Eskê Nzapa ayeke zia terê ti lo na place ti e?

NYEN LA FASON SO NZAPA ALEKE NA ZO AFA NA E?

E oko oko kue e peut ti hinga ye so mbeni mba ti e asentir ni. E yeke hinga ni tongana e imaginé terê ti e na place ti zo ni. Docteur Rick Hanson atene so a yeke mbeni ye so a dü e dungo na ni.

GBU LI NA NDÖ TI TËNË SO: Ngbanga ti nyen la e azo e hinga ti zia terê ti e na place ti amba ti e mingi tongaso? Bible atene so Nzapa acréé zo na image ti lo (Genèse 1:26). So a tene a sara e na image ti Nzapa aye ti tene so e peut ti sara ye tongana lo, ni la e peut ti duti na ambeni sarango ye ti terê ti lo. Ndali ni la tongana azo a-aidé amba ti ala ndali ti so ala zia terê ti ala na place ti ala, ala yeke fa so ala sara ye tongana Jéhovah Nzapa, so ayeke bâ mawa ti azo.—aProverbe 14:31.

NYEN LA BIBLE AFA NA NDÖ TI LEGE SO JÉHOVAH AYEKE ZIA TERÊ TI LO NA PLACE TI E?

Nzapa ayeke zia terê ti lo na place ti e nga lo ye ti tene e bâ pasi ape. Na temps so amolenge ti Israël ayeke lani na gbe ti ngbâa na Égypte nga so na pekoni ala sara ngu 40 na benyama, Bible atene: “Na ngoi kue so ala yeke na yâ ti ye ti vundu, a sara lo vundu.” (Ésaïe 63:9). Nzapa abâ gï pasi ti ala ape, me lo zia terê ti lo nga na place ti ala. Lo tene: “Mbi hinga nzoni mingi pasi so ala yeke bâ.” (Exode 3:7). Lo kiri lo tene: “Zo so andu ala andu vuko lê ti mbi.” (Zacharie 2:8 ). Tongana mbeni zo asara pasi na e, lo nga kue lo yeke bâ pasi.

Même si e wani e bi tënë na li ti e wala e bâ so e lingbi ti tene Nzapa abâ mawa ti e ape, Bible adë bê ti e so “Nzapa ayeke kota ahon bê ti e, na lo hinga ye kue.” (1 Jean 3:19, 20). Nzapa ahinga e nzoni mingi ahon e wani. Lo hinga dutingo ti e, pensé ti e nga na avundu ti bê ti e kue nzoni mingi. Lo yeke zia terê ti lo na place ti e.

Mbeti ti Nzapa adë bê ti e

• “Ala yeke iri ndo, na Jéhovah ayeke yeda. Ala yeke toto ti tene a mû maboko na ala, na lo yeke tene: ‘Mbi la!’”​—ÉSAÏE 58:9.

• “Jéhovah atene: ‘Mbi hinga mbilimbili ye so mbi pensé ti sara ndali ti ala, mbi pensé ti mû na ala siriri, me ye ti vundu pëpe, ti mû na ala mbeni nzoni gigi ti kekereke nga na beku. Ala yeke iri mbi ande nga ala yeke ga ti sambela mbi, na mbi yeke mä ala.’”​—JÉRÉMIE 29:11, 12.

• “Zia ngu ti lê ti mbi kue na yâ ti ngbenda ti mo. A sû tënë ti aye so na yâ ti mbeti ti mo ape?”—PSAUME 56:8.

NZAPA AYEKE BÂ E, LO COMPRENDRE E NGA LO ZIA TERÊ TI LO NA PLACE TI E

Tongana e hinga so Nzapa ayeke zia terê ti lo na place ti e, eskê a peut ti aidé e ti gbu ngangu na yâ ti akpale? Bâ tënë so Maria atene:

“Na temps so molenge ti mbi ti koli so ayeke na ngu 18 akui na peko ti so lo bâ pasi na kobela ti cancer ngu use, mbi bâ so gigi ayeke sioni mingi. Mbi sara ngonzo na terê ti Jéhovah ndali ti so lo sava molenge ti mbi ape!

“Ngu omene na pekoni, mbi tene na mbeni ita ti mbi ti bungbi so Jéhovah aye mbi ape. Na peko ti so lo mä mbi teti al’heure mingi sân ti fâ tënë na yanga ti mbi, lo fa na mbi mbeni versê so a-aidé mbi mingi. A yeke 1 Jean 3:19, 20 so atene: ‘Nzapa ayeke kota ahon bê ti e, na lo hinga ye kue.’ Lo fa na mbi so Jéhovah ahinga pasi ti e.

“Atâa so kue, a yeke ngangu na mbi ti zi ngonzo ni so na bê ti mbi! Mbi diko Psaume 94:19 so atene: ‘Na ngoi so agingo bê ahon ndö ti mbi, mo dë bê ti mbi nga mo sara si mbi duti na siriri.’ Mbi bâ so a sû versê ni so tâ gï ndali ti mbi! Na nda ni, ye ni so a-aidé mbi ti fa avundu ti mbi na Jéhovah, na mbi hinga so lo yeke mä mbi nga lo yeke comprendre mbi.”

A yeke tâ mbeni ye ti dengo bê ti hinga so Nzapa ayeke comprendre e nga lo yeke zia terê ti lo na place ti e! Me ka ngbanga ti nyen la pasi ayeke mingi tongaso? Eskê a yeke ngbanga ti so Nzapa ayeke punir e ndali ti asioni so e sara? Eskê Nzapa ayeke sara ande mbeni ye ti tene pasi ahunzi? E yeke sara tënë na ndö ti ahunda so na yâ ti ambage so ayeke ga na peko.