Tongana mo yeke tiri na mbeni ngangu kobela

“Na temps so a fa na mbi so mbi yeke na cancer ti fufu nga na ti kamba ti yâ, mbi hinga so mbi yeke kui kuingo. Me na temps so mbi londo na ndo ti docteur ni mbi kiri, mbi tene: ‘Bon, a yeke ye so mbi ku terê ti mbi na ni ape, me mbi doit ti gi mbeni lege ti hon ndö ni.’”—Linda, mbeni wali ti ngu 71.

“Mbi bâ pasi na mbeni kota kobela so andu anerf ti mbage ti lê ti mbi ti wali. Na mbeni ngoi, songo ti kobela ni asara si mbi tï na yâ ti kota vundu. Fani mingi, mbi bâ so mbi yeke gï mbi oko nga mbi pensé même ti fâ terê ti mbi.”—Elise, mbeni wali ti ngu 49.

Mbeni koli so aduti na yâ ti fauteuil roulant ayeke na popo ti azo ti lo so aye lo

TONGANA a wara déjà mbeni kobela so apeut ti gue na zo na kuâ na terê ti mo wala na terê ti mbeni zo so mo ye lo mingi, mo kue mo hinga vundu so aga na pekoni. A yeke gï kobela ni la zo ni ayeke tiri na ni ape: ye tongana mawa, ngonzo nga na gingo bê aninga ti sara lo ape. Mbeto apeut ti sara lo tongana lo yeke na rendez-vous na adocteur, tongana warango yorö so lo doit ti nyon wala vongo ni aga ngangu nga tongana aye ti peko ti ayorö so amû na lo ti nyon asara lo nzoni ape. Tongana zo ayeke na mbeni ngangu kobela, gingo bê apeut ti hon ndö ti lo.

Na ndo wa la e lingbi ti wara mungo maboko? Gbâ ti azo abâ so bê ti ala adë mingi tongana ala sambela Nzapa nga ala diko Bible. Bê ti ala alingbi ti dë nga tongana ala bâ so afami nga na akamarade ti ala aye ala nga a-aidé ala.

NYEN LA APEUT TI AIDÉ MO TI GBU NGANGU?

Robert, so ayeke na ngu 58 amû wango so: “Duti na mabe na Nzapa na lo yeke aidé mo ti gbu ngangu. Sambela Jéhovah. Fa na lo atënë ti bê ti mo. Hunda lo ti mû na mo yingo vulu. Hunda lo ti aidé mo ti duti na anzoni pensé, ti encouragé afami ti mo nga ti tene li ti mo aga kirikiri ape na ngoi so mo yeke gbu ngangu na yâ ti kobela ni.

“Tongana afami ti mo ayeke encouragé mo nga ala yeke lakue dä ti aidé mo, a yeke sara nzoni mingi na mo. Lâ oko oko, mbeni fami ti mbi oko wala use ayeke iri mbi na téléphone ti hunda wala mbi yeke tongana nyen? Akamarade ti mbi so ayeke na ando nde nde ayeke encouragé mbi. Ala sara si mbi sentir terê ti mbi bien, a sara si mbi découragé ape.”

Tongana terê ti mbeni kamarade ti mo ason si mo ye ti gue ti bâ lo, gbu li na ndö ti tënë ti Linda so: “Azo so terê ti ala ason aye ka si aye akiri apassé bien na yâ ti gigi ti ala, na peut-être a yeke lakue lakue la ala ye ti sara tënë ti kobela ti ala ni ape. Tongaso, causé na zo ni na ndö ti atënë so mo na lo ayeke tene ka kozo.”

Ngangu ti Nzapa, atënë ti dengo bê so ayeke na yâ ti Bible, nga mungo maboko ti afami nga na akamarade ti e so aye e ayeke sara si e bâ so a yeke tâ nzoni ti ngbâ na fini, même tongana e yeke tiri na mbeni ngangu kobela.

Aversê ti Bible so apeut ti aidé mo

Zia bê ti mo na Nzapa.

“Mbi hunda ye na Jéhovah, na lo kiri tënë na mbi. Lo zi mbi na yâ ti aye kue so amû mbeto na mbi. Zo ti mawa airi ndo, na Jéhovah amä lo.”—Psaume 34:4, 6.

Linda atene: “Lâ oko mbi sambela ape mbi tene ‘Nzapa, sara si mbi wara santé.’ Me mbi yeke sambela ka mbi tene ‘Nzapa, aidé mbi ti duti na courage, nga aidé mbi ti gbû ngangu na yâ ti kobela ti mbi.’”

Diko Mbeti ti Nzapa ti tene mo wara courage.

“Zo ti kodro ni ayeke tene ande pëpe: ‘Terê ti mbi ason.’”—Ésaïe 33:24.

Gbu li na ndö ti azendo so Nzapa amû ndali ti gigi ti kekereke, na mo yeke wara ngangu.

Hunda na afami nga na akamarade ti mo ti aidé mo.

“Tâ kamarade aye mba ti lo na ngoi kue, nga lo yeke mbeni ita so a dü lo ndali ti angoi ti vundu.”—aProverbe 17:17.

Elise atene: “Gi ti duti gï mo oko ape. Zia akamarade ti mo a-aidé mo. Na ambeni temps, mo peut ti pensé so mo yeke mo oko, wala ti pensé so même Nzapa kue ayeke mä mo ape, me atâa so kue gi ti duti gï mo oko ape.”