah ayeke na kota ngele mingi.

Ye so A lingbi E Sala

Nzoni maïngo ti e aga na lege ti wara hingango ye. Lingu ti tâ hingango ye ayeke Tene ti Jéhovah, Bible. Gi ni oko si ayeke fa na e ye so a lingbi e sala ti nzere na Nzapa. Tongaso, a lingbi e manda Tene ti Nzapa nzoni. Ngangu so e yeke sala na bê kue ti manda ye kue so e lingbi ti manda na ndo Jéhovah Nzapa nga na Jésus Christ ayeke gue na e na ‘hingango ye so ayeke fini ti lakue lakue.’ (Jean 17:3) Mara ti hingango ye tongaso ayeke mbeni mosoro so a lingbi e yekia!​—aProverbe 2:1-5.

Hingango ye so e wara na lege ti Tene ti Nzapa akpengba e ti si na kapa ti pekoni: fango mabe na gigi na yâ Jésus Christ. Jéhovah amu yanga so a lingbi zo kue so aga na lo asala ni na lege ti Jésus. (Jean 14:6) Ti tene ni biani, “salut ayeke na yâ mbeni zo oko pepe.” (Kusala 4:12) Na nda ni salut ti e aga pepe na lege ti ‘argent wala lor . . . , me na lege ti mênë ti Christ so ngele ni ayeke ngangu.’ (1 Pierre 1:18, 19) A lingbi e fa mabe ti e na gigi na yengo dä na afango ye ti Jésus nga na mungo tapande ti lo. (aHébreu 12:1-3; 1 Pierre 2:21) Na so tâ ye ti ngele ngangu mingi si sadaka ti lo ayeke! Salango kusala na aye ti nzoni so aga na pekoni ayeke leke kekereke ti lakue lakue teti azo kue. Tongana a sala kusala na ni kue teti e, a yeke mu na e tâ matabisi ti ngele ngangu ti fini ti lakue lakue.​—Jean 3:16.

Jésus atene: “A lingbi mo ndoye Jéhovah Nzapa ti mo na bê ti mo kue, na âme ti mo kue, nga na bibe ti mo kue.” (Matthieu 22:37, NW) Ti ndoye Jéhovah aye ti tene “e bata akomandema ti lo.” (1 Jean 5:3) Akomandema ti lo ahunda ti tene e duti nde na sese, e bata tambela ti mbilimbili, na e maï aye ti Royaume ti lo na be-biani. A yeke na lege so si e yeke “soro fini” ahon ti soro kuâ. (Deutéronome 30:19, NW) Tongana e ‘ga ndulu na Nzapa, fade Lo ga ndulu na e.’​—Jacques 4:8.

Ti hinga so e yeke na yengo dä ti Nzapa ayeke kota ye ahon aye ti mosoro kue ti sese. Ala so ayeke na ni ayeke azo so ayeke na mosoro ahon tanga ti azo kue na sese! Tongaso, zia e sala kue ti wara mosoro so ayeke na tâ ngele: yengo dä ti Jéhovah. Na alege kue, zia e bata na bê wango ti bazengele Paul so: “Tomba peko ti ye so ayeke mbilimbili, dutingo ndulu na Nzapa, mabe, ndoye, gbungo ngangu, tâ be-ti-molenge. Mo tiri nzo bira ti mabe, gbu na ngangu fini ti lakue lakue so a hiri mo ndali ni na so mo fa tene ni polele na gbele atémoin mingi.”​—1 Timothée 6:11, 12, NW.

[Afoto na lembeti 21]

Ye nyen a yeke na kota ngele mingi teti mo? Nginza? Amosoro ti mitele? Kota iri? Wala mbeni ye nde?

[Foto na lembeti 23]

A lingbi e manda Mbeti ti Nzapa nzoni